Luca 11

'Re ihâimana u'âsi mono ma, 're idamreme zusi mono zéb da na, ãma isisanhozé wasu'u

Mateu 6.5-15; 7.7-11

1Tawamhã nimahã bâtâ na, te Zezusi hã nhamra, Timama ma, mreme da. Tãma mreme pari, ma tô misi isiré 're inomro mono norĩ hã 'mai'mahâ, ãne:

— Wanhib'apito, ma'ãpé wama waihu'u za'ra na, 'Re ihâimana u'âsi mono ma, 're iwamreme zusi mono zéb da hã, wa te waihu'u za'ra da. Zuwã hã tinhimi'ubumro norĩ ma, te te iwaihu'u ne, te za wama iwaihu'u za'ra, wa te wasiwi waihu'u da.

2Tahawa, ma tô Zezusi hã asa tãma nharĩ za'ra, ãne:

— Ãne te za 're aimreme zusi aba mo, 'Re ihâimana u'âsi mono ma:

“Wamama, asisi wẽ na uburé da te 're aiwaihu'u za'ra mono da, wa aima da'ãma 're ĩmreme. Uburé da'ãma 're asib'a'uwẽ mono da, wa duré da'ãma 're ĩmreme.

3Awẽ sidâpâsi, wei wama 're anhomri mono, wasa hã ãma 're iwasaihuri mono zéb da hã.

4Dawasédé hã da te wa'ãma 're 'manharĩ za'ra mono wa, wa te wasina 're i'madâ'â za'ra mono õ zarina, a hã duré wa'ãma 're ab'madâ'â mono õ di za, wawasédé hã.

Duré, 're wa'ab'madâ'â nhimini mono õ di za, Wa'uburé hã te te 're wa'a'upi mono wa, wawasété u 're warere'e tõ mono da.”

5Taha pari, te tãma ãma romnhimiré'é za'ra, tisiré 're inomro mono norĩ ma, ãne:

— Ãté, asiwadi te za mara wa'wa atẽme ti'maiwisi 'wa, asõrõwa wa'aba u hã. Tawamhã ãté marĩ õ wa, te za ai'maimorĩ 'wa, asiwadi hâiba amo nhorõwa u. Ãhã wamhã, rowi te za tãma i'manharĩ 'wa ãne: “Wa we atẽme mo, i'u'ẽtẽ wapu hã ĩma 'manhomri da a'â taré. Tahawa, te za si'ubdatõ ĩma isõ a'â. 6Nimosi ma tô we ĩtẽme wi, ĩsiwadi hã, romhâ hawimhã. Tane nherẽ, marĩ õ di, te tãma isõmri da hã.” Ãté, ãne te za tãma i'manharĩ 'wa, 'ri tede'wai ma.

