Zuwã 18
18
Zezusi hã da te dasiwi i'ârizé wasu'u
Mateu 26.47-56; Marcu 14.43-50; Luca 22.47-54
1Tawamhã Timama ma mreme pari, ma tô Zezusi hã watobro rob u, isiré 're inomro mono norĩ me. Taha wamhã, Cedrõ na ẽtẽ siwa'aba nhisi romharé na ma tô ro'rahâri za'ra, oriwera wede 're isimasa mono zéb u. 2Tamomo Zezusi norĩ hã nasi si'rã'õtõ wa, Zudaha ma hã, waihu'u pese di, ta hã. 3Tahawa te te oto sô danhimro, tamomo. Da'wapéi'wa norĩ hã te sô te te simro, ahâ na. Zeruzalẽ ãma 'Re ihâimana u'âsi mono nhorõwa 'ri 'madâ'â'wa norĩ zama te sô te te simro, sasedoti ipire norĩ zadawa para, duré farizeu norĩ zadawa para. Tawamhã rob'uiwẽzéb ré, te sô ai'aba'ré ni, duré 'rãsitõ ré zama. Danhiwãi ré zama te duré sô ai'aba'ré ni, sib'ézé 'wapa ré zama. 4We oto sô dasihutu wamhã, Zudaha zama ma we dame wi. Romhâ ré ma tô uburé sina waihu'u siro, Zezusi hã da te tãma i'manharĩ za'ra zém na. We sô dasihutu wamhã, ma datẽme watobro. Ãne te taha wamhã dama tinha:
— E 'wa sô, te airĩtĩ za'ra wa'aba mo.
5Tawamhã asa te ãne tãma nharĩ za'ra:
— Zezusi Nazaré hawib zô, wa we warĩtĩ za'ra.
Tawamhã Zezusi te dama siwasu'u oto, ãne:
— Ãhãta wa hã Zezusi, wa za.
6Tawamhã imreme ma, ma tô ai'marõpãrĩ za'ra ni. 7Tawamhã Zezusi te duré dama tinha, ãne:
— E 'wa sô, te asõpré wa'wa.
Tawamhã asa te duré tãma nharĩ za'ra, ãne:
— Zezusihi zô, wa wanhopré ni, Nazaré hawi we imorĩ zô.
8Tahawa, te duré Zezusi hã asa dama siwasu'u, ãne:
— Wa hã Zezusi. Wa tô aima ĩsiwasu'u za'ra wa'wa. Ĩzô si asõpré wa'aba wamhã, ma'ãpé ã norĩ hã satõrĩ za'ra wa'aba, si'aba'ré da.
9Ãne Zezusi hã ma tô Timama ma siwasu'u, aré: “Ĩma ipisutu za'ra norĩ hã wa tô te 're 'madâ'â pese za'ra, ĩwi si'utõrĩ tõ da.” Tawamhã da'wapéi'wa norĩ, te te siwi waibui õ wa, timreme, Timama ma, ma tô ãma uwaimrami za'ra.
10Tawamhã Sima Pedru ma tô sib'ézé 'wapa hã waze. Te te wazere wi, ma tô romhuri'wa hã ãma po're nhizâ, ipo're nhimire niwĩ. Sasedoti tisiré norĩ nhipai u ipire uptabi ma romhuri'wa, ta hã. Romhuri'wa nhisi hã, Macu na isisi hã. 11Tawamhã Zezusi hã te Pedruhu ma tinha, ãne:
— Sib'ézé 'wapa hã apâ sẽrẽ. E wa za dawi ĩsisawi, Ĩmama te te ĩ'ãma irotizé hã te ĩsina uwaimrami tõ da. Mare di. Te robzépata da nherẽ, wa za oto ĩsina uwaimra.
Anasihi u, Zezusi da te dasiwi isaprõnizé wasu'u
12Tawamhã Zezusi hã da'wapéi'wa norĩ hã ma tô siwi ti'â, tinhib'apito me. 'Re ihâimana u'âsi mono nhorõwa 'ri 'madâ'â'wa norĩ me zama ma tô siwi ti'â. Ma tô dasiwi pawasisi ni oto. 13Tawamhã Anasihi u te oto siwi saprõni za'ra. Ta hã Anasi hã, Caifasihi maprewa. Sasedoti tisiré norĩ nhipai u ipire uptabi, Caifasi hã. 14Ta hã ma tô ãne tisiré norĩ ma roti za'ra aré, dama ipire norĩ ma: “Misire, wa te wasiwi wĩrĩ wamhã, wama rowẽ za'ra di. Wama pire za'ra õ di.”
