Juan 20
20
1Ja cꞌa xin domingo be ja María Magdalena ja bar mukun wiꞌ ja Jesús, chanim be, cꞌa kꞌekuꞌm na. Ja cꞌa tok xekaji xutzꞌat ja nimlaj abaj ja tzꞌapben ruchiꞌ ja panteón, junwiꞌ yaꞌon pon chi wiꞌ. 2Cꞌamcꞌol ranim be ja bar ecꞌo wiꞌ ja Simón Pedro rachbil ja jun chic discípulo ja congana najoꞌx rmal ja Jesús. Ja cꞌa tok xekaji quewaꞌ xbij chique riꞌ: —Ja kajaw Jesús takaꞌan mchita chipan ja panteón, cꞌamarel pro ba la quiyaꞌon chi wiꞌ, neꞌ chique. 3Ja cꞌa Pedro rachbil ja jun chic discípulo ejeꞌeꞌ xebe ja bar cꞌo wiꞌ ja panteón. 4Cꞌamcꞌol canim xebe chi e caꞌiꞌ pro ja jun más na xutij rukꞌij chwach ja Pedro chewiꞌ tok arjaꞌ xekaji nabey ja bar cꞌo wiꞌ ja panteón. 5Ja cꞌa tok xekaji luqueꞌ kaj, cayoc chipan ja panteón, xutzꞌatoc ja utzlaj tak tziak rxin ja camnak chi xa ruyon chic cꞌo can pro ma xoc ta chipan ja panteón. 6Ja cꞌa Simón Pedro arjaꞌ cꞌa tran can na pro ja tok xekaji xoc chipan ja panteón. Arjaꞌ xutzꞌat ja tziak rxin ja camnak chi xa ruyon chic cꞌo can. 7In xutzꞌat chakajaꞌ ja tziak ja barben rpalaj ja camnak pro ma ruqꞌuin chi ta cꞌo wiꞌ ja juleꞌ chic tziak, junwiꞌ cꞌo pon chi wiꞌ, botol can ruyon. 8Cꞌacꞌariꞌ xoc chipan ja panteón chakajaꞌ ja jun chic discípulo ja xekaji nabey in tok xutzꞌat ja tziak arjaꞌ xnimaj chi cꞌastajnak chic ja Jesús chiquicojol camnakiꞌ. 9Como ejeꞌeꞌ nabey matichꞌobtaj cumal ja tzꞌibtal can chipan ja rtzobal Dios chi rjawaxic chi ncꞌastaj na ja Cristo chiquicojol ja camnakiꞌ. 10Cꞌacꞌariꞌ xemeloji ja discípulo chi cochoch.
* * * * * * * * * *
11Ja cꞌa María arjaꞌ paꞌl can chuchiꞌ ja panteón, rmajon okꞌej. Kas cꞌa rmajon okꞌej ja tok luqueꞌ kaj, cayoc chipan ja panteón. 12Ecꞌo caꞌiꞌ ángel xerutzꞌatoc chipan. Congana sak quitziak ja ángel, jun tzꞌubuli ja bar qꞌuejeꞌ wiꞌ rwiꞌ ja Jesús in jun chic tzꞌubuli ja bar qꞌuejeꞌ wiꞌ rkan. 13Quewaꞌ quibij tre ja María riꞌ:
—Ixok ¿nak tre tok natokꞌi? xecheꞌ tre.
—Cꞌamarel ja Wajaw in ma wotak ta ba la xeya̱ꞌ chi wiꞌ, neꞌe ja María chique. 14Ja tok bitaji tzij rmal xuyaꞌ vuelta in xutzꞌat ja Jesús paꞌl chwach pro ma rotak ta chi Jesús. 15Ja cꞌa Jesús xbij tre:
—Ixok ¿nak tre tok natokꞌi, nak nacanoj? neꞌ tre. Ja xuchꞌob kaj ja María chi chajil tijcoꞌm ja ntzijon ruqꞌuin in quewaꞌ xbij tre riꞌ:
—Ja wi atat xatcꞌamoꞌel rxin tabij jutzꞌit chwe bar xayaꞌ wiꞌ, anin nincꞌamoꞌel rxin, neꞌ tre. 16Cꞌacꞌariꞌ ja Jesús xbij tre:
—María, neꞌ tre. Ja cꞌa María be ruqꞌuin in quewaꞌ xbij tre riꞌ:
—Raboni, neꞌ tre. Jariꞌ tzij xbij tre, pan hebreo xbij wiꞌ in tibij tzij Maestro. 17Ja cꞌa Jesús xbij tre:
—Ma quinachap ta, quinasokpij como majaꞌn quinjoteꞌe ruqꞌuin ja Nataꞌ. Pro ja naban, jat cuqꞌuin ja wachꞌalal, jabij chique chi ninjoteꞌ na ruqꞌuin ja Nataꞌ. Arjaꞌ Etataꞌ ixix chakajaꞌ. Arjaꞌ Dios wxin anin in chakajaꞌ Dios ewxin ixix, neꞌ tre. 18Cꞌacꞌariꞌ be ja María Magdalena cuqꞌuin ja discípulo xerbij chique chi: —Anin xintzꞌat rwach ja kajaw Jesús, neꞌ chique, in xbij chique chakajaꞌ nojel ja binel tre rmal ja Jesús.
