Juan 21

1Ja cꞌa tok bantajnak chic nojel awaꞌ wariꞌ cꞌacꞌariꞌ ja Jesús xucꞌut chic jutij riꞌ chiquewach ja discípulo tokoriꞌ tok ecꞌo chuchiꞌ ja mar ja rbinaꞌan Tiberias in quewaꞌ rbanic riꞌ. 2Ecꞌo cꞌa juleꞌ rdiscípulo quimolon quiꞌ, quewaꞌ quebiꞌ riꞌ, jun Simón Pedro, jun chic Tomás ja yoꞌx neꞌxi, jun chic Natanael ja raj Caná cꞌo pa rcuenta Galilea. Ecꞌoli chakajaꞌ ja rcꞌajol Zebedeo in ecꞌo chi na caꞌiꞌ ja discípulo. 3Ja cꞌa Simón Pedro arjaꞌ xbij chique:

—Can ninbe anin pa chapoj chꞌuꞌ, neꞌ chique.

—Nokbe ajoj chawij chakajaꞌ, xecheꞌ tre. Queriꞌ queban xebe, xeꞌoc chipan ja lancha pro jariꞌ akꞌaꞌ ni majun ja chꞌuꞌ xequechap.

4Ja cꞌa tok pi rsakaric paꞌli ja Jesús chiyaꞌ ja bar ecꞌo wiꞌ ja discípulo pro ejeꞌeꞌ ma cotak ta chi Jesús ja paꞌl triꞌ. 5Ja cꞌa Jesús quewaꞌ xbij chique riꞌ:

—Walcꞌwal ¿la ma ecꞌo ta chꞌuꞌ eꞌechapon nekatiꞌ? neꞌ nojoj chique.

—Ni majun, xecheꞌpi tre.

6—Camic pan ewiquikꞌaꞌ teqꞌuiakaꞌ wiꞌ ja recꞌam in ecꞌoli ja chꞌuꞌ neꞌechap, neꞌ nojoj chic jutij chique. Queriꞌ queban queqꞌuiak ja cꞌam pro congana jun chꞌuꞌ xeꞌoc chipan, maquecowin chic nquiwasajto pa yaꞌ. 7Cꞌoli ja discípulo ja congana najoꞌx rmal ja Jesús, arjaꞌ xbij tre ja Pedro:

—Jalaꞌ laleꞌ kajaw Jesús, neꞌ tre. Ja cꞌa Simón Pedro arjaꞌ tok xcꞌaxaj chi queriꞌ xcojlaꞌ ja rtziak in xuqꞌuiakto riꞌ pa yaꞌ in xuleꞌto. 8Pro ja juleꞌ chic discípulo ejeꞌeꞌ xexuleꞌto pa lancha, quichararanto ja cꞌam ja renojnak chꞌuꞌ chipan. Ma bien ta nat ecꞌo wiꞌ, xla jun cien metro quiyaꞌon can ja chiyaꞌ.

9Ja cꞌa tok xekajto ja chiyaꞌ quetzꞌat juleꞌ rchakꞌakꞌ saꞌon jun chꞌuꞌ parwiꞌ in cꞌo juleꞌ caxlanway chakajaꞌ. 10Ja cꞌa Jesús xbij chique:

—Queꞌecꞌamaꞌto juleꞌ chique ja chꞌuꞌ ja cꞌa xeꞌechapto, neꞌ chique. 11Cꞌacꞌariꞌ be ja Simón Pedro, xoc chipan ja lancha, xerlasajto ja cꞌam pa yaꞌ enojnak ja nimak tak chꞌuꞌ chipan, e jun ciento in cincuentitrés ja chꞌuꞌ. Pro masqui congana e qꞌuiy ja chꞌuꞌ pro ma xraktaj ta ja cꞌam. 12Ja cꞌa Jesús xbij chic chique: —Quixajoꞌ, quixwaꞌi, neꞌ chique. Canojel ja discípulo nquixbej quiꞌ nquicꞌaxaj tre: —¿Nak abiꞌ? xecheꞌ ta tre como cotak chi ja kajaw Jesús. 13Peti ja Jesús triꞌ, xucꞌam ja caxlanway, xuyaꞌ chique in queriꞌ xuban tre ja chꞌuꞌ chakajaꞌ. 14Quewaꞌ cꞌa xuban ja Jesús ja tok cꞌastaji chiquicojol camnakiꞌ, roxmul cꞌawaꞌ wariꞌ ja tucꞌut riꞌ chiquewach ja rdiscípulo.

* * * * * * * * * *

15Ja cꞌa tok colbetaji waꞌim cumal cꞌacꞌariꞌ cꞌaxax tre ja Simón Pedro rmal ja Jesús:

—Simón ja rat rcꞌajol Jonás ¿la ni katzij wiꞌ chi atat ja más na natajoꞌn wxin chiquewach ja juleꞌ chic awachbil riꞌ? neꞌxi.

