Luca 3

Zuwã Batista te te dama irotizé wasu'u

Mateu 3.1-12; Marcu 1.1-8; Zuwã 1.19-28

1Tawamhã 15 na ma tô ãma tiwahu, Tibériuhu ãma, danhib'apito na 're hâimana mono ré, Roma ãma hã. Isadawa para, te Põsiu Pilatu hã te te dama 're roti, Zudéa ãma. Duré Erodi hã te te dama 're roti isadawa para, Galiléa ãma. Duré Erodihi no hã Filipi hã te te dama 're roti, isadawa para, Itureza na danhipti'a nho'õmo nhisi ãma, duré Taraconiti na danhipti'a nho'õmo nhisi ãma. Duré Risãniza hã te te dama 're roti, isadawa para, Abireni na danhipti'a nho'õmo nhisi ãma. 2Duré Anasi hã, Caifasihi me, dama pire uptabi na te 're tineb zahuré, sasedoti na hã. Uburé 'Re ihâimana u'âsi mono ma, da'ãma romhuri'wa norĩ ma, pire zahuré di. Ãne wamhã, ma tô 'Re ihâimana u'âsi mono hã timreme hã Zuwãhã ma tisõ, a'ubuni u 're sãmra mono ré. Zacariaha 'ra, Zuwã hã. Isadawa para te te dama 're roti mono da, ma tô timreme hã tãma tisõ. 3Tahawa, Zuwã hã te oto datẽme 're mo, Zodã pa 'rata, 're isi'ubumroi mono norĩ u. Tawamhã datẽme 're morĩ wamhã, ãne te te dama 're roti:

— Ma'ãpé, aiwasété wi aipizari za'ra wa'aba, 'Re ihâimana u'âsi mono, marĩ 're i'manharĩ wasété za'ra wa'aba mono zé hã te te aima pari za'ra wa'aba da. Tawamhã â dawabzuri hã wa za te aima 're ab'manharĩ 'wa.

4Ãne wamhã, ma tô sina uwaimra romhâ ré, Izaia te te dama irowasu'uzé hã. Ãne, 'Re ihâimana u'âsi mono zadawa 'mahârâ 'rata 'wa, te te dama irowasu'uzém na rob'ui'éré hã:

“Ni'wa te za te te dama 're rob'mahârâ, a'ubuni wi, ãne:

Ma'ãpé bâdâdi hã asiwi ropese aba mono, Wanhib'apito zô.

Duré imana 'rãmi bâdâdi hã sô sa'ra wa'aba mono, awa'awi si da.

5Sa'a wa'wa, rob'rehâ hã te za asiwi isito wa'aba mo, aiwap si da. Sa'a zama, te za asiwi ihâpâ aba mo. Duré bâdâdi nhi'oto wamhã, imana 'rãmi te za asiwi isa'ra aba mo, awa'awi si da. Roptâi wamhã, te za duré asiwi iromhâpâ aba mo, aiwap si da.

6Tawamhã watẽme wei wisi wamhã, te za aihĩni sabu za'ra ni, 'Re ihâimana u'âsi mono te te ipisudu hã, Danho'reptui'wa da. Ãne te za ni'wa hã te te dama 're roti, a'ubuni wimhã.”

7Tawamhã da'ahâ na ma tô Zuwãhã u 're dasihutu, â dawabzuri hã te te dama 're ab'manharĩ mono da. Tawamhã â dawabzuri hã te te dama 're ab'manharĩ mono õ ré, te ãne te te dama 're anharĩ:

— A norĩ wa'wa hã wahi ne, te 're anomro aba mo. E 'wa simiroti zarina, te we ĩtẽme ai'aba'réi wa'wa bété, taré â dawabzuri hã 'manharĩ za'ra wa'aba wa, 'Re ihâimana u'âsi mono nhimihâzé wi, asisõ'reptu za'ra wa'aba da ne, aiwasédé hã rẽme za'ra wa'aba õ nherẽ. 8Sena na aiwasédé hã irẽme za'ra wa'aba zém na, da te 're aiwaihu'u za'ra wa'aba mono da, te za oto 're anomro wẽ wa'aba mo. Duré Abra'ãhã nhihudu wẽ te, asina 're rosa'rata za'ra wa'aba mono õ di za, 'Re ihâimana u'âsi mono te te 're i'aihâ za'ra wa'aba mono õ na hã. 'Re ihâimana u'âsi mono ma, waihu'u pese di, ã ẽtẽ norĩ ma, te te nharĩ da, tãma si'a'uwẽ za'ra da, Abra'ãhã nhihudu oto 're nomro mono da oto, ẽne hã. 9Hâtâra hã ma tô ni'wa hã sarõtõ oto, wede te te ãma sari nhihâri da. Uburé wede hã 're i'rãi pese za'ra mono õ hã te za te te ãma 're anhihâri. Tawamhã unhama u te za te te 're anhamra.

10Tawamhã isimirowasu'u hã da te 're wapari za'ra mono wamhã, te sadanharĩ za'ra ni, ãne:

— E marĩ, wa za 'manharĩ za'ra ni, iwẽ hã, 'Re ihâimana u'âsi mono te te wama rob'manharĩ za'ra tõ da hã.

11Tawamhã asa te tãma nharĩ za'ra, ãne:

— Te za 're asipawaptob za'ra wa'aba mo. Ni'wa hã, ti'uza isõ'utu'u hã maparane wamhã, te za tihâiba amoi ma misi tisõ, uza õ wa. Duré ni'wa hã, tisa hã te za tihâiba amoi ma tisõ, sai õ wa.

12Tawamhã danhib'apito ma, rob'uiprazé ubumroi'wa norĩ hã ma itẽme aihutu, â dawabzuri te te tãma 'manharĩ za'ra da. Tawamhã itẽme sihutu wamhã, te siwi 'mahâ, ãne:

— Rowahutu'wa, wa norĩ hã bété e marĩ, wa za 'manharĩ za'ra ni iwẽ hã, 'Re ihâimana u'âsi mono te te wama rob'manharĩ za'ra tõ da hã.

13Tawamhã asa te tãma nharĩ za'ra, ãne:

— I'uwaibaba si, te za dawi 're iwaptẽrẽ za'ra wa'aba mo, rob'uiprazém na hã. Ãma dawi 're pararé za'ra wa'aba mono õ di za.

14Tawamhã da'wapéi'wa norĩ hã te duré siwi 'mahâ, ãne:

— Wa norĩ hã bété, e marĩ, wa za 'manharĩ za'ra ni, iwẽ hã, 'Re ihâimana u'âsi mono te te wama rob'manharĩ za'ra tõ da hã.

Tawamhã asa te tãma nharĩ za'ra, duré ãne:

— Asiptete na, rob'uiprazé dawi 're waibu za'ra wa'aba mono õ di za. Duré asadawa nhipese na, rob'uiprazé hã dawi 're waptẽrẽ za'ra wa'aba mono õ di za. Duré aipawa'âbâ 'wa hã 're iwaibui aba mono na hã te za asima ãma 're irowẽ za'ra wa'aba mo.

15Tawamhã Zuwã hã ma tô te te dama 're rowasu'u, Danho'reptui'wa, za we imorĩ na hã. Tawamhã te dasima nharĩ za'ra ni, ãne:

— Ãté wanho'reptui'wa da hã romhutu na, te za wei mo. Ãté Zuwã hã, wanho'reptui'wa.

16Tazahã, ãne ma tô dama tinha, Zuwã hã:

— Wa hã wa tô â na si â dawabzuri hã te aima 're 'manharĩ za'ra wa'wa. Ĩza'u si te za ĩma ipire uptabi hã wei wi. Ĩma pire wa, ipara'uza wasisizé hã, te tãma wasihu waihu'u õ di za. Ĩma ipire hã wei morĩ wapsi, te za Tipẽ'ẽzani hã te te aima 're anhomri 'wa, unhama ro'o ne hã. 17Wei morĩ wapsi, te za da'ãma aipo'o. Amnho trigu, da te 're upõrĩ za'ra mono parimhã, te za da te 're sa'wari za'ra, isa'warizéb 're. Tawamhã itomhâ te za da te ãma 're ro'o za'ra. Taha wamhã, iro hã sa'ẽtẽ wa, da te wĩrĩ waihu'u õ di za. Tane, ĩma ipire hã wei morĩ wapsi, te za da'ãma aipo'o, trigu upõrĩ za'wari ne, duré itomhâ za'wari ne.

