Zuwã 19

1Tawamhã Pilatu ma tô da'wapéi'wa norĩ ma 'ru za'ra, powawẽ hâi waré na te te siwi 're pré'é mono da, Zezusi hã. 2Te te siwi 're pré'é mono pari, ma tô 'wabzéré na siwi ãma sõpre. Tisi'ubuzém na ma duré siwi ãma hâiba ubu, ihâ pré na. 3Siwa'rãmi te nasi itẽme ai'ré za'ra, tô sena te te nasi sawi za'ra da newa. Tahawa te ãne nasi tãma nharĩ za'ra, ãma wa'ẽ za'ra sina:

— Zudeu norĩ nhib'apito, rowẽ na aihâimana.

Tawamhã te te nasi sawi za'ra pari, te nasi siwi 'rãi wabzu, sisa'u. 4-5Tawamhã Pilatu, ma apâ datẽme watobro. Ãne te dama tinha:

— Ãhãta wa we atẽme saprõni za'ra wa'wa. Wa tô sadanha. Ma tô ĩma siwasu'u. Marĩ hã te te 're ab'manharĩ wasété mono õ di. Ãne hã waihu'u za'ra wa'aba da, wa tô we atẽme saprõni za'ra wa'wa.

Tawamhã Zezusi ma itẽme watobro, 'wabzéré na sõpre ré. Zazahâ pré na ubu ré zama ma itẽme watobro.

Tahawa, te Pilatu hã dama 'mahâ, ãne:

— Õhõta aibâ hã. 'Madâ'â za'ra wa'aba.

6Tawamhã te 'madâ'â za'ra, 'Re ihâimana u'âsi mono ma, da'ãma romhuri'wa ipire norĩ hã, sasedoti ipire norĩ hã. 'Re ihâimana u'âsi mono nhorõwa 'ri 'madâ'â'wa norĩ zama te 'madâ'â za'ra. Te te 'madâ'â za'ra wamhã, hârâ 'rãihâ na te nasi 'mahârâ za'ra, ãne:

— Wedepo'o nhonhi'rãmi na da te dasiwi sasõmrire, dâ'â da.

Tawamhã te Pilatu asa tãma nharĩ za'ra, ãne:

— Asi'uihâ na te za asiwi isaprõni za'ra wa'wa, asiwi sasõmri za'ra wa'aba da. Wa hã wa tô sadanha. Ma tô ĩma siwasu'u. Marĩ hã te te 're ab'manharĩ wasété mono õ di.

7Tahawa, te asa tãma nharĩ za'ra, dama ipire norĩ hã, ãne:

— Ti'ai ãma poto nherẽ, ma tô dama 're siwasu'u, 'Re ihâimana u'âsi mono 'ra na. Mreme wẽ'õre di. Wahi'rata norĩ hã ma tô dama roti za'ra, ãne ni'wa, 're siwasu'u mono wamhã, wa te wasiwi wĩrĩ da.

8-9Tawamhã Zezusi dama 're isiwasu'u mono zém na ma tô Pilatu hã damreme wapa. Tahawa, ma tô pẽ'ẽwara. Tawamhã 'ri para u ma duré ãzé. Zezusi hã taha wamhã ma duré isarina ãzé. Tahawa, Pilatu ma tô duré Zezusi hã sadanha, ãne:

— E ma hawi te we aimo bété.

Tane nherẽ, Zezusi tizadawa na hã te te ãma tãma wa'rãmi õ di. Ari'iwi te mreme ãna za.

10Tawamhã Pilatu te tãma tinha, ãne:

— E niha bâ, ĩma asiwasu'u õ di. E dama ĩnhimiroti pire na ĩwaihu'u õ di bété, te asatõrĩ da, aimorĩ da oto, duré niha wamhã, te dama ai'ru da, da te dasiwi asasõmri da, wedepo'o nhonhi'rãmi na.

11Tawamhã Zezusi asa te tãma tinha, ãne:

— 'Re ihâimana u'âsi mono, ma tô aipisutu, ĩma aipire da. Ĩma aipire da, te te aipisutu õ 'wa'âhã, aré ĩma aipire õ di. Tawamhã ĩma aipire da, te te aipisutu nherẽ, ĩ'ãma asimiroti wasété wamhã, tãma aiwẽ õ di za, aiwasédé hã ĩ'ãma 'manharĩ wa. Tane nherẽ, aibâ hã si'uihâ na te te aima ĩhâiba nhomri hã aiwasété nhipai u wasété uptabi di, ta hã.

