Luca 16
16
Aibâ ihâimana nhipese wasu'u
1Zezusi hã te duré ãne tãma rowasu'u za'ra, tisiré 're inomro mono norĩ ma:
— Aibâ hã te 're hâimana, isibrob ahâ hã. Tãma iromhuri'wa hã te duré 're sãmra, tãma rob'madâ'â'wa hã. Tawamhã ma tô tãma 'mairowasu'u ni, ãne: “Rob'uiprazé hã te te aiwi 're anhimini, aima rob'madâ'â'wa hã.” Ãne te tãma 'mairowasu'u ni. 2Tahawa, te sô hâ, tãma irob'madâ'â'wa zô. Taha wamhã, te tãma tinha, ãne: “Aiwasu'u hã wa tô wapa. Ĩma 're irob'madâ'â mono zé hã, tâibâ za oto. Te za rob'ui'éré hã oto ĩma isõ, uburé ĩnhimarĩ na 're irob'ui'éré mono zé hã.” Ãne te tãma tinha, tite rob'madâ'â'wai ma.
3— Tawamhã te 'râwi sima tinha, tãma irob'madâ'â'wa hã, ãne: “Ĩnhib'apito, ma tô ĩma tinha, te tãma 're romhuri mono tõ da oto. E marĩ, wa za oto te 're 'manharĩ. Ĩnhiptete uptabi õ di, buru na te dama 're iromhuri mono zéb da hã. Duré ĩnhiséb di za, rob'uiprazém na te 're da'awari mono wamhã. 4Hã, wa tô po're puru oto, marĩ te i'manharĩ da hã, ĩ'ãma 're dasiwadi za'ra mono da. Tawamhã apito te te ĩmei wamhã, ãté ĩsiwadi norĩ hã te za te te siwi 're ĩmrami, tinhorõwa u, isiré 're ĩsa za'ra mono da.” — Ãne te 'râwi sima tinha.
5— Tawamhã te sô hã, apito ma, marĩ te te iwa'âbâ za'ra õ norĩ zô. Tawamhã itẽme iwisi 'rada hã te sadanha, ãne: “E niha tãma iwa'âbâ'õ hã zahadu, marĩ wa'rãmimhã.”
6— “Piza'a, 100 na ihâiba za'ra hã, azeitona 'rãi wa'ui wab ré hã.” — Ãne te tãma siwasu'u.
— Tahawa, te asa tãma tinha, ãne: “Ãhãta iwa'âbâ'õ na, rob'ui'éré hã. Asãmra. 50 na ãma rob'ui'éré, rowa'rãmimhã, tãma wa'âbâ da.” — Ãne te aibâ ma ti'ru, rob'madâ'â'wa hã. Tahawa, te te tãma i'ru zarina, ma tô ahâ prã na ãma rob'ui'éré.
7— Tawamhã aibâ hâiba amo hã ma duré itẽme wi. Tawamhã te sadanha, ãne: “A hã bété, e niha tãma iwa'âbâ'õ hã zahadu, rowa'rãmimhã.”
— “Sa'u hã, miu na ihâiba hã, amnho trigu ré hã te tãma iwa'âbâ'õ hã.” — Ãne te tãma rowasu'u.
— Tawamhã te asa tãma tinha, ãne: “Ma'ãpé, 800 na ãma rob'ui'éré, rowa'rãmimhã tãma isõmri da na.” — Ãne te tãma ti'ru, rob'madâ'â'wa hã. Tahawa, te te tãma i'ru zarina, ma ahâ prã na ãma rob'ui'éré.
8— Te te dama i'rui wasu'u, te te wapari wamhã, te tinha, isib'apito hã: “Pra. E niha rosa'rada tãma iwaihu'u pe.” Ãne te isa'u tãma tinha. — Ãne Zezusi te tãma rowasu'u za'ra, tisiré 're inomro mono norĩ ma.