7-8— Tahawa, te za ãté asa aima 'manharĩ 'wa: “Tane nherẽ, ĩ'utu zei õ di. Tahawa, i'u'ẽtẽ wapu hã te aima sõmri neza. Wa tô 'rinhito. Ĩ'ra norĩ me, wa oto wanhotõ za'ra ni.” Ãté, ãne te za aima 'manharĩ 'wa, asiwadi wa'wa hã. Tazahã, te za sô wahudu, i'u'ẽtẽ wapu zô, tiwi iwaptẽrẽzéb uwaibaba, te te aima 'manhomri da. E marĩ wa, te za aima 'manho. E asiwadi wa, te za aima 'manho. Mare di. Taha wab õ di. Marĩ õ wa, nasi tiwi waptẽrẽ wa, te za aima 'manho. 9-10Tahawa, 'Re ihâimana u'âsi mono wi, te za iwẽ hã 're iwaptẽrẽ u'âsi za'ra wa'aba mo. Tawamhã te za tô te te aima 're anhomri 'wa. Iwẽ zô si te za duré asima 're asõpré u'âsi aba mo. Tawamhã taha zarina te za tô te te aima ãma 're a'uwaimrami 'wa, 'Re ihâimana u'âsi mono hã, 'râwi aima 're hâimana za'ra wa'aba mono da. Duré ni'wa hã 'ri tede'wa zô, te te 're i'ridawa ta'a mono ne, te za iwẽ hã tiwi 're iwaptẽrẽ za'ra wa'aba mo. Tawamhã 'ri tede'wa te te tãma i'ridawa ne, te za tô te te aima 're anhomri 'wa, iwẽ hã, 'Re ihâimana u'âsi mono hã. 11Ãne, wa za duré aima ãma romnhimiré'é za'ra wa'wa. Damama na 're ai'maihâimana aba mono wamhã, ãté ai'ra hã pe'a hã te za aiwi waptẽ. E tawamhã, te za wahi hã tãma isõ. Mare di. Pe'a si, te za tô tãma isõ, te te 'rẽne da. 12Duré ai'ra hã, si'a're hã te te aiwi waptẽrẽ wamhã, e te za apa'apa 'wa nhi'odo hã tãma isõ. Mare di. Si'a're si, te za tô tãma isõ. 13Tane duré, a norĩ wa'wa hã 're anomro wẽ uptabi aba mono õ nherẽ, te za marĩ iwẽ si tô ai'ra norĩ ma 're isõmri za'ra wa'aba mo. Aimama 'wa hã hâiwa ãma 're ihâimana mono hã, te za asõpru wa'aba zém nhipai u, iwẽ hã te te aima 're sõmri za'ẽtẽ za'ra wa'wa, tiwi 're rowaptẽrẽ za'ra wa'aba mono wamhã. Tipẽ'ẽzani hã te za te te aima 're anhomri 'wa.

Bezebu na, wa'uburé norĩ wada'uri'wa nhisi wasu'u

Mateu 12.22-32; Marcu 3.20-30

14Tawamhã Zezusi hã aibâ ma, ma tô wa'uburé hã time. Ipẽ'ẽ 're, sãmra wa, mreme waihu'u õ di aré, aibâ hã. Oto aibâ hawi watobro wamhã, ma tô oto mreme watobro, aibâ hã. Tahawa, ma tô ãma tatob'uzu za'ra ni. 15Tazahã, ni'wam norĩ hã dame isimasam norĩ hã, te Zezusihi ma nharĩ wasété za'ra, ãne:

— Bezebuhu zadawa para, ma tô wa'uburé hã te te dama 're anhamra, wa'uburé norĩ nhib'apito zadawa paramhã.

16Ihâiba amo norĩ hã te duré wada'uri za'ra, ãne:

— Ma'ãpé wanho'a, marĩ dama i'manharĩ waihu'u'õ hã wama 'manharĩ za'ra na, aiwaihu'u pese na, 'Re ihâimana u'âsi mono zadawa para, wa'uburé, dama 're i'anhamra mono na, wa te ãma aiwaihu'u za'ra da.

17-19Tahawa, ma tô sina waihu'u za'ra, te te ãma irosa'rata wasété za'ra na, Zezusi hã. Tahawa, te tãma ãma romnhimiré'é za'ra, ãne:

— Danhib'apito nhib'a'uwẽ norĩ hã 'râwim nherẽ, oto sisada 're simasa mono wamhã, te aré 're si'uprosi. Duré, dasisãnawã nherẽ, dasisada 're dasimasa mono wamhã, te aré duré 're dasi'uprosi. Tane duré, Satanasihi nhib'a'uwẽ norĩ hã sisada 're simasa mono wamhã, e niha te za sina 're sapa'a za'ra. Waihu'u õ di, ta norĩ hâimanazé hã. Ma tô ĩma inharĩ za'ra wa'wa, Bezebuhu zadawa para, wa'uburé te dama 're i'anhamra mono na. Asiré norĩ hã bété. E 'wa sadawa para, te bété wa'uburé norĩ hã te te dama 're sãmra za'ra, ta norĩ hã. E Bezebuhu zadawa para. Mare di. Ãne, wasu'u za'ra wa'aba õ di. Tahawa, ma tô ĩwasu'u za'ra wa'wa, i'upa na, Bezebuhu zadawa para, wa'uburé, te dama 're i'anhamra mono na. 20Tô sena, wa 'Re ihâimana u'âsi mono zadawa para si, te dama 're anhamra, wa'uburé hã. Taha zarina si, te za oto iwaihu'u za'ra wa'wa, tô sena 'Re ihâimana u'âsi mono, ai'ãma 're isib'a'uwẽ za'ra wa'aba mono zéb da, te te ãma isãna'rata na hã.

