Zuwã 6

Zezusi hã da'ahâ uptabi nherẽ, te te ida'asaihurizé wasu'u

Mateu 14.13-21; Marcu 6.30-44; Luca 9.10-17

1Tawamhã Zezusi hã ma tô uba're na saprĩ, isõ'õmo na. Galiléa ãma, isõ'u te 're hâimana. Tiberiadi na isõ'õmo nhisi hâiba amo nhisi hã. 2Da'ahâ na te isarina ai'aba'ré ni. E marĩ wa. Tiwaihu'u pese na, marĩ dama i'manharĩ waihu'u'õ hã te te dama ab'manharĩ wẽ mono wa, danho'a. 3Tawamhã sa'a nhisi u, ma tô hâimo sai'u, Zezusi hã. Tamomo wisi wamhã, te oto nhamra, isiré 're inomro mono norĩ me. 4Romhuture di oto, zudeu norĩ te, dato hã da te 're i'manharĩ za'ra mono zéb u hã, Pascowa na dato nhisi hã.

5Tawamhã itẽme dasi'aba'réi wamhã, ma tô da'ab'madâ, Zezusi hã. Da'ahâ uptabi na te itẽme ai'aba'ré ni. Te te da'ab'madâ'â wamhã, te Filipihi ma, tinha, ãne:

— E mame dasa hã te 're simi'wara, wa te dama i'uipra za'ra da hã, aihĩni ãma dasaihuri da hã.

6Niha na za marĩ te te dama i'manharĩ da hã, te te waihu'u siromo nherẽ, te ãne taré Filipihi ma tãma tinha, niha na te te ãma sada'âbâ zô.

7Tahawa, te Filipi hã asa tãma tinha, ãne:

— Da'ahâ uptabi wa, wa aré taré dasazém na rob'uiprazé sa'ẽtẽ uptabi nherẽ, uprosi za'ra ni, 200 na ihâiba nherẽ. Tane nherẽ, te aré da'ãma ai'utõ duré, i'u'ẽtẽ wapu hã. Suru na dasa hã aiwapsi da te huri da nherẽ, aré duré aihĩni dasa hã da te huri waihu'u õ di.

8-9Tahawa, Zezusihi siré 're imorĩ hâiba amo hã ma tô duré tãma tinha, Ãdré Sima Pedruhu no hã ãne:

— 'Watébrémi te, i'u'ẽtẽ wapu hã te tihâiba, arozum ne u'ẽne hã. 5 na ihâiba hã. Duré pe'a hã maparanere. Ãhã wamhã, aihĩni dasaihuri õ di za.

10Tawamhã ma tô Zezusi hã asa tãma nharĩ za'ra, ãne:

— Te za dama inharĩ za'ra wa'wa, ti'ai wa, dasi'ubumro da.

Tamemhã duroire hã sa'ẽtẽ di. Tahawa, ma tô ti'ai wa asimro ni. Da'ahâ uptabi di. Aibâ si, 5 miu na ihâiba za'ra hã. 11Tawamhã Zezusi ma tô waibu, i'u'ẽtẽ wapu hã. 'Re ihâimana u'âsi mono ãma te tiwata, sõpru wa. Taha pari, ma tô tisiré 're inomro mono norĩ ma sõmri za'ra, te te dama sõmri za'ra mono da. Pe'a zama ma duré tãma sõmri za'ra, te te dama sõmri za'ra mono da. Tawamhã i'u'ẽtẽ wapu hã umrore nherẽ, da'ãma si'utõrĩ õ di. Pe'a zama maparane nherẽ, duré da'ãma si'utõrĩ õ di. Tahawa, ma tô aihĩni dasa hã huri ni. Ma tô da te 'mahâpãrĩ, da'ãma si'utõrĩ ãna. 12Da te 'mahâpãrĩ mono wamhã, Zezusi hã te tisiré 're inomro mono norĩ ma 'ru za'ra, apâ te te ubumroi mono da, danho'rada isi'azahâri mono hã taré simi'wara tõ mono da.

13Tahawa, ma tô apâ te te ubumro za'ra. Si'õtõ wa, ma tô duré te te sé. Si'õno hã ahâ di, danho'rata ré hã, te te i'ubumro za'ra hã i'u'ẽtẽ wapu wẽ'ẽi ré hã. 12 na si'õno hã.