Ma tô duré tãma waihu'u za'ra, ãne:
— Marĩ zô si, da te 're irosa'rata za'ra mono norĩ ma, waihu'u pese di, rosa'rada hã, rowa'a nhib'a'uwẽ norĩ nhipai u. 9Tahawa, ti'ab ré te za asimarĩ na 're idazawi za'ra wa'aba mo, ãma 're asiwadi za'ra wa'aba mono da. Asimarĩ hã asipara 're rẽme za'ra wa'aba mono wapsi, hâiwa u, asõrõwa u 're asisisi aba mono wi, te za asô 're tob'uzu za'ra wa'wa, asawi'wa norĩ wa'wa hã. — Ãne Zezusi te tãma roti za'ra, tisiré 're inomro mono norĩ ma. 10Te duré tãma nharĩ za'ra, ãne:
— Ãté ni'wam norĩ hã te za danhibrob 'rare hã, dazô te te 're 'madâ'â wẽ za'ra. Tawamhã dama umnhasi wa, te za da te tãma 're pisutu za'ra, danhibrob ahâ na, te te dazô 're 'madâ'â za'ra mono da oto. Tane, danhibrob 'rare, dazô te te 're 'madâ'â wasété za'ra mono wamhã, te za da te 're waihu'u za'ra, isa'ẽtẽ na zama, za dawi 're isipsaihuri za'ra mono na. 11Ti'ai ãma danhimarĩ hã, dazô 're 'madâ'â wasété za'ra wa'aba mono wamhã, e 'wa hã te za marĩ iwẽ uptabi hã te te aima 're pisutu za'ra wa'wa, sô 're 'madâ'â za'ra wa'aba mono da. Mare di. Ni'wa, te te aima 're pisutu za'ra wa'aba mono õ di za. 12Marĩ hã date hã, dazô 're 'madâ'â wasété za'ra wa'aba mono wamhã, e niha te za marĩ iwẽ hã da te aima 're sõmri za'ra wa'wa, ate da. Mare di. Ni'wa te te aima 're sõmri za'ra wa'aba mono õ di za.
13— Dama romhuri'wa hã isib'apito maparane wamhã, aiwa te te tãma 're romhuri wẽ zahuré mono õ di za. Duré sahuré te te 're sawi pese zahuré mono õ di za. Misi te za te te 're sawi pese. Ihâiba amo si te za te te siwi 're wẽ'õ. Duré sahuré te te 're wapari pese zahuré mono õ di za, romhuri'wa hã. Misi te za te te 're wapari pese. Ihâiba amo si te za te te 're 'ruiwapari. Tane, a norĩ wa'wa hã rob'uiprazéb zô si asima 're romhuri za'ra wa'aba mono wamhã, e aiwa asimiromhuri za'ra wa'wa hã za, 'Re ihâimana u'âsi mono ma, romhuri me. Mare di. Aiwab õ di.
Zezusihi nhimirowasu'u hâiba amo
Mateu 11.12-13; 5.31-32; Marcu 10.11-12
14Tawamhã farizeu norĩ hã ma tô Zezusihi mreme hã wapari za'ra. Tawamhã rob'uiprazé wẽ 'wa, 're nomro mono wa, ma tô Zezusihi ma nharĩ za'ra, ãne. 15Tahawa, te Zezusi hã tãma nharĩ za'ra, ãne:
— A norĩ wa'wa hã aiwẽ newa, te ai'ãma 're dawata za'ra wa'wa. Tazahã asimirosa'rata 'wa hã, 'Re ihâimana u'âsi mono ma, waihu'u pese di. Ãté, marĩ na te za dasima ãma 're dawata za'ra, iwẽ newa. Tazahã tãma wẽ õ wamhã, te za te te 're awẽ'õ, 'Re ihâimana u'âsi mono hã.
16— Uburé marĩ hã Mozési te te dama 're i'apisutu mono hã, da te 're 'madâ'â za'ra mono da, duré 'Re ihâimana u'âsi mono zadawa 'mahârâ 'rata 'wa norĩ nhimiroti hã ma tô dasipara bâ si, da te 're pese za'ra, Zuwã Batista datẽme morĩ õ ré. Tawamhã iwasu'uwẽ hã te oto da te 're wapari za'ra, 'Re ihâimana u'âsi mono hã, da'ãma 're isib'a'uwẽ mono zé wasu'u hã. Tahawa, marĩ zô dasima iwẽzéb uwaibaba, da te 're irob'ruiwapari za'ra mono ne, te za oto da te dasima 're rob'ruiwapari za'ra, itẽme 're dasihutu mono da.
17— Pire u'âsi, te za dama 're hâimana za'ra, uburé marĩ hã, 'Re ihâimana u'âsi mono te te dama 're i'apisutu mono hã, da te 're 'madâ'â za'ra mono da, isimiroti na rob'ui'éré 'rada hã. Hâiwa hã si'utõrĩ nherẽ, duré ti'a hã si'utõrĩ nherẽ, te za pire u'âsi dama 're hâimana u'âsi.
18— Ni'wa hã aibâ hã timro te te rẽme wamhã, duré pi'õ aimawi na mro wamhã, te za tiwasédé hã 'manha, aibâ hã. Duré, pi'õ, da te ime na aibâ mro wamhã, te za duré 'manharĩ wasété, ta hã.