Pedru hã Zezusi te te dawi i'udâzé wasu'u
Mateu 26.69-70; Marcu 14.66-68; Luca 22.54-57
15-17Tawamhã Zezusi hã da te dasiwi saprõni wamhã, Pedru hã te Zezusihi zarina mo. Ãhã wamhã, Zezusihi siré 're imorĩ hâiba amo zama te duré isarina mo, sasedoti tisiré norĩ nhipai u ipire uptabi nhorõwa u. Taha wamhã, õhõ si, ma te isarina ãzé 'ri 'wawi wa'ra u hã, tãma waihu'u pese wa, 'ri tede'wai ma. Tane nherẽ, Pedruhu si hã te rowi za, 'ridawa 'rata. 'Ri 'wawi wa'ra ãma 'ridawa te pi'õ hã 'madâ. Tawamhã isiré 're imorĩ hâiba amo hã ma tô mo, 'ridawa u. Taha wamhã, pi'õi ma, te tinha, Pedruhu wi te te rosawi tõ da. Tahawa, te te tãma wẽ wa, ma tô 'mazé Pedru hã, 'ri 'wawi wa'ra u. Tahawa, te pi'õ hã Pedru sadanha, ãne:
— E a hã, Zezusihi siré te 're aimo.
Tawamhã Pedru asa te tãma tinha, ãne:
— Mare di. Wa hã isiré 're ĩmorĩ õ di.
18Tame romhuri'wa norĩ hã te sima ro'o za'ra, hâ te, hâi'ro za'ra da. 'Ri za'ẽtẽ 'madâ'â'wa norĩ me, te sima ro'o za'ra. Pedruhu zama te taha wamhã dame tihâi'ro.
Sasedoti ipire uptabi hã, Zezusi te te isadanharĩzé wasu'u
Mateu 26.57-68; Marcu 14.53-65; Luca 22.54,66-71
19Tawamhã sasedoti dama ipire uptabi hã te Zezusi sadanha, isiré 're inomro mono norĩ na. Isimiroti na zama te sadanha. 20-21Tawamhã Zezusi asa te tãma tinha, ãne:
— Sõ'awi wa tô te dama 're rowahutu u'âsi, rowahutuzé mono bâ. Ãme dasi'rã'õtõzéb ãma zama, wa tô nasi dama rowahutu, 'Re ihâimana u'âsi mono nhorõwa 'ri ãma hã. Pi'uriwi te dama 're rowahutu mono õ di. E marĩ da, te ĩzadanha. Ĩwapari'wa norĩ hã te za isadanharĩ za'ra wa'wa, te te aima ĩzadawa wasu'u za'ra da. Ta norĩ ma, waihu'u pese za'ra di, ĩnhimirowasu'u hã.
22Tawamhã Zezusihi 'rata aibâ isa, ma tinhib'rata na 'rãime. Tahawa te tãma tinha, ãne:
— E niha te ãne tãma inha, sasedoti dama ipire uptabi ma nherẽ.
23-24Tahawa, te Zezusi hã asa tãma tinha, ãne:
— Ĩmreme na te ãma upai wamhã, ma'ãpé we ĩma waihu'u. E marĩ da, ma ĩ'rãime, ĩmreme wẽ nherẽ.
Tawamhã Anasi hã ma tô Zezusi hã dama ti'ru, Caifasihi u da te dasiwi saprõni da.
Tawamhã pawasisi ré, ma tô itẽme dasiwi saprõni ni, sasedoti ipire uptabi u.
Pedru hã Zezusi te te duré dawi i'udâ na isahuzé wasu'u
Mateu 26.71-75; Marcu 14.69-72; Luca 22.58-62
25Tawamhã Sima Pedru te zahadu za, unhama ãma hâi'ro da. Tahawa, te ãne sadanharĩ za'ra:
— E a hã te Zezusihi siré 're aimo.
Tawamhã Pedru hã ma tô duré dawi ai'udâ. Tahawa te tãma nharĩ za'ra, ãne asa:
— Mare di. Wa hã isiré 're ĩmorĩ õ di.
26Tawamhã aibâ te duré sadanha Pedru hã, sasedoti tisiré norĩ nhipai u ipire uptabi ma, romhuri'wa hã. Taha sisãnawã, ma tô Pedru po're nhizâ. Ãne te taha wamhã duré Pedru sadanha:
— E a hã oriwera wede, 're isimasa mono ãma, te ai'madâ'â õre di bété.
27Tahawa, ma tô duré Pedru hã tiwi ai'udâ.
Tiwi si'udâ parip si, ma tô si'a hã awa'awi hâ.
Zezusi hã Pilatuhu u da te isaprõnizé wasu'u
Mateu 27.1-2,11-14; Marcu 15.1-5; Luca 23.1-5
28Tawamhã Caifasihi nhorõwa hawi ma tô Zezusi hã siwi saprõni, zudeu norĩ hã, romanu nhorõwa u robza'rã ré. Roti'wa dama ipire uptabi romanu hã, Pilatu na isisi hã. Te te itẽme siwi ãwisi wamhã, 'ri para u te te siwi 'mazébré õ di, Pilatuhu u. Rowi te iré aimasa. E marĩ wa. 'Re ihâimana u'âsi mono nhimiroti waihu'u'õ'wai wa, Pilatu hã. Tawamhã Pascowa na dato nhisi bâtâ na, dasi'rã'õtõ ré, sisisi õ di za, siwasété za'ra tõ da. Siwasété za'ra 'wa'âhã, aré dame saihuri waihu'u õ di. 29Tawamhã Pilatu hã ma tô datẽme watobro. Ãne te dama tinha:
— E marĩ wa, te we bété asiwi isaprõni 'wa. E marĩ, ma 'manha.
