Luca 15
15
Pone'ẽrebâ isimanizé wasu'u
Mateu 18.10-14
1Tawamhã Zezusihi u ma tô aihutu ni, da'ahâ na, imreme hã da te wapari za'ra da. Danhib'apito ma, rob'uiprazé arĩ ubumroi'wa norĩ hã ma tô duré itẽme aihutu, siwa'ru 're inomro mono norĩ zama. 2Tawamhã farizeu norĩ hã te ãne tãma nharĩ za'ra, 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ me:
— Õ hã ma tô ãma 're siwadi za'ra, siwa'ru 're inomro mono ãma hã. Ta norĩ siré, te nasi tisa.
3Tahawa, Zezusi hã ma tô tãma ãma romnhimiré'é za'ra, ãne:
4— Asimizama hã ahâ wamhã, ãté misi te za aiwi 'maihaimani, 100 na ihâiba za'ra wamhã. E tawamhã, sô airĩtĩ mono õ di za, aiwi i'masimani zô hã. Te za tô sô airĩtĩ mo, apâ âri da. Asimizama zô airĩtĩ mono ré, te za 99 na ihâiba za'ra hã asa'u daba'wara, itehutu wa. 5Tawamhã aiwi isimani hã oto sãmri wamhã, atoi uptabi di za. Tahawa, te za asisé we i'â apâ, sãmri wẽ te. 6'Ri tẽme ãwisi wamhã, te za sô aihârâ za'ra, asiwadi norĩ zô. 'Râwi ai'rata 're isõrõwa za'ra mono norĩ zô zama, te za sô aihârâ za'ra. Tawamhã te za tãma irowasu'u za'ra, ãne: “Ãhã na ĩma rowẽ di. Ĩnhimizama hã wa tô tisã, ĩwi isimani hã. Ĩzabâdâ te za 're ato za'ra wa'aba mo.” Ãne te za tãma irowasu'u za'ra.
7— Tane duré, ni'wa hã siwa'ru 're imorĩ hã tiwasédé hã te te oto rẽme pese wamhã, hâiwa ãma 're isi'ubumroi mono norĩ hã te za tãma 're to za'ra, misi nherẽ. Õhõ ãma si, te za 're toi uptabi za'ra, 're inomro wẽ mono norĩ nhipai u hã, 99 na ihâiba za'ra nhipai u hã. Ta norĩ hã 're nomro wẽ mono wa, tiwasété na 're isiwẽ'õ za'ra mono da hã, mare di.
Rob'uiprazé isapotore simanizé wasu'u
8Tawamhã Zezusi hã te duré tãma ãma romnhimiré'é za'ra, ãne:
— Pi'õ te, rob'uiprazé hã ahâ wamhã, ãté misi te za tiwi 'maihaimani, 10 na hâimana za'ra wamhã, isapotore hã. E tawamhã sô 're rĩtĩ mono õ di za, tiwi 'masimani wamhã. Te za tô sô 're rĩtĩ. Iro'ore hã te za duré sô ro'o, sô rĩtĩ da. Te za duré sô 'ri 're wamro. Sô 're rĩtĩ pese mono wamhã, te za tô oto tisã. 9Tawamhã te te sãmri wẽ te, tisiwadi norĩ zô te za oto tihârâ za'ra. I'rata isõrõwa za'ra norĩ zô zama, te za tihârâ za'ra. Tawamhã te za oto tãma rowasu'u za'ra, ãne: “Ãhã na, ĩma rowẽ di. Rob'uiprazé isapotore hã wa tô tisã, ĩwi isimani hã. Ĩzabâdâ te za 're ato za'ra wa'aba mo duré, a norĩ wa'aba zama.” Ãne te za tãma rowasu'u za'ra.
10— Tane duré, ni'wa hã siwa'ru 're imorĩ hã, tiwasédé hã te te oto rẽme pese wamhã, hâiwa ãma 'Re ihâimana u'âsi mono ma romhuri'wa norĩ hã te za ãma 're to za'ra, tiwasédé hã te te rẽme pese wẽ te, misi nherẽ.
Ai'repudu, timama te te irẽmezé wasu'u
11Zezusi hã te duré tãma ãma romnhimiré'é za'ra, ãne:
— Aibâ 'ra hã maparane. 12Tawamhã te bâtâ na ino hã timama wi waptẽ, tinhibrom na ãma tãma siwanhizari zahuré da.
— Tahawa, ma imama hã ãma tãma aipo'o zahuré. 13Ãhã wamhã, ãma ronomro õ ré, te uburé tinhibro hã sima ubumro, darob amo u morĩ da, ino hã. Darob amoi u wisi wamhã, wasété ahâ na te 're mo. Marĩ na si, ma taré tinhibro hã uprosi, imama te te tãma ipo hã.
