Zuwã 12

Maria hã Zezusi te te ipara upsõzé wasu'u

Mateu 26.6-13; Marcu 14.3-9

1Romhuri misi da'ãma si'utõrĩ parip si, te za dato hã dasiwi 'manharĩ ni, Pascowa na dato nhisi hã. Tawamhã Zezusi hã te apâ mo, Betãnha u. Tame Lazaru hã te 're sãmra, ab're hawi Zezusi te te ihâiwa'udu hã. 2Tawamhã wisi wamhã, ma tô tãma api za'ra ni, sa da, Zezusi hã sawi te. Taha wamhã, Marta hã ma tô ĩsa tãma a'â. Lazaru hã te taha wamhã isiré dame nhamra. 3Tawamhã Maria hã ma tô we ti'â, wedewa'u isadaze hã. Nadu na wedewa'u nhisi hã. Ta hã iwa'âbâ wawẽ. Zezusihi zô te we ti'â, te te ãma para u'ré wa, tãma rowẽ da. Tawamhã te te ãma para u'ré pari wamhã, ma tô para u'õ, tizéré na. Sadazei pire wa, ma tô 'ri 're zadaze sina. 4-5Tawamhã Zuda Icarioti hã tãma toi õ di, Mariaha ma hã. Zezusihi siré 're imorĩ Zuda hã, Zezusi te te dama ihâiba nhomri da hã. Tahawa, te Mariaha ma tinha, Zuda hã, ãne:

— E marĩ da bété, te te dama wede õ di wedewa'u zadaze hã, rob'uiprazéb zô isibrob'õ norĩ ma, ãma sipé da, iwa'âbâzé hã.

6E marĩ wa. E isibrob'õ norĩ hã te te pawaptob zei wa. Mare di. Te te pawaptob ze za'ra wab õ di. Ta hã sipsaihuri di. Rob'uiprazé hã te te wama 're i'madâ'â mono hã, te pi'uriwi te te sima 're 'mazani.

7-8Tahawa Zezusi hã ma tô Zudaha ma tinha, ãne:

— Tô'ã. Tane hã tãma nharĩ õ di za. Ĩdâ'â wapsi, da te dasiwi ĩnherẽ õ ré, te te ãma ĩhâiba u'ré da, te aré ĩzada tété. Isibrob'õ norĩ hã te ai'rata 're si'ubumroi u'âsi 'wa. Nimahã aima wẽ za'ra wa'aba wamhã, te za 're ipawaptob u'âsi za'ra wa'aba mo. Tanei õ di, wa hã. Ai'rata 're ĩnhamra u'âsi aba mono õ di za oto. Tahawa, ai'rata ĩnhamra aba ré, te te ĩma 'manharĩ wẽ wa, ĩma rowẽ di.

Sasedoti ipire norĩ hã, Lazaru te te siwi wĩrĩ da, te te ãma irosa'rata wasété za'ra zé wasu'u

9Tawamhã da'ahâ na ma tô waihu'u za'ra ni, Zezusi Betãnha ãma isãmra na hã. Tahawa, da'ahâ na ma tô we itẽme ai'aba'ré ni, da te sabu za'ra da. Zezusihi u si, we dasi'aba'réi õ di. Lazaruhu u zama te we ai'aba'ré ni, ab're hawi te te ihâiwa'utu u zama, da te sabu za'ra da. 10-11Tawamhã Lazaru hã da te sabu za'ra wamhã, da'ahâ na ma tô Zezusi hã Danho'reptui'wa na saze za'ra ni. Ta norĩ ma, oto wapu za'ra di, 'Re ihâimana u'âsi mono ma, da'ãma romhuri'wa ipire norĩ mreme hã, sasedoti ipire norĩ mreme hã. Tahawa, Zezusi, da te saze za'ra 'ru te, te sima ãma roti za'ra Lazaruhu ãma, taha zama da te siwi wĩrĩ da.

