Juan 13

1Xerilaꞌ ja pispra rxin ja nmakꞌij pascua. Ja cꞌa Jesús arjaꞌ rotak chi xurwilaꞌ ja hora chi nuyaꞌ can ja rwachꞌulew in nmeloj ruqꞌuin ja Tatixel. Caniꞌ rbanonto chique ja rdiscípulo waweꞌ chwachꞌulew nij erajoꞌonto wiꞌ in niquirwariꞌ xuban can chic chique, cꞌoli ja xcꞌutbej chic chiquewach chi ni nerajoꞌ wiꞌ. 2Arjaꞌ rmajon waꞌim cuqꞌuin ja rdiscípulo. Ja cꞌa diablo arjaꞌ rbanon chic ja samaj pa ranma ja Judas Iscariote ja rcꞌajol Simón, rtakchiꞌin chic chi nujach ja Jesús pa quekꞌaꞌ ja winak ja netzelan rxin. 3Ja cꞌa Jesús arjaꞌ bien rotak chi jachon pa rukꞌaꞌ nojelal rmal ja Tatixel in bien rotak chakajaꞌ chi arjaꞌ ruqꞌuin ja Dios penak wiꞌ in ruqꞌuin nmeloj chi wiꞌ jutij. 4Cꞌacꞌariꞌ yictajto pa mesa, ja cꞌa tziak ja rcojon trij ja rtziak jariꞌ xlasaj can, xucꞌam chic jun tziak ja caniꞌ nquecoj ja rilinelaꞌ in jariꞌ xucoj chic xeꞌ rupan. 5Cꞌacꞌariꞌ xchomij jun palangana yaꞌ in xumaj rchꞌajic cakan ja rdiscípulo. Ja cꞌa tok nchꞌajtaji nusuꞌ tre ja tziak ja rcojon xeꞌ rupan. 6Ja cꞌa tok xekaj ruqꞌuin ja Simón Pedro chi nuchꞌaj ja rkan quewaꞌ bix tre rmal ja Pedro riꞌ:

—Wajaw, takaꞌan nachꞌaj wakan, neꞌxi.

7—Xa matichꞌobtaj amwal camic ja nmajon rbanic chawe pro nerilaꞌ na jun kꞌij tok nchꞌobtaj na amwal, neꞌe ja Jesús tre.

8—Ma can ta, atat ni ma yatal ta wiꞌ chawij chi xtachꞌaj ta wakan, neꞌe ja Pedro tre.

—Ja wi matinchꞌaj jariꞌ ma at wachbil chi ta cꞌariꞌ, neꞌe ja Jesús tre. 9Cꞌacꞌariꞌ ja Pedro xbij tre:

—Wajaw, ja wi queriꞌ rbanic, ma ruyon ta cꞌa wakan nachꞌaj ariꞌ, tachꞌajaꞌ cꞌa nukꞌaꞌ in tabakaꞌ nwiꞌ chakajaꞌ, neꞌ tre. 10Ja cꞌa Jesús xbij chic tre:

—Jun achi wi rtijon chic atinem jariꞌ chꞌajchꞌoj chic, ma rjawaxic chi ta tre chi njoskꞌix chic, xa ruyon chic rkan nchꞌaji, in queriꞌ chewe ixix, ix chꞌajchꞌojiꞌ chic pro ma ewanojelal ta, neꞌ tre. 11Como arjaꞌ bien rotak nak ja njacho na rxin pa quekꞌaꞌ ja netzelan rxin chewiꞌ tok xbij chi: —Ma ewanojelal ta ix chꞌajchꞌojiꞌ, neꞌ chique.