12Tawamhã Zezusihi mreme te te sina waihu'u wa, ma tô sima wẽ, Zezusi te te satõrĩ da, apâ dawi morĩ da. Tane nherẽ, hârâ 'rãihâ na te nasi imreme wa'rãmi 'mahârâ za'ra, dama ipire norĩ hã, ãne:

— Õ hã danhib'apito na ma tô 're siwasu'u. Ni'wa hã danhib'apito na 're siwasu'u mono wamhã, apito Séza hã danhib'apito na te te da'ãma waihu'u õ di za. Apâ morĩ da, tãma rob'rui wamhã, apito Séza hã aima toi õ di za.

13-14Tawamhã damreme te te sina wapari wa, ma tô Zezusihi zô ãzé, te te tãma nharĩ da, rob u isarina watobro da. Tahawa, ma tô isarina watobro, rob u. Tawamhã ẽtẽ 'manharĩ nhisiwi, te wedeza na nhamra 'ridawa, Pilatu hã. Hebreu norĩ mreme na ẽtẽ 'manharĩ nhisi hã, Dabata na. Tame danhib'apito, te 're simasisi u'âsi, dawasété na te te 're da'awaihu'u mono da, dawẽ na zama te te duré 're da'awaihu'u mono da. Tame sãmra ré, ma tô abzumazéb u za bâdâ hã, sabadu õ ré hã, duré Pascowa na dato nhisi õ ré hã. Tawamhã Zezusi hã rob u isarina watobro wamhã, Pilatu te tinha, wasiré zudeu norĩ ma, ãne:

— Õhõta asib'apito za'ra wa'wa.

15Tawamhã dahârâ 'rãihâ na te nasi 'mahârâ za'ra ni asa, ãne:

— Wedepo'o nhonhi'rãmi na da te dasiwi sasõmri, dâ'â da.

Tawamhã Pilatu asa te tãma nharĩ za'ra, ãne:

— E asib'apito za'ra wa'wa, wa za dama ti'ru, wedepo'o nhonhi'rãmi na da te dasiwi sasõmri da hã, dâ'â da.

Tawamhã sasedoti ipire norĩ hã te asa tãma nharĩ za'ra, ãne, Pilatuhu ma:

— Roma ãma apito Sézaha si, wanhib'apito za'ra hã.

16Tawamhã da'wapéi'wa norĩ ma, te oto ti'ru Pilatu hã, wedepo'o nhonhi'rãmi na te te siwi sasõmri da, dâ'â da, Zezusi hã.

Zezusi hã wedepo'o nhonhi'rãmi na da te dasiwi isasõmrizé wasu'u

Mateu 27.32-44; Marcu 15.21-32; Luca 23.26-43

17-18Tawamhã 'ri nhiti te oto siwi saprõ, Zezusi hã. Wedepo'o nhonhi'rãmi hã te sisada ti'â, Da'rãihi na romnhisi u. Hebreu norĩ mreme na Gogota na romnhisi hã.

Tamomo te te siwi ãwisi za'ra wamhã, wedepo'o nhonhi'rãmi na ma tô oto siwi sasõ, da'wapéi'wa norĩ hã. Aibâ norĩ wa'wa, ma tô siwi sasõ. Aibâ maparane te ãma aiwa'aba zahuré, da te dasiwi isasõmri zahuré hã. 19Tawamhã Pilatu, ma tô ãne ãma rob'ui'éré: “Ã hã Zezusi, Nazaré hawi we imorĩ, zudeu norĩ nhib'apito.” Ãne ma tô ãma rob'ui'éré. Tawamhã te te ãma rob'ui'éré pari, te dama ti'ru, i'rãi uwaibaba te te siwi 'mazasõmri da, rob'ui'éré hã. Si'ubdatõ damreme na rob'ui'éré hã. Hebreu norĩ mremezém na, duré romanu norĩ mremezém na, duré gregu norĩ mremezém na. 20Isa'ozém hawimhã 'ri nho'õmo u hã, romhuture di. Tahawa, wasiré zudeu norĩ hã te ahâ na te te 're sõré za'ra, ãma rob'ui'éré hã. 21-22Tawamhã Pilatuhu ma, te nharĩ za'ra, sasedoti ipire norĩ hã, ãne:

— Rob'ui'éré na ãma saprĩ na. “Ã hã zudeu norĩ nhib'apito,” ãne tõ da. Ãne ãma saprĩ na. “Ãne te ã hã 're siwasu'u: Wa hã zudeu norĩ nhib'apito.”