Zezusi hã Zeruzalẽ u iwisizé wasu'u

Mateu 21.1-11; Marcu 11.1-11; Luca 19.28-40

12-18Tawamhã awẽm na Zezusi hã ma tô mo, Zeruzalẽ u. Zezusi hã Lazaru ab're hawi te te hâiwa'utu wamhã, ma tô ãma 'madâ'â za'ra ni aré. Tawamhã ãma i'madâ'â'wa norĩ hã ma tô dama rowasu'u za'ra aré, Zeruzalẽ ãma 're isi'ubumroi mono norĩ ma. Zeruzalẽ u dasi'rã'õtõ wamhã, daro mono bâ ma tô Lazaruhu wasu'u hã wapari za'ra ni, idasi'rã'õtõ mono hã. Zezusihi wasu'u, ma duré wapari za'ra ni, Zeruzalẽ u imorĩ na hã. Tahawa, te itẽme ai'aba'ré ni, Zeruzalẽ u idasi'rã'õtõ mono hã bâdâdi wa, da te uzusi za'ra da. Wa'asu te dasiré 'wasari ni, dama rowẽ wa, Zezusi da te ãma sawi za'ra da.

Tawamhã Zezusi hã da te uzusi za'ra wamhã, te dasima 'mahârâ za'ra ni, ãne:

— 'Re ihâimana u'âsi mono ãma 're wawata za'ra wa'aba mono. Õhõta Wanhib'apito, te we oto mo, 'Re ihâimana u'âsi mono zadawa para. 'Re ihâimana u'âsi mono hã iwẽ si te te tãma 're pisutu u'âsi mono da si, wa wasima wẽ za'ra ni, Izaraéu nhihudu norĩ nhib'apito ma hã.

Tawamhã ma tô awaru po'repore hã tisã Zezusi hã, iprédupté hã. Tawamhã ma tô ãma darõno, ãma morĩ da. Ãne wamhã, ma tô sina uwaimra, ãma rob'ui'éré hã. Duréihã ma tô ãma rob'ui'éré siro, 'Re ihâimana u'âsi mono zadawa 'mahârâ'wa hã. Ãne ma tô ãma rob'ui'éré, Zeruzalẽ ãma 're idasi'ubumroi mono norĩ ma:

“Siã na 're aihâimana za'ra wa'aba mono norĩ, aipahi za'ra wa'aba õ di za. Õhõta te we atẽme timorĩ za'ra wa'wa, Asib'apito za'ra wa'wa hã awaru po'repore ipréduptém na.”

Ãma rob'ui'éré te te sina uwaimrami nherẽ, Zezusihi siré 're inomro mono norĩ ma, waihu'u pese za'ra õ di, ãma rob'ui'éré hã. Zezusi hã ab're hawi hâiwa'utu wa, hâiwa u rowẽ uptabi u apâ morĩ parip si, te za ãma sipo're pu'u za'ra, rob'ui'éré na. Tawapsi te za sima rowasu'u za'ra, ãne: “Tô sena ma tô sina uwaimra, ãma rob'ui'éré hã. Ãma dawata za'ra ré, ma tô datẽme mo, awaru po'repore na ipréduptém na.” Ãne te za sima rowasu'u za'ra.

19Tawamhã da'ahâ na da te uzusi za'ra da, itẽme dasi'aba'réi wamhã, ãne te sima rowasu'u za'ra, farizeu norĩ hã:

— Marĩ hã wa te 'manharĩ waihu'u za'ra õ di. Ma'ãpé 'madâ'â za'ra wa'aba. Õhõta te nemo isiré dasi'ré. Taré, wa nasi ãma wasima roti u'âsi za'ra ni.

