Popular Bible Verses from Juan 14

Share

Anin ninbe pro kas tiquicot can ja rewanma. Anin cꞌo jun quicotemal wqꞌuin jariꞌ nyaꞌ can chewe pro jariꞌ ma junan ta ruqꞌuin ja quicotemal ja xa xin rwachꞌulew. Maxta ticapuj ecꞌuꞌx in maxta texbej ewiꞌ chakajaꞌ.

—Pro anin cꞌa ja rin bey, wqꞌuin anin niltaj wiꞌ nojelal ja ni katzij wiꞌ ja ni majun engaño rcꞌan in anin ninyowi ja utzlaj cꞌaslemal ja mta qꞌuisic trij. Mta jun nak ta xtekaj ta ruqꞌuin ja Tatixel ja maquita yukul rucꞌuꞌx wqꞌuin.

Cꞌacꞌariꞌ xbij chic chique: —Maxta ticapuj ecꞌuꞌx, ni tiyukeꞌ wiꞌ ecꞌuꞌx ruqꞌuin ja Dios in wqꞌuin anin chakajaꞌ.

Pro ja cꞌa tok ma incꞌo chi ta checojol tokocꞌariꞌ cꞌo chi na jun nta̱kpi na ewqꞌuin chi etoꞌic jariꞌ ja rEspíritu Santo. Arjaꞌ nta̱kto na rmal ja Nataꞌ in pa nubiꞌ anin tok xtitakto. Arjaꞌ xticꞌutu chic chewach nojelal, arjaꞌ nnatan chic chewe nojel ja nbin can chewe.

Ja winak ja necꞌolowi ja ntzobal pa tak canma in wi nquinimaj ja ntzobal triꞌ netzꞌa̱t wiꞌ chi ni katzij wiꞌ chi nincajoꞌ. Ja winak ja neꞌajoꞌn wxin neꞌajoꞌx cꞌa ejeꞌeꞌ ariꞌ rmal ja Nataꞌ in neꞌajoꞌx mwal anin chakajaꞌ in xtinkꞌalasaj wiꞌ chiquewach. Queriꞌ xbij ja Jesús chique.

Ja cꞌa ranin ncꞌutuj na tre ja Tatixel chi arjaꞌ nutakto jun chic ja ntoꞌo ewxin ja nqꞌuejeꞌ ewqꞌuin pro ni chijutij. Ja nta̱kto chic ewqꞌuin jariꞌ ja rEspíritu Santo ja ni katzij wiꞌ nojel ja nbij. Ja winak ja xa ruqꞌuin rwachꞌulew yukul wiꞌ quecꞌuꞌx ejeꞌeꞌ maquecowini nquechꞌob nak rbanic ja rEspíritu Santo in matiquecꞌul. Como ejeꞌeꞌ matiquetzꞌat rwach in nixtacꞌa cotak ta rwach chewiꞌ tok queriꞌ nqueban. Pro ja rixix ewotak rwach como arjaꞌ cꞌol ewqꞌuin in nqꞌuejeꞌ na pa tak ewanma.

In jun chic, nojel ja xtecꞌutuj tre ja Nataꞌ in wi yukul ecꞌuꞌx wqꞌuin chi rcꞌutuxic, anin nyaꞌ chewe ja necꞌutuj. Queriꞌ rbanic utzcꞌa chi nya̱ꞌ na rukꞌij ja Tatixel pro rmal ja Ralcꞌwalaxel tok nya̱ꞌ rukꞌij. In jutij chic nbij chewe, xa nak ta ja xtecꞌutuj in wi yukul ecꞌuꞌx wqꞌuin chi rcꞌutuxic, anin ninyoꞌ chewe ja necꞌutuj.

Ja wi ni katzij wiꞌ chi ninewajoꞌ jariꞌ nenimaj ja nbij chewe chi neban.

Ja chi rochoch ja Nataꞌ sobre ja lugar cꞌo chilaꞌ. Ja wixta ma queriꞌ ta xinbij ta cꞌariꞌ chewe chakajaꞌ. Anin ninbe camic nenchomarsaj na ja lugar ewxin.

In como xinbij chewe chi ninbe chi nenchomarsaj ja relugar pro ninmelojpi chic jutij nixuncꞌamaꞌ kaj utzcꞌa chi nixqꞌuejeꞌ chic wqꞌuin. Queriꞌ nban utzcꞌa ja bar xquinqꞌuejeꞌ wiꞌ anin triꞌ nixqꞌuejeꞌ wiꞌ ixix chakajaꞌ.

Ja cꞌa Tomás arjaꞌ xbij tre: —Wajaw, ajoj ma kotak ta ja bar natbe wiꞌ ¿nak moda cꞌariꞌ tok nabij chake chi kotak ja bey? neꞌ tre.