Juan 14

1Cꞌacꞌariꞌ xbij chic chique:

—Maxta ticapuj ecꞌuꞌx, ni tiyukeꞌ wiꞌ ecꞌuꞌx ruqꞌuin ja Dios in wqꞌuin anin chakajaꞌ. 2Ja chi rochoch ja Nataꞌ sobre ja lugar cꞌo chilaꞌ. Ja wixta ma queriꞌ ta xinbij ta cꞌariꞌ chewe chakajaꞌ. Anin ninbe camic nenchomarsaj na ja lugar ewxin. 3In como xinbij chewe chi ninbe chi nenchomarsaj ja relugar pro ninmelojpi chic jutij nixuncꞌamaꞌ kaj utzcꞌa chi nixqꞌuejeꞌ chic wqꞌuin. Queriꞌ nban utzcꞌa ja bar xquinqꞌuejeꞌ wiꞌ anin triꞌ nixqꞌuejeꞌ wiꞌ ixix chakajaꞌ. 4Ixix ewotak ja bar xquinbe wiꞌ in ewotak ja bey chakajaꞌ, neꞌ chique. 5Ja cꞌa Tomás arjaꞌ xbij tre:

—Wajaw, ajoj ma kotak ta ja bar natbe wiꞌ ¿nak moda cꞌariꞌ tok nabij chake chi kotak ja bey? neꞌ tre.

6—Pro anin cꞌa ja rin bey, wqꞌuin anin niltaj wiꞌ nojelal ja ni katzij wiꞌ ja ni majun engaño rcꞌan in anin ninyowi ja utzlaj cꞌaslemal ja mta qꞌuisic trij. Mta jun nak ta xtekaj ta ruqꞌuin ja Tatixel ja maquita yukul rucꞌuꞌx wqꞌuin. 7Ja wixta chꞌobtajnakto emwal nabey nak ja kas mero nbanic chꞌobtajnak ta cꞌariꞌ emwal chakajaꞌ nak rbanic ja Nataꞌ pro ja camic riꞌ xtichꞌobtajel emwal nak rbanic ja Nataꞌ in etzꞌaton chic rwach chakajaꞌ, neꞌe ja Jesús chique. 8Ja cꞌa Felipe arjaꞌ xbij tre:

—Wajaw, tacꞌutuꞌ chikawach ja Tatixel in xa ruqꞌuin ariꞌ nokquicoti, mta nak chi ta nkajoꞌ chawe, neꞌ tre. 9Ja cꞌa Jesús xbij tre:

—Felipe ¿nak tre tok nabij queriꞌ chwe chi anin ncꞌut chewach ja Tatixel pro tuban waꞌan qꞌuiylaj tiempo incꞌol ewqꞌuin, la majaꞌn cꞌa tichꞌobtaj amwal ariꞌ nak nbanic? pro ja reꞌotakyon nwach jariꞌ cotak cꞌa rwach ariꞌ ja Tatixel. 10¿La matanimaj chi anin xa jun nbanon ruqꞌuin ja Tatixel in ja Tatixel arjaꞌ xa jun rbanon wqꞌuin chakajaꞌ? Nojel ja tzij ja nbij chewe ma chaka ta nwinakarsan nojoj nuyon, ja Tatixel ja cꞌo pa wanma arjaꞌ nsamaj pa wanma chi rbanic nojel ja nmajon rbanic. 11Tenimaj ja nbij chewe chi anin xa jun nbanon ruqꞌuin ja Tatixel in jaꞌ Tatixel xa jun rbanon wqꞌuin anin chakajaꞌ. Owi matenimaj ja chaka tzij nban ewqꞌuin como cꞌo cꞌa ja nimak tak milagro nbanon chewach rmaltariꞌ xtenimaj.