12Ja tok chꞌajtaji ja cakan rmal cꞌacꞌariꞌ xucoj chic ja rtziak ja rwasan can in tzꞌabeꞌ chic jutij pa mesa in quewaꞌ xbij chic chique riꞌ:

—¿La nchꞌobtaj emwal ja cꞌa xinban chewe riꞌ? 13Ixix nebij chwe Maestro, nixcheꞌ chwe, in Kajaw, nixcheꞌ chwe, in jariꞌ ni rubey wiꞌ ja nebij como ni katzij wiꞌ chi in Emaestro, in Ewajaw chakajaꞌ. 14Anin in Ewajaw, in Emaestro chakajaꞌ pro ma xinpokonaj ta xinchꞌaj ja rewakan in queriꞌ cꞌa chewe ixix chakajaꞌ rjawaxic chi matepokonaj nechꞌaj ja rewakan chibil tak ewiꞌ. 15Jun ejemplo awaꞌ xinyaꞌ chewach riꞌ chi queriꞌ neban ixix chibil tak ewiꞌ ja caniꞌ xinban anin chewe. 16Ni katzij wiꞌ ja xtinbij chewe riꞌ, jun ilinel ¿la nim ta cꞌa rukꞌij chwach ja rajaw in jun banol takquil la nim ta cꞌa rukꞌij chwach ja takyonel rxin? 17Ja wi nchꞌobtaj emwal ja cꞌa xinbij chewe riꞌ jariꞌ congana quiꞌil chewe pro ja wi nenimaj.

18Pro ma ewanojelal ta ja quiꞌil chewe como anin wotak janiꞌ enaꞌoj ja rixnchaꞌon. In ni rjawaxic wiꞌ chi nbantaj na cumplir ja tzꞌibtal can chwe ojer chipan ja rtzobal Dios, quewaꞌ nbij riꞌ: —Cꞌo jun xinwachbilaj chi waꞌim jariꞌ xoc ncꞌulel, yictaj chwij. Queriꞌ tzꞌibtal can. 19Ja xinbij chewe riꞌ masqui majaꞌn tibantaji pro nbij chewe camic chi ni nbantaj na wiꞌ. Queriꞌ nbij chewe utzcꞌa ja tok xtibantaji tokoriꞌ bien nchꞌobtaj emwal nak inocnak wiꞌ utzcꞌa nenimaj chi nij in quirwariꞌ ja caniꞌ nbinto chewe. 20Ni katzij wiꞌ ja xtinbij chewe riꞌ, xa nak ta xquecꞌulu quixin ja rajsamajelaꞌ ja nenutakel, anin cꞌariꞌ ninquecꞌul chakajaꞌ, in xa nak ta xquecꞌulu wxin nquecꞌul cꞌariꞌ chakajaꞌ ja takyonto wxin. Queriꞌ xbij ja Jesús chique.

* * * * * * * * * *

21Ja tok bitaji tzij riꞌ rmal cꞌacꞌariꞌ xumaj jun nimlaj bis, congana lawuloꞌ nuban ranma rmal in xbij chic chique:

—Ni katzij wiꞌ ja xtinbij chewe riꞌ, cꞌo jun chewe, arjaꞌ njacho na wxin pa quekꞌaꞌ ja winak ja netzelan wxin, neꞌ chique. 22Ja cꞌa rdiscípulo ejeꞌeꞌ quemaj rtzꞌatic quiꞌ, matichꞌobtaj cumal chok tre bix wiꞌ ja tzij. 23Cꞌo jun chique ja rdiscípulo ja congana najoꞌx rmal, arjaꞌ kꞌeloc ruqꞌuin ja Jesús pa mesa. 24Ja cꞌa Simón Pedro arjaꞌ xuban pon rukꞌaꞌ chwach ja jun chic discípulo chi ncꞌaxaj tre chok tre bix wiꞌ ja tzij rmal ja Jesús. 25Ja cꞌa discípulo como arjaꞌ kꞌeloc chwa rucꞌuꞌx ja Jesús chewiꞌ tok xcꞌaxaj tre:

—Kajaw ¿nak chake ja njacho awxin? neꞌ tre.

