Lucas 13
13
1Ecꞌo cꞌa juleꞌ winak triꞌ ejeꞌeꞌ quemaj rcholic chwach ja Jesús ja queban juleꞌ achiꞌiꞌ ja raj Galilea ja xecamsax rmal ja gobernador Pilato. Ja quiquiqꞌuel ja rachiꞌiꞌ jariꞌ xeryujuꞌ riꞌ ruqꞌuin ja quiquiqꞌuel juleꞌ chicop ja netajini netzujux chwach ja Dios cumal ja rachiꞌiꞌ como sacrificio. 2Ja cꞌa Jesús tok xcꞌaxaj ja tzij riꞌ quewaꞌ xbij chique riꞌ:
—Ja raj Galilea ja xecamsaxi ¿la más na e ajꞌil la más na e ajmaquiꞌ chiquewach ja juleꞌ chic cach tak aj Galilea nechꞌob ixix ja tok ban queriꞌ chique? 3Ma queriꞌ ta. Tzucꞌa chewe ixix chakajaꞌ wi mateqꞌuex ja renaꞌoj, wi mateyaꞌ can ja ritzelal jariꞌ camíc nesiqꞌuij chewij chakajaꞌ. 4In jun chic, turkaj chewe ja re dieciocho winak ja tok tzakto ja torre xin Siloé chiquij in xercamsaj. ¿La más na e ajꞌil la más na e ajmaquiꞌ chiquewach ja juleꞌ chic winak ja recꞌo triꞌ pa Jerusalén nechꞌob ixix? 5Ma queriꞌ ta. Tzucꞌa ixix chakajaꞌ wi mateqꞌuex ja renaꞌoj, wi mateyaꞌ can ja ritzelal jariꞌ camíc nesiqꞌuij chewij chakajaꞌ, neꞌe ja Jesús chique.
* * * * * * * * * *
6Cꞌo jun cꞌambal tzij xbij chique chakajaꞌ, quewaꞌ xbij chique riꞌ:
—Cꞌo jun achi cꞌo jun mocaj higo rticon pa rchenoj. Ja cꞌa rachi arjaꞌ be ruqꞌuin ja cheꞌ nertzꞌataꞌ ja wi cꞌo rwach pro ja tok xekaji ni majun rwach ja cheꞌ. 7Cꞌo jun ajsamajel ja nchajin rxin ja chenoj quewaꞌ xbij tre riꞌ:
—Jawaꞌ jun mocaj higo riꞌ junaꞌ junaꞌ ni nuntzꞌataꞌ wiꞌ ja wi cꞌo rwach nuyaꞌ. Oxiꞌ junaꞌ nbanon quewaꞌ in nixtacꞌa cꞌo ta jun ti rwach ntzꞌaton ta. Mejor tachoyoꞌ, chaka queriꞌ nuqꞌuis rchokꞌakꞌ ja rulew, neꞌ tre ja rajsamajel.
8—Chꞌenchilaꞌ taꞌ, tiqꞌuejeꞌ chi na jun junaꞌ. Anin nchakꞌ na ruxeꞌ in ncoj abono chuxeꞌ chakajaꞌ. 9Matzij xa xtiwachini nowi mani tokocꞌariꞌ xtachoy, neꞌxi ja rajaw chenoj. Queriꞌ ja cꞌambal tzij ja xbij ja Jesús chique.