12Ni katzij wiꞌ ja xtinbij chewe riꞌ, ja winak ja nyukeꞌ quecꞌuꞌx wqꞌuin ejeꞌeꞌ xtiyataj na chique chakajaꞌ chi nqueban ja nimak tak milagro ja caniꞌ nban anin. Xtiyataj na chique chi más chi na nimak tak milagro xtiqueban chwach ja caniꞌ nbanon anin. Queriꞌ nbij chewe como anin ninbe ruqꞌuin ja Tatixel rmalcꞌariꞌ tok xtiyataj na chique chi queriꞌ nqueban. 13In jun chic, nojel ja xtecꞌutuj tre ja Nataꞌ in wi yukul ecꞌuꞌx wqꞌuin chi rcꞌutuxic, anin nyaꞌ chewe ja necꞌutuj. Queriꞌ rbanic utzcꞌa chi nya̱ꞌ na rukꞌij ja Tatixel pro rmal ja Ralcꞌwalaxel tok nya̱ꞌ rukꞌij. 14In jutij chic nbij chewe, xa nak ta ja xtecꞌutuj in wi yukul ecꞌuꞌx wqꞌuin chi rcꞌutuxic, anin ninyoꞌ chewe ja necꞌutuj.

* * * * * * * * * *

15Ja wi ni katzij wiꞌ chi ninewajoꞌ jariꞌ nenimaj ja nbij chewe chi neban. 16Ja cꞌa ranin ncꞌutuj na tre ja Tatixel chi arjaꞌ nutakto jun chic ja ntoꞌo ewxin ja nqꞌuejeꞌ ewqꞌuin pro ni chijutij. 17Ja nta̱kto chic ewqꞌuin jariꞌ ja rEspíritu Santo ja ni katzij wiꞌ nojel ja nbij. Ja winak ja xa ruqꞌuin rwachꞌulew yukul wiꞌ quecꞌuꞌx ejeꞌeꞌ maquecowini nquechꞌob nak rbanic ja rEspíritu Santo in matiquecꞌul. Como ejeꞌeꞌ matiquetzꞌat rwach in nixtacꞌa cotak ta rwach chewiꞌ tok queriꞌ nqueban. Pro ja rixix ewotak rwach como arjaꞌ cꞌol ewqꞌuin in nqꞌuejeꞌ na pa tak ewanma.

18Anin ninbe pro matinban can chewe ix caniꞌ tak acꞌalaꞌ ja chaka nemalataji, can ninmelojpi chic jutij ewqꞌuin. 19Xajalal majaꞌn quinbe. Ja cꞌa tok xquinbe maquinquetzꞌat chic ja winak ja xa ruqꞌuin rwachꞌulew yukul wiꞌ quecꞌuꞌx pro ja rixix ninetzꞌat chi na. Como anin wcꞌan ja utzlaj cꞌaslemal ja mta qꞌuisic trij rmalariꞌ newcꞌaj na ixix chakajaꞌ ja utzlaj cꞌaslemal ja mta qꞌuisic trij. 20Ja cꞌa tok xtipeti ja rEspíritu Santo jariꞌ bien nchꞌobtaj chic emwal chi anin xa jun kabanon ruqꞌuin ja Tatixel, bien nchꞌobtaj chic emwal triꞌ chi ixix xa jun ebanon wqꞌuin in anin chakajaꞌ xa jun nbanon ewqꞌuin. 21Ja winak ja necꞌolowi ja ntzobal pa tak canma in wi nquinimaj ja ntzobal triꞌ netzꞌa̱t wiꞌ chi ni katzij wiꞌ chi nincajoꞌ. Ja winak ja neꞌajoꞌn wxin neꞌajoꞌx cꞌa ejeꞌeꞌ ariꞌ rmal ja Nataꞌ in neꞌajoꞌx mwal anin chakajaꞌ in xtinkꞌalasaj wiꞌ chiquewach. Queriꞌ xbij ja Jesús chique.

