Lucas 11

1Xuban jutij ja Jesús arjaꞌ cꞌo pa jun lugar, rmajon rbanic oración. Ja cꞌa tok tzuri ja roración rmal pi jun chique ja rdiscípulo in quewaꞌ xbij ja discípulo tre riꞌ:

—Wajaw, koꞌatijoj tre ja banoj oración ja caniꞌ xuban ja Juan Bautista xertijoj ja discípulo rxin arjaꞌ, neꞌ tre. 2Ja cꞌa Jesús xbij chique:

—Ja tok neban oración quewaꞌ nebij riꞌ: —Katataꞌ Dios ja ratcꞌo chilaꞌ chicaj, lokꞌ ta xtinaꞌi ja rabiꞌ cumal ja winak. Xtikajpi ta ja ragobierno waweꞌ chwachꞌulew, xtinimax ta ja ravoluntad atat waweꞌ ja caniꞌ ntajini nba̱n chilaꞌ chicaj nnimaxi. 3Kꞌij kꞌij ni ta nayaꞌ wiꞌ ja kaway ja ncꞌatzin chake. 4Tacuyuꞌ ja kil kamac ja caniꞌ nkaban ajoj nekacuy ja winak tok cꞌoli nqueban chake. Atat ta xcatchajin kaxin, maxta kokaji tok nokrtakchiꞌij ja diablo, koꞌatoꞌoꞌ pa rukꞌaꞌ. Queriꞌ ta rbanic ja roración neban, neꞌ chique ja rdiscípulo. 5Cꞌacꞌariꞌ xbij chic chique:

—Tacꞌa cꞌo ta jun chewe nbe ta ruqꞌuin jun ramigo pa tak ncꞌajakꞌaꞌ in nerbij ta tre: —Wamigo, maxta cꞌo caxlanway awqꞌuin, tayaꞌaꞌ oxiꞌ rkan wxin pro can nyaꞌ rcꞌaxel. 6Xa cꞌo jun wamigo cꞌa xurkaj wqꞌuin, penak pa viaje in ni majun nyaꞌ tre, neꞌ ta tre. 7In quewaꞌ ta cꞌa ncꞌulbaꞌto ja ramigo pa jay riꞌ: —Ma quinaban ta molestar como ntzꞌapin chic ja chiꞌjay, okcotzꞌol chic cuqꞌuin tak walcꞌwal. Maquincowini ninyictaji, maquincowini nyaꞌ chawe ja nacꞌutuj chwe, neꞌto ta tre, neꞌe ja Jesús chique. 8Cꞌacꞌariꞌ xbij chic chique: —Camic nbij chewe, ja rachi wi chijutij numaj rcꞌutuxic ja caxlanway, wi ni matitanbaꞌ wiꞌ rcꞌutuxic jariꞌ nyictaji ja ramigo in nuyaꞌ tre nojel ja ncꞌatzin tre pro ma rmal ta chi camigo quiꞌ ruqꞌuin tok nuyaꞌ pro rmal ja ni matitanbaꞌ wiꞌ chi rcꞌutuxic chewiꞌ tok nuyaꞌ. 9Rmalcꞌariꞌ tok nbij chewe, tecꞌutuj tre ja Dios ja ncꞌatzin chewe in arjaꞌ nuyaꞌ chewe, tecanoj ja newajoꞌ in newil, tecꞌoncꞌoꞌoc ja chiꞌjay in nja̱k chewach. 10Queriꞌ nbij chewe como canojel ja necꞌutuni nyataj chique in ja necanoni nyataj chique chi nquewil in ja necꞌoncꞌonoc ja chiꞌjay nja̱k chiquewach. 11O ¿la cꞌol on jun tatixel chewe tok ncꞌutux jun caxlanway tre rmal jun ti rcꞌajol la nuyaꞌ jun abaj pa rukꞌaꞌ? Owi ncꞌutux jun chꞌuꞌ tre ¿la nuyaꞌ jun cumatz tre? 12Owi ncꞌutux jun sakmoloꞌ tre ¿la nuyaꞌ jun sinaꞌy? 13Ixix masqui ix lawuloꞌ pro ewotak neyaꞌ utzlaj tak nakun chique ja rewalcꞌwal pro pior ta cꞌa ja Tatixel ewxin ja cꞌo chilaꞌ chicaj arjaꞌ nuyaꞌ ja rEspíritu Santo chique ja necꞌutun tre. Queriꞌ xbij ja Jesús chique ja rdiscípulo tre ja banoj oración.

