Juan 12

1Wakiꞌ kꞌij cꞌo chi wiꞌ ja nmakꞌij pascua tok be chic jutij ja Jesús pa Betania ja bar cꞌo wiꞌ ja Lázaro. Jariꞌ mismo Lázaro ja yataj tre rmal ja Jesús chi cꞌastaj chiquicojol camnakiꞌ. 2Cꞌo jun nimlaj waꞌim chomixi ja pa Betania rumac ja xekaji ja Jesús cuqꞌuin. Ja Marta arjaꞌ rmajon ilinem, ja cꞌa Lázaro arjaꞌ jun tzꞌubul chiquicojol ja winak ja retzꞌubul ruqꞌuin ja Jesús pa mesa. 3Ja cꞌa María arjaꞌ xucꞌam ncꞌaj litro akꞌom nardo neꞌxi, congana quiꞌ rxulaꞌ in congana nim rjil chakajaꞌ. Ja cꞌa xuban, xutix ja rakꞌom trij rkan ja Jesús cꞌacꞌariꞌ xusuꞌ chi rsamal rwiꞌ. Ja rakꞌom ni noji rxulaꞌ pa jay. 4Cꞌo cꞌa jun chique ja rdiscípulo ja Jesús rbinaꞌan Judas Iscariote, arjaꞌ rcꞌajol jun achi rbinaꞌan Simón, arjaꞌ njacho na ja Jesús pa quekꞌaꞌ ja winak ja netzelan rxin. Ja Judas tok xutzꞌat ja xuban ja María quewaꞌ xbij riꞌ:

5—Ja rakꞌom leꞌ ¿nak tre tok ma xuyaꞌ ta chake kacꞌayij ta chi oxiꞌ ciento quetzal, ja cꞌa rjil kayaꞌ ta chique ja tak mebaꞌiꞌ? neꞌe. 6Queriꞌ xbij pro ma rmal ta chi npokonaj quewach ja tak mebaꞌiꞌ como arjaꞌ xa alakꞌom xa chewiꞌ tok nlakꞌaj kaj ja pwok pa caja como pa rukꞌaꞌ cꞌo wiꞌ ja pwok quixin ja Jesús e rachbil ja rdiscípulo. 7Ja cꞌa Jesús xuchꞌaꞌ tre ja xbij, quewaꞌ xbij tre riꞌ:

—Ma tanak ta ja María como arjaꞌ rcꞌolon ja rakꞌom chi nucoj chwij jariꞌ nnatbej ja ncamic. 8Ja tak mebaꞌiꞌ ejeꞌeꞌ nij ecꞌo wiꞌ checojol ja wi cꞌol egana neban utzil chique pro ja chwe anin maquinqꞌuejeꞌ ewqꞌuin nojel tiempo, ninwasaxel na checojol, neꞌe.

9Congana e qꞌuiy chique ja raj Israel tok quicꞌaxaj chi cꞌo chic pa Betania ja Jesús, triꞌ xebe wiꞌ nequitzꞌataꞌ rwach pro ma ruyon ta ja Jesús como cꞌo quigana nequitzꞌataꞌ rwach ja Lázaro chakajaꞌ. Jariꞌ mismo Lázaro ja yataj tre rmal ja Jesús chi cꞌastaji chiquicojol ja camnakiꞌ. 10Ja cꞌa jefe quixin sacerdote ejeꞌeꞌ quemol quiꞌ chi rchomarsaxic nak nqueban tre ja Lázaro chi nquicamsaj arjaꞌ chakajaꞌ. 11Queriꞌ queban como rumac ja Lázaro chewiꞌ tok e qꞌuiy chique ja cach tak aj Israel xeꞌelel cuqꞌuin ejeꞌeꞌ in yukeꞌ chic quecꞌuꞌx ruqꞌuin ja Jesús.

