Génesis 42
42
José yachi aina Egiptonam shiakmau
1Egiptonam trigo irunui tamaun Jacob antuk, nina uchiri ainan chicharuk: ¿Urukamtai anisha matsatrume? 2Egiptonam trigo nukap irunu tuinamun antukjai. Tsukai jinaawaij atumsha werum, trigo sumaka utitarma, tusa tinaiti.
3Takai Josén yachi diez ajakarua nu, trigon sumak utiartasa Egiptonam shiakaruiti. 4Turasha José yachin Benjamínnaka, José urukawait numamtuk jakai tu enentaimu asa, nina yachi shimuinakaisha akupkachuiti. 5Canaán nugkanmasha tsuka tepea asamtai, nuiya shuar aina yutain sumakartasa Egiptonam shimuinakai, Israelan uchiri ainasha yutain sumakartasa nitajai shiakaruiti. 6Tumawar José Egiptonmaya apu asa, chikich shuar yutain sumaktasa kaununcha sua asamtai, José yachi ainasha nui jeawar tsuntsumruawaruiti.
7Turasha José nina yachi ainan nekayat, nekachua numamtuk nitan kakaar chicharuk: ¿Atumsha tuiya winarme? tusa tinaiti. Tama nita aimainak: Ika Canaán nugkanmayati yutai sumaktasar wininaji, tusar tiaruiti. 8Joséka nina yachi ainanka nekaawaiti. Turasha nitaka nekacharuiti. 9Tumainakai José karanam yaunchuk wainkamurin anear nitan chicharuk: Atumka egiptonmaya ainasha uruk matsatuak tusarum nekaattsarum kaunkaurme, tusa tinaiti. 10Tama nita chichainak: Atsaa apuru, ika yutaiya nuke sumaktasar kaunkaji. 11Ii ainatika chikichik aishmagkuk akigmau ainaji. Ika shuar pegker ainaji, tura nekamata tusarkesha akupkamu ainatsji, tusar tiaruiti.
12Tuinakaisha José nitan chicharuk: Atumka egiptonmaya ainasha uruk matsatuak tusarum nekaattsarum kaunkaurme, tusa tinaiti. 13Takai nita chichainak: Apuru ika chikichik aishmagkuk akigmauwaitji, yaunchukka doce shuar ayaji. Ina yachi ekeuka ina aparijai juakmayi. Antsu ina yachi chikichka megkaakauwaiti, tusar tiaruiti.
14Tuinakaisha José nitan chicharuk: Wika nui tajarme atumka nekakratattsarum kaunkaurme. 15Turasha yamai nekapsatjarme. Faraónkan naarin pachisan tajarme: Atum yatsur ekeu aparijai pujumai tarum nu itaachkurminka juiyagka akupkashtatjarme. 16Nekas takurmeka atum ainarum nuiya chikichik akupkatarma nuna yatsumin ekeun juki itati. Tura chikich ainatirmeka cárcelnum egkeamu matsamtattrume. Atumin yachin itachmataigka nugkan nekattsampa yujawa titatjarme. 17Tusa José, nina yachi ainan cárcelnum chumpia tres tsawan apujsaruiti. 18Tura José nitan jiikiar chicharuk: Wii timajrum nu umiakrum iwáku pujustatrume. Wisha Yuusan umirnaitjai. 19Atum nekas shuar pegker ainakrumka, atumin yachi cárcelnum chikichik ikuakrum, chikich ainatirmeka atumi patai yuatin yutai jukirum wetaarma. 20Tura winakrum atumin yachi ekeu itaatarma, turawakrumin atum nekasa nu chichaamun nekaattajai. Antsu waitruarmeka mantamnattarme tusa takai ayu tiaruiti. 21Tusar nitak chichainak: Ika ina pegkerchaurinig jutikam aji. Ina yachi wake mesemar nekapeak wait aneasrum surutkairpa tusa imattrutmakrincha anturkachuitaj nui incha yamai wake mesemar aruttramsaji, tusar tiaruiti.
22Tuinakai Rubén nitan chicharuk: Uchi pegkerchau amajkairpa tusa tamaitiatrum anturtukchau ainarme. Nu pegkerchau amajkamunam isha waitkam ainaji, tusa tinaiti. 23Joséka Egiptonmaya chichaman chichaakai, chikich shuar José yachi ainan uja, turamu asar Joséka ii chichaamunka antatsuapi tu enentaimaina. 24Turasha nita tuinamun antuk Joséka kanaki we útnaiti. Tura ataksha taa, nitasha iimainamunam Simeón achikrum jigkaatarma, tusa tinaiti. 25Tura José nina inatairi ainan chicharuk: Saconam trigo aimratarma. Tura nita trigo sumaku akikmakmaurigka awagtakrum sacorin egketatarma, tura nita jinta wenak yuatnusha yutai susatarma takai turusag umirkaruiti. 26Turawarmatai nita burrorin aentskar waketkiaruiti.
Apari Jacob pujamunam waketkiaru ainawai
27Tuma wesar nita kanartinnum jeawar, chikichik shuar burrorin ayurattsa sacorin atia iikma nita akikmakmau imanisag kuitan egketun wainkauwaiti. 28Tura yachi ainan chicharuk: ¡Winaka kuitan awagturkiarai! ¡sacoruin egketun wainkajai! tusa tinaiti. Takai ashi wainkar senchi sapijmakar chichainak: ¿Yuuscha junasha urukamtaig jutikramajia? tusar tiaruiti. 29Nita apari Canaánnum pujamunam jeawar, nita turunamuri ainanka ashi ujakaruiti. Tura chichainak: 30Egiptonmaya apu kakaar chichartamuk, atumka nugka nekaattsarum yujarme tusa turammaji. 31Turasha ii chichaakur: Ika shuar pegker ainaji, tura nugka nekattsarkesha yujatsji, 32ika chikichik aishmagkuk akigmau ainaji yaunchukka doce shuar ayaji. Ina yachi ekeuka ina aparijai juakmayi. Antsu ina yachi chikichka megkaakauwaiti, tusar timaji.
33-34Tama ni chichartamuk: Atumi yachi chikichik jui ikuktaarma, tumakrum chikich ainatirmeka atumi patai aina yuatin trigo jukirum wetaarma. Tura winakrum atumin yachi ekeu itaatarma. Turawakrumin wainkan shuar pegkerapi ainawa, nekakratattsagka yujainatsuapi tusan titatjarme. Tura nui atumin yachin jiiktajai, tura atumsha takasrum surakrum agkan matsamsatnaittrume, tusa turammaji tuina. 35Nita sacorin atir iikma nita kuit ijiamu imanisag chumpimtatmaun wainkaruiti. Tuma aparisha, tura nitasha enentai jearcharuiti. 36Tura Jacob uchiri ainan chicharuk: “Winaka uchirtinchau amajtustattrume. José megkaakauwaiti, tura Simeónsha atsawai. Tura yamai Benjamín jukittsa wakerarme, jutikrakrum ima senchi waitkararme”, tusa tinaiti.
37Takai Rubén aparin chicharuk: Benjamínnaka wii jukin ataksha itaatjai. Antsu itachmataigka wina uchir jimar puja nu maata, tusa tinaiti. 38Takai Jacob ayak: “José jakamtai nigki juaku asamtai, Benjamínnaka akupkashtatjai. Jinta atum weamunam uchir megkakamtaigka untach asan wisha útin jakattajai. Tumamtai atum makumattarme”, tusa tinaiti.
Currently Selected:
Génesis 42: hubDBL
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