* * * * * * * * * *

14Cꞌo cꞌa jun achi memirnak rmal jun itzel espíritu. Ja cꞌa Jesús arjaꞌ ntajini nlasaj ja ritzel espíritu tre. Ja tok lastajel rmal ni jariꞌ hora xumaj tzij ja rachi. Ja cꞌa winak congana cꞌascꞌoꞌi quetzꞌat. 15Pro ecꞌo juleꞌ chique quewaꞌ quibij riꞌ:

—Xa poder xin Beelzebú ja jefe quixin ja ritzel tak espíritu xa jariꞌ nucoj chi quilasaxic ja ritzel tak espíritu, xecheꞌe. 16Ecꞌo chi cꞌa juleꞌ quemaj rcꞌambajaxic:

—Tabanaꞌ jun milagro ja ncꞌutu chikawach chi Dios yoyon chawe ja poder ja cꞌo pan akꞌaꞌ, xecheꞌ tre. 17Pro ja cꞌa Jesús arjaꞌ bien rotak ja quimajon rchꞌobic in xbij chique:

—Jun gobierno xa nak ta chi gobiernoꞌil, wi xa división nuban chibil riꞌ jariꞌ xa nyojtaji. In queriꞌ chique juleꞌ winak chakajaꞌ ecꞌo pa jun jay, wi xa división nqueban chibil tak quiꞌ jariꞌ xa neqꞌuisi. 18In queriꞌ cꞌa tre ja Satanás chakajaꞌ, ja wi xa división nuban cuqꞌuin rach tak demonio ¿nak moda ja maquita xtiqꞌuisi ja rgobierno? Queriꞌ nbij chewe como ixix nebij chwe chi poder xin Beelzebú ncoj chi quilasaxic ja demonio. 19Ja cꞌa ranin wi xa poder xin Beelzebú ncoj ja tok nenlasaj ja demonio ¿nak nebij chique ja rediscípulo ixix? Como ejeꞌeꞌ nequiwasaj demonio chakajaꞌ ¿la xcꞌa poder xin Beelzebú nquecoj nechꞌob ixix? Ja rediscípulo ixix ejeꞌeꞌ cꞌariꞌ xquekꞌalasani chi ma katzij ta ja xebij chwe. 20Ja ranin poder xin Dios ncoj ja tok nenlasaj ja demonio in wi queriꞌ nban tibij cꞌa tzij ariꞌ chi ja gobierno xin Dios kajnakto chic checojol.

21Ja tok cꞌo jun achi ja congana rchokꞌakꞌ rmajon rchajixic rochoch in tok cꞌoli ja banbal chꞌaꞌoj ruqꞌuin jariꞌ cꞌayew chi xtilasax ta tre ja cꞌo ruqꞌuin. 22Pro ja cꞌa tok npi chic jun achi ja más kꞌaxnak chi na rchokꞌakꞌ in nuchꞌec ja rachi ja rajaw jay jariꞌ numaj tre nojel ja banbal chꞌaꞌoj ja bar yukul wiꞌ rucꞌuꞌx, nlasaj tre ja cꞌo ruqꞌuin in numaj rjachic chique ja rachbil.

23Ja winak ja matiquecoj quiꞌ wqꞌuin jariꞌ xa ruqꞌuin Satanás ja ncꞌulel nquecoj wiꞌ quiꞌ in chakajaꞌ ja maquetoꞌo wxin chi quimolic ja winak jariꞌ xa nequichicaj.