Gregu norĩ, Zezusi te te 'madâ'â za'ra da, Filipihi wi te te iwaptẽrẽ za'ra zé wasu'u

20Tawamhã gregu norĩ zama ma tô aihutu, Zeruzalẽ u, 'Re ihâimana u'âsi mono ãma dame wata za'ra da, zudeu'õ norĩ hã. 21Tawamhã tame si'ubumroi ré, te ai'aba'ré, Filipihi u. Galiléa hawimhã Filipi hã. Besada na isa'ru nhisi hã. Filipihi u sihutu wamhã, te tãma nharĩ za'ra, ãne:

— Wa wasima wẽ za'ra ni, wa te 'madâ'â za'ra da, Zezusi hã.

22Tahawa, te Filipi hã mo Ãdréhé u, te te tãma sadawa wasu'u za'ra da. Ãhã wamhã, Zezusihi u hã te duré sisaprõni zahuré, te te tãma sadawa wasu'u za'ra da. 23Tawamhã imreme te te wapari wamhã, ãne te Zezusi hã tãma siwasu'u zahuré:

— Romhuture di oto bâdâ hã, za Dasiré Ipoto ãma 're idawata za'ra mono zéb da hã. 24Tô sena wa za aima rowasu'u za'ra wa'wa, amnho potozé wasu'u na hã. E niha te za amnho trigu hã ti'rã ahâ. Ai'uréiwi nomro wamhã, poto õ di za. Ab're 're, 're rere'e mono wa, itomhâ, 're si'utõrĩ mono wapsi, te za 're poto za'ra. 'Re poto za'ra mono wapsi, duré 'rãi ahâ di za. Duré misire nherẽ, 're poto za'ra mono wap si, nhama wamhã, zâb ahâ di za. 25— Ni'wam norĩ hã tihâimanazé te te sima 're sawi za'ra mono wamhã, rowẽ isi'utõrĩ'õ hã te te sina 're uwaimrami za'ra mono õ di za. Ni'wam norĩ hã ĩzarina 're nomro mono da, tihâimanazé te te sima 're sawi za'ra mono õ wapsi, te za rowẽ hã te te sina 're uwaimrami za'ra. 26Duré ni'wam norĩ hã te te ĩma 're romhuri za'ra mono da, te te sima 're ĩwẽ za'ra mono wamhã, 're ĩmorĩzém na si te za 're nomro, ĩnhirã zarina si. Tawamhã ĩ'rata te za 're hâimana u'âsi za'ra, hâiwa ãma. Te te ĩma 're romhuri pese za'ra mono wa, te za Ĩmama hã ãma 're wata za'ra. Te za duré te te tãma 're wa'âbâ za'ra, isimiromhuri hã.

Zezusi hã za tidâ'âzém na isiwasu'uzé wasu'u

27— Ãhã na te ĩsina rosa'rata ahâ di. E Ĩmama ma, wa za ĩsi'ru, te te dawi ĩnho'reptu da, ĩdâ'â õ ré, te robzépata tõ da. Mare di. Tãma ĩsi'rui õ di za, te te dawi ĩnho'reptu da hã. Dazada ĩdâ'â da si, wa wei mo. 28Ĩmama, ma'ãpé we ĩpawapto na, ĩ'ãma irotizém na te ĩsina uwaimrami da, ai'ãma 're dawata za'ra mono hâ.

Tawamhã hâiwa hawi ma tô tãma tinha, ãne:

— Wa tô te 're aipawaptob u'âsi, ĩ'ãma 're dawata za'ra mono da. Wa za duré aipawapto, ĩ'ãma 're dawata u'âsi za'ra mono da hã.

29Tawamhã ma tô sima rowasu'u za'ra, i'rata isimasa hã, ãne:

— Õhõta te wei rãrã, tã hã.

Tawamhã ni'wam norĩ hã te dama ãma romnomri za'ra, ãne:

— Mare di. 'Re ihâimana u'âsi mono ma romhuri'wa, te we tãma mre, hâiwa hawi.