14I'u'ẽtẽ wapu hã umrore nherẽ, da'ãma si'utõrĩ õ wa, ma tô ãma tatob'uzu za'ra ni, waihu'u pese wa, Zezusi hã. Tawamhã te ãne dasima rowasu'u za'ra ni, dasaihuri wẽ te:

— Tô sena õ hã 'Re ihâimana u'âsi mono zadawa 'mahârâ'wa, we datẽme imorĩ zô 're idanhimipari za'ra mono. Oto wa te wasiwi saprõni aba, ãma wanhib'apito za'ra da.

15Tawamhã Zezusi, damreme hã ma tô sina waihu'u. Tahawa, te siwaprosi sa'a nhisi u mo apâ, danhiti.

Zezusi hã â nhisi baba imorĩzé wasu'u

Mateu 14.22-33; Marcu 6.45-52

16-17Tawamhã mara sime na, ma tô isiré 're inomro mono norĩ hã si'ra za'ra âi ba, uba're na te te saprĩ za'ra da, zara u, Cafanau u. Ãhã wamhã, zahadu itẽme wisi za'ra õ di, Zezusi hã. 18Tawamhã ma rowa'u hã tiwi tiwatobro za'ra, rowa'u'u za'ẽne hã. Tahawa, âsisasi hã sa'ẽtẽ di. 19Tawamhã isiré 're inomro mono norĩ hã 5 quilometru ti'ai pibuzém na, niha wamhã, ãté duré 6 quilometru ti'ai pibuzém na te te siré wasi za'ra mono ré, ma tô Zezusi hã siwi tisã. Â nhisi baba te wei itẽme timorĩ za'ra, uba're u. Romhuture di oto itẽme iwisi za'ra zéb da hã. Tahawa, ma tô tãma tipẽ'ẽwara pese za'ra.

20Ãhã wa, Zezusi ma tô tãma si'mahârâ za'ra, ãne:

— Wa hã wa we atẽme ĩmorĩ 'wa. Ĩma aipahi za'ra wa'aba tõ.

21Tawamhã ãne tãma si'mahârâ za'ra wa, tãma pahi za'ra ãna, ma tô sô tihârâ za'ra, uba're u itẽme sébré za'ra da, tãma rowẽ za'ra wa, isabâdâ hã. Itẽme sébré za'ra wi, ma tô uba're hã â zada'ré u sina ropto, te te ãma sima iroti za'ra zéb u.

Zezusihi zô idanhoprézé wasu'u

22Tawamhã da'ahâ na te Zezusihi siré 're inomro mono norĩ za'u asimro ni, isõ'u zaihâ na bâtâ pusizém niwĩ. Tahawa, awẽm na te ãne dasima rowasu'u za'ra ni:

— Ahâmhâ hã uba're hã misire te nomro, âmhã. Zezusihi siré 're inomro mono norĩ si ma tô asisi uba're wa, te te siré sari za'ra da. Zezusi hã isiré sébré za'ra õ di. Ãhã wamhã, e momo te bété mo. — Ãne te tasisadanharĩ za'ra ni ãma. 23Tawamhã ni'wam norĩ hã ma tô uba're na datẽme saprĩ za'ra, zara u. Tiberiadi hawi ma tô datẽme saprĩ za'ra, 'ri nho'õmo hawi. Wanhib'apito hã 'Re ihâimana u'âsi mono ãma iwatazéb u, ma tô ãma roptob za'ra, dasa hã da te ihurizéb u. 24Tawamhã Zezusi hã sãmra õ wa, duré isiré 're inomro mono norĩ zama si'ubumroi õ wa, ma tô uba're wa, asisi ni, tisa te te ihuri norĩ hã zara u te te saprĩ za'ra da apâ. Tawamhã Zezusihi zô danhopré da, ma tô uba're na saprĩ za'ra ni, Cafanau u.

Zezusi hã dasai uptabi na dama isiwasu'uzé

25Tawamhã Zezusi hã ma tô sãmri za'ra ni, Cafanau ãma isõ'u zara niwĩ. Da te dasiwi sãmri wamhã, ãne te sadanharĩ za'ra ni:

— Rowahutu'wa, e niwa ma tô we aiwi, ãwamhã.