Tawamhã Pilatu asa te tãma nharĩ za'ra, duré ãne:

— Mare di. Te ãma saprĩ õ di za. Õhõ u'â za.

23Tawamhã te te siwi sasõmri pari, ma i'uzazém na sima ãma aipé, misi si da'wapéi'wa norĩ hã. Maparane si'uiwa na ihâiba hã. Misire ihâpa hã, te tihâiba, ihâ're'õ hã. Õne haré i'manharĩ hã. 24Tahawa, te ãne sima nharĩ za'ra:

— Wasima ãma wasipé na, wa te wasima hânhihâri mono tõ da. Ẽtẽre hã misi, wanhisi ui'éré ré hã wa te wasiwi mei wa'aba, itede'wa hã wa te wasiwi ãma waihu'u za'ra da.

Tawamhã ma tô sima me za'ra. Duréihã wahi'rada, ma tô ãne ãma rob'ui'éré siro, 'Re ihâimana u'âsi mono zadawa 'mahârâ'wa hã:

“Ĩ'uzazé hã ma tô sima ãma aipé. Ẽtẽre, ma duré siwa'wa sima me za'ra, itede'wa hã te te siwi ãma waihu'u za'ra da.”

Tawamhã rob'ui'éré zarina, ma tô 'manharĩ za'ra, da'wapéi'wa norĩ hã.

25Tame te pi'õ norĩ hã aimasa, Zezusihi za'ozéb 'rata ina norĩ hã, duré ina wapté, duré Maria, Coropasihi mro, duré Maria Madaréna. 26-27Tawamhã Zezusi te tina hã 'madâ. Isiré 're imorĩ te te 're isawi pese mono zama te duré 'madâ, ipapara sa wa.

Tawamhã ãne te tina ma tinha:

— Ãhãta ai'ra. Te za oto ãma 're ai'ra mo.

Tawamhã te te 're isawi pese mono ma, te duré tinha, ãne:

— Ãhãta ana. Te za oto duré a zama ãma 're ana mo.

Tawamhã te te tãma irotizéb zarina, ma tô Zezusihi na tinhorõwa u saprõ, i'rata 're sãmra u'âsi mono da oto.

Zezusihi dâ'âzé wasu'u

Mateu 27.45-56; Marcu 15.33-41; Luca 23.44-49

28Tawamhã Zezusi hã sa'o ré, ma tô sina uwaimra, Imama te te ãma irotizé hã. Ãne na ma tô sina waihu'u, Zezusi hã. Tawamhã ãma irob'ui'éré 'rata zéb zarina, te tinha, ãne:

— 'Rubu di.

29Piza'a 're nho'a hã te ipapara za, uwa 'rãi wa'u isé ré hã. Tawamhã ma tô marĩ hã wedehu na siwi ãma 'rã'ubu da'wapéi'wa norĩ hã, uwa 'rãi wa'u isé na te te ãma siwi di'i da, iwa'âbâ suru na, Zezusihi ma, te te siwi wẽ da, isadawa u. Ta hã te upsõ Zezusi hã, tizoto na. 30Te te upsõmri parip si, te tinha, ãne:

— Tâibâ oto. Wa tô oto ĩsina uwaimra.

Taha pari, ma tô oto 'rãi waptãrã. Tawamhã si'uihâ na ma pẽ'ẽ hai'utõ.

