Zuwã 20

Zezusi hã ab're hawi apâ ihâiwa'utuzé wasu'u

Mateu 28.1-8; Marcu 16.1-8; Luca 24.1-12

1Tawamhã pi'õ Maria Madaréna te robza'rã ré dumigu na ab're u hã mo. Tawamhã ab're u morĩ wamhã, ab're nhitobzé ẽne hã, baba di. Ni'wa ma tô iwana isiti hã sa'ré. 2Tahawa, te apâ Sima Pedruhu u hã wara, duré isiré 're imorĩ Zezusi te te 're isawi pese mono u zama. Ãne te taha wamhã tãma rowasu'u zahuré:

— Wanhib'apito hã ma tô dasiwi wazere ni, ab're hawi. Nimame da te dasiwi ihirizé hã wa te duré waihu'u za'ra õ di.

3Tawamhã te te tãma rowasu'u zahuré pari, ma tô awa'awi tineb zahuré, ab're u Pedru norĩ hã. 4Ãhã wamhã, ma tô oto duré asamro. Tane nherẽ, Zezusihi siré 're imorĩ hâiba amo, Pedruhu ãma sisa'u wa, ma tô iwana hã wi, ab're u. 5Wisi wi, ma tô ab're u sô aiwẽ'ẽ, te te sô rob'madâ'â da. Ãhã wamhã, sébré õ di. I'ubuzéb si ma tô 'madâ'â za'ra, ihâirã hã. I'ubuzéb si te duré daba'wara. 6Tawamhã Sima Pedru hã ma tô oto isarina wi. Wisi wi, ma taha si ab're u ãzé. Sébré wamhã, ma duré i'ubuzéb si 'madâ'â za'ra. 7Romhâ na te i'ubuzém nhiti i'rã ubuzé hã nomro, hâ nhinhai haré. 8Tawamhã ab're u iwisi 'rada hã ma tô duré oto isarina ãzé. I'ubuzé hã ma tô duré 'madâ'â za'ra. I'rã ubuzé hã isiti inomro hã te duré 'madâ, hâ nhinhai haré. Te te 'madâ'â wamhã, ma tô Zezusi hã saze, ihâiwa'utuzém na. 9(Ta norĩ ma, zahadu tãma waihu'u za'ra õ di, duréihã 'Re ihâimana u'âsi mono nhimiroti 'rata na rob'ui'éré siro hã, Zezusi za ihâiwa'utuzéb da na ipisutu siromo na.) 10Tawamhã ab're, te te sabu zahuré pari, ma tô oto apâ tineb zahuré, tinhorõwa u hã.

Zezusi hã Maria Madarénahã u isihâi'rézé wasu'u

Mateu 28.9-10; Marcu 16.9-11

11Tawamhã Maria Madarénahã si te isa'u zahuré za, ab're 'rata, wawa sina. Wawa sina ma ab're u aiwẽ'ẽ, te te duré sô rob'madâ'â da. 12Siwẽ'ẽi wa, ma tô aibâ hã 'madâ'â zahuré, 'Re ihâimana u'âsi mono ma romhuri'wa norĩ hã, hâiwa hawi we ine hã. Zazahâ ihâirã ré te aimasisi zahuré, siwanhizari. Zezusihi 'rã nomrozéb ãma te ihâiba amo hã nhamra. Ihâiba amo hã ite nomrozéb ãma te duré nhamra. 13Tawamhã hâiwa hawi romhuri'wa norĩ hã te Maria Madaréna sadanharĩ zahuré, ãne:

— Pi'õ. E marĩ wa, te aiwawa.

— Wanhib'apito, da te dasiwi wazere wa, da te dasiwi ihirizé hã te waihu'u õ wa, wa ĩwawa.

14Tawamhã te te tãma nharĩ zahuré pari, ma aipi'ra. Sipi'rai wi, ma tô aibâ hã tisã, Maria Madaréna hã. Tane nherẽ, Zezusihi na hã te te waihu'u õ di, ni'wa newa. 15Tawamhã Zezusi te tãma tinha, ãne:

— Pi'õ, e marĩ wa, te aiwawa. E 'wa sô, te irob'madâ.