* * * * * * * * * *

24Jun itzel espíritu tok nel pa ranma jun achi arjaꞌ nbe pa tak lugar ja bar mta wiꞌ yaꞌ, nercanoj jun lugar ja bar nxulaꞌn wiꞌ pro matuwil ja lugar in quewaꞌ nbij riꞌ: —Ninmeloj chic jutij chipan ja wochoch ja bar inelnakto wiꞌ nabey, neꞌe. 25Ja cꞌa tok nekaj chic jutij ruqꞌuin ja rachi nutzꞌat ja ranma caniꞌ jun jay joskꞌin rpan in wekon chi utz. 26Cꞌacꞌariꞌ nmeloj chic jutij, neꞌercꞌamaꞌ wukuꞌ rach tak itzel espíritu ja más chi na e itzel chwach arjaꞌ. Ja cꞌa tok neꞌurkaj ruqꞌuin ja rachi neꞌoc pa ranma chi e waxakiꞌ in triꞌ neqꞌuejeꞌ wiꞌ. Xcꞌa chewiꞌ tok más chi na lawuloꞌ ja rcꞌaslemal ja rachi chwach ja nabey.

* * * * * * * * * *

27Kas rmajon rbixic ja tzij riꞌ ja tok cꞌo jun ixok chiquicojol ja winak quewaꞌ xbij tre riꞌ:

—Congana quiꞌil tre ja rateꞌ ja qꞌuittzin awxin, neꞌ tre ja Jesús. 28Pro ja cꞌa Jesús quewaꞌ xbij tre riꞌ:

—Más na quiꞌil chique ja winak ja necꞌaxani ja rtzobal Dios in nqueban cumplir ja nbij chique chi nqueban, neꞌ tre.

* * * * * * * * * *

29Ja cꞌa tok congana e qꞌuiy ja winak quimolon chic quiꞌ trij xumaj tzij cuqꞌuin quewariꞌ:

—Ja winak trewaꞌ tiempo ja rokcꞌo wiꞌ riꞌ xa e itzel tak winak. Ejeꞌeꞌ nquicꞌutuj chwe chi nban jun milagro utzcꞌa chi ninquinimaj. Pro ja milagro ja nquicꞌutuj ni matinban wiꞌ chiquewach xarwariꞌ cꞌo jun ja milagro nbantaj na chiquewach, jun milagro ja caniꞌ xuban ja rojer profeta Jonás. 30Como caniꞌ xuban ja Jonás ojer arjaꞌ xoc retal chiquewach ja winak ja recꞌo chipan ja tinamit Nínive ojer in queriꞌ cꞌa chwe anin chakajaꞌ ja rin Alcꞌwalaxel ja xinoc alaxic cuqꞌuin ja winak, ninoc na retal chiquewach ja winak ja recꞌo chipan awaꞌ tiempo ja rokcꞌo wiꞌ riꞌ. 31Ja tok xterilaꞌ ja nimlaj kꞌij xin juicio ja rixok ja reina rxin ja nación ja cꞌo pa sur arjaꞌ xtiyictaji ix rachbil ja rix tinamit Israel in arjaꞌ noc kꞌetol tzij chewij. Queriꞌ nbij chewe como jariꞌ ixok arjaꞌ cꞌa cꞌa nat pi wiꞌ chi rcꞌaxaxic ja rnaꞌoj Dios ja yatajnak tre ja rojer rey Salomón. In ja camic nbij chewe, anin más chi na nim nukꞌij chwach ja Salomón. 32Ja tok xterilaꞌ ja nimlaj kꞌij xin juicio ja rachiꞌiꞌ ja recꞌo chipan ja tinamit Nínive ojer ejeꞌeꞌ xqueyictaji ix cachbil ja rix tinamit Israel in ejeꞌeꞌ neꞌoc e kꞌetol tak tzij chewij. Queriꞌ nbij chewe como ja raj Nínive ejeꞌeꞌ tok quicꞌaxaj ja rtzobal Dios ja bix chique rmal ja Jonás ojer qꞌuextaji ja quinaꞌoj in queyaꞌ can ja ritzelal. In ja camic nbij chewe, anin más chi na nim nukꞌij chwach ja Jonás.