21Te duré tãma ãma romnhimiré'é za'ra, ãne:

— Ãté, aibâ isiptede hã te za 're 'manhamra. Tawamhã si'wa'rutu ré, te za tinhorõwa te te dawi 're 'madâ'â pese. Tahawa, te za rowẽ na sa 're romnhimi'wara, isibro hã, da te upi ãna. 22Ãté aibâ isiptete u te za oto wi, isipai u isiptete uptabi hã. Tãma siptete wa, te za 'marõwĩ. Te za tiwi waibu isi'wa'rudu hã, te te i'umnhasizé hã. Uburé isibrob zama te za tiwi waibu. Tawamhã te za oto dama ãma aipé.

23Te duré tinha:

— Ni'wam norĩ hã ĩwẽ'wa 're nomro mono õ wamhã, ta norĩ hã te ĩzada 're hâimana za'ra. Duré ni'wam norĩ hã te te 're ĩpawaptob za'ra mono õ wamhã, ĩtẽme te 're ida'ubumroi mono na hã ta norĩ hã ĩnhiti dazatõrĩ'wa na te za 're hâimana za'ra.

24Te duré tãma ãma romnhimiré'é za'ra, Zezusi hã, ãne:

— Ãté wa'uburé hã te za aibâ hawi 'maiwatobro. Te za duré a'ubuni wi 're mo, â'õ wa'wai baba. Te za dazô 're rĩtĩ. Dazô 're rĩtĩ baba mono wa, nimomo wa'utu õ wa, te za sima tinha: “Ĩnhorõwa 'rata u, wa za apâ mo, ãma 're ĩnhorõwa u'âsi mono da, ipẽ'ẽ 'remhã.” Ãne te za sima tinha. 25Tawamhã te za apâ mo aibâ u, ipẽ'ẽ 're, apâ sébré da. Tawamhã ihawi watobro haré, te aré hâiba baba na 're hâimana, 'ri hã baba na 're simasa mono wa, 'ri 're wa'wa su'u na 're isimasa mono ne, duré 'ri paramhã robza'ra wẽ u'âsi, 're iromnhimi'wara mono ne. Tahawa, wa'uburé ma, wẽ di, aibâ hã apâ ãma 're isõrõwa mono da hã. 26Tawamhã te za rob u watobro, tisiré norĩ zô morĩ da, wa'uburé hã. Tawamhã te za itẽme ãwisi za'ra, 7 na ihâiba hã isipai u iwasété uptabi za'ra hã, si'u ãma 're sõrõwa za'ra mono da, aibâ ãma. Ãhã wana ré hã tãma rowẽ prã na te aré 're sãmra, wa'uburé misi, ãma 're sõrõwa mono ré hã, ipẽ'ẽ 'remhã. Ahâ na oto ãma 're sõrõwa za'ra mono wa, tãma rowẽ'õ uptabi di oto.

27Taha wasu'u te te dama wasu'u pari, te pi'õ hã Zezusihi ma tinha, dawa'wa isa hã:

— Asépata'wai ma, 're rowẽ mono di za, aiprédu'wai ma. A hã isimiprédu wa, tãma 're rowẽ mono di za.

