Juan 15

1Cꞌacꞌariꞌ xcꞌambej tzij chiquewach, quewaꞌ xbij chique riꞌ:

—Wqꞌuin anin nelto wiꞌ ja cꞌaslemal ja katzij chi cꞌaslemal, anin in junan ruqꞌuin ja rkan jun mocaj uva. Ja cꞌa Nataꞌ arjaꞌ junan ruqꞌuin ja nbano cuenta ja uva in njoskꞌij. 2Arjaꞌ nkupijel ja rkꞌaꞌ uva nojelal ja mta rwach nuyaꞌ, ejeꞌeꞌ cꞌariꞌ ja winak ja chaka ecꞌoloc wqꞌuin. Pro ja rkꞌaꞌ uva ja nwachini jariꞌ njoskꞌix rmal ja Nataꞌ utzcꞌa chi nwachin más. 3Pro ja rixix ixjoskꞌin chic como nojel ja tzij xinbij chewe jariꞌ xixjoskꞌbexi. 4Xa jun tebanaꞌ wqꞌuin in xa jun nban anin ewqꞌuin chakajaꞌ. Caniꞌ tre ja rkꞌaꞌ uva ja wixta ma jun ta rbanon ruqꞌuin ja rkan jariꞌ mta moda xtiwachin ta. In queriꞌ chewe ixix chakajaꞌ, ja wi ma jun ta neban wqꞌuin jariꞌ mta moda xtiwachin ta ja rutzil xin Dios pa tak ewanma.

5Anin in rkan ja jun mocaj uva, ja cꞌa rixix ix tak rukꞌaꞌ. Xa nak ta chewe wi xa jun nuban wqꞌuin in wi anin xa jun nban ruqꞌuin jariꞌ junan ruqꞌuin ja rkꞌaꞌ uva ja buena nwachini. Queriꞌ nbij chewe como majun nak ta nixcowini neban ja wi ma jun ta neban wqꞌuin. 6Ja winak ja ma jun ta nqueban wqꞌuin queriꞌ nba̱n na chique ja caniꞌ nba̱n tre ja rkꞌaꞌ uva, nkupixel in nchakiji cꞌacꞌariꞌ nmo̱l ruchiꞌ in nporox pa kꞌakꞌ. 7Ja wi xa jun neban wqꞌuin wi nqꞌuejeꞌe ja ntzobal pa tak ewanma jariꞌ tecꞌutuj tre ja Dios xa nak ta newajoꞌ in nyataj na chewe. 8Ja wi buena nwachini ja rutzil xin Dios pa tak ecꞌaslemal jariꞌ nya̱ꞌ rukꞌij ja Nataꞌ cumal ja winak emwal in triꞌ nixtzꞌat wiꞌ chi ni katzij wiꞌ chi ix ndiscípulo. 9Caniꞌ rbanon anin chwe ja Tatixel arjaꞌ nij inrajoꞌon wiꞌ in queriꞌ nbanon anin chewe chakajaꞌ nij ixnwajoꞌon wiꞌ in camic nbij chewe, quixqꞌuejeꞌ chipan ja rajoben riꞌil wxin. 10Ja wi ni nenimaj wiꞌ ja nbij chewe chi neban jariꞌ ni nixqꞌuejeꞌ wiꞌ chipan ja rajoben riꞌil wxin, caniꞌ nbanon anin, ni nniman wiꞌ ja bin chwe rmal ja Nataꞌ chi nban in nij incꞌo wiꞌ chipan ja rajoben riꞌil rxin ja Nataꞌ. 11Nojel ja cꞌa xinbij kaj chewe riꞌ utzcꞌa chi xtiqꞌuejeꞌ ta pa tak ewanma ja quicotemal ja cꞌo pa wanma anin. Xinbij chewe utzcꞌa chi xtinoj ta ja quicotemal pa tak ewanma.