* * * * * * * * * *

33Ni majun nak ta nbanowi xtutzij ta jun candil xtiwawaj ta cꞌa pa jun latzꞌlaj lugar nixtacꞌa xtijupbaꞌ ta jun caxon trij. Pro ja cꞌa nbani, ja tok ntzijtaji jun candil ncanox jun rcꞌolibal ja bar nya̱ꞌ wiꞌ utzcꞌa pa sak neqꞌuejeꞌ wiꞌ ja winak ja neꞌoc pa jay. 34Ja panewach caniꞌ rbanic jun luz ixryaꞌon pa sak, ja wi mta rbanon wi ma yojtajnak ta jariꞌ pa luz cꞌa cꞌo wariꞌ ja recuerpo pro ni chi jun. Pro ja cꞌa wi yojtajnak jariꞌ pa kꞌekuꞌm cꞌa cꞌo wariꞌ ja recuerpo. 35Rmalcꞌariꞌ tok nbij chewe, tebanaꞌ cuenta, maxta tichupi ja luz ja yatajnak chewe pa tak ewanma utzcꞌa chi maquixqꞌuejeꞌ pa kꞌekumal. 36Ja wi pa luz atcꞌo wiꞌ pro ni chi at jun, ja wi majun kꞌekumal awcꞌan jariꞌ nnojsaxi ja luz pan awiꞌ pan awanma caniꞌ nuban jun candil natruyaꞌ pa sak, neꞌe ja Jesús chique ja winak.

37Ja cꞌa tok tzuri tzij rmal cꞌo jun fariseo xubanel invitar chi newaꞌ ruqꞌuin. Ja cꞌa Jesús tok xekaj chi rochoch ja fariseo xoc pa jay in tzꞌabeꞌ pa mesa. 38Ja cꞌa fariseo arjaꞌ junwiꞌ xutzꞌat como ja Jesús rmajon chic waꞌim pro ma xuban ta ja costumbre xin chꞌajoj kꞌabaj nabey. 39Ja cꞌa kajaw Jesús quewaꞌ xbij tre riꞌ:

—Ixix ja rix fariseo ix caniꞌ juleꞌ plato rachbil juleꞌ vaso ja bien chꞌajchꞌoj rij pro ja rpan congana tzꞌilornak. Queriꞌ cꞌa ebanic ixix como ja rewanma nojnak ja ritzelal chipan, congana alakꞌ ebanon. 40Xa ix nacnak tak winak. ¿La ma ewotak ta cꞌa chi ja Dios arjaꞌ winakarsyon ja rewanma chakajaꞌ in ma ruyon ta ecuerpo rwinakarsan? 41Pro ja rjawaxic chi neban, ja cꞌol ewqꞌuin jariꞌ queꞌetobej ja winak ja cꞌo rjawaxic chique. Ja wi queriꞌ neban jariꞌ chꞌajchꞌoj nixeli pro ni chi ix jun.

42Congana lawuloꞌ chewe ja rix fariseo como ixix congana nixoclaꞌ il chi ryaꞌic ja reprimisia pro cꞌoli ja más chi na rjawaxic chi neban pro jariꞌ ni ma ebanon ta. Congana ix conforme chi neyaꞌ eprimisia, neyaꞌ nojel rwach ja richaj caniꞌ tre menta in caniꞌ tre ruda pro ja banoj utzil jariꞌ ni ma ebanon ta wiꞌ in mta ja rajoben riꞌil xin Dios chewe. Pro jariꞌ ni rjawaxic wiꞌ chi neban cumplir in ni rjawaxic wiꞌ chakajaꞌ chi matetanbaꞌ ryaꞌic ja reprimisia.

43Congana lawuloꞌ chewe ja rix fariseo como ixix tok nixbe pa tak jay xin molbal riꞌil ja bar ncꞌaxax wiꞌ ja rtzobal Dios congana nel ecꞌuꞌx trij ja tzꞌulbal jeꞌe ja más nimak rukꞌij in chakajaꞌ tok nixbin pa tak cꞌaybal congana nel ecꞌuꞌx trij ja nixban saludar.