28Tahawa, te Zezusi hã asa tãma tinha, ãne:

— Tane tô. Tãma 're rowẽ mono nherẽ, isipai u ni'wam norĩ ma, 're rowẽ uptabi za'ra mono di za. Ni'wam norĩ hã, 'Re ihâimana u'âsi mono zadawa wasu'u hã tipo're na te te 're wapari za'ra mono wamhã, duré te te 're 'madâ'â pese za'ra mono wamhã, tãma 're rowẽ uptabi za'ra mono di za.

Zonahã wasu'u, apito Salomahã wasu'u me

Mateu 12.38-42; 16.1-4; Marcu 8.11-13

29-30Tawamhã Zezusihi tẽme ma oto dasina tahâ'â ni. Tahawa, te dama tinha, ãne:

— E niha ã nimosi hã aipoto tém norĩ i'aihâimana wasété za'ra wa'wa. Ma tô ĩma i'ru za'ra wa'wa, marĩ dama i'manharĩ waihu'u'õ hã te 'manharĩ da, asõ'a za'ra wa'aba, ĩwaihu'u pese na, 'Re ihâimana u'âsi mono te te ĩwẽsãmri na, ĩwaihu'u za'ra wa'aba da. Tahawa, taré 'madâ'â za'ra wa'aba da, niha hã marĩ te 'manharĩ õ di za. 'Re ihâimana u'âsi mono hã, tiwaihu'u pese na niha Zonahã ma, te te i'manharĩ wẽ ne, te za niwapsi 'manha, dama i'manharĩ waihu'u'õ hã. Duréihã, Zonahã ma, te te 'manharĩ wẽ wamhã, isadawa para datẽme imorĩ na, ma tô waihu'u za'ra, Niniwé ãma 're idasi'ubumroi mono norĩ hã. Tane, wa hã ti'ai ãma dasiré ĩpoto ma, te za niha ĩma 'manharĩ wẽ, isadawa para atẽme ĩmorĩ aba na, ĩwaihu'u za'ra wa'aba da. 31Niwamhã 'Re ihâimana u'âsi mono, za da'ãma isipo'ozéb ãma hã, duréihã danhib'apito sipi'õ hã Saba na romnhisi ãma te te 're ida'ab'madâ'â mono hã, te za duré asada tihâimana 'wa, aiwasédé hã te te ai'ãma sa'ra wa'aba da, 'Re ihâimana u'âsi mono nho'a. E marĩ wa. Ta hã duréihã romhâ uptabi nherẽ, iwi, apito Salomahã u, isimiroti hã te te wapari da, isimiroti hã dahâimanazém na rowaihu'u na hã wẽ uptabi wa. Taha nhimiroti hã pire nherẽ, isipai u ĩnhimiroti si pire uptabi di. Tane nherẽ, ĩnhimiroti hã aima wapari ze za'ra wa'aba õ di. Tahawa, te za tô i'uwaibaba aiwasédé hã ai'ãma sa'ra wa'wa, danhib'apito sipi'õ hã. 32Niwamhã 'Re ihâimana u'âsi mono, za da'ãma isipo'ozéb ãma hã, duréihã Niniwé na 'ri nho'õmo nhisi ãma 're idasi'ubumroi mono norĩ hã te za asada tihâimana za'ra wa'wa, aiwasédé hã te te ai'ãma sa'ra wa'aba da, 'Re ihâimana u'âsi mono nho'a. E marĩ wa. Duréihã Zona hã 'Re ihâimana u'âsi mono te te tãma 're sadawa wasu'u za'ra mono wamhã, ma tô te te 're wapari za'ra. Tahawa, ma tô ta norĩ hã tiwasété wi 're sipizari za'ra. Zonahã nhimiroti hã pire nherẽ, isipai u ĩnhimiroti si pire uptabi di. Tane nherẽ, a norĩ wa'wa hã ĩzaze za'ra wa'aba õ di, 'Re ihâimana u'âsi mono nhimipisutuzéb zarina, we atẽme ĩmorĩ aba na hã. Tahawa, te za tô i'uwaibaba aiwasédé hã ai'ãma sa'ra wa'wa, Niniwé ãma 're idasi'ubumroi mono norĩ hã.

