Génesis 40
40
Jimar shuar karanam wainkamun José nekaamu
1-3José cárcelnum pujai, umutain apun ajamin, tura pankan apun ajamnujai faraónkan chichamen umirkacharuiti. Turam faraón kajek nitan achik, cárcelnum egkeatarma, tusa tinaiti. Timau asar jukiar egkeawaru ainawai. 4Turamtai capitán Josén chicharuk: Ame kuitamkarta, tusa tinaiti. Turam nukap tsawan pujusaruiti. 5Tura nui pujusar umutain apun ajamin, tura pankan apun ajamnusha nita turunatnurin káshi karanam wainkaruiti. 6Tumawaru ai Josésha káshikmas jeari iikma wake mesekar matsatun wainkauwaiti. 7Tura nitan iniak: ¿Urukamtai yamaika wake mesekrumsha matsatrume? tusa tinaiti.
8Tama nita chichainak: Pegkerchau kanarji nuniku asar, yáki incha ujatmaktaj tusa enentaimkur juni matsatji, tusar tiaruiti. Tuinakai José chichaak: Atum kanarurum nuna nekamtikartumainka Yuusaiti. Uruk kanaruram nu ujatkatarma, tusa tinaiti.
9-10Takai umutain apun ajamin Josén ujak: Uva tres kanawentin wajau yagkuruk nerek tsaman wainjai. 11Tura faraónkan shikika umutairincha takaku asan, uva neren ijuraan faraónkan suajai, tusa tinaiti. 12-13Takai José chicharuk: Uva tres kanawentin wainkaum nuka, tres tsawantin faraón juiya jiirmaki ame takatairminig ataksha apujtamsattawai. Turutmamtai yaunchuk umirmiam imatiksamek umirtatme. 14Wii tajam nu metek uminkaigka winasha kajinmatrukim inaitutsuk wina pachittsamsha faraónjai chichasta, turam winasha jiirkiti. 15Wika hebreo shuar aig kasamrukaruiti. Wika pegkerchaunka takaschau asan, cárcelnumka egkemmaitsujai, tusa tinaiti.
16Umutain apun ajamin ataksha waketki takastintrin José nekaamtai, pankan apun ajamnusha shir aneas Josén chicharuk: Wika tres chagkinnum pan puju aina chumpiamun muukaaruin ekenjai. 17Tura chagkin yakini amaunam apu yuatin pan chumpirun muukaaruin ekentsan weamun, chigki yuinan wainjai, tusa tinaiti.
18Takai José chicharuk: Ame tres chagkin wainkaum nuka tres tsawantin, 19faraón juiya jiirmaki suwenam jigkatmaa numinam nenaa mantamattawai. Nutikramamtai iyashmin chuag yuawartatui, tusa tinaiti.
20Tura tres tsawan pujuinai, faraón ni akinamuri tsawan tsawaarmatai yutai pegker inartukam nijai takau ainajai yuak pujus chichaak: Umutain ajamrina nu, tura pankan ajamrina nujai jukirum itatarma, tusa tinaiti. Takai weriar mai jukiar itariaruiti. 21Turawarmatai umutain ajamaun chicharuk: Ameka umutai yaunchuk ajamrin ayam nuig takasta tusa ataksha apujsauwaiti. 22Antsu pankan ajamaunka José tina turusag, suwenam jigkaarum numinam nenarum maatarma, tusa tinaiti. 23Turasha umutain apun ajamnuka, José timaunka kajinmatkinaiti.
Currently Selected:
Génesis 40: hubDBL
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