14— Tawamhã tinhibro hã ma uburé uprosi pese oto, ai'repudu hã. Tawamhã tame darob ãma 're idasi'ubumroi mono norĩ hã ma tô duré mram na 're dasi'ubumro. Dasai õ di. Tahawa, ma tô ai'repudu hã mra hã dame sépata. 15Tahawa, te aibâ u mo, te te tãma 're romhuri mono da, tame. Ãhã wa, ma tô aibâ hã satõ tiburu u, buru ãma uhâbâ te te tãma 're 'madâ'â mono da. 16Mrap te, ma tô sima wẽ, uhâbâ sa na 're sai mono da. Taha wamhã, mra te te 're sépata mono nherẽ, ai'reputu ma hã, da te 're ai mono õ di. 17Tahawa, ma tô sima tinha ãne: “Ĩmama ma, romhuri'wa norĩ hã ahâ nherẽ, ma tô dasa hã 're si'azahâri. Wa hã wa ãme mra hã te 're sépata za'ẽtẽ. 18Tahawa, wa za oto mo, ĩmama u apâ. Ĩwisi wamhã, wa za ĩmama ma ĩsiwasu'u, ãne: ‘Ĩmama, ĩwasété na wa tô 're mo. 'Re ihâimana u'âsi mono nhimiroti hã, wa tô upa. Asimiroti zama, wa tô duré upa. 19Ĩwasété wa, ãté ĩ'ãma 're ai'ra mono õ di za oto. Aima romhuri'wa da, oto 're ĩmorĩ da, te za ĩma ipisu.’ ” Ãne ma tô rosa'rada hã sima 'manha, ai'repudu hã.
20— Tawamhã aré 're isãmra mono zém hawi te oto mo, timama nhorõwa u. Taha wamhã, zahadu romhâ ré, ma imama hã tisã ti'ra hã. Tahawa, te imama hã itẽme wara, i'ra hã te te sina pẽ'ẽ tari wa. Itẽme wisi wamhã, tinho'utu ma tô ti'â, ti'ra hã. Tob'rata hârâ na, ma duré sawi. 21Tawamhã te timama ma tinha, ai'repudu hã, ãne: “Ĩmama, ĩwasété na, wa tô 're mo. 'Re ihâimana u'âsi mono nhimiroti hã, wa tô upa. Asimiroti zama, wa tô duré upa. Ĩwasété wa, ãté ĩ'ãma 're ai'ra mono õ di za.” Ãne te timama ma tinha, ai'repudu hã.
22— Wasété na 're morĩ nherẽ, te te wẽ'õ õ di, ti'ra hã, imama hã. Tahawa tite romhuri'wa norĩ te oto sa'ẽtẽ 'mahârâ za'ra, zazahâ ihâiwẽ we te te siwi 'mai'âri da, te te siwi ãma uza da. Duré isiptõmohi wasisizé, te te tãma sẽrẽ za'ra da, ma tô 'mahârâ za'ra. Duré ipara'uza zama te te tãma sẽrẽ za'ra da, ma tô duré 'mahârâ za'ra. 23Tawamhã te duré tãma nharĩ za'ra, ãne: “Powawẽ zapu zama, we asiwi 'mai'ãwisi aba, wĩrĩ aba da, ihâipe hã. 24E marĩ wa. Ĩ'ra hã dâ'â newa. Tane nherẽ, dâ'â õ di. Ma tô aré ãma ropsisa'rese'õ. Tane nherẽ, ma tô we apâ wi. Tahawa, wasa hã wa za oto wasiré huri ni, rowẽ te.” Ãne imama te tãma nharĩ za'ra, te te tãma 're iromhuri za'ra mono norĩ ma. Taha na ma tô dasa hã dama 'manha.
25— Tawamhã ino hã wisi wamhã, idub'rada hã te buru ãma nhamra. 'Ri tẽme te ãhã wamhã oto mo. Te te oto 'ri u rob'umhutu wa, ma tô rowamreme hã wapa, te te irowamreme za'ra hã. Dapara 'rasi zama, ma tô wapa, rowẽ te, da te dasima iromhu'u za'ra zé hã. 26Tahawa, te romhuri'wa hã 'mahâ, ãne: “E marĩ, te 'manharĩ za'ra ni.” Ãne te sadanha.
27— “Ano hã rowẽ na ma tô wei wi. Tahawa, wei wisi wẽ te, ma tô wama ti'ru aimama hã, powawẽ ihâipe hã wa te wasiwi wĩrĩ da, wasaihuri da.” Ãne te idub'rata ma rowasu'u, romhuri'wa hã.
28— Tawamhã ma idub'rada hã tizahi. 'Ri para u sébré da hã, te te sima wẽ õ di. Tawamhã imama, ma itẽme watobro, te te tãma nharĩ da, sébré da. Tane nherẽ, sébré zei õ di. 29Ãhã wa, te timama ma tinha, ãne: “Wa hã wa tô te aima 're romhuri pese. Ĩ'ãma wahub ahâ di, te aima 're iromhuri mono ré hã. Niwa, aimreme hã te simini õ di. Tane nherẽ, marĩ ĩma sõmri õ di, pone'ẽrebâ hã, dasa hã ĩsiwadi norĩ ma, te i'manharĩzéb da hã ãma. 30Ãhã na ai'ra hã ma tô wi. Asibro hã tãma ipo hã ma tô pi'õ na si hã uprosi. Tane nherẽ, ma tô wisi wi, dama i'ru, powawẽ ihâipe hã da te tãma 'maiwĩrĩ da.” Ãne te timama ma tinha, idub'rada hã.
31— Tawamhã imama te asa tãma tinha, ãne: “Ĩ'ra, a hã ĩ'rata, te 're asãmra u'âsi mo. Marĩ hã ĩnhibro hã, uburé ate hã. 32Uburé wama rowẽ za'ra wa, wa tô dasa hã dama 'manha, ĩ'ra hã iwisizém na. Ano hã dâ'â newa. Tane nherẽ, dâ'â õ di. Ma tô aré ãma ropsisa'rese'õ. Tane nherẽ, ma tô we apâ wi.” Ãne ma tô ti'ra ma waihu'u.
Currently Selected:
Luca 15: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.