26Tahawa, te Zezusi hã asa tãma nharĩ za'ra, ãne:

— E marĩ da, te we ĩzô asõpré wa'aba mo. E marĩ dama i'manharĩ waihu'u'õ hã ĩwaihu'u pese na te aima 'manharĩ za'ra wa'aba wa, ma tô ĩwaihu'u za'ra wa'wa, 'Re ihâimana u'âsi mono we te te ĩzatõrĩ na. E tahawa, te we ĩzô asõpré wa'aba mo. Mare di. Taré i'u'ẽne hã 'mahâpãrĩ za'ra wa'aba mono wẽ te, te we ĩzô asõpré wa'aba mo. 27Dasa hã siwamnarĩ su'u di. Tahawa, taha zô si 're romhuri za'ra wa'aba mono õ di za. Dasa ne isi'utõrĩ'õ zô si, te za 're irob'ruiwapari za'ra wa'aba mo, wẽ na 're ihâimana u'âsi mono zô si. Ta hã rowẽ u'âsi dadâ'â ãna 're idahâimana u'âsi za'ra mono zé, te wasu'u. Wa hã ti'ai ãma dasiré ĩpoto wa, ma tô Ĩmama hã ĩpisutu, isadawa para te dama 're anhomri mono da, rowẽ u'âsi 're idahâimana u'âsi za'ra mono zé hã.

28Tawamhã ma tô asa tãma nharĩ za'ra ni, ãne:

— E marĩ na ma tô 'Re ihâimana u'âsi mono hã te te sima 're da'awẽ, te te sima 're iwẽ mono zéb uwaibaba, wa te tãma ãma 're i'uwaimrami za'ra mono da hã. Ma'ãpé wama waihu'u za'ra na, wa te waihu'u za'ra da.

29Tawamhã te Zezusi hã asa tãma nharĩ za'ra, ãne:

— 'Re ihâimana u'âsi mono, ma tô we ĩzatõ, da te dasina 're ĩ'umnhasi za'ra mono da. Tawamhã asina 're ĩ'umnhasi za'ra wa'aba mono wamhã, te za tãma ãma 're i'uwaimrami za'ra wa'aba mo, te te sima 're iwẽ mono zéb uwaibaba, 're ĩzaze za'ra wa'aba mono wa.

30-31Tawamhã te asa tãma nharĩ za'ra ni, ãne:

— Wahi'rata norĩ hã a'ubuni wi 're nomro mono ré, ma tô te te 're huri mana na dasa nhisi hã. Ãne ma tô daza'u ãma rob'ui'éré ibaihâ na, 'Re ihâimana u'âsi mono zadawa 'mahârâ'wa hã: “Ma tô te te dama 're anhomri, hâiwa hawi dasazé hã.” A hã bété. E marĩ te za wanho'a duré wama i'manha, dama i'manharĩ waihu'u'õ hã, wa te ãma aiwaihu'u pese za'ra wa, wa te asaze za'ra da.

32Tahawa, te Zezusi hã tãma nharĩ za'ra, ãne:

— Mozési hã hâiwa hawi te te dama 're anhomri mono õ di, dasazé hã. Ĩmama si hâiwa hawi dasai uptabi nhomri'wa te 're hâimana. 33Dasa hã 'Re ihâimana u'âsi mono nhibzari hã hâiwa hawi we imorĩ te wasu'u, dadâ'â ãna 're idahâimana u'âsi za'ra mono zé hã te te dama 're anhomri mono da.

34Tawamhã te asa tãma nharĩ za'ra ni, ãne:

— Wama 're anhomri u'âsi mono, wasai uptabi hã.

