Génesis 41
41
Faraón karanam wainkamun José nekaamu
1-4Jimar uwí nagkamasa ai, faraón siete vaca pegker nuweram aina, entsanmaya jiintrar chirichirin yuinak irunun, chikichka siete vaca watsaku tsumain aina jinar vaca pegker nuweram ainan yuinan karanam Nilo entsan yantamen wajas wainu tepau shintaaruiti.
5-7Tuma ataksha kanar: Chikichik trigonmag siete trigo pegker aina nerekar irunmaunam, chikichka siete trigo tsererach kaaku aina tsapainiar trigo pegker ainan ijinun karanam wainu tepau shintaar, karanma tu wainaj, tusa tinaiti. 8Tuma wake mesemar nekapu asa, tsawaar nina inatairi ainan: Werum yacha aina, tura nekamin aina, Egiptonam matsata nu yaruakrum ashi ikaatruktarma, tusa tinaiti. Takai weriar ikaankarmatai ni karanam wainkamun pachis nitan ujakuiti. Turasha chikichkiksha pegke nekacharuiti.
9Turawarmatai faraónkan umutain ajamin chichaak: Wii kajinmatkimurun yamaika anearjai. 10Apu ame kajerkartukam, cárcelnum jimar shuartin egkekratamiam, 11nui pujusar ii turunatin káshi karanam wainkamiaji. 12Tura shuar achikmau ainan kuitamin hebreo shuar pujau asa, ii karanam wainkamun nekartamamiaji, tusa tinaiti. 13Ni timauka imanisag uminkauwaiti. Wika takatur ajakmaunmak wayaawaitjai. Antsu chikichnaka suwenam jigkaa numinam nenaawar maawaruiti, tusa tinaiti.
14Tama faraón, José jukirum itatarma tusa nina suntaari ainan akuptukuiti. Turam achikam egketun jiikiaruiti. Turam susurin awar, jaanchin yapajmamamtai jukiar faraón pujamunam ejéniaruiti. 15Turawarmatai faraón, Josén chicharuk: Wii karanam wainkaj nuna ujatmain atsawai. Turasha amina pachitmasar karanam wainkamun nekau, tusa turamainakai untsukjame, tusa tinaiti. 16Tama José faraónkan ayak: Apuru wichauwaitjai, antsu ame karanam wainkamunka Yuus nekamtikramattawai, tusa tinaiti.
17-21Tama faraón Josén chicharuk: Siete vaca nuweram pegker aina entsanmaya jiintrar chirichirin yuinak irunun, chikichka siete vaca watsaku tsumain aina jiintrar vaca nuweram pegker ainan yuinan karanam Nilo entsa yantamen wajasan wainu tepaun shintaarmajai. 22-24Tuman ataksha karanam: Chikichik trigonmag siete trigo pegker aina irunmaunam, chikichka siete trigo tsererach kaaku aina tsapainiar trigo pegker ainan ijinun karanam wainkau asan, ujatkatarma tusan nekamin ainan ujakarmajai, turamsha nekacharmayi, tusa tinaiti.
25Tama José faraónkan ayak: Ame karanam wainkaum nuka mai nuketi. Yuus ni turatnurin iwainturmakai. 26-31Siete vaca nuweram pegker aina, tura chikichik trigonmag siete trigo pegker ainajai wainkaum nuka, Egipto nugkanam siete uwí yutai nukap atin wainkaume. Antsu siete vaca watsaku tsumain aina, tura siete trigo tsererach kaaku ainajai wainkaum nuka, siete uwí tsuka tepeatin wainkaume. Tsuka tepeamtai Egipto nugkanam tuke puju ainasha senchi waittsartinaiti. Nunaka Yuus ni turatnurin iwainturmakume. 32Apuru, nunaka wári uminkatnun Yuus iwainturmakume. 33Turatin asamtai apuru, Egipto nugkan iistin shuar shir enentaimkau etegkam apujmainaitme. 34-36Tura tsuka tepeamtai shuar ainan susartinan irumrartin ainasha etegkawarta, turam nita Egipto nugkanam yujasar siete uwí trigon juukartata nuna cinco saconam jukarka chikichik sacon akanak jukiar jeanam irumrarti tusam apuru ame titá. Nu turunamtaigka Egipto nugkanam siete uwí tsuka tepeatta nuisha shuar ainaka waittsachartatui tusa, José faraónkan tinaiti.
