Génesis 8
8
1Nitohaneein satiin caa cana rai chauratane que tijiarohin amunacaauru, jiaauluhin amunacaauru naaonjoaihunri aina bote cuhane niha Nohene coaraain jetaote, cujuana letoae Cana Coaunera, chauratane joora acau ichoae situhin jiatuhane batihajihane coina. 2Nii jaun jetaote, cucuana asajai cajeeuru, dede cajene maajeein inae mituhane jianiha acaune jaun jetao, inae uhane jiane elo. 3Lefasha saoqui choonca janonihane cuhane jetaote, aansijihanai aansijihanaain jeraaen batihaje. 4Nitohaneein jetaote, inae lechoonca caainsi janoniha cana bajaanaa batene bana jetao, jeraaen batihajihane jaun, ichatane tabai Ararat ecuuno que jetao nelauriaain nedae nii bote. 5Inae le janoa cana bajaanaa batene lechoonca bana jetaote, inae inanacae leeochaauru ichatane ecuunooru batihajeein sacuhane jaun.
6-7Nitohaneein inae inanacaa ichatane ecuunooru baiha jetaote, jena choonca janoneein catiaain nii nenotaane jaanu que nichanaa bote bacuujua joaracaain, leinjiin tajae ajanuri rijijieein nenaa jiane Nohe. Ne jetaote, neniha atanene jaun, cajihaneein amuhemujue nii niicha jianei tajaae, niha atanene cohaca. 8Nii leinjiin tajaae jianihane baiha jetaote, nacoaauneein leinjiin serori jiane Nohe, batihane coaraa cuhane coina. 9Ne jetaote, neniha atane nelauriaane jaanune jaun, jelaiha bote cuhane enoha cue jetao nii serori, satiin acau tabai niha jaitine jaun. Nii jaun jetaote, nii serori mucuhin jelaiha bote cuhane enoae Nohe.
10Nii baiha coaiteen, caainsi janoneein catiaain nacoaauneein nii serori jianihane jana jetaote, 11inae sohane jaun nocohejihane jana, catu que enuha olibo uune laaojoiri amaain jetao, turuha cue rene nii serori. Nitohaneein turuha cuha enuha uune amaain nii serorine jaun jetaote, inae nainae niha atanene que Nohe. 12Nii baiha nacoaauneein caainsi janoneein catiaain nii serori jianihane jana jetaote, inae laen jelaiha caene.
13Nitohaneein jetaote, saota fasha le jaanacaa Nohe ne jana jetao, jacoroelu caa cana rai chauratane acau tabai nihane caje. Inae nitohaneein jacorohane jana, le janoha cana bajaanaa batene nunuhe bana, nii bote coloheri joaracaain coaraa Nohene jana jetaote, inae jacoroe satiin chauratane. 14Inae coroata choonca caainsi janoniha cana bajaanaa coroata batenene bana jetaote, jooca acau tabaine caje jiuroelu caa cana rai chauratane.
Nii jaun jetaote: 15-16“Chajaain ena ii comasai, ii calaohichuru, chacanacuru, naaonjoaihunru aina jiniiquiin mituuche caa bote cajera. 17Chaaen, nii iniha lauri lauri nenacaauru tajaaecuru, itolere atane choae tijiarohin amunacaauru, nenaanajau lauri lauri irineein neenihuru, naaonjoaihunrine maajeein mitaaute, arajiin calaojoin itolereneein cana rai chauratane sacuritaain calaohichuruhinete nefaauruhinera”, nae jetao Nohe rai Cana Coaunera.
18Nii jaun jetaote, comasai, calaohichuru, nacanacuru, naaonjoaihunri aina jiniiquiin bote caje mituha Nohene jana jetao, 19jiniichaain mituure nii aina nenacaauru nunaanau neenihuru, irineein neenihuru, jiaauluhin, amuenihuru naaonjoaihunri. 20Nii baiha neein jetaote, Cana Coaunera coroajeein, le laurichuru caje, lenoneneein neenihuru tajaaecuru, lenoneein neenihuru tijiarohin amunacaauru, naaonjoaihunri mocohin, que Cana Coaunera belaihane jaanu rorinu que jetao ajeri caje rori jae Nohe. 21Nii ajeri caje rori jaain, nichoae teein lenonecuru mocoha Nohene jana, jataain raotiin juujijiaain aonaane jaun jetaote:
“Inae laen chabana nihei carai, baaso ichaain niha cachane nihanatiin, caa chauratane cojiotaain itajihanu nera; nenamanacane caje coaauneein baasohacha coaauca cachane nihanatiin caa ichacaaunne rijijieein itolere lenonecuru naaonjoaihunri aina taebinaecuru itajerihaaunita.
22Jaiti niha cana rai chaurutanene janate nereein itolere temulecurura. Jerichanejeeintechu temule jaain, inaacane taain, naaonjoaaurureein cachaaurura.
Nerichaain ajaaronaa, jelaronaa, ajaanaa, elohena, jiichoo, janotiin naaonjoaihunricha”, nae jetao Cana Coaunera.
Currently Selected:
Génesis 8: URA
Highlight
Share
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