Tawamhã Maria te asa tãma tinha, ãne:

— A hã wazere wamhã, ma'ãpé ihirizé hã ĩma wasu'u na te waihu'u da, nimomo ihirizéb u sô ĩmorĩ da, apâ te we âri da.

Rob'rere wede 'madâ'â'wa newa, te te waihu'u õ di, Zezusi na hã.

16Tawamhã Zezusi te tãma tinha, ãne:

— Maria.

Tawamhã tinhisi te te wapari wamhã, ma itẽme aipi'ra, Maria hã. Tawamhã hebreu norĩ mreme na te tãma tinha, ãne:

— Raboni. (Ã hã damreme hã ãma isaprĩ na hã “Rowahutu'wa.”)

17Tawamhã Zezusi te tãma tinha, ãne:

— Ĩtété õ di za. Zahadu apâ ĩmorĩ õ di, Ĩmama u hã. Mo oto aimorĩ, ĩsisãnawã norĩ u tãma ĩzadawa wasu'u za'ra da. Ĩmama u, wa za oto mo apâ hâiwa u, Aimama aba u. Ĩnhib'apito u, wa za oto mo, Asib'apito za'ra wa'aba u. Ãne tãma ĩzadawa wasu'u za'ra na za.

18Tawamhã Maria Madaréna te oto itẽme timorĩ za'ra, Zezusihi siré 're inomro mono norĩ u, te te tãma sadawa wasu'u za'ra da. Itẽme wisi za'ra wamhã, te tãma rowasu'u za'ra, ãne:

— Wanhib'apito, wa tô 'madâ. Timama u te za, u, oto mo, hâiwa u Wamama za'ra u. Tinhib'apito u te za, u, oto mo, Wanhib'apito za'ra u.

Zezusi hã tisiré norĩ u isihâi'rézé wasu'u

Mateu 28.16-20; Marcu 16.14-18; Luca 24.36-49

19Tawamhã tô taha bâtâ na dumigu na bâdâ sébré wi, ma tô si'rã'õtõ, Zezusihi siré 're inomro mono norĩ si. Dama ipire norĩ pipa te, ma tô siré 'rinhitop tete za'ra. Tame si'rã'õtõ ré, ma tô Zezusi hã tãma sihâi'ré za'ra. Taha wamhã, te iwa'wab za'ra za. Tawamhã te ãne tãma nharĩ za'ra:

— Rowẽ na 're aihâimana za'ra wa'aba mono.

20Tawamhã tinhib'rada, ma tô tãma wẽ za'ra, te te 'madâ'â za'ra da. Ti'a're ãma ti'wa're hã ma duré tãma urĩrĩ za'ra. Tawamhã Wanhib'apito te te 'madâ'â za'ra wamhã, ma tô 're to za'ra, rowẽ te. 21Tawamhã Zezusi te duré tãma nharĩ za'ra:

— Rowẽ na 're aihâimana za'ra wa'aba mono. Ĩmama we te te datẽme ĩzatõrĩ ne, wa za duré datẽme asatõrĩ za'ra wa'wa isine.

22Tawamhã tizadawa wa'u'u na ma tô sa'uri za'ra. Ãne te tawamhã tãma nharĩ za'ra:

— Wa za oto Ĩpẽ'ẽzani hã aima sõmri za'ra wa'wa. Wẽ uptabi di, ta hã. 23Taha zarina te za ĩzadawa para dama 're iwaihu'u za'ra wa'aba mo, 'Re ihâimana u'âsi mono hã dawasédé hã te te da'ãma 're i'ab'madâ'â mono õ zém na hã. Tawamhã dama 're iwaihu'u za'ra wa'aba mono zéb zarina, te za te te dama 're apari, dawasédé hã. Ãne na dama 're waihu'u za'ra wa'aba mono õ wamhã, dawasédé hã te te dama 're apari mono õ di za, 'Re ihâimana u'âsi mono hã.