José Egiptonmaya shuar ainan apuri jasmau
37Tama faraón nina inatairi ainajai Josén senchi wakerukaruiti. 38Faraón nitan chicharuk: Ju shuaran Yuusa Wakaní pujura imajuka shuar chikichka atsawai, tusa tinaiti. 39Tusa Josén chicharuk: Yuus junaka ashi nekamtikramayi, turutma asamtai ame nekam imauka chikichka atsawai. 40Tuma asamtai ame wina jearui pujuina nuka inarta. Tura wina yaktarui shuar pujuina nusha ashi umirtamkarti. Antsu wika faraón asan amina nagkasau atatjai, tusa tinaiti.
41Tusa Josén chicharuk: Ashi Egipto nugka juna apuri atá tusan amina apujsajme. 42Nuna tusa faraón nina uwejen anillo sellortinan patakemamun ukuinak Josén patakeawaiti. Tura jaanch pegkeran anugkar, suwenam nugkutaincha orojai najanamun anugkrauwaiti. 43Nutika umik nina chikich carretarin ekennaiti. Tura ni emak weakai José ukunam wuwaiti. Tumakai chikichik shuar emak wesa senchi chichaak: Faraón winawai jinta agtuatarma, tusa tinaiti. Josénka tu apu amajsaru ainawai. 44Tura faraón Josén chicharuk: Wii faraón asan tajame, egiptonmaya ainaka amina chichamrumin ashi umirtamkarti, tusa tinaiti.
45Tusa faraón Josén Safnat-panéah anaikauwaiti. Tura Potifaran nawantri Asenat naartinjai nuwemtikawaiti. Potifarka yaakat Ontan sacerdoteri ajakuiti. José Egiptonmaya shuar ainan apuri jasuiti. 46Josénka treinta uwí ejé pujaun, Egiptonmaya apu pujamunam ejéniaru ainawai. Turam faraónkan aujas ikuki, Egipto nugkanam yaakat irununka wekatus ashi iisuiti. 47Arak shir nukap nereamu siete uwí asauwaiti. 48-49Tuma asamtai shuar aina arakan juwainakai akanar yaruak, yaakat ainanam, trigon yaikim nekapmamainchauwa iman nukap irumrauwaiti. 50Tsuka tepeatsaig José jimar uchin akiawaiti. 51Tura waittsamurun tura pataar ainancha Yuus kajinmamtikrukai, tusa iwairinka Manasés anaikauwaiti. 52Tura ju nugkanam kuntuts pujai, uchin Yuus surusai, tusa chikichnaka Efraín anaikauwaiti. 53Siete uwí árak shir nukap nereamu nagkamasmatai.
54José tina tumasag ashi nugkanam siete uwí tsuka tepeawaiti. Tumamtaisha Egipto nugkanmaya ainaka tsukaika waittsacharu ainawai. 55Egipto nugkanam tsuka tepeamtai, nuiya shuar aina tsukamainak faraónkan jeariar yutain seaina. Turam faraón egiptonmaya ainan chicharuk: Werum José seataarma, tusa tinaiti. 56Tsuka tepea asamtai egiptonmaya aina senchi waitainakai yutai irumramu ainan kuitjai sujakuiti. 57Tura chikich nugkanmaya ainasha tsukai waitainak yutain sumakartasa, Egiptonam kaunkar Josén seajakaruiti.
Currently Selected:
Génesis 41: hubDBL
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