Rob'uiwẽzé wasu'u

Mateu 5.15; 6.22-23

33Tahawa, te duré tãma ãma romnhimiré'é za'ra, ãne:

— Rob'uiwẽzé hã da te ro'o wamhã, e te za nima niwĩ dawi simi'uri ni. E piza'a na, te za upsibi ni. Mare di. Isima'warazém na si te za sõ'awi da te 're sõré, rowa'a na 're danhisisi mono da. Taha da, te za ro'o ni, rob'uiwẽzé hã. 34Tane duré dato hã, aiwa rob'uiwẽzé me. Datõmo wẽ wamhã, dama rob'madâ'â wẽ di. Datob'a wamhã, dama rob'madâ'â waihu'u õ di. Tane duré, a norĩ wa'wa hã asimirosa'rata wẽ za'ra wa'aba wamhã, te za iwẽ hã asimirosa'rata na 're iwaihu'u za'ra wa'aba mo. Duré, asimirosa'rata wasété za'ra wa'aba wamhã, iwẽ hã 're waihu'u za'ra wa'aba mono õ di za. 35Tahawa, 'râwi te za asimirosa'rata na 're asi'madâ'â za'ra wa'aba mo. 36Wa za duré aima ãma romnhimiré'é za'ra wa'wa, ãne: Rob'uiwẽzé hã te te aima 're rob'uiwẽ za'ra wa'aba mono wamhã, uburé aihâiba ma hã 're rowa'a za'ra wa'aba mono di za. Aiwi 're robra za'ra wa'aba mono õ di za. Tane, asimirosa'rata wẽ za'ra wa'aba wamhã, te za aiwasédé hã 're iwẽ'õ za'ra wa'aba mo, iwẽ si 're waihu'u za'ra wa'aba mono da.

37Tawamhã tame te te dama rowasu'u pari, ma tô aibâ hã tãma tinha, isõrõwa u morĩ da, isiré sa da. Aibâ hã, farizeu. Tahawa, ma tô Zezusi hã ãma saze. Tawamhã 'ri para u sébré wamhã, te nhamra, sa da. 38Tane nherẽ, sai õ ré, simisõi õ di Zezusi hã, dahi'rada hã 're isimisõ za'ra mono zéb zarina hã. Tahawa, te farizeu hã tãma tinha, tipẽ'ẽ na, simisõi õ wa. 39Tawamhã ma tô Wanhib'apito hã tãma tinha, Zezusi hã:

— Farizeu norĩ, wa za aima ãma romnhimiré'é za'ra wa'wa, ãne: Hâsizé hã duré pratu hã imana wawip si, da te 're upsõ za'ra mono wamhã, iwa'wamhã wasété di, zahadu upto wa. Tane, a norĩ wa'wa hã 're anomro wẽ wa'aba mono newa, da te 're ai'madâ'â wẽ za'ra wa'aba mono da, te 'Re ihâimana u'âsi mono nhimiroti ipire prã norĩ si 're i'madâ'â pese za'ra wa'aba mo, danho'a. Tane nherẽ, aipẽ'ẽ 'remhã asimirosa'rata wasété na te zahadu iré 're aihâimana u'âsi za'ra wa'aba mo. Danhibrob na si te duré 're ida'ruiwapari za'ra wa'aba mo. Aihâimana nhipese zarina, te duré marĩ na dawi 're asipsaihuri za'ra wa'aba mo. 40E niha waihu'u za'ra wa'aba õ di bété. Uburé Dapoto'wa hã e wahâiba na si, ma tô te te 're wa'awaihu'u. Mare di. Wanhimirosa'rata na zama, ma tô te te 're wa'awaihu'u, 'Re ihâimana u'âsi mono hã. 41Tahawa, ma'ãpé isibrob'õ norĩ ma, 're asõprub za'ra wa'aba mono. Ãne dama 're 'manharĩ za'ra wa'aba mono wamhã, asimirosa'rata wẽ na, te za te te 're ai'awaihu'u 'wa, 'Re ihâimana u'âsi mono hã.

