Zuwã 16

1Ãne te duré tãma nharĩ za'ra, Zezusi hã:

— Ĩnhimiroti hã 're rẽme za'ra wa'aba mono tõ da, wa tô ãne na aima roti za'ra wa'wa. 2Dama ipire norĩ hã te za aiwi te te 're rosawi za'ra wa'wa, rowahutuzéb u dame 're asisisi aba mono tõ da. Duré 'Re ihâimana u'âsi mono te te tãma pisutu za'ra newa, te za ai'uprosi aba ni. 3'Re ihâimana u'âsi mono hã da te dasiwi 're waihu'u mono õ di, Ĩmama na. Ĩzama we te te ĩzatõrĩ na, da te dasiwi 're ĩzaze za'ra mono õ di. Tahawa, ĩzadawa wasu'u'wa 're anomro aba mono nherẽ, te za da te 're ai'ruiwapari u'âsi za'ra wa'wa. 4Ãne, wa aima waihu'u siromo za'ra wa'wa, da te dasiwi 're ai'ruiwapari za'ra wa'aba mono wapsi, ĩmreme na 're aipo're pu'u u'âsi za'ra wa'aba mono da, marĩ zô asipibu ma, 're asõpré wa'aba mono tõ da.

Zezusi hã, Timama pẽ'ẽzani na te te dama iropisutuzé wasu'u, dapawapto'wa da

Tawamhã ãne ma tô duré tãma waihu'u za'ra:

— Ãne na te aima 're rowasu'u za'ra wa'aba mono õ di aré tô, zahadu ai'rata 're ĩhâimana za'ra wa'aba mono wa. 5-6Apâ wa za oto aiwi ĩmorĩ za'ra wa'wa, we ĩzatõrĩ'wai u. Tahawa, ãhã na si wa tô uburé aima rowasu'u za'ra wa'wa, asina waihu'u siromo za'ra wa'aba da. Ãne aima ĩsiwasu'u za'ra wa'aba wa, aipẽ'ẽzé ahâ za'ra wa'aba di, we ĩzatõrĩ'wai u za oto aiwi ĩmorĩ za'ra wa'aba wa. “E momo te za aimo,” ãne asiwi ĩzadanharĩ na sahu za'ra wa'aba õ di za, te aima waihu'u pese za'ra wa'aba da. 7Tô sena, wa za aima rowasu'u za'ra wa'wa. Wa za oto aiwi ĩmorĩ za'ra wa'wa, aipawaptob za'ra wa'aba 'wa da hã te we atẽme satõrĩ za'ra wa'aba hâ, rowẽ u'âsi 're anomro aba mono da. Aiwi ĩmorĩ za'ra wa'aba õ wamhã, we atẽme morĩ za'ra wa'aba õ di za, aipawaptob za'ra wa'aba 'wa da hã. Ĩmorĩ wapsi, ĩsiwa'rãmi wa za we atẽme satõrĩ za'ra wa'wa. 8-11We atẽme wisi za'ra wa'aba wapsi, te za marĩ hã te te dama 're awaihu'u, da te dasina 're waihu'u za'ra mono da hã. Ĩmreme na da te 're ĩzaze za'ra mono õ wa, 'Re ihâimana u'âsi mono ma, dawẽ õ na te za te te dama 're awaihu'u. 'Re ĩmorĩ wẽ u'âsi na zama te za duré te te dama 're ĩwasu'u, da te 're ĩwaihu'u za'ra mono da. 'Re ĩmorĩ wẽ u'âsi wa, wa za apâ mo, Ĩmama u. Apâ ĩmorĩ wamhã, asiwi 're ĩzabui waihu'u za'ra wa'aba mono õ di za. 'Re ihâimana u'âsi mono hã ma tô sima ãma roti siro, ti'ai ãma dawada'uri wasété 'wa te te azâri da, Wa'uburé hã. Ãne na te za duré te te dama 're awaihu'u, aipawaptob za'ra wa'aba 'wa da hã.