35Tawamhã te Zezusi hã oto tãma siwasu'u za'ra, ãne:

— Wa hã dasai uptabi, 're idahâimana u'âsi za'ra mono zém nhomri'wa. Ni'wam norĩ hã we ĩtẽme 're nomro mono wamhã, mrab ãna te za oto 're nomro. Duré te te sina 're ĩzaze za'ra mono wamhã, 'rubu ãna te za oto 're nomro. 36A norĩ wa'wa hã ma tô ĩ'madâ'â za'ra wa'wa. Tane nherẽ, asina 're ĩ'umnhasi za'ra wa'aba mono õ di. Ãne wa tô aima ĩsiwasu'u za'ra wa'wa aré. 37Ĩmama ma tô da'apisutu, ĩnhib'a'uwẽ si 're danomro mono da. Ta norĩ si te za te te 're ĩzaze za'ra, te te ipisutu za'ra norĩ hã. Te te 're ĩzaze za'ra mono nherẽ, e wa za ĩsiwi te 're awẽ'õ. Mare di. Te ĩsiwi 're awẽ'õ mono õ di za. 38Wa hã hâiwa hawi wa wei mo. E marĩ da. E 'râwi ĩnhimiroti si te ĩsima 're 'madâ'â mono da. Mare di. 'Râwi ĩnhimiroti si te ĩsima 're 'madâ'â mono da, we ĩmorĩ õ di. We ĩzatõrĩ'wa nhimiroti si te 're 'madâ'â mono da hã, wa tô wei mo. 39E marĩ, ma tô te te sima 're wẽ, Ĩmama hã. Ĩzazei'wa norĩ te 're ab'madâ'â pese u'âsi mono wa, ĩte u'âsi 're nomro mono da, ma tô te te sima 're wẽ, ĩte da, te te ĩma 're apisutu siromo mono wa. Ma tô duré te te sima 're ĩwẽ, ĩzazei'wa norĩ na hã 're dâ'â za'ra mono wa, bâtâ na te ahâiwa'utu da, apâ 're hâimana u'âsi za'ra mono da oto, ti'a isi'utõrĩzéb ãma. 40Ĩmama ma tô duré te te sima 're da'awẽ, da te dasina 're ĩ'umnhasi za'ra mono wa, rowẽ na 're dahâimana u'âsi za'ra mono da, hâiwa ãma. Tawamhã 're dâ'â za'ra mono wa, wa za bâtâ na hâiwa'utu za'ra, ti'a isi'utõrĩzéb ãma.

41-42Dasa hã hâiwa hawi we imorĩ na siwasu'u wa, te ãne sima rowasu'u za'ra, dama ipire norĩ hã:

— Oro hâiwa hawi wei morĩ za. Õ hã Zezusi, Zuzéhé 'ra. Ina zama wama waihu'u pese za'ra di.

43Tahawa, te Zezusi asa duré tãma nharĩ za'ra, ãne:

— Tô'ã. Tane ĩma nharĩ za'ra wa'aba õ di za. 44Dasi'uihâ na da te 're ĩzazei waihu'u za'ra mono õ di za. Ĩmama si te za te te 're da'apisutu we ĩzatõrĩ'wa hã, da te 're ĩzaze za'ra mono da. Tawapsi te za da te 're ĩzaze za'ra. Tawamhã 're dadâ'â za'ra mono wa, wa za bâtâ na ab're hawi da'ahâiwa'utu ti'a isi'utõrĩzéb ãma, apâ 're dahâimana u'âsi za'ra mono da oto. 45Duréihã ma tô ãne na rob'ui'éré, 'Re ihâimana u'âsi mono zadawa 'mahârâ 'rata 'wa hã: “Timreme te za te te dama 're awaihu'u, 'Re ihâimana u'âsi mono hã.” Ãne ma tô ãma rob'ui'éré. Tawamhã Ĩmama, timreme te te dama 're i'awaihu'u mono na, da te ãma 're sazei pese za'ra mono wamhã, ĩmreme na zama te za duré da te 're ĩzazei pese za'ra. 46Ĩmama hã datõmo na da te 're 'madâ'â za'ra mono õ di. Ĩwétési wa tô te 're 'madâ'â, ihawi we ĩmorĩ wa.