12Caniꞌ nbanon anin chewe nij ixnwajoꞌon wiꞌ queriꞌ cꞌa tebanaꞌ ixix chakajaꞌ tewajoꞌ ewiꞌ, jawaꞌ jun mandamiento nyaꞌ can chewe chi neban. 13Ja tok matapokonaj natcam pa quicuenta ja rawamigo jariꞌ bien kꞌalaj chi congana neꞌawajoꞌ, mta jun ajoben riꞌil ja queriꞌ chi ta. 14Ja cꞌa rixix ix wamigo ja wi nenimaj ja nbij chewe chi neban. 15Nojel ja ncꞌwaxan ja bin chwe rmal ja Nataꞌ jariꞌ nkꞌalasan chic chewach in rmalariꞌ nbij chewe chi ix wamigo. Camic ma ja ta nbij chewe chi xa ix nmoso como jun moso arjaꞌ ma rotak ta nak ntajini nuchꞌob ja rpatrón. 16Ma ixix ta xixcanon wxin, ja xinban, anin xincanon ewxin chi xixoc apóstol, xinbij chewe chi nixbe nebanaꞌ ja nsamaj. Queriꞌ xinban chewe utzcꞌa chi ja samaj ja nebanaꞌ cꞌoli ja rutzil xin Dios nwachij utzcꞌa chi ja rutzil ja newachij jariꞌ mta qꞌuisic trij. Queriꞌ rbanic utzcꞌa ja Tatixel arjaꞌ nuyaꞌ na chewe xa nak ta necꞌutuj tre ja wi yukul ecꞌuꞌx wqꞌuin chi rcꞌutuxic. 17Nojel awaꞌ ja cꞌa xinbij chewe riꞌ utzcꞌa chi newajoꞌ ewiꞌ.

* * * * * * * * * *

18Ja winak ja xa ruqꞌuin rwachꞌulew yukul wiꞌ quecꞌuꞌx ja wi ejeꞌeꞌ xa itzel nixquetzꞌat bien techꞌoboꞌ chi queriꞌ queban anin chwe nabey, itzel xinquetzꞌat chakajaꞌ. 19Ja wixta ix cachbil ja winak ja xa ruqꞌuin rwachꞌulew yukul wiꞌ quecꞌuꞌx jariꞌ lokꞌ ta nixquenaꞌ ariꞌ. Pro jariꞌ ma ix cachbil ta como anin xixnuchaꞌ chiquicojol in xixnpartiꞌij rmalcꞌariꞌ tok itzel nixquetzꞌat. 20Turkaj chewe jun tzij ja xinbij chewe quewariꞌ: —Jun moso arjaꞌ ma nim ta rukꞌij chwach ja rpatrón, xincheꞌ chewe. Tibij cꞌa tzij ariꞌ ja wi cꞌo pokon quibanon anin chwe cꞌo cꞌa pokon xtiqueban ariꞌ chewe ixix chakajaꞌ. Ja cꞌa wi quinimaj ja ntzobal ja xinbij chique jariꞌ xtiquinimaj ja xtebij ixix chique chakajaꞌ. 21Pro mwal anin ja tok xtetij pokon pa quekꞌaꞌ. Ejeꞌeꞌ nqueban na pokon chewe como ma cotak ta janiꞌ rnaꞌoj ja Dios ja takyonto wxin. 22Ja wixta maquita xinpeti wixta maquita xinkꞌalasaj chiquewach janiꞌ rnaꞌoj ja Dios jariꞌ mta nechapbexi pro ja camic mta nquitobej quiꞌ xtiquibij ta chi ma quemac ta. 23Ja winak ja xa itzel ninquetzꞌat jariꞌ xa itzel nquetzꞌat ja Nataꞌ chakajaꞌ. 24Ja wixta maquita xinban ja nimak tak milagro chiquewach, pro juleꞌ milagro ja ni majun nak chi ta banyon, jariꞌ mta nechapbexi pro jariꞌ quetzꞌat in camic xa itzel ninquetzꞌat in xa itzel nquetzꞌat ja Nataꞌ chakajaꞌ. 25Queriꞌ nqueban utzcꞌa chi nbantaj cumplir ja tzꞌibtal can chwe chipan ja ley xin Dios ja cꞌo cuqꞌuin, quewaꞌ nbij riꞌ: —Ejeꞌeꞌ xa itzel xinquetzꞌat pro chaka queriꞌ mta wil, mta xinban chique. Queriꞌ ja tzꞌibtal can. 26Pro ja jun chic Toꞌonel ja cꞌo ruqꞌuin ja Nataꞌ arjaꞌ nkajto na ewqꞌuin como anin xquintakoto rxin. Arjaꞌ ja rEspíritu Santo pro jun Espíritu ja ni katzij wiꞌ nojel ja nbij, jun Espíritu ja ruqꞌuin Nataꞌ npi wiꞌ. Ja tok xturkaj ewqꞌuin arjaꞌ nkꞌalasaj na chiquewach ja winak nak inocnak wiꞌ anin. 27Ja cꞌa rixix chakajaꞌ nekꞌalasaj na chiquewach ja winak nak inocnak wiꞌ como ixix nij ixcꞌo wiꞌ wqꞌuin ja tok xinmajto ja nsamaj.

Currently Selected:

Juan 15: tzjW

Highlight

Copy