18Iwasu'uwẽ na te te 're da'apo're pu'u, Zuwã Batista hã. Tawamhã marĩ na hã isimirowasu'u hã ahâ di, 're danomro wẽ mono da, te te dama 're roti mono ré hã. 19Tawamhã apito Erodihi ma, te duré tinha, wasété na 're morĩ wa. Tinoi mro, ma tô ti'â, Erodi hã. Inoi mro nhisi hã, Erodiza na. Ma tô duré tiwasédé hã te te 're ab'manharĩ. Tahawa, te tãma tinha, Zuwã hã. 20Tahawa, Erodi hã ma tô Zuwã hã dama ti'ru, dazazéb 're, da te sẽrẽ da. Ãne wamhã, ma tô isipai u tiwasédé hã 'manha, oto Erodi hã.

Zezusi hã, â dawabzuri te te i'manharĩzé wasu'u

Mateu 3.13-17; Marcu 1.9-11

21-22Tawamhã dazazéb 're, zahadu da te sẽrẽ õ ré, te â dawabzuri hã te te dama 're ab'manharĩ, Zuwã hã. Te te dama ab'manharĩ parimhã, Zezusihi ma zama, ma tô oto duré 'manha. Tawamhã Zezusi hã te mre, 'Re ihâimana u'âsi mono ma. Mreme ré, hâiwa ma we si'ridawa, isisi nho'õmoi baba. Tawamhã 'Re ihâimana u'âsi mono pẽ'ẽzani hã ma we itẽme wi, utu'u ne. Hâiwa hawi, te we tãma tinha, ãne:

— A hã ĩ'ra. Ĩma asawi uptabi di. Aima ĩto za'ẽtẽ uptabi di.

