VAKATEKIVU 22
22
Vakaroti o Epara-ama me Vakacabori Aisake
1Ena dua na gauna ki muri, sa qai vakatovolei Epara-ama na Kalou. A sa kacivi koya, “I Epara-ama!” A sauma o Epara-ama ka kaya, “Oi au saka oqo, noqu Turaga.”#Ipe 11.17-19
2Sa qai kaya na Kalou, “Mo kauta na luvemu, ka lako ki na vanua o Moraia. Mo vakacabori koya e kea me i soro kama vei au ena ulunivanua au na vakatakila vei iko.”#2Vei 3.1
3Ena mataka ka tarava, a yadra sara vakamataka o Epara-ama ni sa vakarautaka na i dabedabe ni asa, ka kauti Aisake yani kei na rua na nona dauveiqaravi. A taya eso na buka ni vakacaboisoro ka lako sara yani ki na vanua sa kaya vua na Kalou. 4Ena i katolu ni siga ni rai yani o Epara-ama sa raica na vanua o ya ni tu vakayawa sara yani. 5Sa qai kaya vei rau na nona dauveiqaravi, “Drau tiko ga eke vata kei na asa, keirau na lako yani kei na gone ki na yasana o ya, me la'ki qarava na Kalou, ka qai lesu tale mai vei kemudrau.”
6A sa vakacolata vei Aisake na buka ni soro kama o Epara-ama, ka taura e ligana na matanibuka kei na i sele. E rau sa mai lako sara yani. 7Sa qai kaya o Aisake, “Tamaqu!” A sauma yani o Epara-ama,
“Io, na luvequ?” Sa kaya o Aisake, “Na bukawaqa kei na buka sa tu oqo, ia sa e vei ga na lami me i soro?”
8A sauma o Epara-ama ka kaya, “Na Kalou vakataki koya ena vakarautaka e dua.” E rau sa mani lako sara yani.
9Ia ni rau yaco ki na vanua sa kaya vua ko Jiova, sa cakava sara e dua na i cabocabonisoro o Epara-ama ka tuva na buka e delana. Sa qai vesuki Aisake na luvena ka vakadavora ena i cabocabonisoro ena dela ni buka.#Jeme 2.21 10Sa qai taura na i sele ka dodoka na ligana me vakamatea na luvena. 11Sa qai kacivi koya mai e dua na agilosi i Jiova mai lomalagi, ka kaya, “I Epara-ama, I Epara-ama!” A sauma yani o koya ka kaya, “Oi au saka oqo, noqu Turaga.”
12Sa qai kaya mai na agilosi, “Mo kakua ni vakamatea na gone. Au sa qai kila ni o sa rerevaka na Kalou, ni o sa sega ni bureitaka vei au na luvemu e duabau ga.”
13A rai yani o Epara-ama, ka raica e dua na sipi tagane ni sa tacori tu na kena i leu ena veikau lalai. A lako yani ka kauta mai, ka vakacabora me i soro kama me i sosomi kei na luvena tagane. 14A sa vakatoka na vanua o ya o Epara-ama me yacana ko Jiova Jaire.#22.14 Jiova Jaire: A kena i balebale Ko Jiova ena raica, se na vakarautaka (Jehovah Jireh — the Lord sees/provides). Era sa dau kaya ga kina na tamata me yacova mai na siga edaidai, “Ena ulunivanua i Jiova, sa na veivakarautaki#22.14 veivakarautaki; se raici se laurai. o koya.”
15A sa kaci mai vakarua na agilosi i Jiova mai lomalagi vei Epara-ama, ka kaya, 16“Au sa bubului ki na yacaqu ni'u na vakalougatataki iko vakalevu sara ena nomu vakayacora na ka oqo, ka sa sega ni o bureitaka vei au na luvemu e duabau ga;#Ipe 6.13-14 17au na vakalewevuqataka na nomu kawa me vaka na kalokalo ni lomalagi kei na mata ni nuku ni matasawa. Na nomu kawa era na tawana na nodra koro na kedra meca.#Ipe 11.12 18Era na kalougata talega na veimataqali kece e vuravura ena vukudra, ena vuku ni nomu talairawarawa ki na noqu vosa.”#Caka 3.25 19A sa suka yani o Epara-ama vei rau na nona dauveiqaravi, ka ratou lesu yani ki Perisepa; ka la'ki tiko kina.
Na Kawa i Neori
20Ena dua na gauna mai ki muri, a rogoca o Epara-ama ni a vakasucuma o Milika na wati Neori na tacina eso na luvena. 21Sa ulumatua o Usa, na tacina o Pusa kei Kemueli na tama i Erami, 22kei Kiseti, Eso, Pilitasa, Jetilafi kei Pecueli. 23O Pecueli oqo na tama i Repeka. Sai iratou o ya na lewe walu na luve i Milika vei Neori 24o Reuma; e ratou luvena o Tipa, Keama, Teasi kei Meka.
Currently Selected:
VAKATEKIVU 22: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