12— Uburé marĩ hã ĩnhimirowasu'u na te aima wasu'u ze za'ra wa'aba nherẽ, te aima rowasu'u za'ra wa'aba õ di za a'â. E marĩ wa. Zahadu aima pibu pese za'ra wa'aba õ wa. 13Zahadu wapsi aipawaptob za'ra wa'aba 'wa da hã, te za we atẽme timorĩ za'ra wa'wa, 'Re ihâimana u'âsi mono pẽ'ẽzani hã. Tô sena uptabi, isimiroti hã. We atẽme wisi za'ra wa'aba wapsi, te za uburé roti tô sena uptabi hã te te aima 're waihu'u pese za'ra wa'wa. Si'uihâ na te te aima 're waihu'u za'ra wa'aba mono õ di za. Ĩnhimirowasu'u zarina si te za te te aima 're waihu'u za'ra wa'wa. Romhâ ré te za duré za iromhâimanazé hã te te aima 're waihu'u siromo za'ra wa'wa. 14Ĩnhimiroti si te za te te aima 're waihu'u u'âsi za'ra wa'wa. Ĩnhimiroti te te aima 're waihu'u u'âsi za'ra wa'aba mono wamhã, ĩnhisi za'ẽtẽ di za, ĩzazei'wa norĩ ma. 15Aiwa wanhimiroti hã, Ĩmama me. Tahawa, te za ĩnhimiroti si te te aima 're waihu'u za'ra wa'wa, Ĩmama pẽ'ẽzani hã.

Zezusihi siré norĩ hã za tiwi irobzei'õ za'ra zé wasu'u, duré apâ za tãma irowẽ za'ra zé wasu'u me

16— Romhutu na a'â asiwi ĩ'madâ'â aba õ di za. Tane nherẽ, taha pari romhutu na te za apâ asiwi ĩ'madâ'â zahu za'ra wa'wa. — Ãne Zezusi te tãma siwasu'u za'ra.

17-18Tawamhã isiré 're inomro mono norĩ hã te sima rowasu'u za'ra, ti'a wi, ãne:

— Wa'rata te za nhamra. Suru na wa'rata sãmra parip si, wa te sabu za'ra õ di za ãté a'â, Timama u za oto apâ morĩ wa. Taha parip si, wa za duré wasiwi sabu ni za. E niha, surure na imreme. Ãne wamhã, wama pibu prã za'ra di.

19Zezusihi mreme hã te te siwi waihu'u õ wa, te te siwi sadanharĩ ze ti oto. Ãne ma tô sina waihu'u za'ra, Zezusi hã. Tahawa, te tãma nharĩ za'ra, ãne:

— Wa tô aima ĩsiwasu'u za'ra wa'wa, ãne: “Suru na wa oto ai'rata ĩnhamra 'wa. Taha parip si, a'â duré asiwi ĩ'madâ'â aba õ di za. Taha pari nimahã na si te za duré oto asiwi ĩ'madâ'â na isahu za'ra wa'wa.” Ãne wa tô aima ĩsiwasu'u za'ra wa'wa. E ĩmreme hã aima pibu prã za'ra wa'aba di. E aima pibu prã za'ra wa'aba wa, te ãne asima irowasu'u za'ra wa'wa. 20Asina ĩwapari pese za'ra wa'aba za. A norĩ wa'wa hã aiwawa ahâ za'ra wa'aba di za. Ĩzazei'õ'wa norĩ si te za 're to za'ra. Aipẽ'ẽzé ahâ za'ra wa'aba nherẽ, aipẽ'ẽzé u'âsi 're anomro aba mono õ di za. Zahadu wapsi, aima 're rowẽ uptabi za'ra wa'aba mono di za. 21Pi'õi ãma te za iwasã hã 're sépu'u za'ra, tãma 're irere'e mono zéb u hã, romhuture wa oto. Tãma 're rere'e mono parip si, tãma 're rowẽ za'ra mono di za oto, ina ma. Tahawa, tihâzé na hã te te 're rosa'rata u'âsi za'ra mono õ di za oto. 22Tane duré a norĩ wa'wa hã, te za aipẽ'ẽzé hã a'â isépata za'ra wa'wa. Apâ atẽme ĩwisi aba wapsi, aima 're rowẽ za'ra wa'aba mono di za. Robzei u'âsi te za 're anomro aba mo.