22Cꞌacꞌariꞌ cꞌoli ja bix tre rmal ja Judas pro ma ja ta ja Judas Iscariote, quewaꞌ bix tre riꞌ:

—¿Nak cꞌa rbanic ariꞌ ja nabij leꞌ chi nakꞌalasaj awiꞌ chikawach ajoj pro matakꞌalasaj awiꞌ chiquewach ja winak ja xa ruqꞌuin rwachꞌulew yukul wiꞌ quecꞌuꞌx? neꞌxi.

23—Ja winak wi ni katzij wiꞌ chi nincajoꞌ nquinimaj cꞌariꞌ ja ntzobal. Ja wi queriꞌ nqueban neꞌajoꞌx cꞌariꞌ rmal ja Nataꞌ, ok caꞌiꞌ ruqꞌuin ja Nataꞌ nokekaj cuqꞌuin in noqui ja canma como kochoch in nokqꞌuejeꞌ chipan. 24Ja winak ja maqueꞌajoꞌn wxin matiquinimaj cꞌariꞌ ja ntzobal. Ja cꞌa ntzobal ja remajon rcꞌaxaxic camic ma anin ta inwinakarsyon nojoj nuyon, ja Tatixel ja takyonpi wxin arjaꞌ biyon chwe.

25Nojel awaꞌ nbin chewe como cꞌa incꞌo na checojol. 26Pro ja cꞌa tok ma incꞌo chi ta checojol tokocꞌariꞌ cꞌo chi na jun nta̱kpi na ewqꞌuin chi etoꞌic jariꞌ ja rEspíritu Santo. Arjaꞌ nta̱kto na rmal ja Nataꞌ in pa nubiꞌ anin tok xtitakto. Arjaꞌ xticꞌutu chic chewach nojelal, arjaꞌ nnatan chic chewe nojel ja nbin can chewe. 27Anin ninbe pro kas tiquicot can ja rewanma. Anin cꞌo jun quicotemal wqꞌuin jariꞌ nyaꞌ can chewe pro jariꞌ ma junan ta ruqꞌuin ja quicotemal ja xa xin rwachꞌulew. Maxta ticapuj ecꞌuꞌx in maxta texbej ewiꞌ chakajaꞌ. 28Ixix xecꞌwaxaj ja tok quewaꞌ xinbij chewe riꞌ: —Anin ninbe pro ninmelojpi chi na jutij ewqꞌuin. Ruqꞌuin ja Nataꞌ ninbe wiꞌ, xincheꞌ chewe. Ja wixta congana ninewajoꞌ xixquicot ta cꞌariꞌ ja tok xinbij chewe chi ruqꞌuin ja Nataꞌ ninbe wiꞌ como ja Nataꞌ arjaꞌ más na nim rukꞌij chinwach anin. 29Camic nyaꞌon pon chic rbixic chewe nak ja majaꞌn tiban chwe utzcꞌa tok xtibantaji tokoriꞌ nyukeꞌ ecꞌuꞌx wqꞌuin pro ni chijutij. 30Xa jurata chic incꞌo checojol chi noktzijon ewqꞌuin. Queriꞌ nbij chewe como ja Satanás ja nbano mandar waweꞌ chwachꞌulew arjaꞌ xajalal majaꞌn turkaji chi ninurchapaꞌ pro arjaꞌ mta rukꞌaꞌ chwe, majun nak ta ninrchapbej. 31Xarwariꞌ anin nyaꞌ wiꞌ pa rukꞌaꞌ utzcꞌa chi ja winak ja xa ruqꞌuin rwachꞌulew yukul wiꞌ quecꞌuꞌx ejeꞌeꞌ bien ncotakij na chi congana nwajoꞌ ja Tatixel utzcꞌa bien ncotakij na chi nnimaj ja bin chwe rmal ja Tatixel chi nunbanaꞌ kaj. Camic quixyictaji, joꞌ, koꞌel chipan ja lugar riꞌ, neꞌ chique.

Currently Selected:

Juan 14: tzjW

Highlight

Copy