Tome hã Zezusi te te iwawãzé wasu'u

24-25Tawamhã Zezusihi siré 're inomro mono norĩ hã si'rã'õtõ wamhã, Tome hã ime sãmra za'ra õ di, isi'ubza na da te 're isisi mono hã. Tahawa, ma tô tãma rowasu'u za'ra, ãne:

— Wanhib'apito, wa tô 'madâ'â za'ra ni.

Tawamhã Tome ma te ãma sada'âbâ za'ra, ãne asa:

— Wa hã isib'rata zapu'uzé, te 'madâ'â õ wamhã, duré isib'rata zapu'uzéb 're, ĩnhipto te sẽrẽ õ wamhã, duré i'a're ãma iwa're 're, ĩnhib'rada te sẽrẽ õ wamhã, ihâiwa'utuzém na wa hã, te sazei õ di za.

26Tawamhã romhuri misi ãma si'utõrĩ za'ra pari, ma tô duré Zezusihi siré 're inomro mono norĩ hã si'rã'õtõ, tô dumigu na. Tome hã te oto ime tinhamra za'ra. Tawamhã 'ri nhitop tete nherẽ, ma tô duré wei itẽme tizébré za'ra, Zezusi hã. Iwa'wab za'ra, te duré ãhã wamhã za. Ãne te tawamhã duré sawi za'ra:

— Rowẽ na 're aihâimana za'ra wa'aba mono.

27Tawamhã Zezusi te Tomehẽ ma tinha, ãne:

— We ĩtẽme aimorĩ, ĩnhib'rada 'madâ'â da. Ĩnhib'rata zapu'uzéb 're, asipto hã sẽrẽ. Duré ĩ'a're wi ĩwa'rézéb 're, asib'rada hã sẽrẽ. Ĩhâiwa'utuzém na ĩwasu'u na, ĩwawã tõ. Te za oto ĩzaze, ĩhâiwa'utuzém na hã.

28Tawamhã Tome te asa tãma tinha, ãne:

— A hã, Ĩnhib'apito uptabi. A hã, 'Re ihâimana u'âsi mono. Ai'ãma si, wa za 're ĩwata u'âsi.

29Tawamhã Zezusi te asa duré tãma tinha, ãne:

— Ĩ'madâ'â wapsi, ma tô oto ĩzaze, ĩhâiwa'utuzém na. Ni'wam norĩ hã te te 're ĩ'madâ'â za'ra mono õ nherẽ, te te 're ĩzaze za'ra mono wamhã, tãma 're rowẽ za'ra mono di za.

Rowasu'u 'rãsutuzém na rowasu'u

30Zezusi hã dâ'â õ ré, ma tô tiwaihu'u pese na marĩ dama i'manharĩ waihu'u'õ hã te te dama 're ab'manharĩ wẽ u'âsi, isiré 're inomro mono norĩ nho'a. Isimipawaptobzé hã ahâ di, ã ibaihâ na ãma irob'ui'éré mono õ hã. 31Danho'reptui'wa da, 'Re ihâimana u'âsi mono te te ipisutu na, Zezusihi si 're saze za'ra wa'aba mono da, duré 'Re ihâimana u'âsi mono 'ra na 're saze za'ra wa'aba mono da, ma tô rob'ui'éré'wa hã ãne na ãma romnhihâtâ. E marĩ da, te za Zezusihi si asina 're i'umnhasi za'ra wa'aba mo. Rowẽ u'âsi ãma 're anomro aba mono da, duré 're atâ'â za'ra wa'aba mono ãna 're aihâimana u'âsi za'ra wa'aba mono da, 'Re ihâimana u'âsi mono 'rata, hâiwa ãma. Taha da, te za Zezusihi si asina 're i'umnhasi za'ra wa'aba mo.

Currently Selected:

Zuwã 20: xavBP

Highlight

Copy