Génesis 13
13
Ita caje amuuruha Loto aina Abaranne
1Nitohaneein jetaote, Egipto caje jitariin niicha sirii amaain, jelaiha Negueve batane que cauha cuha comasai aina Abaranne jana jetao, acaauru aina cuelu jetao rai calaohi riji Loto. 2Nii bana jetaote, jataain coriquihona neein, arajiin irihuru siriin, jataain coretiin coataneein nenaa plata, oro, naaonjoaihunri sirilu Abaran. 3Nitohaneein Negueve batane caje jeraaen inaauje inaaujueein cuhin jetaote, jelaiha cauha cuelu Beteli neseu turuhanereein tiaain.
Nitohaneein cuhin jetaote, inae ecu turuhin jetao, jelai caje coaauneein jauriaanejeein neloanaritihalu Beteli aina Hai neseeuru cataaun teeinne jaau jetao turue, 4nii jauriaa, ecu neein Cana Coaunera bajaane jaanu que leinjiin ajeri caje rori jaalune jaau.
5Nii jana jetaote, nii rai nichene Abaran tocohaneein jataain coriquihona neein, arajiin baca, carenero, naaonjoaihunri sirilu Loto. Chaaen arajiin cachaaurune maajeein sirihane jaun jetaote, rohan neloanariteein neeure. 6Nitohaneein arajiin baca, carenero, naaonjoaihunri sirichuruha ita aina Abaran, Loto naaonjoaaurine jaun, lanajejeein lenonecuruha acaauru irihurune jaun jetaote, inae ita aina ichaonaa nainecurenihane jaun, 7ita soore Loto iri beraihurera aina Abaran iri beraichacuru. Chaaen jetaote, nii bana jaiti ecu ichaoorelu Canaan cocoaichacuru, Fereseecuru naaonjoaihunri.
8Nitohanihane jaun jetaote, nii Loto rai: “Coatiha caohachaai, ita araai nejesinajeein ita cotaihacaneta. Cana irihuru beraihurera nihanatiin, nainecuruhi nejesinajeein ita cotaihuruhane”, naain jetao, 9“Coaraau. Niha itolereneein caa atane cunaa jereeine jaau cuhine coina. Atiin canu aina neeine caje amuhin, iicha rautaihu ichaonihu. Enoto soo uuri cana raotono nichajai jeloon cuhinene, canu cana ajaabiji enoto soo uuri nichajai jeloon cureeunnicha. Jana ii cana ajaabiji nichajai que cuhinene, canu, cana raotono nichajai jeloon cureeunicha”, naa rai Abaranne jaun, 10itolereneein Jorodaan auha coaraa Lotone jana jetaote, Egipto batane tocohaneein caohatiin ocoana tocohaniha rai nauha macararone jana, nese laaojoiri Zoar que tiaaojoaain jetao, ichaonaa najaanu que lanaene acau.
Nitohanihalu jetao, jaiti Sodoma, Gomorra, naaonjoaihunri neseeuru itajeniha Cana Coaunerane ajiniha.
11Nitohaneein jetaote, itolereneein Jorodaan auha macararo janijiin coaraain jetao, nii neeuruhane jaa uuri enoto mitu nichajai que cuhin ichaoha cuha nii calaohi riji Lotone jana jetao, 12Canaan nedaain ichoaelu Abaran. Nitohaneein jetaote, Sodoma nese rohan nenaa neseeuru rohan jetao, atane macararo que ichaoha cue jetao rai calaohi riji Loto.
13Nii bana jetaote, nii Sodoma neseu ichaoorelu jataain Cana Coaunera coitucuelanaala osa que jataain banejelanaala nesaruhin ichaonacaauru cachaauru.
14Nitohaneein inae amuha Lotone baiha jetaote, Abaran rai jetao: “Nii neeine jaa caje coaauneein, caohachaain jerane enoto soo uurihuru aina enoto mitu jelai nichajai coaraau. 15Satiin caa iicha coarai atanete, ii inamacooru aina, ii raineein niha cureein inoaelunetojoeein chabana satonoelanaalara. 16Chaennechu, atane bujuinaa jeeoneein janiinacajelanaala nefaauruha ii inamacoorune coina ichareeunnicha. Charijieein chaainti, janiinacajene atane bujuinaa, nii rijijieeintechu, janiinacajelanaala nefaaurureein, ecu ii inamacoorura. 17Nimichuhin cuhin caa atane caare, rai jaratono, naaonjoaihunri jitariin tinonohin coaanihu. Caa atanena ichei tereeunnicha”, naa rai Cana Coaunerane jana jetaote, 18jelai caje amuhin, Hebron nese rohan nenaa leinjiin cacha Mamere rai niha enuha encina nocojoaine jaun jetao, ichaoha cue jacari caje nenaa rai loanari amaain Abaran. Ecu ichaohin jetaote, Cana Coaunera rai ajerichuru caje leinjiin rori jae jetao Abaran.
Currently Selected:
Génesis 13: URA
Highlight
Share
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