44Congana lawuloꞌ chewe ja rix maestro xin ley in chewe ja rix fariseo, cacaꞌ epalaj como ixix ix junan ruqꞌuin ja rulew ja bar mukun wiꞌ jun camnak pro jun ulew ja ma kꞌalaj chi ta chi cꞌo jun camnak chuxeꞌ in rmalariꞌ ja winak tok nekꞌax parwiꞌ ja rulew mta nquinabej chi parwiꞌ jun camnak nekꞌax wiꞌ. Queriꞌ xbij ja Jesús chique.

45Cꞌo cꞌa jun chique ja maestro rxin ja ley xin Dios quewaꞌ xbij tre ja Jesús riꞌ:

—Maestro, ja cꞌa xabij leꞌ xa nokaban ofender ajoj tre chakajaꞌ, neꞌ tre. 46Ja cꞌa Jesús quewaꞌ xbij chic riꞌ:

—Congana lawuloꞌ chewe ixix chakajaꞌ ja rix maestro rxin ja ley xin Dios como ja tijonem neyaꞌ caniꞌ nimak tak ijkaꞌm neyaꞌ chiquij ja winak pro juleꞌ ijkaꞌm ja congana cꞌayew chi rijkaxic pro ja rixix nixtacꞌa nechap ta jutzꞌit ja rijkaꞌm tre jun rwiꞌ ekꞌaꞌ.

47Congana lawuloꞌ chewe como neban rbanic quipanteón ja rojer tak profeta xin Dios pro ewatiꞌt emamaꞌ ixix waꞌan ja xecamsan quixin. 48Ja tok queriꞌ neban jariꞌ bien kꞌalaj chi ix conforme ruqꞌuin ja queban ja rewatiꞌt emamaꞌ ojer como ejeꞌeꞌ xecamsan quixin ja profeta in ixix nixbano rbanic ja quipanteón. 49Rmalcꞌariꞌ tok ja Dios ojer quewaꞌ rbin can riꞌ: —Ja winak ecꞌoli profeta nenutakel na cuqꞌuin e cachbil juleꞌ apóstol. Ja cꞌa profeta in apóstol juleꞌ chique necamsax na cumal ja winak in juleꞌ chic chique nesalux na cumal. Queriꞌ xbij ja Dios ja rotakyon nojelal. 50Queriꞌ ja nbantaji utzcꞌa ja winak ja recꞌo chipan awaꞌ tiempo ja okcꞌo wiꞌ riꞌ chiquij ejeꞌeꞌ nkaj wiꞌ ja rtojbalil ja quicamic canojel ja profeta ja recamsanto chwach ja rwachꞌulew. 51Ja kas nabey Abel ja camsaxi in ja cꞌa qꞌuisbex rcamsaxic Zacarías. Chicojol ja templo in ja raltar ja cꞌo chwach ja templo triꞌ camsax wiꞌ ja Zacarías. Rmalcꞌariꞌ tok nbij chewe, ja winak ja recꞌo chipan awaꞌ tiempo ja rokcꞌo wiꞌ riꞌ chiquij ejeꞌeꞌ nkaj wiꞌ ja rtojbalil ja quicamic ja profeta canojelal.

52Congana lawuloꞌ chewe ja rix maestro rxin ja ley xin Dios ja tzꞌibtal can rmal ja Moisés como ixix etzꞌapin quebey ja winak chiquewach utzcꞌa chi maticotakij nak ja kas mero rbanic ja rtzobal Dios. Xa ma ewotak ta ixix nak ja kas mero rbanic in nixtacꞌa neyaꞌ ta lugar chique ja winak ja cꞌo quigana ncotakij, neꞌe ja Jesús chique.

53Ja tok bitaj rmal nojel awaꞌ juleꞌ tzij riꞌ ja cꞌa maestro xin ley e cachbil ja fariseo ejeꞌeꞌ congana xeyictaj trij. Congana quemaj rcꞌotic ruchiꞌ 54jariꞌ nquicꞌambajbej rxin como cꞌo quigana nquicanoj rij rwach nak nqueban tre chi nquechap.

Currently Selected:

Lucas 11: tzjW

Highlight

Copy