Lucas 12

1Ecꞌoli ja winak quimolon chic quiꞌ triꞌ pro congana e qꞌuiy, quimajon rminic quiꞌ rmal. Ja cꞌa Jesús arjaꞌ xumaj tzij cuqꞌuin ja rdiscípulo nabey, quewaꞌ xbij chique riꞌ:

—Tebanaꞌ cuenta ewiꞌ chwach ja levadura quixin ja fariseo. Jariꞌ tibij tzij chi maxta xa cacaꞌ epalaj ixix como caniꞌ ejeꞌeꞌ. 2Queriꞌ nbij chewe como nojel ja ma kꞌalajinnak ta jeꞌe jariꞌ nerilaꞌ na jun kꞌij tok xtikꞌalajini in nojel ja rawatal jeꞌe jariꞌ nel na pa sakil, notakix na. 3Rmalcꞌariꞌ ja tok nbij chewe, xa nak ta chi tzijal ja rebin kaj pa tak kꞌekuꞌm nel na rbixic pa sak in chakajaꞌ nojel ja tzij ja rebin kaj pan ekal pa tak ewochoch nel na rbixic chiquewach ja winak.

* * * * * * * * * *

4Camic nbij chewe ja rix wamigo, ma texbej ta ewiꞌ chiquewach ja winak ja xa ruyon ecuerpo necowini nquicamsaj como ja tok nixcamstaj cumal mchita nak chi ta necowini nqueban chewe. 5Pro anin nbij chewe chok chwach ja nexbej wiꞌ ewiꞌ. Texbej ewiꞌ chwach ja ncowini nercamsaj winak in ja tok necamstaj rmal cꞌo rukꞌaꞌ chique chi neruyaꞌ pa kꞌakꞌ. Chwach cꞌa riꞌ texbej wiꞌ ewiꞌ.

6Ja tak tzꞌiquin ja tok necꞌayixi xa caꞌiꞌ tak centavo neya̱ꞌ wiꞌ ja re joꞌoꞌ. Pro masqui xa e tak barata pro nixtacꞌa cꞌo ta jun chique xtimestax ta rmal ja Dios. 7In ja cꞌa chewe ixix mta moda xquixrmestaj ta ja Dios, ja rsamal ewíꞌ rajlan chijujunal. Rmalcꞌariꞌ nbij chewe, ma texbej ta ewiꞌ, más na ix vale chiquewach jun nimlaj moc tzꞌiquin.

* * * * * * * * * *

8Ja winak xa nak ta chi winakil wi matiquipokonaj nquibij chi wqꞌuin anin yukul wiꞌ quecꞌuꞌx pro wi ni chiquewach ja winak nquibij wiꞌ, anin chakajaꞌ can nbij na chique chi ecꞌo pa ncuenta pro ni chiquewach ja ángel xin Dios xtinbij wiꞌ, anin ja rin Alcꞌwalaxel ja xinoc alaxic cuqꞌuin ja winak. 9Pro ja wi cꞌo jun npokonaj nbij chiquewach ja winak chi wqꞌuin yukul wiꞌ rucꞌuꞌx, anin chakajaꞌ nbij na tre chi arjaꞌ ma cꞌo ta pa ncuenta pro ni chiquewach ja ángel xin Dios xtinbij wiꞌ.

10Ja wi cꞌo jun winak xa nak ta chi winakil masqui arjaꞌ nbij juleꞌ tzij tre ja Ralcꞌwalaxel ja xoc alaxic cuqꞌuin ja winak, juleꞌ tzij ja xa ofensa rcꞌamonto tre, jariꞌ cꞌo cuytajic trij pro wi nbij juleꞌ tzij tre ja rEspíritu Santo ja xa ofensa rcꞌamonto tre jariꞌ ni mta wiꞌ cuytajic trij.