30Tahawa, te Zezusi hã dama tinha, ãne:

— Ĩma si wei mreme õ di. Ai'udâna za'ra wa'aba, te we ĩma mre, wapari za'ra wa'aba da. 31'Re ihâimana u'âsi mono, ma tô ãma roti siro, dawasété na. Romhuture di oto bâdâ hã te te ãma irotizém na, te te ãma i'uwaimramizéb da hã. Romhutu na te za duré tinha Wa'uburé ma, dama sib'uwa wa, oto te te 're dawada'uri tõ mono da. 32Hâiwi ĩza'o da, da te dasiwi ĩzasõmri wapsi, wa za ĩsitẽme te 're da'a'ubumro, ĩnhib'a'uwẽ 're dahâimana za'ra mono da, daro mono bâ.

33E marĩ da. Wedepo'o nhonhi'rãmi na idâ'âzém na da te waihu'u siromo za'ra da.

34Tawamhã te ãne asa tãma nharĩ za'ra ni:

— Danho'reptui'wa da, 'Re ihâimana u'âsi mono te te ipisudu hã dâ'â õ di za. Te za 're morĩ u'â. Ãne duréihã ma tô ãma rob'ui'éré za'ra, 'Re ihâimana u'âsi mono zadawa 'mahârâ'wa norĩ hã. E niha te bété inha ãne, hâiwi da te dasiwi isasõmri na, ti'ai ãma dasiré ipodo hã. E 'wa hã tawamhã dasiré ipodo niha na isisi hã.

35Tawamhã Zezusi hã sõ'awib õ nherẽ, te rowa'a na siwasu'u, ãne:

— Rowa'a hã te za suru na aima 're hâimana za'ra wa'wa oto. Tawamhã aima 're ihâimana za'ra wa'aba mono ré, te za 're anomro aba mo, aiwi 're robra za'ra wa'aba mono õ ré hã. Robra na damorĩ wamhã, nimomo damorĩ da hã dama waihu'u õ di. 36Ai'rata 're ĩnhamra za'ra wa'aba mono ré, te za asina 're ĩ'umnhasi za'ra wa'aba mo, ĩ'ãma 're anomro wẽ uptabi aba mono da.

Zudeu norĩ hã, Zezusi Danho'reptui'wa na te te 're isazei õ za'ra mono zé wasu'u

Taha pari te danhiti mo, da te dasiwi 'madâ'â tõ da, Zezusi hã. 37Marĩ hã dama i'manharĩ waihu'u'õ hã ma tô te te dama 're ab'manharĩ wẽ u'âsi, Zezusi hã, tiwaihu'u pese na. Tane nherẽ, Danho'reptui'wa da, 'Re ihâimana u'âsi mono te te ipisutu na, da te ãma saze za'ra õ di. 38Da te isaze za'ra õ zarina, ma tô dasina uwaimrami za'ra ni, Izaiaha mreme hã. Duréihã ma tô ta hã 'Re ihâimana u'âsi mono ma dawasu'u, isadawa 'mahârâ'wa hã. Ãne ma tô tãma dawasu'u:

“Wanhib'apito, wa te dama 're asadawa wasu'u za'ra mono wamhã, e ma tô ai'ãma da te 're wazaze za'ra. Mare di. Ai'ãma, da te 're wazaze za'ra mono õ di. Duré aiwaihu'u pese na 're da'apawapto mono wamhã, e ma tô aiwaihu'u pese na da te 're aiwaihu'u za'ra. Mare di. Da te 're aiwaihu'u za'ra mono õ di.”

39-40Tawamhã da te 're saze za'ra mono da, da te dasima 're wẽ za'ra mono õ wa, da te 're sazei waihu'u za'ra mono õ di oto. Ãne ma tô duré rowasu'u Izaia hã, 'Re ihâimana u'âsi mono zazei'õ'wa norĩ ãma:

“'Re ihâimana u'âsi mono, ma tô oto dama tinha, isimiroti hã da te 're waihu'u za'ra mono ãna oto 're danomro mono da, dawasété wi 're dasipizari za'ra mono tõ da, duré te te 're da'anho'reptui mono tõ da.”