47— Tawamhã Danho'reptui'wa na da te dasina 're ĩ'umnhasi za'ra mono wamhã, rowẽ u'âsi te za dadâ'â ãna 're dahâimana u'âsi za'ra hâiwa ãma, 'Re ihâimana u'âsi mono 'rata. Tô sena, wa aima rowasu'u za'ra wa'wa, waihu'u za'ra wa'aba da. 48Wa hã dasa na, wa ĩsiwasu'u, rowẽ na 're idahâimana u'âsi za'ra mono zé nhomri'wa, 're ĩmorĩ wa, dama. 49Wahi'rata norĩ hã a'ubuni wi 're nomro mono ré, ma tô mana hã te te 're huri. Tane nherẽ, dâ'â ãna 're hâimana u'âsi za'ra mono õ di, ta norĩ hã. Ma tô tidâ'â za'ra. 50Hâiwa hawi dasa na 're dasaihuri mono wamhã, rowẽ u'âsi te za dadâ'â ãna i'rata 're dahâimana u'âsi za'ra, hâiwa ãma. 51Wa hã dasa na wa tô ĩsiwasu'u, hâiwa hawi we ĩmorĩ wa. Ni'wam norĩ hã ĩ'ãma 're saihuri u'âsi mono wamhã, te za dâ'â ãna 're hâimana u'âsi za'ra, hâiwa ãma. Taha da, wa za ĩhâiba hã dama tisõ, dazada ĩdâ'â da.

52Tawamhã te sima rowasu'u za'ra, ãne:

— E niha te za õ hã tihâiba hã wama sõmri za'ra, ãma 're wasaihuri u'âsi mono da.

53Tahawa te Zezusi duré asa tãma nharĩ za'ra, ãne:

— Tô sena wa aima waihu'u za'ra wa'wa. Ti'ai ãma Dasiré Ipoto hâiba na 're asaihuri aba mono õ wamhã, duré iwapru, 're âhuri aba mono õ wamhã, rowẽ u'âsi ãma 're anomro aba mono õ di za. 54Ĩ'ãma 're dasaihuri mono wamhã, duré ĩwapru, da te 're âhuri mono wamhã, rowẽ u'âsi te za ĩ'ãma 're danomro. Tawamhã 're dadâ'â za'ra mono wa, wa za bâtâ na ab're hawi da'ahâiwa'utu ti'a isi'utõrĩzéb ãma, apâ 're dahâimana u'âsi za'ra mono da hã. 55Ĩhâiba hã dasai uptabi. Duré ĩwapru hã, â uptabi. 56Ĩhâiba na 're dasaihuri mono wamhã, duré ĩwapru, da te 're âhuri mono wamhã, te za ĩsiré 're dahâimana u'âsi za'ra. Wa hã wa za duré dasiré 're ĩmorĩ u'âsi za. 57Ĩmama hã ma tô we ĩzatõ, 're imorĩ u'â hã. Ta hã 're hâimana u'âsi mono wa, wa za duré wa hã 're ĩhâimana u'âsi. Tahawa, ĩ'ãma 're dasaihuri mono wamhã, te za ĩsine 're dahâimana u'âsi za'ra hâiwa ãma, 're dadâ'â za'ra mono ãna. 58Wa hã dasa na, wa tô ĩsiwasu'u, Ĩmama, hâiwa hawi te te we dama ĩnhomri na. Wahi'rata norĩ hã ma tô duréihã hâiwa hawim na tisa hã te te 're huri. Tane nherẽ, dâ'â ãna 're hâimana u'âsi za'ra mono õ di. Ma tô tidâ'â za'ra. Ĩ'ãma 're dasaihuri mono wapsi, dadâ'â ãna te za 're dahâimana u'âsi za'ra, hâiwa ãma.

59Ãne Zezusi ma tô tãma siwaihu'u za'ra, zudeu norĩ te, rowahutuzéb ãma, Cafanau ãma.

Zezusi hã tisiré norĩ te te sina isadanharĩ za'ra zé wasu'u, za te te irẽme za'ra zéb da na

60Tawamhã Zezusihi nhimirowasu'u hã ma tô dame wapari za'ra, isazei'wa norĩ hã. Te te wapari za'ra wamhã, ãne te ahâ na sima rowasu'u za'ra:

— Isimirowasu'u hã wama pire za'ra di, wa te ãma isaze za'ra zéb da hã.