* * * * * * * * * *
19Jariꞌ kꞌij domingo, ja cꞌa discípulo como ejeꞌeꞌ nquixbej quiꞌ chiquewach ja cach tak aj Israel chewiꞌ tok quimolon quiꞌ pa jay, quitzꞌapinto quechiꞌ. Ja cꞌa tok xoc akꞌaꞌ xekaji ja Jesús cuqꞌuin, peꞌi chiquicojol in quewaꞌ xbij chique riꞌ:
—Ja quicotemal xin Dios tiqꞌuejeꞌ checojol, neꞌ chique. 20Ja cꞌa tok bitaji tzij rmal cꞌacꞌariꞌ xucꞌut chiquewach ja pa rukꞌaꞌ in ja pa rupox chakajaꞌ. Congana xequicoti ja discípulo ja tok quetzꞌat chi ni katzij wiꞌ chi ja kajaw Jesús ja cꞌo cuqꞌuin. 21Ja cꞌa Jesús xbij chic jutij chique:
—Ja quicotemal xin Dios tiqꞌuejeꞌ checojol. Ja Nataꞌ arjaꞌ xinrutakto waweꞌ chwachꞌulew in queriꞌ cꞌa nban chic chewe ixix chakajaꞌ, nixnutakel chi nebanaꞌ ja nsamaj, neꞌ chique. 22Ja cꞌa tok bitaji tzij rmal cꞌacꞌariꞌ xerxupuj in quewaꞌ xbij chique riꞌ: —Camic, tecꞌuluꞌ ja rEspíritu Santo. 23Ja wi nebij tre jun winak xa nak ta chi winakil chi cuytaji ja ril rumac cuytaj cꞌariꞌ owi nebij tre chi ma xcuytaj ta ma xcuytaj ta cꞌariꞌ. Queriꞌ xbij chique.
* * * * * * * * * *
24Pro cꞌo jun chique ja cablajuj apóstol rbinaꞌan Tomás ja yoꞌx neꞌxi, arjaꞌ mta ja tok xekaji ja Jesús cuqꞌuin ja juleꞌ chic discípulo. 25Ja cꞌa tok xekaji ja Tomás bix tre cumal ja juleꞌ chic:
—Katzꞌat rwach ja kajaw Jesús, neꞌxi. Pro ja Tomás xbij chique:
—Jariꞌ matinnimaj chi cꞌastaji. Ja wi xtintzꞌat ja pa rukꞌaꞌ ja bar soctajnak wiꞌ rmal ja clawux in wi xtinmin ja rwinukꞌaꞌ triꞌ in wi xtinmin nukꞌaꞌ pa rupox ja bar soctajnak wiꞌ chakajaꞌ cꞌa tokoriꞌ xtinnimaj, neꞌ chique.
26Ja cꞌa cha jun domingo chic quimolon chic jutij quiꞌ ja discípulo chipan ja jay cachbil ja Tomás. Tzꞌapali ja chiꞌjay pro chaka jalal tok xekaji ja Jesús, peꞌi chiquicojol in quewaꞌ xbij chique riꞌ:
—Ja quicotemal xin Dios tiqꞌuejeꞌ checojol, neꞌ chique. 27Cꞌacꞌariꞌ xbij tre ja Tomás:
—Taminaꞌ ja rwiakꞌaꞌ waweꞌ riꞌ, tatzꞌataꞌ mpeꞌ ja pa nukꞌaꞌ riꞌ in taminaꞌ ja rakꞌaꞌ pa nupox. Maxta ma catniman chi ta pro ni catniman wiꞌ, neꞌ tre.
28—Atat at Wajaw, atat at nDios, neꞌe ja Tomás tre. 29Ja cꞌa Jesús xbij tre:
—Tomás, atat natzꞌat nwach camic chewiꞌ tok natnimani pro congana na quiꞌil chique ja nenimani masqui matiquetzꞌat nwach, neꞌ tre.
* * * * * * * * * *
30Ja Jesús cꞌo chi na juleꞌ milagro ja xuban ja xkꞌalasbej riꞌ chiquewach ja rdiscípulo pro jariꞌ ma xintzꞌibaj ta chipan awaꞌ jun libro riꞌ. 31Pro cꞌoli ja xintzꞌibaj chipan awaꞌ jun libro riꞌ utzcꞌa chi nenimaj ja Jesús chi arjaꞌ ja Cristo ja Ralcꞌwal Dios in tok queriꞌ nenimaj jariꞌ nyataj chewe ja utzlaj cꞌaslemal ja mta qꞌuisic trij como jariꞌ nyataj chake ja tok xa jun nkaban ruqꞌuin.
Currently Selected:
Juan 20: tzjW
Highlight
Share
Copy
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.