26—Ja bar xtinyaꞌ wiꞌ ja caxlanway ja muꞌun, arjaꞌ cꞌariꞌ, neꞌe ja Jesús tre. Cꞌacꞌariꞌ xumuꞌ ja caxlanway in tre ja Judas Iscariote xuyaꞌ wiꞌ, ja rcꞌajol Simón. 27Ja cꞌa Judas arjaꞌ tok cꞌamtaj rmal ja caxlanway cꞌacꞌariꞌ xoqui ja Satanás pa ranma in bix tre rmal ja Jesús:

—Ja ramajon rchꞌobic chi naban jat, tabanaꞌ chanim, neꞌxi. 28Pro ja recꞌo pa mesa ni majun chique chꞌobtaj ta cumal nak tre tok bix queriꞌ tre ja Judas rmal ja Jesús. 29Ecꞌoli chique, ejeꞌeꞌ quechꞌob kaj chi ja Judas bix tre chi nbe, nerlokꞌoꞌ ja ncꞌatzin tre ja waꞌim xin nmakꞌij owi nta̱kel chi nersipaj jun ti ayuda chique ja tak mebaꞌiꞌ como ja Judas ruqꞌuin arjaꞌ cꞌo wiꞌ caja xin pwok. 30Queriꞌ xuban ja Judas tok chaka maril cꞌamtaj rmal ja caxlanway be, xelel chiquicojol, ocnak chic akꞌaꞌ.

* * * * * * * * * *

31Ja cꞌa tok elnakel chic ja Judas xumaj chic jutij tzij ja Jesús, quewaꞌ xbij chic riꞌ:

—Camic ni kꞌalaj wiꞌ chi congana nim rukꞌij ja Ralcꞌwalaxel ja xoc alaxic cuqꞌuin ja winak. In jun chic, rmal ja rcꞌaslemal ja Ralcꞌwalaxel triꞌ ntzꞌa̱t wiꞌ chi congana nim rukꞌij ja Dios chakajaꞌ. 32Como ja Dios arjaꞌ nya̱ꞌ rukꞌij rmal ja rcꞌaslemal ja Ralcꞌwalaxel rmalcꞌariꞌ ja Dios nkꞌalasaj na chi congana nim rukꞌij ja Ralcꞌwalaxel chakajaꞌ, nkꞌalasaj na chi xa jun quibanon ruqꞌuin in jariꞌ nkꞌalasaj chanim. 33Chakꞌlaj walcꞌwal, anin xa jun ti tiempo chic ninqꞌuejeꞌ checojol. Ninecanoj chi na pro caniꞌ xinbij chique ja juleꞌ chic aj Israel queriꞌ nbij chic chewe ixix camic quewariꞌ, ja bar xquinbe chi wiꞌ maquixcowin ixix nixekaj triꞌ. 34Cꞌo jun cꞌacꞌa mandamiento nbij can chewe riꞌ, tewajoꞌ ewiꞌ. Caniꞌ nbanonto anin chewe nij ixnwajoꞌonto wiꞌ queriꞌ cꞌa tebanaꞌ ixix chakajaꞌ ni tewajoꞌ wiꞌ ewiꞌ. Jariꞌ ja cꞌacꞌa mandamiento nyaꞌ can chewe. 35Ja wi queriꞌ neban wi newajoꞌ ewiꞌ triꞌ cꞌa nixtzꞌa̱t wiꞌ cumal canojelal ja winak chi ni katzij wiꞌ chi ix ndiscípulo, neꞌe ja Jesús. 36Ja cꞌa Simón Pedro arjaꞌ xbij tre:

—Kajaw ¿bar cꞌa triꞌ natbe wiꞌ? neꞌ tre.

—Ja bar xquinbe wiꞌ, atat macatcowini nattreꞌ chwij camic pro nerilaꞌ na jun kꞌij ja tok xcattreꞌ na chwij, neꞌxi rmal ja Jesús.

37—Wajaw ¿nak tre tok ma xquincowin ta xquintreꞌ chawij camic? Anin matinpokonaj nincamsax amwal, neꞌe ja Pedro.

38—¿La ni katzij wiꞌ nabij chi matapokonaj natcamsax mwal? Pro ja xtinbij anin chawe riꞌ ni katzij wiꞌ, ja tok majaꞌn tokꞌi ja acꞌ, atat oxmul xtabij chwe chi ma awotak ta nwach, neꞌxi rmal ja Jesús.

Currently Selected:

Juan 13: tzjW

Highlight

Copy