Zezusihi hi'rata norĩ wasu'u

Mateu 1.1-17

23Zezusi hã 30 na ãma iwahub ãma, ma tô romhuri na sãna'rata, Timama zadawa wasu'u na hã. Zuzéhé 'ra newa, ma tô i'ra na, da te 're sisi za'ra. Zuzéhé poto'wa nhisi hã, Eri na isisi hã. 24Erihi poto'wa nhisi hã, Matati na isisi hã. Matatihi poto'wa nhisi hã, Levi na isisi hã. Levihi poto'wa nhisi hã, Méqui na isisi hã. Méquihi poto'wa nhisi hã, Zana'i na isisi hã. Zana'ihi poto'wa nhisi hã, Zuzé na isisi hã. 25Zuzéhé poto'wa nhisi hã, Matatia na isisi hã. Matatia poto'wa nhisi hã, Amosi na isisi hã. Amosihi poto'wa nhisi hã, Nau na isisi hã. Nauhu poto'wa nhisi hã, Ezri na isisi hã. Ezrihi poto'wa nhisi hã, Nada'i na isisi hã. 26Nada'ihi poto'wa nhisi hã, Maati na isisi hã. Maatihi poto'wa nhisi hã, Matatia na isisi hã. Matatiaha poto'wa nhisi hã, Seme na isisi hã. Semehẽ poto'wa nhisi hã, Zuzé na isisi hã. Zuzéhé poto'wa nhisi hã, Zoda na isisi hã. 27Zodaha poto'wa nhisi hã, Zuãna na isisi hã. Zuwãnahã poto'wa nhisi hã, Reza na isisi hã. Rezaha poto'wa nhisi hã, Zorobabé na isisi hã. Zorobabéhé poto'wa nhisi hã, Sarati'é na isisi hã. Sarati'éhé poto'wa nhisi hã, Neri na isisi hã. 28Nerihi poto'wa nhisi hã, Méqui na isisi hã. Méquihi poto'wa nhisi hã, Adi na isisi hã. Adihi poto'wa nhisi hã, Cosã na isisi hã. Cosãhã poto'wa nhisi hã, Eumadã na isisi hã. Eumadãhã poto'wa nhisi hã, Ere na isisi hã. 29Erehe poto'wa nhisi hã, Zozué na isisi hã. Zozuéhé poto'wa nhisi hã, Eriézé na isisi hã. Eriézéhé poto'wa nhisi hã, Zorĩ na isisi hã. Zorĩhĩ poto'wa nhisi hã, Matati na isisi hã. Matatihi poto'wa nhisi hã, Levi na isisi hã. 30Levihi poto'wa nhisi hã, Simiã na isisi hã. Simiãhã poto'wa nhisi hã, Zuda na isisi hã. Zudaha poto'wa nhisi hã, Zuzé na isisi hã. Zuzéhé poto'wa nhisi hã, Zona na isisi hã. Zonahã poto'wa nhisi hã, Eriaquĩ na isisi hã. 31Eriaquĩhĩ poto'wa nhisi hã, Merea na isisi hã. Mereaha poto'wa nhisi hã, Mena na isisi hã. Menahã poto'wa nhisi hã, Matata na isisi hã. Matataha poto'wa nhisi hã, Natã na isisi hã. Natãhã poto'wa nhisi hã, Dawi na isisi hã. 32Dawihi poto'wa nhisi hã, Zésé na isisi hã. Zéséhé poto'wa nhisi hã, Obedi na isisi hã. Obedihi poto'wa nhisi hã, Buazi na isisi hã. Buazihi poto'wa nhisi hã, Sara na isisi hã. Saraha poto'wa nhisi hã, Nasõ na isisi hã. 33Nasõhõ poto'wa nhisi hã, Aminadabe na isisi hã. Aminadabehe poto'wa nhisi hã, Ademi na isisi hã. Ademihĩ poto'wa nhisi hã, Arini na isisi hã. Arinihi poto'wa nhisi hã, Esrõ na isisi hã. Esrõhõ poto'wa nhisi hã, Peresi na isisi hã. Peresihi poto'wa nhisi hã, Zuda na isisi hã. 34Zudaha poto'wa nhisi hã, Zaco na isisi hã. Zacoho poto'wa nhisi hã, Izaqui na isisi hã. Izaquihi poto'wa nhisi hã, Abra'ã na isisi hã. Abra'ãhã poto'wa nhisi hã, Tera na isisi hã. Teraha poto'wa nhisi hã, Nao na isisi hã. 35Naoho poto'wa nhisi hã, Serugui na isisi hã. Seruguihi poto'wa nhisi hã, Rada'u na isisi hã. Rada'uhu poto'wa nhisi hã, Peregui na isisi hã. Pereguihi poto'wa nhisi hã, Ébé na isisi hã. Ébéhé poto'wa nhisi hã, Sera na isisi hã. 36Seraha poto'wa nhisi hã, Ca'ina na isisi hã. Ca'inahã poto'wa nhisi hã, Apasadi na isisi hã. Apasadihi poto'wa nhisi hã, Sẽ na isisi hã. Sẽhẽ poto'wa nhisi hã, Nowé na isisi hã. Nowéhé poto'wa nhisi hã, Rameti na isisi hã. 37Rametihi poto'wa nhisi hã, Matuzarẽ na isisi hã. Matuzarẽhẽ poto'wa nhisi hã, Enoqui na isisi hã. Enoquihi poto'wa nhisi hã, Zaredi na isisi hã. Zaredihi poto'wa nhisi hã, Ma'alaléu na isisi hã. Maalaléuhu poto'wa nhisi hã, Ca'ina na isisi hã. 38Ca'inahã poto'wa nhisi hã, Enosi na isisi hã. Enosihi poto'wa nhisi hã, Seti na isisi hã. Setihi poto'wa nhisi hã, Adã na isisi hã. Adãhã poto'wa hã, 'Re ihâimana u'âsi mono.

Currently Selected:

Luca 3: xavBP

Highlight

Copy