—Queriꞌ Wajaw, atat awotak chi congana nel nucꞌuꞌx chawij, neꞌe ja Pedro.

—Queꞌayukꞌuj cꞌa ja yukul quecꞌuꞌx wqꞌuin como ejeꞌeꞌ e caniꞌ tak ncarnelo, neꞌxi rmal ja Jesús. 16Cꞌacꞌariꞌ ja Jesús xcꞌaxaj chic jutij tre:

—Simón ja rat rcꞌajol Jonás ¿la ninawajoꞌ? neꞌ tre.

—Queriꞌ Wajaw, atat awotak chi congana nel nucꞌuꞌx chawij, neꞌx chic jutij rmal ja Pedro.

—Queꞌachajij cꞌa ja ncarnelo, neꞌe ja Jesús tre. 17Pa roxmul cꞌaxax chic tre ja Pedro:

—Simón ja rat rcꞌajol Jonás ¿la congana nel acꞌuꞌx chwij? neꞌxi rmal ja Jesús. Ja cꞌa Pedro arjaꞌ xumaj bis rmal ja cꞌaxax oxmul tre ja wi congana nel rucꞌuꞌx trij ja Jesús:

—Wajaw, atat ni majun nak ta ja maquita awotak, awotak chi congana nel nucꞌuꞌx chawij, neꞌe ja Pedro tre.

—Queꞌayukꞌuj cꞌa ja ncarnelo, neꞌe ja Jesús tre.

18In xbij chic jutij tre:

—Ni katzij wiꞌ ja xtinbij chawe riꞌ, ja tok cꞌa at cꞌajol na xacoj ja ratziak, xaxim xeꞌ apan in xatbe xa bar ta cꞌo wiꞌ agana chi xatbe wiꞌ. Pro ja tok xcatrajiꞌxi narip na akꞌaꞌ in junwiꞌ chic nximo awxin in natrucꞌamel ja bar mta wiꞌ agana natbe wiꞌ, neꞌe ja Jesús tre. 19Ja tok queriꞌ xbij jariꞌ xcꞌutbej nak xtiban na tre ja Pedro tok xticamsaxi, jariꞌ xcꞌutbej chi ja rcamic ja Pedro noc na yaꞌbal rukꞌij ja Dios. Cꞌacꞌariꞌ ja Jesús xbij chic tre ja Pedro: —Joꞌ, ni quinawachbilaj wiꞌ, neꞌ tre. 20Ja cꞌa Pedro arjaꞌ caꞌy can trij in xutzꞌat chi tran chiquij ja discípulo ja congana najoꞌx rmal ja Jesús. Jariꞌ mismo discípulo ja kꞌeꞌoc chwarucꞌuꞌx ja Jesús tokoriꞌ tok queban ja qꞌuisbal waꞌim ruqꞌuin ja tok cꞌo jun pregunta xcꞌaxaj tre ja Jesús quewariꞌ: —Wajaw ¿nak xtijacho awxin pa quekꞌaꞌ ja netzelan awxin? neꞌ tre. 21Ja cꞌa Pedro arjaꞌ tok xutzꞌat ja discípulo chi tran chiquij quewaꞌ xbij tre ja Jesús riꞌ:

—Wajaw, jalaꞌ jun kachbil leꞌ ¿nak cꞌa xtiban na tre arjaꞌ chakajaꞌ? neꞌ tre.

22—Ja wi cꞌo ngana chi cꞌa cꞌas na arjaꞌ ja tok xquinmeloj chic jutij jariꞌ mta akꞌaꞌ atat tre pro xar ja naban atat, ni quinawachbilaj wiꞌ, neꞌxi ja Pedro rmal ja Jesús. 23Jariꞌ tzij ja xbij ja Jesús be rtzijoxic chiquicojol ja kachꞌalal pro queqꞌuex rbixic: —Ni maticam wiꞌ ja discípulo, xecheꞌe, pro ma queriꞌ ta xbij ja Jesús como arjaꞌ xbij: —Ja wi cꞌo ngana chi cꞌa cꞌas na arjaꞌ ja tok xquinmeloj chic jutij jariꞌ mta akꞌaꞌ atat tre, queriꞌ xbij.

24Jariꞌ mismo discípulo arjaꞌ ntajini nkꞌalasaj nojel awaꞌ ja bantaji riꞌ, arjaꞌ tzꞌibyon nojel ja cꞌo chipan awaꞌ jun libro riꞌ in bien kotak chi ni katzij wiꞌ ja nbij. 25Pro ja Jesús arjaꞌ cꞌa cꞌo na más ja xuban waweꞌ chwachꞌulew. Nojel ja xuban ja Jesús wixta tzꞌibtali chijujunal pa tak libro maquita nuban ariꞌ ja rwachꞌulew xticꞌol ta ja libro chwach. Amén.

Currently Selected:

Juan 21: tzjW

Highlight

Copy