42— Farizeu norĩ, a norĩ wa'aba ma, aima 're ropipa uptabi za'ra wa'aba mono di za. Ma tô asimiromhuri wa'â hã 'Re ihâimana u'âsi mono ma, 're ipo'o u'âsi za'ra wa'aba mo, wesuirã zapore wa'â hã, suru na tãma 're sõmri za'ra wa'aba mono da. Uburé danhipi wazarizé wa'â hã tãma 're po'o nhimini za'ra wa'aba mono õ di. Ta hã, wẽ di. Tazahã, isimarĩ'õ norĩ ma, 're asõprub za'ra wa'aba mono õ di. Duré 'Re ihâimana u'âsi mono, 're sawi pese za'ra wa'aba mono õ di. Ma tô tãma 're asõprub za'ra wa'aba mo. Ibâre aré isimarĩ'õ norĩ ma, 're asõprub za'ra wa'aba mono 'wa'âhã. Tazahã, ma tô 're i'mararé za'ra wa'aba mo. Tahawa, niwapsi aima 're robze za'ra wa'aba mono õ di za.

43— Farizeu norĩ, ai'ãma ĩpẽ'ẽzé za'ra wa'aba di. Aima 're ropipa uptabi za'ra wa'aba mono di za. Dama ipire norĩ simasisizém na, 're asimro zei wa'aba mono di, rowahutuzéb ãma. Duré 'ri nhi'riti wa, da te dasina 're i'ubumroi mono zéb ãma asisi pire na, da te 're asawi za'ra wa'aba mono wamhã, asina 're dawapari ze za'ra wa'aba mono di. Tahawa, niwapsi aima 're robze za'ra wa'aba mono õ di za.

44— A norĩ wa'aba ma, aima 're ropipa uptabi za'ra wa'aba mono di za. Tahawa, wa za aima ãma romnhimiré'é za'ra wa'wa, ãne. Ãté ni'wa hã adâ'â 'ru uwaibaba te za mo, sisa'rese ãna, ti'ai haré newa. Tahawa, te za siwasété. Tane aiwẽ za'ra wa'aba newa, asirã za'ra wa'aba zarina 're danomro mono wamhã, te za 're dasiwasété za'ra. Tahawa, aiwẽ prã za'ra wa'aba wa, aima 're robze za'ra wa'aba mono õ di za.

45Tawamhã aibâ hã te Zezusihi ma tinha, ãne:

— Rowahutu'wa, farizeu norĩ, wẽ'õ za'ra wa, ma tô ta norĩ zu, wa norĩ zama hã iwa'awẽ'õ.

46Tawamhã Zezusi te asa tãma tinha, ãne:

— Rowahutu'wa norĩ, ai'ãma ĩpẽ'ẽzé za'ra wa'aba di. A norĩ wa'aba ma zama, aima 're ropipa uptabi za'ra wa'aba mono di za. Wa za aima ãma romnhimiré'é za'ra wa'wa, ãne: Ãté marĩ ipire uptabi hã te za ni'wa hã dama sibu, te te sõihi waptob ãna. Tane a norĩ wa'wa hã. Dama asimiroti za'ra wa'aba zé hã ahâ uptabi na ma tô dama 're ipisutu za'ra wa'aba mo, da te 're 'madâ'â za'ra mono da, 're dapawaptob za'ra wa'aba mono ãna. Tahawa, te robzei'õ na oto 're danomro. Tahawa, aima 're robze za'ra wa'aba mono õ di za.