61Ta norĩ hã sima si te te rowasu'u za'ra nherẽ, ma tô imreme hã sina waihu'u za'ra, Zezusi hã. Tahawa, te tãma nharĩ za'ra, ãne:

— E ĩmreme hã asiwi wẽ'õ za'ra wa'aba wa, te za ĩrẽme za'ra wa'wa. 62Ti'ai ãma Dasiré Ipodo hã apâ hâiwa u morĩ ré, 'madâ'â za'ra wa'aba wamhã, e niha te za tawamhã asima irowasu'u za'ra wa'wa. 63'Re ihâimana u'âsi mono pẽ'ẽzani si te za te te dama 're anhomri, dadâ'â ãna 're idahâimana u'âsi za'ra mono zé hã. Dasi'uihâ na da te dasina 're uwaimrami za'ra mono õ di za. Marĩ na te aima 're irowasu'u za'ra wa'aba mono zéb zarina, te za Ipẽ'ẽzani hã te te dama 're anhomri, 're idahâimana u'âsi za'ra mono zéb da hã. 64-65Ãne, wa aima ĩsiwasu'u za'ra wa'wa, waihu'u za'ra wa'aba da. Tane nherẽ, ãne aima ĩsiwasu'u za'ra wa'aba nherẽ, aihĩni ĩmreme na ĩzaze za'ra wa'aba õ di za, ãté. Dasi'uihâ na da te 're ĩzazei waihu'u za'ra mono õ di za. Ĩmama si te te dama 're anharĩ mono wapsi, te za ĩmreme na da te 're ĩzaze za'ra. Ãne wa tô aima rowasu'u za'ra wa'wa aré. — Ãne Zezusi ma tô tãma rowasu'u za'ra. E marĩ wa. Da'ahâ na isiré 're danomro mono nherẽ, aihĩni te te sazei uptabi za'ra õ wa. Ta norĩ hã tô senai õ na, ma tô Zezusi hã sina waihu'u za'ra. Duré te te dama ihâiba nhomri da hã ma tô sina waihu'u siro, Zezusi hã.

Tahawa, ma tô aré dama rowasu'u, ãne:

— Dasi'uihâ na da te 're ĩzaze za'ra mono õ di za. Ĩmama si te te dama 're anharĩ mono wapsi, te za da te 're ĩzaze za'ra.

66Tawamhã da'ahâ na oto isiré 're danomro mono õ di, isazei'wa norĩ hã. Imreme te te wapari ze za'ra õ wa, ma tô oto rẽme za'ra ni. 67Tahawa, te Zezusi hã tisiré 're inomro mono norĩ hã sadanharĩ za'ra, ãne:

— E a norĩ wa'aba zama te za ĩrẽme za'ra wa'wa.

68Tawamhã Sima Pedruhu si te asa tãma tinha, ãne:

— Mare di. Wa te airẽme za'ra õ di za. Wa te airẽme za'ra wamhã, e 'wa tẽme, wa za 're wanomro, rowasu'uwẽ hã wa te 're iwapari za'ra mono da hã. Aimreme si wama pire za'ra di. Aimreme na si da te 're asaze za'ra mono wamhã, rowẽ u'âsi te za ai'ãma 're danomro. Te za duré hâiwa ãma 're dadâ'â za'ra mono ãna 're dahâimana u'âsi za'ra, 'Re ihâimana u'âsi mono 'rata. 69'Re ihâimana u'âsi mono, ma tô we asatõ. Wa norĩ hã wa tô asaze za'ra ni. A hã 're aimorĩ wẽ uptabi di. Ãne na wa tô aiwaihu'u za'ra ni.

70Tawamhã Zezusi asa te tãma nharĩ za'ra, ãne:

— A norĩ wa'wa hã 12 na aihâiba za'ra wa'wa hã wa tô aipisutu za'ra wa'wa, ĩsiré 're anomro aba mono da, dama 're ĩzadawa wasu'u za'ra wa'aba mono da. Tane nherẽ, misire Wa'uburé nhib'a'uwẽ te 're mo, asiré wa'aba.

71Wa'uburé nhib'a'uwẽ hã te te tãma wasu'u za'ra wamhã, Zuda te wasu'u, Sima Icariotihi 'ra hã. Ta hã 12 na Zezusihi siré 're inomro mono norĩ siré 're morĩ nherẽ, te za niwapsi dama hâiba nho, Zezusi hã.

Currently Selected:

Zuwã 6: xavBP

Highlight

Copy