30Tawamhã te asa tãma wasu'u za'ra, ãne:
— Tiwasédé te te 're 'manharĩ u'âsi mono õ 'wa'âhã, aré wa te aima hâiba nhomri za'ra õ di.
31Tawamhã Pilatu ma te asa ãma tãma wa'rãmi za'ra, ãne:
— A norĩ wa'wa hã te za asiwi isaprõni 'wa, asi'uihâ na aihi'rata norĩ nhimi'manharĩzéb zarina, marĩ hã tãma 'manharĩ za'ra wa'aba da, tiwasédé hã asõ'a za'ra wa'aba, te te 're 'manharĩ u'âsi mono wamhã.
Tahawa, ma tô asa tãma nharĩ za'ra, Pilatuhu ma, ãne:
— Mare di, wa te wasiwi saprõni õ di za. Asib'apito, ma tô wawi sawi za'ra, ni'wa hã tiwasédé te te 'manharĩ wamhã, wa te wasiwi wĩrĩ tõ da.
32Romhâ ré ma tô Zezusi hã siwasu'u tidâ'âzém na, wedepo'o nhonhi'rãmi na da te dasiwi isasõmrizém na. Tawamhã Pilatu te te dama 'rui wapsi, te za 're isiwasu'u mono zéb zarina, dasiwi sasõmri ni.
33Tawamhã Pilatu, ma tô 'ri para u apâ ãzé. 'Ri para u sébré parip si, te Zezusihi zô hâ, 'ri para u itẽme sébré da, te te sadanharĩ da, Pilatu hã. Tawamhã ãne te sadanha:
— E a hã, zudeu norĩ nhib'apito.
34Tawamhã Zezusi asa ma te ãma tãma wa'rã, ãne:
— E apito na da te aima ĩwasu'u za'ra wa, te ĩzadanha. E asi'uihâ na te ĩzadanha, wa hã apito zô.
35Tawamhã Pilatu hã te duré asa tãma tinha, ãne:
— E wa hã zudeu na 're ĩhâimana mono bâ, ĩsi'uihâ na te asadanharĩ da hã. Asiré zudeu norĩ hã ma tô siwi ĩma aihâiba nho, sasedoti ipire norĩ me. E marĩ, ma bété i'manha.
36Tawamhã ma tô Zezusi hã asa tãma siwasu'u, ãne:
— Wa hã ti'ai ãma danhib'apito na 're ĩhâimana mono õ di. Danhib'apito na 're ĩhâimana mono 'wa'âhã, wa aré ĩnhib'a'uwẽ norĩ hã wada'uri za'ra, te te da'wapé za'ra da, da te dasiwi ĩhâiba nhomri tõ da, dama ipire norĩ u. Wa hã ti'ai ãma danhib'apito na 're ĩhâimana mono õ di.
37Tahawa, ma tô Pilatu hã asa duré sadanha, ãne:
— E a hã danhib'apito.
Zezusi te duré tãma tinha, ãne:
— Tahata ma tô tane hã ĩ'ãma iwaihu. Taha da, wa tô ti'ai ãma podo. Taha da, wa tô we ti'ai u datẽme mo, roti tô sena uptabi hã te dama 're wasu'u mono da. Ni'wam norĩ hã roti tô sena uptabi hã te te sima 're wẽ za'ra mono wamhã, ta norĩ si te za te te 're ĩwapari ze za'ra.
38Pilatu te duré asa tãma tinha, ãne:
— E ma hã, roti tô sena uptabi hã.
Pilatu hã Zezusi da te dasiwi wĩrĩ da, te te dama ihâiba nhomrizé wasu'u
Mateu 27.15-31; Marcu 15.6-20; Luca 23.13-25
Tawamhã Pilatu hã apâ ma datẽme watobro, rob u. Ãne te dama tinha:
— Wa tô sadanha. Ma tô ĩma siwasu'u. Marĩ hã te te 're ab'manharĩ wasété mono õ di. 39Ãme ma tô asi'rã'õtõ 'wa, Pascowa na datozé nhibâtâ na. Ma tô asima 're iwẽ za'ra wa'aba mo, 're asi'rã'õtõ aba mono ré, misi si dazazém hawi te dama 're arob'rui mono da, apâ 're dawairébé mono da. Zudeu norĩ, e tawamhã wa za asib'apito za'ra wa'aba ma rob'ru, apâ morĩ da.
40Tawamhã hârâ 'rãihâ na te 'mahârâ za'ra ni, ãne:
— Mare di. Taha ma, rob'ru õ di za, morĩ da. Barabasihi ma si te za irob'ru, taha si morĩ da apâ.
Ta hã rowasété 'manharĩ'wa, Barabasi hã.
Currently Selected:
Zuwã 18: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.