23— Niwapsi, Ĩmama hã te za we Tipẽ'ẽzani hã atẽme satõrĩ za'ra wa'wa. Tawapsi asiwi 're ĩzadanharĩ za'ra wa'aba mono õ di za, marĩ hã 're waihu'u za'ra wa'aba mono da. Tô sena wa za aima rowasu'u za'ra wa'wa. Marĩ hã te aima 're iwẽ za'ra wa'aba mono zéb uwaibaba si, te za Ĩmama wi 're iwaptẽrẽ za'ra wa'aba mo, ĩmreme zarina. Tawamhã te za te te aima ãma 're a'uwaimrami 'wa. 24Zahadu marĩ hã te aima 're iwẽ za'ra wa'aba mono zéb uwaibaba, Ĩmama wi 're waptẽrẽ za'ra wa'aba mono õ di. Te za oto tiwi 're irowaptẽrẽ za'ra wa'aba mo, te te aima 're sõmri za'ra wa'aba mono da, robzei u'âsi 're anomro aba mono da.

Zezusi hã sisa'u za te te idarẽme na, duré Timama u za imorĩzém na isiwasu'uzé wasu'u

25— Ãhã na sõ'awi, Ĩmama hã te aima wasu'u za'ra wa'aba õ di. Romnhimiré'é na si wa tô te aima 're rowasu'u za'ra wa'wa. Niwapsi, wa za sõ'awi te aima 're rowasu'u za'ra wa'wa, romnhimiré'é ãna. 26-27Tawapsi te za marĩ hã te aima 're iwẽ za'ra wa'aba mono zéb uwaibaba, Ĩmama wi 're iwaptẽrẽ za'ra wa'aba mo, ĩmreme zarina. Wa hã Ĩmama wi, marĩ hã te aima 're waptẽrẽ za'ra wa'aba mono õ di za. Asi'uihâ na te za tô oto tiwi 're iwaptẽrẽ za'ra wa'aba mo. Tawamhã Ĩmama si te za si'uihâ na te te aima 're sõmri za'ra wa'wa, ta hã te te duré 're asawi pese za'ra wa'aba mono wa. E marĩ wa, ma tô Ĩmama hã te te 're asawi pese za'ra wa'wa. A norĩ wa'wa hã ma tô 're ĩzawi pese za'ra wa'aba mo. Ĩmama hawi we ĩmorĩ na ma tô duré 're ĩzaze za'ra wa'aba mo. Tahawa, ma tô te te 're asawi pese za'ra wa'wa, Ĩmama hã. 28Ĩmama hawi wa we datẽme mo. Apâ wa za duré dahawi itẽme mo, Ĩmama u.

29-30Tahawa, te tãma nharĩ za'ra, ãne:

— Sõ'awi ma tô oto wama asiwasu'u za'ra, romnhimiré'é ãna. Wanhimirosa'rata za'ra hã ma tô asina iwaihu'u siro. Tahawa, wa te wasiwi asadanharĩ da, asina wazô asimipari õ di. Ãne wama waihu'u pese za'ra di oto. Tahawa, wa tô asaze za'ra ni, tô sena 'Re ihâimana u'âsi mono hawi we aimorĩ na.

31-32Tahawa, ma tô Zezusi hã asa tãma nharĩ za'ra, ãne:

— E tô sena ma tô oto ĩzaze za'ra wa'wa, 'Re ihâimana u'âsi mono hawi we ĩmorĩ na hã. Ãté tô sena ĩzaze za'ra wa'aba õ di. Romhuture di oto bâdâ hã, ĩhawi iropéi wa'aba mono zéb u hã, asõrõwa wa'aba u. Tane nherẽ, asiwi ĩrẽme za'ra wa'aba nherẽ, ĩsiwaprosi ĩhâimana õ di za. Ĩmama, te ĩsiré 're hâimana u'âsi. 33Ãne na wa tô aima rowasu'u za'ra wa'wa, ĩ'ãma 're aihâimana za'ra wa'aba mono wa, rowẽ na 're aihâimana za'ra wa'aba mono da. Tane nherẽ, ĩzazei'õ'wa norĩ hã te za tô te te 're ai'ruiwapari u'âsi za'ra wa'wa. Tahawa, te za 're irobzépata za'ra wa'aba mo. Tane nherẽ, te za asiptete sina ĩ'ãma 're anomro aba mo. Wa hã ĩzazei'õ'wa norĩ ma, ĩnhiptete uptabi wa, wa tô ãma ai'uté za'ra.

Currently Selected:

Zuwã 16: xavBP

Highlight

Copy