Da'wapéi'wa hã Zezusi i'a're wi te te iwa'rézé wasu'u

31Tawamhã dama ipire norĩ hã te Pilatuhu u ai'aba'ré, isõrõwa u. Itẽme sihutu wamhã, te ãma sadanharĩ za'ra, wedepo'o nhonhi'rãmi na isimnhana hã te te dama 'ru za'ra da, da te dasiwi hi'ẽ za'ra da. E marĩ da. Dâ'â su'u za'ra da, wedepo'o nhonhi'rãmi hawi da te dasiwi wamirĩ hâ. Ãne te ãma sadanharĩ za'ra. E marĩ wa. Romhuri zahârizém na simnhatã u'âsi wamhã, dama wẽ prã ti. Hâiwahâ pesere si te za bâdâ hã iwa waptãrã, romhuri zahârizé hã. Tawamhã romhuri zahârizéb u simnhatã ré, ãma hâiwahâ pese tõ za'ra da, te ãne ãma sadanharĩ za'ra, bâdâ hã dama pire uptabi wa, romhuri zahârizé hã. 32Tawamhã Pilatu hã te tãma 'ru za'ra, da'wapéi'wa norĩ ma, te te siwi hi'ẽ za'ra da. Te te tãma 'ru za'ra wa, ma tô aibâ norĩ hã siwi hi'ẽ zahuré, Zezusihi siré isa'o zahuré hã. 33Taha pari, ma tô Zezusihi zô ai'ré za'ra. Ãhã wamhã, iwana zahuré dâ'â wa, te te siwi hi'ẽi õ di. 34Iwana dâ'â zahuré nherẽ, ma tô i'a're wi wa'ré da'wapéi'wa hã, si'uwazi 'rã'wa pa na. Te te wa'réi wi, ma iwapru hã puru. Â zama ma te tawamhã isu asa'wa.

35Ãne na ãhã 'madâ'â'wa hã ma tô aima wasu'u za'ra wa'wa, waihu'u za'ra wa'aba da, 're saze za'ra wa'aba mono da. Sena na te te iwasu'uzém na hã õhõ ma, tãma waihu'u pese di. 36Duréihã ma tô 'Re ihâimana u'âsi mono zadawa 'mahârâ'wa hã ãma rob'ui'éré siro, da te dasiwi ihi'ẽi õ na hã. Tawamhã ãma irob'ui'éré zarina, te te siwi hi'ẽi õ di, da'wapéi'wa norĩ hã. 37Ma tô duré ãne ãma rob'ui'éré siro, isadawa wasu'u'wa hã: “Da te iwa'rézé hã te za 'madâ'â za'ra ni.” Tawamhã ãma irob'ui'éré zarina, iwa'rézé hã ma tô 'madâ'â za'ra ni.

Zezusi dâ'â pari, da te dasiwi isẽrẽzé wasu'u

Mateu 27.57-61; Marcu 15.42-47; Luca 23.50-56

38-39Tawamhã Zuzé hã ma tô Pilatuhu u mo, Zezusihi hâiba na te te tãma rowairébé wa, te te âri da, ab're 're, te te sẽrẽ da. Arimatéa na romnhisi hawimhã, Zuzé hã. Zezusihi zazei'wa, 're morĩ nherẽ, isazei'wa na siwasu'u õ di, dama ipire norĩ mreme pipa te. Tawamhã Zezusihi hâiba na ma tô ãma saze, Pilatu hã. Tawamhã te oto sô mo, Zuzé hã. Nicodemosihi me, ma tô âri zahuré, te te hâiba u'ré zahuré da. Marĩ zu wazari, ma tô Nicodemosi hã we sada ãwisi isadaze hã ahâ na, 35 na ipire pibuzé hã. Wede nhinihãi hâ zum ne hã, 'rém nhana'ré ne hã, iwazarimhã. Nicodemosi hã ta hã Zezusihi u bara na imorĩ, isimiroti te te wapari da. 40Tawamhã zazahâ ihâ pa na ma tô hâiba ubu zahuré. Zazahâ hã te nasi ãma hâzub zahuré, isadaze na te te ãma hâiba ubu zahuré ré. Õne u'â wasiré zudeu norĩ hã 're dadâ'â za'ra mono wamhã, te te dama 're 'manharĩ za'ra, da te danherẽ õ ré.

41Zezusihi za'ozéb ãma te wede hã 're simasa, rob'rere wede hã. Tame sa'a zahâpâ, te ab're hã 're sa'wari, ab're siro hã, i'ubuni hã, ni'wa iwa da te isẽrẽ õ hã. 42Tawamhã romhuri zahârizéb u oto romhuture wa, duré ab're siro hã isa'ozéb 'rata hâimana wa, ma tô iwa sẽrẽ zahuré, Zuzé norĩ hã.

Currently Selected:

Zuwã 19: xavBP

Highlight

Copy