11Ja tok xquixchap cumal ja winak, tok nixquecꞌamel pa tak jay xin molbal riꞌil in tok nixquecꞌamel chiquewach ja kꞌetol tak tzij maxta quixoclaꞌ il tre ja nebij ja netobej ewiꞌ chiquewach 12como ja rEspíritu Santo arjaꞌ ni jariꞌ hora xtuyaꞌ chewe nak rjawaxic chi nebij chique, neꞌe ja Jesús chique ja rdiscípulo.

* * * * * * * * * *

13Cꞌo cꞌa jun achi chiquicojol ja winak quewaꞌ xbij tre ja Jesús riꞌ:

—Maestro, tabij paki jutzꞌit tre ja nnimal chi nujach chwe ja herencia ja cꞌo nukꞌaꞌ tre, neꞌ tre.

14—Achi ¿la in juez laꞌan chewiꞌ ja tok anin xquinchomin ewxin tre ja herencia? neꞌxi rmal ja Jesús. 15Cꞌacꞌariꞌ ja Jesús xbij chique ja winak:

—Tebanaꞌ cuenta ewiꞌ, maxta quixban engañar rmal ja yarin mebaꞌil. Queriꞌ nbij chewe como ni majun winak masqui congana mebaꞌil cꞌo ruqꞌuin pro ma ja tariꞌ ja mebaꞌil nyowi rcꞌaslemal, neꞌ chique. 16Cꞌacꞌariꞌ xbij jun cꞌambal tzij chique quewariꞌ:

—Cꞌo jun achi biyom, cꞌoli ja rulew in congana cosecha nuyaꞌ. 17Ja cꞌa biyom arjaꞌ xumaj kaj rchꞌobic pa ranma: —¿Nak nban cꞌawaꞌ? como camic mchita bar ta xtincꞌol wiꞌ ja ncosecha, neꞌ kaj. 18Ja cꞌa tok chꞌobtaj rmal quewaꞌ xbij chic riꞌ: —Mejor ja nban, can nyoj ja ntroja nojelal in nban chic juleꞌ ja más chi na nimak. Ja cꞌa tok xtibantaj mwal chipan xtincꞌol wiꞌ nojel ja ncosecha rachbil ja juleꞌ chic mebaꞌil ja cꞌo wqꞌuin. 19Ja tok xticꞌoltaj mwal nojelal quewaꞌ xtinbij kaj chic pa wanma riꞌ: —Camic sobre ja nmebaꞌil, jawaꞌ qꞌuiylaj junaꞌ nuban wqꞌuin. Mejor, solo xulaꞌnem chic ja nmajel rbanic camic, solo waꞌim, solo quicotemal. Queriꞌ ja xtinban, neꞌ kaj ja biyom pa ranma. 20Pro quewaꞌ bix tre rmal ja Dios riꞌ: —Nacnic achi, chipan awaꞌ jun akꞌaꞌ riꞌ puersa natcami in nojel ja mebaꞌil ja racꞌolon jariꞌ xa nqꞌuejeꞌ can, neꞌxi ja rachi. 21Queriꞌ cꞌa rbanic jun winak ja tok xa nqꞌuiyirsaj ja mebaꞌil xin rwachꞌulew pro mta ja mebaꞌil xin Dios cꞌo ruqꞌuin. Queriꞌ ja cꞌambal tzij ja xbij chique ja winak.

22Cꞌacꞌariꞌ xumaj tzij cuqꞌuin ja rdiscípulo, quewaꞌ xbij chique riꞌ:

—Rmalcꞌariꞌ ja tok nbij chewe, maxta tekꞌisaj ewiꞌ tre ja recꞌaslemal: —¿Nak nkatij cꞌawaꞌ? maxta quixcheꞌe, in nixtacꞌa ja ncꞌatzin tre ja recuerpo chakajaꞌ: —¿Nak nkacoj chi cꞌawaꞌ? maxta quixcheꞌe. 23Ja Dios arjaꞌ nuyaꞌ nojelal ja ncꞌatzin tre ja recꞌaslemal in tre ja recuerpo ¿la matuyaꞌ cꞌariꞌ chewe chakajaꞌ ja netij in ja necoj? 24¿La maqueꞌetzꞌat cꞌa ja tak tzꞌiquin? Ejeꞌeꞌ nixtacꞌa cꞌo ta tijcoꞌm nquetic in nixtacꞌa cꞌo ta cosecha nquecꞌol, mta quitroja pro ja Dios arjaꞌ ntzuku quixin. Pro ja rixix más na ix vale chiquewach ja tak tzꞌiquin. 25In jun chic, ni majun chewe masqui congana nkꞌisaj riꞌ ncowin ta ruyon nuyaꞌ ta rqꞌuiybal nel ta más nim rkan. 26Como maquixcowini neban ja wariꞌ ¿nak cꞌa tre tok nekꞌisaj ewiꞌ rmal ja juleꞌ chic ja ncꞌatzin chewe? 27Tewasaj mpeꞌ enaꞌoj trij ja cotzꞌiꞌj nak nuban tok nqꞌuiyi pro matisamaji in matikꞌinoni. Ja cꞌa ranin nbij chewe camic, ja rojer rey Salomón masqui congana biyom pro mta rtziak xucoj ta ja más buena ta chwach rcoloril jun trewaꞌ juleꞌ cotzꞌiꞌj riꞌ. 28Ja cotzꞌiꞌj masqui xa ncami, masqui xa nchakiji chanim in nporox pa kꞌakꞌ pro ja Dios arjaꞌ nuyaꞌ rcoloril. Ja wi queriꞌ nuban ¿la matuyaꞌ cꞌariꞌ chewe chakajaꞌ ja retziak necoj? Xarwariꞌ nbij chewe, ma kas ta yukul ecꞌuꞌx ruqꞌuin ja Dios. 29Rmalcꞌariꞌ nbij chewe, ma tekꞌisaj ta ewiꞌ: —¿Nak nkatij cꞌawaꞌ? maxta quixcheꞌe in: —¿Nak nkacoj cꞌawaꞌ? maxta quixcheꞌe chakajaꞌ. 30Queriꞌ nbij chewe como ja winak ja ma cotak ta rwach ja Dios ejeꞌeꞌ riꞌ ja nebano queriꞌ. Ja cꞌa chewe ixix, ja retataꞌ Dios arjaꞌ bien rotak chi ncꞌatzin chewe nojel awaꞌ wariꞌ. 31Pro ja kas rjawaxic chi neban, ja gobierno xin Dios ni ta ja wariꞌ nechꞌob. Ja wi queriꞌ neban nojel awaꞌ ja ncꞌatzin chewe nyataj chewe.

32Ixix ix caniꞌ jun ti moc tak carnelo pro ma texbej ta ewiꞌ como ja retataꞌ Dios arjaꞌ rchomin chic chi nixrucoj chipan ja gobierno rxin. 33Ja cꞌo jeꞌe ewqꞌuin tecꞌayij in tesipaj ja rjil chique tak mebaꞌiꞌ. Ja wi queriꞌ neban jariꞌ cꞌoli caniꞌ jun cꞌolbal emebaꞌil nyataj na chewe pro mta yojtajic trij in cꞌoli chakajaꞌ ja mebaꞌil ewxin xin chilaꞌ chicaj pro jun mebaꞌil ja ni mta wiꞌ qꞌuisic trij. Ni majun alakꞌom xtoc ta triꞌ nixtacꞌa cꞌo ta jun chicop ja xtitijo ta ja mebaꞌil. 34Anin xinbij chewe ja tzij riꞌ como xa nak ta chi mebaꞌil benak ecꞌuꞌx ruqꞌuin triꞌ cꞌo wiꞌ ja rewanma chakajaꞌ.