* * * * * * * * * *
10Ja cꞌa pa jun xulaꞌnbal kꞌij ja Jesús arjaꞌ rmajon quitijoxic ja winak chipan jun jay xin molbal riꞌil. 11Cꞌo cꞌa jun ixok triꞌ yawaꞌ, tuban dieciocho junaꞌ toqui ja yobil tre rmal jun itzel espíritu. Rmalcꞌariꞌ tok luclic rij ja rixok, maticowini jic ta xtipeꞌi nixtacꞌa jutzꞌit ta. 12Ja cꞌa Jesús tok xutzꞌat ja rixok xsiqꞌuij pon. Ja tok xurkaj ruqꞌuin quewaꞌ xbij tre riꞌ: —Camic ixok, ma atcꞌo chi ta pa rukꞌaꞌ ja yobil, neꞌ tre. 13Cꞌacꞌariꞌ xuyaꞌ rukꞌaꞌ pa rwiꞌ in ni jariꞌ hora tzuri, ma luclic chi ta rij, congana xumaj ryaꞌic rukꞌij ja Dios rmal. 14Pro peti ja jefe rxin ja jay xin molbal riꞌil, arjaꞌ congana penak ryewal como ja Jesús pa jun xulaꞌnbal kꞌij xtzursaj wiꞌ ja rixok in quewaꞌ xbij chique ja winak riꞌ:
—Ja chipan jun semana wakiꞌ kꞌij ja yatal chake chi noksamaji. Tre ja wakiꞌ kꞌij jariꞌ utz nixpeti xa nak ta chi kꞌijal chi nixtzuri pro ma quixpi ta jutzꞌit pa tak xulaꞌnbal kꞌij, neꞌe ja jefe chique. 15Ja cꞌa kajaw Jesús tok xcꞌaxaj ja xbij ja jefe quewaꞌ xbij tre riꞌ:
—Caꞌiꞌ apalaj. Ixix ja pa tak xulaꞌnbal kꞌij ¿la mta cꞌa jun chewe ja maquita nuquirel ja rwacax owi ruquiej in maquita nucꞌamel neryaꞌaꞌ ruyaꞌ? 16Ja cꞌawaꞌ jun ixok riꞌ arjaꞌ riy rumam can ja rAbraham. Ja camic tuban dieciocho junaꞌ ximtal chipan ja yobil rmal ja Satanás. ¿La ma yatal ta cꞌa tre chi nel libre pa rukꞌaꞌ ja yobil camic masqui xulaꞌnbal kꞌij nachꞌob atat? neꞌ tre ja jefe. 17Ja cꞌa winak ja xetzelan rxin tok quicꞌaxaj ja tzij riꞌ congana qꞌuixbal quenaꞌ rmal. Ja cꞌa juleꞌ chic winak ejeꞌeꞌ congana xequicot rmal ja nimak tak samaj xin Dios ja rbanon.
* * * * * * * * * *
18Cꞌacꞌariꞌ xumaj chic jutij tzij ja Jesús, quewaꞌ xbij chic riꞌ:
—¿Nak cꞌa rbanic ja gobierno xin Dios, bar cꞌa njunsaj wiꞌ? 19Ja gobierno xin Dios queriꞌ rbanic caniꞌ rbanic jun ti chirwach mostaza cꞌamarel rmal jun achi, xutic pa rchenoj. Xumaj qꞌuiyem ja mostaza, xoqui caniꞌ jun mocaj cheꞌ. Xepeti ja tak tzꞌiquin, xurquibanaꞌ quesoc pa tak rukꞌaꞌ. Queriꞌ xbij ja Jesús.
20Cꞌacꞌariꞌ xbij chic jutij:
—¿Bar cꞌa njunsaj chi wiꞌ ja gobierno xin Dios? 21Queriꞌ rbanic caniꞌ nuban juleꞌ levadura ja nsapoji caxlanway rmal in cꞌo jun ixok xucꞌam, xuyaꞌ chipan juleꞌ kꞌor, oxiꞌ pajbal harina ocnak. Ja cꞌa tok qꞌuiswani ja levadura mta ja maquita xekaj wiꞌ tre ja kꞌor, congana samaj chipan, neꞌe ja Jesús.
* * * * * * * * * *
22Cꞌacꞌariꞌ xumajel chic rubey, benak pa Jerusalén. Ja tok nekaj pa jun tinamit owi pa jun aldea numaj quitijoxic ja winak ja recꞌo chipan. 23Cꞌo cꞌa jun chique ja winak cꞌoli xcꞌaxaj tre ja Jesús quewariꞌ:
—Wajaw ¿la xa ma e nim ta ja newilowi ja totajem xin Dios? Ja cꞌa Jesús arjaꞌ xumaj tzij cuqꞌuin ja winak, quewaꞌ xbij chique riꞌ:
24—Cꞌoli caniꞌ jun pa rchiꞌjay ja congana ti latzꞌ ja bar natoc wiꞌ chi rilic ja totajem xin Dios. Tetijaꞌ cꞌa ekꞌij utzcꞌa chi triꞌ xquixoc wiꞌ ixix. Pro tecojoꞌ ewachokꞌakꞌ como e qꞌuiy ja winak ja ma xqueꞌoc ta masqui cꞌo quigana neꞌoqui. 25Como ja rajaw jay arjaꞌ xtiyictaji in ntzꞌapij ruchiꞌ ja jay. Ja cꞌa rixix wi majaꞌn quixoqui triꞌ jariꞌ xtemaj rcꞌoncꞌoxic ja puerta in quewaꞌ xtebijoc riꞌ:
—Kajaw, Kajaw, tajakaꞌ chiꞌjay chikawach, xquixcheꞌoc tre. Ja cꞌa rajaw jay quewaꞌ xtibijto chewe riꞌ:
—Anin ma wotak ta ba la ixpenak wiꞌ ixix, xticheꞌto chewe.