* * * * * * * * * *

12Ja cꞌa chi rcab kꞌij ja winak ja reꞌekajnak chi rcꞌulic ja nmakꞌij e qꞌuiy chique tok quicꞌaxaj chi benak ja Jesús pa Jerusalén 13ejeꞌeꞌ quecꞌam rxak tak palma, xepeti chi nurquicꞌuluꞌ. Cꞌacꞌariꞌ quemaj rakic quechiꞌ, quewaꞌ quibij riꞌ: —Dios, koꞌatoꞌoꞌ camic, peti ja Toꞌonel janila nim rukꞌij, arjaꞌ ja Rey kaxin ja rok aj Israel ja penak pa rubiꞌ ja kajaw Dios, xecheꞌe. 14Ja cꞌa Jesús arjaꞌ xcanoj jun bur ja cꞌa ti coꞌl na. Ja tok contaj rmal cꞌacꞌariꞌ tzꞌabeꞌel trij. Queriꞌ xuban ja caniꞌ tzꞌibtal can ojer chipan ja rtzobal Dios chi nbantaj na, quewaꞌ nbij riꞌ: 15—Ja rix aj Sión ma texbej ta ewiꞌ camic, tetzꞌataꞌ mpeꞌ leꞌ peti ja Rey ewxin, tzꞌubulto trij jun bur ja cꞌa ti coꞌl na. Queriꞌ ja tzꞌibtal can ojer.

16Pro ja cꞌa rdiscípulo ja Jesús ejeꞌeꞌ xa matichꞌobtaj cumal nabey nojel awaꞌ wariꞌ ja ntajini nuban ja Jesús. Ja tok cꞌastaji ja Jesús chiquicojol ja camnakiꞌ in tok joteꞌ chilaꞌ chicaj cꞌa tokocꞌariꞌ chꞌobtaj cumal in xurkaj chique chi tzꞌibtal can ojer chipan ja rtzobal Dios nojel awaꞌ wariꞌ ja xuban ja Jesús in caniꞌ tzꞌibtal can ni queriꞌ ja ban tre. 17Triꞌ ecꞌo wiꞌ juleꞌ winak ja xetzꞌato rxin ja Jesús tok xuyic ja Lázaro chiquicojol ja camnakiꞌ, ejeꞌeꞌ quetzꞌat ja xuban ja tok xbij tre ja Lázaro chi nelto chipan ja jul ja bar mukun wiꞌ. Jawaꞌ winak riꞌ ejeꞌeꞌ quimajon rbixic chique ja juleꞌ chic winak ja quetzꞌat. 18Rmalcꞌariꞌ tok xepeti ja winak chi rcꞌulic ja Jesús como quicꞌaxaj ja milagro xuban tre ja Lázaro. 19Ja cꞌa fariseo xa pokon quenaꞌ rmal in quemaj rbixic chibil tak quiꞌ: —Queꞌetzꞌataꞌ mpeꞌ ja winak leꞌ xebe ruqꞌuin ja Jesús pro ni canojelal, camic majun nokcowini nkaban chic tre, xecheꞌe.

20Ecꞌo cꞌa juleꞌ winak aj Grecia, ejeꞌeꞌ eꞌurkajnak pa Jerusalén, epenak chi ryaꞌic rukꞌij ja Dios chipan ja nmakꞌij pascua. 21Xebe ruqꞌuin ja Felipe ja raj Betsaida ja cꞌo pa rcuenta Galilea. Ja tok xeꞌekaj ruqꞌuin quewaꞌ quibij tre riꞌ: —Ajoj nkajoꞌ nkotakij rwach ja Jesús, xecheꞌ tre. 22Ja cꞌa Felipe arjaꞌ xerbij tre ja rAndrés cꞌacꞌariꞌ xebe chi e caꞌiꞌ xequibij tre ja Jesús. 23Ja cꞌa Jesús tok xcꞌaxaj ja bix tre quewaꞌ xbij chique riꞌ:

—Camic ja Ralcꞌwalaxel ja xoc alaxic cuqꞌuin ja winak xurwilaꞌ ja tiempo chi congana nya̱ꞌ rukꞌij. 24Ni katzij wiꞌ ja xtinbij chewe ja ncꞌambej tzij chewach riꞌ. Ja jun chirwach trigo ja wi napokonaj namuk pa tokꞌulew jariꞌ majun nelto in majun cosecha nuyaꞌ pro ja wi matapokonaj namuk pa tokꞌulew jariꞌ nelto in congana rwach nuyaꞌ. 25Ja wi napokonaj nayaꞌ can ja racꞌaslemal waweꞌ chwachꞌulew jariꞌ natzꞌilaꞌ ja utzlaj cꞌaslemal pro wi matapokonaj nayaꞌ can ja racꞌaslemal waweꞌ chwachꞌulew jariꞌ nij awcꞌan wiꞌ ja utzlaj cꞌaslemal in jariꞌ cꞌaslemal ni mta wiꞌ qꞌuisic trij. 26Ja winak ja neniman wxin rjawaxic chi triꞌ nekꞌax wiꞌ ja bar ninkꞌax wiꞌ anin in chakajaꞌ triꞌ neꞌeqꞌuejeꞌ wiꞌ ja bar incꞌo wiꞌ anin. Xa nak ta ja neniman wxin ejeꞌeꞌ nya̱ꞌ na quekꞌij rmal ja Nataꞌ.