Isibro pese wasu'u, isibrob'õ me
19Tawamhã Zezusi hã te duré tãma rowasu'u za'ra, farizeu norĩ ma, ãne:
— Aibâ hã te 're mo, isibro pe hã. Zazahâ iwa'âbâ za'ẽtẽ na si, te 're si'uza. Duré dasa iwẽ uptabi na si, te 're sa. 20Tawamhã aibâ ihâiba amo hã te 're sãmra, isibrob'õ hã, i'wa're ré hã, Lazaru na isisi hã. Isiwadi norĩ hã te te siwi 're mrami, isibro pese nhorõwa u, te te siwi 're simizusi mono da, 'ridawa u. 21Dasai a'a na si, te ta hã 're sa. Wapsã si ma tô i'wa're hã te te siwi 're upsõmri. 22Tawamhã ma tô oto dârâ, isibrob'õ hã. Dâ'â wamhã, hâiwa u ma tô siwi ti'â, 'Re ihâimana u'âsi mono ma, romhuri'wa norĩ hã. Abra'ãhã 'rata, te oto 're sãmra, dame 're sai mono da. Isibro pe hã ma tô duré dârâ. Dâ'â wamhã, ma tô dasiwi sẽrẽ ni, ab're 're. 23Tawamhã ropipa hã te te oto 're sépata za'ẽtẽ, adâ 're isi'ubumroi mono zéb ãma hã. Ta hawi ma tô rob'madâ, isibro pe hã. Te te rob'madâ'â wamhã, ma tô Abra'ã hã tisã, romhâ na. I'rata te Lazaru hã nhamra, isibrob'õ hã. 24Te te 'madâ'â wamhã, ma tô tãma si'mahâ, ãne: “Wahi'rada Abra'ã, ĩ'ãma aipẽ'ẽzé na. Ma'ãpé, Lazaru hã we ĩtẽme satõrĩ, â we te te ĩma a'âri da, te te ãma ĩnhoto di'i da, tinhiptõmo na, ĩnhoto wahâ da. Ãme ropipa, wa oto te 're sépata za'ẽtẽ, unhama ãma.”
25— Tahawa, ma tô Abra'ã hã asa tãma tinha, isibro pese ma, ãne: “Ĩnhihudu, aihâiba ré, aima 're rowẽ mono di. Uburé marĩ iwẽ hã ma tô asô 're simi'wara. Lazaru ma hã, marĩ iwasétére si, ma tô da te tãma 're sõmri za'ra. Ãhã na hã rowẽ na te oto 're hâimana. A hã te oto tô ropipa hã 're isépata mo. 26Duré, ab're 'rehâ hã isa'ẽne hã te 're sa'wari, wawa'wa. Tahawa, wa te ãma 're saprĩ waihu'u za'ra mono õ di, wa norĩ hã atẽme wa'aba hã. Duré a norĩ wa'wa hã we 're saprĩ waihu'u za'ra wa'aba mono õ di, watẽme hã.”
27— Tawamhã isibro pe hã te asa tãma tinha, ãne: “Wahi'rada Abra'ã, tane wamhã, ma'ãpé Lazaru hã satõrĩ, ĩmama nhorõwa u. 28Tame te ĩsisãnawã norĩ hã 're si'ubumro, 5 na ihâiba za'ra hã. Ropipa, wa oto te 're sépata. Tahawa, te za isatõ, itẽme morĩ za'ra da, te te tãma rowasu'u za'ra da, ĩzarina we 're sisisi tõ mono da, ropipa u.”
29— Tahawa, ma tô duré Abra'ã hã asa tãma tinha, ãne: “'Re ihâimana u'âsi mono nhimiroti na Mozési te te ãma irob'ui'éré hã te nomro, ano norĩ 'ratamhã. 'Re ihâimana u'âsi mono zadawa 'mahârâ 'rata 'wa norĩ nhimi'ui'éré zama, te i'rata tinomro za'ra. Ta hã te za te te 're wapari za'ra za, ti'ai ãma ré.”
30— Tawamhã isibro pe te duré asa tãma tinha, ãne: “Tane nherẽ, te te saze za'ra õ di, isimiroti na hã. Ni'wa hã dâ'â nherẽ, hâiwa'utu wa, itẽme morĩ za'ra wapsi, te za isimirowasu'u na saze za'ra, ĩsisãnawã norĩ hã. Ãne wapsi, te za tiwasédé hã rẽme pese za'ra, rowẽ na oto 're nomro mono da.”
31— Tawamhã Abra'ã hã te duré asa tãma tinha, ãne: “Ano norĩ hã Mozésihi nhimiroti hã te te saze za'ra õ di. Duré 'Re ihâimana u'âsi mono zadawa 'mahârâ'wa norĩ nhimiroti zama, te te saze za'ra õ di. Ãne wamhã, ni'wa hã dâ'â nherẽ, apâ hâiwa'utu wamhã, e te aré bété ãma saze za'ra. Te te ãma saze za'ra õ di aré, isimirowasu'u na hã.”
Currently Selected:
Luca 16: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.