26—Pro ajoj okwaꞌnak waꞌan awqꞌuin in xeꞌatijoj waꞌan ja winak pa tak bey chipan ja katinamit, xquixcheꞌoc chic tre.
27—Anin nbij chewe chi ma wotak ta ba la ixpenak wiꞌ. Camic quixel chinwach ewanojel ja rix banol tak itzelal, xticheꞌto chic chewe. 28Tokocꞌariꞌ tok xtetzꞌat ja rAbraham chi arjaꞌ cꞌo chipan ja gobierno xin Dios e rachbil ja rIsaac in Jacob e rachbil chakajaꞌ canojel ja rojer tak profeta xin Dios pro ja cꞌa rixix ma xtiyataj ta chewe chi nixoc ta chiquicojol. Rmalcꞌariꞌ ja tok xtemaj jun nimlaj bis okꞌej in xtecachꞌachꞌej ewakꞌ rmal. 29In chakajaꞌ ecꞌoli winak ja ma e aj Israel ta ejeꞌeꞌ nepi na nojel nat nakaj tre ja rwachꞌulew, neꞌoc na chipan ja gobierno xin Dios in netzꞌabeꞌ chi mesa. 30Pro bien tewotakij chi ecꞌoli winak ja recꞌamol tak bey nabey ja xquecanaj can pa rqꞌuisbal in ecꞌoli ja re tak qꞌuisbal ja necꞌamo chic bey. Queriꞌ xbij ja Jesús chique ja winak.
* * * * * * * * * *
31Jariꞌ mismo kꞌij ecꞌo juleꞌ fariseo xeꞌekaj ruqꞌuin in quewaꞌ quibij tre riꞌ:
—Jat, catanmajel como ja gobernador Herodes arjaꞌ cꞌo rgana natrcamsaj, xecheꞌ tre. 32Ja cꞌa Jesús quewaꞌ xbij chique riꞌ:
—Ja Herodes arjaꞌ xa banol engaño. Camic jix ruqꞌuin in quewaꞌ nebij tre riꞌ: —Ja Jesús nbij chi cꞌa ecꞌo na ja winak ja nerlasaj na itzel tak espíritu chique in cꞌa ecꞌo na ja yawaꞌiꞌ ja nertzursaj na chakajaꞌ. Queriꞌ nuban camic in chwak in cꞌa chi rox kꞌij xtuqꞌuis wiꞌ ja rsamaj, neꞌe, queriꞌ ja nebij tre. 33Pro camic puersa nmajel chic jutij nubey. Ninbini camic, chwak in cabij, puersa ninbe pa Jerusalén in triꞌ nincamsax wiꞌ como jun profeta xin Dios mta moda ja maquita pa Jerusalén xticamsax wiꞌ.
34Ixix ja rix aj Jerusalén, anin congana ninbison emwal. Ja profeta xin Dios xa neꞌecamsaj. Ja cꞌa juleꞌ chic ajsamajelaꞌ rxin Dios ja neta̱k ewqꞌuin xa neꞌeqꞌuiak tzaꞌn abaj. Anin qꞌuiylaj mul xinwajoꞌ ta xixnutoꞌ ta ja caniꞌ nuban jun acꞌ nermutzej ja tak ral xeꞌ rupan pro ja rixix ma xewajoꞌ ta. 35Camic bien tecꞌwaxaj ja xtinbij chewe riꞌ, ja retinamit rachbil ja templo cꞌo chipan jariꞌ yaꞌon can chic rmal ja Dios, lawuloꞌ xtiban na tre in xa ntaleꞌ can. Queriꞌ nbij chewe como camic matutzꞌat chic riꞌ kawach ewqꞌuin, cꞌa tokoriꞌ nutzꞌat chic jutij riꞌ kawach ewqꞌuin ja tok xterilaꞌ ja kꞌij tok quewaꞌ nebij chic chwe riꞌ: —Bendecido ja Cristo ja penak pa rubiꞌ ja kajaw Dios, xquixcheꞌ chwe. Queriꞌ xbij ja Jesús chique.
Currently Selected:
Lucas 13: tzjW
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
