Génesis 25

Warmin Ceturachö Abrahampa tsurinkuna yuriyanqan

1 Crónicas 1.32-33

1Abrahampa juk warminpa shutinmi karqan Cetura#25.1 Ceturaqa Abrahampa concubïnanmi karqan (1Crón. 1.32).. 2Tsë warmichömi Abrahampa tsurinkuna kayarqan Zimram, Jocsán, Medán, Madián, Isbac y Súa. 3Jocsánpa tsurinkunam kayarqan Seba y Dedán. Dedánpita miraqkunapitam kayarqan Asur, Letus y Leum nunakuna. 4Madiánpa tsurinkunanam kayarqan Efa, Efer, Hanoc, Abida y Elda. Pëkunam Ceturapita miraqkuna kayarqan.

5Abrahampa llapan imëkanpis karqan tsurin Isaacllapaqmi. 6Concubïna warminkunachö#25.6 Abrahampa concubïnankunaqa Agar y Ceturam kayarqan. kaq tsurinkunataqa wallka wallkallam imankunapis rakirqan. Tsënö rakïkurmi pëkunata despacharqan inti yarqamunan läduman ewkuyänanpaq. Tsënöpam Isaacpita karuchöna täräyarqan.

Abraham wanunqan

7Abrahamqa kawarqan juk pachak qanchis chunka pitsqa (175) watayuq kanqanyaqmi. 8Pëqa pasëpa awkinna këkarmi wanukurnin unë castankuna kaqman ewkurqan. 9Wanukuptinmi tsurinkuna Isaacwan Ismael pampayarqan Macpela machëman. Tsëqa këkan Mamripita inti yarqamunan läduchömi y Zoarpa tsurin Efrónpa chakranchömi. Efrón casta nunakunaqa heteo nunakunam kayarqan. 10Tsë chakraqa karqan heteo nunakunapita Abraham rantinqanmi.#Gén. 23.3-18. Tsëmanmi Abrahamta pampayarqan warmin Sara pamparëkanqan lädunman 11Abraham wanukunqanchönam tsurin Isaacta Teyta Dios bendicionta qorqan. Pëqa tärarqan Beer Lahai-Roí ninqan pözu lädunchömi.#Gén. 16.1-14.

Ismaelpita miraqkuna

1 Crónicas 1.28-31

12Këchömi qellqarëkan Abrahampa tsurin Ismaelpa tsurinkunapaq y pëkunapita miraqkunapaqpis.

Ismaelpa mamäninmi karqan Agar. Agarqa karqan Sarapa sirwiqnin Egipto warmim. 13Ismaelpa tsurinkunaqa wamaqshupita tutuyaq kayarqan Nebaiot, Cedar, Adbeel, Mibsam, 14Misma, Duma, Massa, 15Hadar, Tema, Jetur, Nafis y Cedema. 16Ismaelpa tsurinkuna chunka ishkëmi kayarqan. Pëkunam atskaman mirar chunka ishkë trïbu tikrayarqan. Tsë tsurinkunapa shutinkuna kanqannöllam trïbunkunapa markankunapa shutinkuna karqan. Pëkunam juknin jukninpis trïbunkunachö mandakuq kayarqan.

17Ismael kawarqan juk pachak kima chunka qanchis (137) watam. Wanukurnam unë castankuna kaqman ewkurqan. 18Ismaelpita miraqkunaqa ramakashqam täräyarqan Havilapita hasta Shuryaq. Tsëqa Egipto nación lädupam këkan. Tsëpam Asurman näni pasëkan. Kikinpura chikinakïkarpis tsëchömi llapankuna täräyarqan.#Gén. 16.12.

Jacobwan Esaú yurikuyanqan

19Këchömi qellqarëkan Isaacpa tsurinkunapaq y pëkunapita miraqkunapaqpis. Isaacqa Abrahampa tsurinmi karqan.

20Chusku chunka (40) watayuq këkarmi Rebecawan Isaac juntakarqan. Rebecaqa karqan Betuelpa tsurinmi y Labánpa paninmi. Pëkunaqa kayarqan Padan-aramchö täraq arameo nunakunam. 21Warmin Rebeca qolloq kaptinmi qeshyaqyänanpaq Teyta Diosta Isaac mañakurqan. Mañakunqanta Teyta Dios wiyaptinmi Rebecaqa qeshyaqyärirqan. 22Rebecapa pachanchö millish karmi maqanakur mamäninpa pachanta alläpa nanatsiyarqan. Tsëmi Rebecaqa kënö nir yarpakacharqan: <<Tsënö wamräkuna maqanakuyänan kaptinqa allim wanukümanpis>>.

Tsëmi imanir pachanwan jipanqantapis musyananpaq Teyta Diosta mañakur tapurqan. 23Tsënö tapuptinnam Teyta Dios kënö nirqan:

<<Pachëkichö wawëkikunam atskaman mirar ishkë markakuna kayanqa.

Pachëkillachönam chikinakur pelyëkäyan.

Punta yuriq kaqmi qepa yuriq kaqpa munëninchö kanqa>>.#Rom. 9.11-12.

24Killan tinkuriptinnam Rebecaqa qeshpikurqan millishta. 25Puntata yuriq kaqpa aqtsanmi karqan puka y llapan cuerpunmi karqan shapra. Pëpa shutinmi churayarqan Esaúta.#25.25 Esaú ninanqa shaprasapa ninanmi. 26Esaúpa atakanta tsarashqam qepanta yurirqan wawqin. Tsënö yurinqanpitam shutin churayarqan Jacobta.#25.26 Jacob ninanqa atakanta aptan ninan y ulikuq ninanmi. Rebeca qeshpikunan witsanqa Isaac këkarqan joqta chunka (60) watayuqnam.

Mayor kë derëchunta Esaú rantikïkunqan

27Tsëpitanam Esaúwan Jacob gentiyäyarqanna. Esaúqa jirkakunapa purirmi chucaru animalkunata wanutsita yachakurqan. Jacobqa mëpapis mana yarqushpam täkuq. 28Esaú tsarimunqan animalkunapa ëtsanta mikurmi Isaac alläpa kuyarqan tsurin Esaúta. Rebecanam Jacobta alläpa kuyarqan.

29Juk junaqnam Jacob arukïkaptin Esaúqa charqan jirkapa ëwanqanpita pasëpa utinashqa. 30Tsënö chärirmi wawqinta nirqan: <<Tsë pukëpa pukar arukunqëki mikïta qararamë. Mallaqëwan pasëpanam ëwakärï>>.

(Tsënö pukëpa pukaq mikïta munapanqanpitam Esaúta reqiyarqan Edom nir.#25.30 Edom ninanqa puka ninanmi.)

31Niptinnam Jacob nirqan: <<Qaranaqpaqqa mayor kë derëchïkita kanan höra kë mikïwan troquëkatsimë>>.

32Jacob tsënö niptinnam Esaú nirqan: <<Mallaqëwan wanïkaptï ¿imapaqtaq väliman mayor kanqä derëchüpis?>>

33Esaú tsënö niptinmi Jacob nirqan: <<Kanan höra Diospa nöpanchö jurarnin änimë mayor kë derëchïkita trocatsimänëkipaq>>.

Tsënam Esaúqa jurar mayor kë derëchunta tsë mikïwan troquëkurqan.#Heb. 12.16-17. 34Tsënam Jacob qararqan tantatawan lentëjas pichuta. Mikur upur usharirnam pacha junta ewkurqan. Manam imapis qokurqantsu mayor kë derëchunta troquëkurpis.

Currently Selected:

Génesis 25: qwhB

Highlight

Copy