* * * * * * * * * *

35Quixcꞌascꞌoti in maxta tichupi ja recandil. 36Tebanaꞌ ixix ja caniꞌ nqueban juleꞌ ajsamajelaꞌ ja cayben ja quipatrón benak pa jun cꞌulbic in chaka jalal tok nmelojto ja quipatrón, ncꞌoncꞌoꞌoc ja chiꞌjay in ejeꞌeꞌ como ecꞌascꞌotnak nquejaklaꞌ chwach chanim. 37Congana quiꞌil chique ja rajsamajelaꞌ ja recꞌascꞌotnak chi raybexic ja quipatrón ja tok xturkaji. Ni katzij wiꞌ nbij chewe, ja patrón arjaꞌ nchomarslaꞌ riꞌ chanim, nertzꞌubaꞌ pa mesa in numaj quilixic. 38Ja cꞌa wi nmelojto pa tak ncꞌajakꞌaꞌ owi pa rsakaric congana quiꞌil chique ja wi ecꞌascꞌotnak chi raybexic triꞌ. 39Pro bien teyaꞌaꞌ ewxquin tre ja xtinbij chewe riꞌ, jun rajaw jay ja tok nba̱n alakꞌ ruqꞌuin, ja wixta rotak nak hora chi nekaji ja ralakꞌom ruqꞌuin chakꞌaꞌ nchajij ta cꞌariꞌ rochoch, ncꞌascꞌot ta cꞌariꞌ in maquita nuyaꞌ lugar tre ja ralakꞌom chi noc ta pa rochoch. 40Rmalcꞌariꞌ nbij chewe, ni rjawaxic wiꞌ chi nixcꞌascꞌot ixix chakajaꞌ como ja Ralcꞌwalaxel ja xoc alaxic cuqꞌuin ja winak arjaꞌ chaka jalal tok xtipi chic jutij chipan jun hora ja ni ma echꞌobon ta, neꞌe ja Jesús.

41Cꞌacꞌariꞌ ja Pedro xbij tre:

—Wajaw ¿la xa ruyon chake ajoj xabij wiꞌ ja cꞌambal tzij o la xabij chique canojelal? neꞌ tre. Ja cꞌa Jesús quewaꞌ xbij riꞌ:

42—Techꞌoboꞌ cꞌa chi utz ja xtinbij chewe riꞌ, ja rajsamajelaꞌ ¿echinatak ja nebano cumplir ja nbix chique cumal ja quipatrón, echinatak ja buena quinaꞌoj? Caniꞌ tre jun patrón tok cꞌo jun ajsamajel ruqꞌuin in nuyaꞌ rsamaj chi arjaꞌ npeꞌe chiquij ja juleꞌ chic rach tak ajsamajelaꞌ chi neruban cuenta in nuyaꞌ queway ja tok ncꞌatzin chique. 43Congana quiꞌil tre ja rajsamajel ja wi ntajini nuban cumplir ja rsamaj ja tok xturkaji ja rpatrón ruqꞌuin. 44¿Nak nuban ja patrón? Seguro chi nojel ja mebaꞌil cꞌo ruqꞌuin nujach pa rukꞌaꞌ jawaꞌ jun ajsamajel riꞌ chi arjaꞌ npeꞌe trij. 45Pro ja rajsamajel wi xa nbij kaj pa ranma chi: —Nak la kꞌij npit ariꞌ ja npatrón, wi neꞌ kaj, in wi numaj quichꞌayic ja rach tak ajsamajelaꞌ e cachbil ja rajꞌicꞌaꞌ, wi xa banoj tak waꞌim nuban, wi numaj tijoj tak yaꞌ in wi xa nkꞌabari, 46ja wi xa queriꞌ ntajini nuban nerilaꞌ na jun kꞌij tok cꞌa jaꞌ xtunaꞌ xturkaji ja rpatrón, ni majun nak ta rnaben. Ja cꞌa rajsamajel janila jun nimlaj rpokonal xtutij pa rukꞌaꞌ ja rpatrón in nta̱kel rmal chipan ja lugar ja bar ecꞌo wiꞌ ja winak ja xa maquenimani.