27Camic congana ntiꞌoni ja wanma, ni lawuloꞌ nban rmal pro ¿nak cꞌa nban? ¿La xtinbij ta cꞌa tre ja Nataꞌ chi arjaꞌ ninrutoꞌ utzcꞌa chi maquita ninkꞌax chipan ja rpokonal ja penak chinwach riꞌ? Jariꞌ ma can ta como ja penak chinwach riꞌ xa rmalariꞌ tok inpenak anin waweꞌ chi ninkꞌax chipan. 28Xarwariꞌ nbij chawe Nataꞌ, takꞌalasaj chiquewach ja winak chi congana nim akꞌij atat. Queriꞌ xbij ja Jesús. Cꞌacꞌariꞌ cꞌo jun kulaj cꞌaxaxi penak chilaꞌ chicaj quewaꞌ xbij riꞌ: —Jariꞌ nkꞌalasan chic in nkꞌalasaj chi na más chakajaꞌ, neꞌe ja kulaj rxin ja Tatixel. 29Ja winak ja recꞌo triꞌ ecꞌoli chique tok quicꞌaxaj ja kulaj ejeꞌeꞌ quibij chi xuban quiakolijay, xecheꞌe. In juleꞌ chic quibij: —Jun ángel tzijonto ruqꞌuin, xecheꞌe. 30Pro ja Jesús arjaꞌ xbij chique:

—Ja kulaj ja cꞌa xecꞌwaxaj jariꞌ ma mwal ta anin tzijoni, emwal ixix. 31Camic xurwilaꞌ ja tiempo chi nkꞌalajini nak rbanic ja ritzelal ja cꞌo pa tak canma ja winak waweꞌ chwachꞌulew, xurwilaꞌ ja tiempo chi nkajsax rchokꞌakꞌ ja Satanás ja nbano mandar waweꞌ chwachꞌulew in nbatataxel. 32Pro ja chwe anin ja tok xquinjecbaxi jariꞌ nenujicꞌ canojelal ja winak xa nak ta chi winakil utzcꞌa chi nyukeꞌ quecꞌuꞌx wqꞌuin. Queriꞌ xbij ja Jesús. 33Ja tok xbij queriꞌ jariꞌ xcꞌutbej nak xtiban tre ja tok xticamsaxi chi chwach jun cruz njecbax wiꞌ. 34Ja cꞌa winak quewaꞌ quibij tre riꞌ:

—Pro kacꞌaxan waꞌan chipan ja rtzobal Dios chi tok xtipeti ja Cristo arjaꞌ ni mta wiꞌ camíc trij ¿nak cꞌa tre tok nabij atat chi ja Ralcꞌwalaxel ja xoc alaxic cuqꞌuin ja winak chi rjawaxic chi njecbax na chicaj? ¿Nak cꞌa ja ralcꞌwalaxel ja nabij leꞌ? xecheꞌ tre. 35Ja cꞌa Jesús xbij chic chique:

—Ja nsakirsan ebey camic arjaꞌ xa jun caꞌiꞌ kꞌij nqꞌuejeꞌ chi na checojol rmalcꞌariꞌ nbij chewe, como cꞌa cꞌo na ja luz checojol teyaꞌaꞌ lugar tre chi noc pa tak ewanma utzcꞌa chi matoqui ja kꞌekumal pa tak ewanma. Ja winak ja xa pa kꞌekumal nebin wiꞌ ejeꞌeꞌ ma cotak ta bar xqueꞌekaj wiꞌ. 36Como majaꞌn tel checojol ja nsakirsan ebey chewiꞌ tok nbij chewe, tiyukeꞌ ecꞌuꞌx ruqꞌuin camic utzcꞌa chi ni ja wiꞌ ja sakil nucꞌan ewxin, neꞌe ja Jesús chique. Ja tok bitaj awaꞌ tzij rmal riꞌ cꞌacꞌariꞌ be, rawaj riꞌ chiquewach.