41Duréihã Izaia hã sõtõ 'rowi te te irosawẽrẽ ne, ma tô Wanhib'apito 'madâ, Zezusi hã. Ihâiba na hã rowa'a za'ẽtẽ di. Te te 'madâ'â wa, te ãne na rowasu'u siro.

42Tawamhã da'ahâ na Zezusi, da te saze za'ra õ nherẽ, ma tô ni'wam norĩ hã saze za'ra, dama ipire norĩ hã, ahâ na. Tane nherẽ, te te saze za'ra nherẽ, isazei'wa na sõ'awi dama 're siwasu'u za'ra mono õ di, farizeu norĩ mreme pipa te. Zudeu norĩ te, rowahutuzéb u dame 're sisisi tõ mono da, te te tiwi 're rosawi za'ra mono õ'umnhasite, te ari'iwi 're si'ubumroi u'âsi. 43Farizeu norĩ si te te 're wẽsãmri za'ra mono da, ma tô te te sima 're wẽ za'ra. 'Re ihâimana u'âsi mono si te te 're wẽsãmri za'ra mono da, te te sima 're wẽ za'ra mono õ di. Tahawa, te ari'iwi 're si'ubumroi u'âsi, 're siwasu'u za'ra mono ãna, isazei'wa na.

Timreme wẽ'õ'wa norĩ ãma, Zezusi te te ãma irowasu'uzé

44Tawamhã Zezusi te da'ab'mahâ:

— Ni'wam norĩ hã Danho'reptui'wa na te te sina 're ĩ'umnhasi za'ra mono wamhã, ĩzazei'wa si 're nomro mono õ di za. Ĩ'u'âbâ te za we ĩzatõrĩ'wa zazei'wa duré 're nomro. 45Duré ni'wam norĩ hã te te ĩ'madâ'â za'ra wamhã, ĩ'u'âbâ te za we ĩzatõrĩ'wa zama hã duré 'madâ'â za'ra. 46Wa hã wa tô we datẽme mo, dama rob'uiwẽ'wa ne 're ĩmorĩ da. E marĩ da. Da te dasina 're ĩ'umnhasi za'ra mono wa, robra na ne, dawasété na si oto 're danomro tõ mono da. 47Ãté ni'wam norĩ hã te za taré ĩmreme hã te te 're wapari za'ra. E tawamhã wa za ta norĩ hã awa'awi te 're ahâ za'ra. Mare di. Awa'awi te 're dahâ za'ra mono da, we ĩmorĩ õ di. Te 're da'anho'reptui mono da si, wa wei mo. 48Ni'wam norĩ hã te te 're ĩwẽ'õ za'ra mono wamhã, duré ĩmreme te te 're wẽ'õ za'ra mono wamhã, zahadu wapsi te za oto siwaihu'u za'ra, tiwasété na. Ti'a isi'utõrĩzéb ãma ĩmreme na po're pu'u za'ra wa, te za bâtâ na siwaihu'u za'ra, tiwasété na hã.

49-50— Ĩmama hã ma tô ĩzazei'wa norĩ ma pisutu siromo za'ra, robzei u'âsi ĩ'ãma 're nomro mono da. Duré i'rata 're hâimana u'âsi za'ra mono da, hâiwa ãma 're dâ'â za'ra mono tõ da, ma tô duré tãma pisutu siromo za'ra. Ãne si ma tô Ĩmama hã ĩma waihu'u, te dama 're awaihu'u mono da. Wa hã ĩsi'uihâ na ĩnhimirosa'rata si te dama 're awaihu'u mono õ di. We ĩzatõrĩ'wa, te te ĩma iwaihu'uzéb zarina si, wa tô te dama 're awaihu'u.

Currently Selected:

Zuwã 12: xavBP

Highlight

Copy