Joaancha Laenai 16

1Nii jaunna inara rai aitoon, inara rerohecaauruhane, nererojoecaain inara letohanune jaan jianequichene coataane, caa caritiin aitoon inara rai, laraajiin abaantaain neeichene coina. 2Acaauru ita taojiaauruhana jaan loreri asaae enohichene janate, caje inara sitaa cuurureein. Chaaente, chunocoha inara tabanejei sohin jaooruhane, ‘Jeriha Cana Coaunerana jaunne, caa ichaaun’, naa cuurureein. 3Nii chabana Ofa coitucuelanaala, canu nihanatiin coitucuurenihane jaunte, nitohanai ichaa cuurureein. 4Inae cuutihane bana, ‘Esinaete aitelu’, naaichene coinana caa aitoon.

Chaaelai ichana nainiha Cana Coaunera Suujuane

Jaiti jelai inara ratirihanune rai nenihanune jaunna, jauriaa caa que inara rai erenajaqueneeun. 5Inae laaen curichaaunni nii caletoaera aina nihanune coina. Nihei chunicohanejein nii cunaa jerichaaunne jaan bajaane que airijiin, 6satiin inaderaachaquiche caa que aitocoaunne jaun. 7Inara rai tejian caohachare cuhanune. Jana cuenihanune, urihei inara corihaneein inara suujua lararajiaain, inara coroatajaneraanu. Acate inara suujua lararajiaain, inara corihaneein inara coroatajanereein. Inae cuhanunena, canu letoareeunni. 8Aca inae turuhanete, cacha relaa cureein, osaaocuruhane coitucuuruha cachaaurune coina. Chaaen techu, caohati ichaonaa que cacha relaa aicheein. Jana ichaonaa caohacha sacunaa jeriheichurute, casetecaa cureein Cana Coaunera, 9osaaocuruhane saijieein quesenetaaurenihane coreniha. 10Nii banate, esinae rauhijiriin ichaonaa esine teraneein nihanune coitucuha cuurureein, Ofa nenajaun tacaa curichaaunnine jaun.

Inae canu coaariheicheein cuutihane reeintiaain. 11Nii banate, Moconajaaera aina jiniiquiin nosa coreniha caseteco coaraa cuururichaaine coitucuha cuurureein cachaauru.

12Niha arajiin inara rai quiicha beeni niqui, nete ‘Quete toon aite’, naain coitucunaa naineneriquiche. 13Inae turuha Cana Coaunera Suujuenete, rauhijiriin inara relaa cureein. Coatiha suujua caje rocohin aitorinaain. Aitoha Cana Coaunera najaan quete aitoha cureein, nitohaneein situsihane ajiniha coitucuhin neeichene coina. 14Acate coroajeein canu nichaaunne biha cureein, cacoitucuhin neeichene coina. 15Charijieein teeinti, itolere coauneraneein ne Cana Inaca. Nirijijieein inachu canu netonai neeun, Cana Inaca calaohi nichaaunne. Aihana jaun, coa cojoaelatohache canu coitucueratiha Ofa Suujuane.

Inaderaaichene baihate necoriha cureein inara suujua rachoojoenaa neein

16Satonoote, caa basiinjiin cacoharaa curiquicheein. Nii baihajirite canu coaraa curiquicheein coaiteen”, nae Cana Coaunera Calaohi Jesoso.

17Nii jaunte ita caje: “Tonaa nena, ‘Satonoote cacoharaririquicheein, Cana Inaca rene curichaaunnine jaun. Nii baihajirite cacoharaa curiquicheein’, nae. 18Chatonaa nena aite”, naacaanu ita rai.

19Nii jaunte, caje bajanaa jerichaanune coarajihane jaun: “ ‘Satonoote basiinjiin cacoharaririquicheein. Nii baihajirite cacoharariquicheein’, naanune jaunna ita caje bajaaiche.

20Esinaena rauhijiriin aitoreeunni. Inaderanaa caaunte chanaa curiquicheein. Nii janate inara coraaeca cuurureein caa chauratane que nenacaauru cachaauru. Nete rachoojoenaaneein necoriha cureein inara suujua.

21Charijieein teeinti, nejanoanaa jeriha rai canaanaine nererojoecaaure enecuru cunaa caaun. Jana inae lesajeein nejanoaane, inae nii cuna coacuelanaala raotojoeein rachoojoeein ne, nii canaanai coraaeca.

22Nii rijijieeinte nererojoecaaiche niqui ena. Nete, turuhin inara coaraa uhanune, aitohi rijitojoeein rachoojoenaa neein niha cureein inara suujua cuhanai. Nihei chunei inara caje nii rulunaa nainera.

23Nii bana inae cacaje, ‘Chatohaneein icharihacaanu’, naain cacaje cha bajariheicheein, inara netonai coitucuriquicheeine jaun. Chaaelai inaraacha latei bajaaiche cacorenihanete, tiha cureein Cana Inaca. 24Nihei caniha neeichene caje coaauneein, cacoreniha chaaelai bajaheeiche. Bajaaiche cacorenihanete, tiha cureein Cana Inaca, raotojoeein rachoojoeein neeichene coina.

25Inae cuutihane bana caritiin, ‘Charijieein teeinti naojoain’, naain cuaain, inara rai berinaaunni. Inae cuu tihane banane, nechu jataain rauhijiriicha cuaain Cana Inaca aitoonjoan que inara relareeunni, rauhijiriin aonaain coitucuhichene coina. 26Nii banate, inara raaje inaraacha latei bajaa curiquicheein. Nitohanihane bana, coatiha canu Cana Inaca rai aitorihaauni, 27inae raujiaain caje uhanune esenetaaichene coreniha inara belaiha Cana Coaunerana jaun. 28Canune, Cana Inaca nenaja caje mituhin, caa chauratane que turuha uun. Inae caa chauratane ratiriin, Ofa Cana Inaca Cana Coaunera rene curichaaunni”, naa Cana Coaunera Calaohi Jesosone janate:

29“Inae laaen aonacaaun rauhijiriin aitohine jaun. 30Nii jaunna esinae itolere coitucuhin, esinae rauhijiriin Cana Coaunera caje uhine esenetaacaanu. Aihana jaun, nihei nenacaaen canacaanuhacha bajaaenenu, inae coitucuhacaanune jaun”, naacaanune jana:

31“Nii jaunchana esenetaaiche. 32Inae cojoinaca que tiha. Enenete satiin ita caje riatoroaain, jelai cajaohin caratiriin amuriquicheein, nena jelai caa neneeun, caniha niha Ofa Cana Coaunerana jaun. 33Coitucuhichene jerena caunne caa aitoon, quesenetaain raotojoeein rachoojoeein neeichene coina. Chaaen inara netonai, caa chauratane que necairichanaa coaraa curiquicheeine jaunna, raotojoeein rachoojoeein necairichanaa abaantaichene coinana aitoon. Caa chauratane curuaanaa Moconajaaera amuritohanune jaun, inara netonai laraajiin caa chauratane curuaanaa Moconajaaera amuritohichene coinana, coitucuhichene jerena caaun aitoon”, nae Cana Coaunera Calaohi Jesoso, aina nerelanaa nichaanune rai.

Currently Selected:

Joaancha Laenai 16: URA

Highlight

Copy