* * * * * * * * * *

37Ja Jesús masqui congana qꞌuiy ja milagro rbanon chic ja rcꞌutben chiquewach nak ja rocnak wiꞌ pro ejeꞌeꞌ ni ma xyukeꞌ ta wiꞌ quecꞌuꞌx ruqꞌuin. 38Queriꞌ queban utzcꞌa chi nbantaj cumplir ja bitajnak can rmal ja profeta Isaías ojer quewariꞌ: —Wajaw, xa ma e nim ta ja xenimani ja ratzobal ja kayaꞌ rbixic, xa ma e nim ta ja chꞌobtaj cumal nak rbanic ja nimak tak milagro naban chiquewach. Queriꞌ tzꞌibtal can. 39Rmalcꞌariꞌ ma xecowin ta ja winak yukeꞌ ta quecꞌuꞌx ruqꞌuin ja Jesús. Queriꞌ queban como cꞌo chic juleꞌ tzij bitajnak can rmal ja rIsaías quewariꞌ: 40—Ja xuban ja Dios chique caniꞌ xermoyirsaj in xcowirsaj ja canma. Queriꞌ xuban chique utzcꞌa chi matiquetzꞌat ja ncꞌu̱t chiquewach chi matichꞌobtaj cumal ja nbix chique in matiqueqꞌuex quinaꞌoj chi netzuri. 41Queriꞌ rbin can ja rIsaías, tokoriꞌ xbij ja tok xutzꞌat ja gloria ja rcꞌan ja Kajaw in tok tzijon tre nak rbanic.

42Pro e qꞌuiy chique ja kꞌetol tak tzij ejeꞌeꞌ quinimaj ja Jesús pro xa nquipokonaj nquibij chi yukul quecꞌuꞌx ruqꞌuin como nquixbej quiꞌ chiquewach ja fariseo: —Maxla nokquichꞌakijto chipan ja jay xin molbal riꞌil ja bar ncꞌaxax wiꞌ ja rtzobal Dios in makoquecꞌul chic chipan, xecheꞌe. 43Queriꞌ queban como más na nqueyaꞌ caso tre ja nbix chique cumal ja winak chwach ja nbix chique rmal ja Dios.

44Xumaj chic jutij tzij ja Jesús, cow tzijoni in quewaꞌ xbij riꞌ:

—Ja winak ja yukul quecꞌuꞌx wqꞌuin jariꞌ yukul cꞌa quecꞌuꞌx ariꞌ chakajaꞌ ruqꞌuin ja rintakyonto, ma ruyon ta wqꞌuin anin. 45Ja winak ja retzꞌatyon nwach quitzꞌaton cꞌa rwach ariꞌ chakajaꞌ ja rintakyonto. 46Anin inpenak waweꞌ chwachꞌulew chi nsakirsaj quebey ja winak chiquewach utzcꞌa xa nak ta chi winakil ja xtiyukeꞌ quecꞌuꞌx wqꞌuin ejeꞌeꞌ maqueqꞌuejeꞌ más chipan ja kꞌekumal. 47Anin inpenak waweꞌ chwachꞌulew ma rmal ta chi nkꞌet ta tzij chiquij ja winak pro inpenak chi quitoꞌic. Rmalcꞌariꞌ nbij chewe, ja wi ecꞌoli winak ja necꞌaxani ja nbij chique pro wi matiquinimaj jariꞌ ma anin ta ninkꞌeto tzij chiquij. 48Ja wi maticajoꞌ nyukeꞌ quecꞌuꞌx wqꞌuin in wi maticajoꞌ nquinimaj ja nbin chique jariꞌ cꞌoli ja nkꞌetbex tzij chiquij como ja tzij ja xinbij chique jariꞌ nkꞌetbex tzij chiquij tokoriꞌ tok xterilaꞌ ja nimlaj juicio xin qꞌuisbal kꞌij. 49Queriꞌ nbij chewe como ja tijonem ja ncꞌutun chewach jariꞌ yaꞌon chwe rmal ja Tatixel ja rintakyonto, ma chaka ta nwinakarsan nojoj nuyon, 50in ja tijonem ja yaꞌon chwe rmal ja Tatixel bien wotak chi jariꞌ cꞌamyonto ja utzlaj cꞌaslemal ja mta qꞌuisic trij. Queriꞌ rbanic, nojel ja tzij nbij, xa nak ta chi tzijal, jaꞌ Tatixel biyon chwe. Queriꞌ xbij ja Jesús.

Currently Selected:

Juan 12: tzjW

Highlight

Copy