47-49— A norĩ wa'aba ma, aima 're ropipa uptabi za'ra wa'aba mono di za. Aihi'rata aba norĩ hã ma tô 'Re ihâimana u'âsi mono zadawa 'mahârâ 'rata 'wa norĩ hã te te 're simro, isadawa wasu'u na te te 're wẽ'õ za'ra mono wa. A norĩ wa'wa hã isadawa wasu'u na, 're wẽ za'ra wa'aba mono newa, ma tô ẽtẽ tõmo wawẽ hã 're isõré za'ra wa'aba mo, ab're 'wawi, dama ipibu pese zéb da, i'ru hã. Tazahã, aihi'rata aba ne, ma tô isadawa wasu'u hã 're iwẽ'õ za'ra wa'aba mo. E marĩ, te bété wasu'u, ab're 'wawi ẽtẽ tõmo wawẽ, 're isõré za'ra wa'aba mono hã. Aihi'rata 'wa, isadawa 'mahârâ'wa norĩ te te 're isimroi mono zé, ma tô 're isaze za'ra wa'aba mo. Ãne te wasu'u, ab're 'wawi ẽtẽ tõmo wawẽ, 're isõré wa'aba mono hã. Aiwana wa'aba, ma tô romhâ ré dapo're pu'u, 'Re ihâimana u'âsi mono hã. Datẽme, wa za te 're da'azatõrĩ, da te dama 're ĩzadawa wasu'u za'ra mono da. Tazahã, ĩzadawa para õ nherẽ, te za da te 're simro, ni'wam norĩ hã. Rowasédé hã te za duré da te tãma 're 'manharĩ za'ra, ni'wam norĩ ma. Ãne, tãma waihu'u pese siromo wa, ma tô romhâ ré dapo're pu'u, 'Re ihâimana u'âsi mono hã. 50-51Ropoto na'rata hawi, ma tô ãma dasiwi sãna'rata ni, isadawa 'mahârâ'wai pãrĩ na hã. Imorĩ'rada hã ma tô Abéu hã wĩrĩ 'rata ni. Abéu za'u si, ma tô isadawa wasu'u'wa sidâpâsi, da te 're simro. Zacariaha zama, ma duré wĩrĩ ni, 'ri nho're ãma. 'Re ihâimana u'âsi mono nhorõwa 'ri nho're, ma wĩrĩ ni. Ibabarã na te 'ri hã za, 'ri iwẽ hã. Õ niwĩmhã, tãma danhoprubzé nomrizé te za, wedeza ne hã. Tame sab ré, ma wĩrĩ ni, Zacaria hã. Tahawa, te za 'ruiwa'âbâ za'ra, uburé tizadawa wasu'u'wa norĩ hã, da te 're isimroi mono norĩ hã. Tahawa, ã nimosi dapoto té mono hã i'aihâimana za'ra wa'wa hã, te za aima rob'manharĩ za'ra wa'wa, isadawa wasu'u'wa norĩ, isimirowasu'u na 're wẽ'õ za'ra wa'aba mono 'ru te.

52— Rowahutu'wa norĩ, a norĩ wa'aba ma, aima 're ropipa uptabi za'ra wa'aba mono di za. E marĩ wa. Wa za ãma romnhimiré'é, ãne: Ãté, aibâ hã te za 'manhamra, 'ridawa tétézéb ré. Ta hã 're zasi mono õ di, 'ri para u hã. Duré, 'ri para u 're danhisisi mono õ di, te te dawi 're azawi mono wa, 'ridawa tétézé hã. Tane, a norĩ wa'wa hã 're 'madâ'â pese za'ra wa'aba mono õ di, 'Re ihâimana u'âsi mono nhimiroti hã. Ma tô duré dawi 're isawi za'ra wa'aba mo, isimiroti mono bâ, da te 're waihu'u za'ra mono tõ da.

53-54Tawamhã rob u, ma tô watobro, Zezusi hã. Watobro wamhã, te rowahutu'wa norĩ hã tãma nharĩ za'ra, farizeu norĩ me. Te te sadawa 'ru za'ra wa, te duré sadanharĩ na sima tirẽ, timreme na te te ãma upa zô, te te ãma upai wa, te te siwi wẽ'õ pese za'ra da. Tazahã, timreme na te te ãma upai õ di, Zezusi hã.

Currently Selected:

Luca 11: xavBP

Highlight

Copy