47Ja rajsamajel ja rotak nak ja najoꞌx tre rmal ja rpatrón chi nuban in wi cꞌa matichomarsaj riꞌ chi rbanic ja samaj in wi matuban rvoluntad ja rpatrón jariꞌ congana jun nimlaj rpokonal nutij na rmal. 48Ja cꞌa rajsamajel ja ma rotak ta nak ja najoꞌx tre rmal ja rpatrón chi nuban in wi cꞌoli nuban in wi yatal trij chi nba̱n castigar rmal jariꞌ ma kas ta nim ja rpokonal nutij. Ja tok qꞌuiy ja nsipax chawe rmal ja Dios jariꞌ qꞌuiy ja xticꞌutux chawe rmal chakajaꞌ chi naban. Ja tok qꞌuiy ja nja̱ch pan akꞌaꞌ jariꞌ más na qꞌuiy ja xticꞌutux chawe.

* * * * * * * * * *

49Anin cꞌoli caniꞌ jun kꞌakꞌ ntzijel waweꞌ chwach ja rwachꞌulew, xinpeti chi rtzijic jariꞌ kꞌakꞌ in ja ta nwajoꞌ rmajonel chi ta cꞌatem camic riꞌ. 50Pro nabey cꞌoli ja nba̱n na chwe caniꞌ ninban bautizar chipan jun nimlaj rpokonal in ja kas ngana anin kꞌaxnak chi ta na chwij ja bautismo riꞌ. 51¿La xa ruyon quicotemal ja ncꞌamonto waweꞌ chwachꞌulew nechꞌob ixix? Ma queriꞌ ta. Anin nbij chewe chi ecꞌoli winak ja xa división xtiqueban mwal. 52Queriꞌ nbij chewe como numajel ja banoj división mwal camic. Ja wi e joꞌoꞌ winak ja recꞌo pa jun jay xa división xtiqueban mwal, e oxiꞌ chique neyictaj chiquij ja re caꞌiꞌ chic in ja re caꞌiꞌ neyictaj chiquij ja re oxiꞌ. 53Ja tatixel nyictaj trij ja rcꞌajol in ja cꞌajolaxel nyictaj trij ja rtataꞌ. Ja teꞌej nyictaj trij ja ral in ja xtan nyictaj trij ja ruteꞌ. Ja rixok nyictaj trij ja raliꞌ in ja ralibotz nyictaj trij ja raliteꞌ. Queriꞌ xbij ja Jesús chique ja rdiscípulo.

* * * * * * * * * *

54In chakajaꞌ cꞌoli xbij chique ja winak quewariꞌ:

—Ja tok cꞌoli ja sutzꞌ netzꞌat ja nwinakari pan oeste chanim nebij chi cꞌo jab penak in ni katzij wiꞌ chi nkaji ja jab. 55In jun chic, ja tok numaj xcomel nebij chi cꞌo jun cꞌatan nucꞌamto in ni katzij wiꞌ chi npeti ja cꞌatan. 56Cacaꞌ epalaj, ixix bien nchꞌobtaj emwal nak rcꞌamonto ja netzꞌat jeꞌe chicaj in ja netzꞌat jeꞌe chwach ja rwachꞌulew pro ¿nak cꞌa tre ja tok matichꞌobtaj emwal nak rcꞌamonto ja ntajini nuban ja Dios chewach chipan ja tiempo ja rokcꞌo wiꞌ riꞌ?

* * * * * * * * * *

57¿Nak tre tok matechꞌob ixix eyon nak ja rubey chi neban? 58Ta cꞌa cꞌo ta jun nyoꞌ parte chewij, mejor ja neban, tok emajon bey ixbenak pa kꞌetbaltzij techomij ewiꞌ ruqꞌuin, nowi ma queriꞌ ta neban, ja nyoꞌ parte chewij arjaꞌ nixrujach pa rukꞌaꞌ ja ralcalta, ja cꞌa ralcalta nixrujach chic pa rukꞌaꞌ comisario in nixrucoj pa cheꞌ. 59Anin nbij chewe chi ni maquixelto wiꞌ ja pa cheꞌ, nixelto cꞌa pro netoj can na nojel ja recꞌas, nixtacꞌa cꞌo ta jun ti centavo ja maquita xtetoj can. Queriꞌ xbij ja Jesús chique ja winak.

Currently Selected:

Lucas 12: tzjW

Highlight

Copy