Génesis 38

Tamar qeshpikunqan

1Tsë witsanmi wawqinkunawan täranqanpita Judá ewkurqan Hirapa wayinman täkuq. Hiraqa Adulam markapitam karqan. 2Tëkarmi Judá reqinakuyarqan Súa shutiyuq cananeo nunapa shipashninwan. Pëwan juntakarmi täkuyarqan. 3Tsë shipashmi qeshyaqyar qeshpikurirqan ollqu wamrata. Tsë wawanpa shutinmi churarqan Er nir. 4Tsëpitanam yapë qeshyaqyar qeshpikurirqan jina ollqu wamrata. Tsë wawanpa shutinmi churarqan Onán nir. 5Tsëpitanam yapëpis juk ollqu wamrata qeshpikurirqan. Tsë wawanpa shutinnam churarqan Sela nir. Quezibchö Judá tëkaptinmi tsë tsurinkuna yurikuyarqan.

6Wamaqshu tsurin Ertam Judáqa juntëkurqan Tamar shutiyuq shipashtawan. 7Erqa feyu nuna karmi Teyta Dios munanqannötsu kawarqan. Tsëmi Teyta Dios permitirqan Er wanunanpaq.

8Tsënam qepa kaq tsurin Onántana Judá nirqan: <<Shë, wawqikipa pajunwan juntakë pëchö tsuriki kaptin wawqikipa tsurinnö kananpaq>>.#Deut. 25.5-6.

9Tsurin yurirpis wawqinpa tsurinnö kananpaq kaqta musyarninmi Onánqa wawqinpa pajunwan ruranqan höra mana qeshyaqyänanpaq sutarir jaqllaman shuturatsiq. Tsënö rurarqan wawqinpa tsurinnö kananta mana munarmi. 10Onán tsënö ruraptinmi Teyta Dios alläpa piñarqan. Tsëmi pëtapis wanuratsirqan.

11Ishkan tsurinkuna tsënö wanuyaptinmi Judáqa yarparqan tsurin Selapis Tamarwan punur wanukïkunanta. Tsëmi Tamarta nirqan: <<Tsurï Sela gentiyanqanyaq tëtëkipa wayinchö täkurëkë>>.

Tsënö niptinmi Tamarqa tëtanpa wayinman kutikurqan.

12Tsëpita atska watatanam Judápa warmin wanukurqan. Tsë warmiqa karqan Súapa tsurinmi. Warminta lütur cumplirirnam Judá ëwarqan Timnatman. Tsëchömi minkankuna üshankunapa millwanta rutïkäyarqan. Pëtam Adulam markapita yanasan Hira yanaqarqan.

13Timnatman millwa rutuq suegrun ëwëkanqantam Tamar musyarirqan. 14Tsëmi lütu yakaranqan ratashta trocakurir pipis mana reqinanpaq vëluwan shukupakurkur Enaim marka yëkunaman täkïkurqan. Tsëqa karqan Timnatman ëwana nänichömi. Tamarqa tsënö rurarqan Sela poqushqana këkaptinpis suegrun mana juntaptinmi.

15Tsënam qaqllan tsapashqa kaptin Judá yarparqan prostitüta warmi kanqanta. 16Tsëmi nänipa ëwëkanqanpita yëkurqan parlapänanpaq. Llumtsïnin kanqanta mana musyarnam nirqan: <<¿Mamë, punukurishun?>>

Tamarnam nirqan: <<Punukurishqaqa ¿imatataq pagamanki?>>

17Judánam nirqan: <<Apatsimushaq juk mallwa chiwatam>>.

Pënam nirqan: <<Rasunpa apatsimunëki kaptinqa imëkillatapis prendata jaqipämë>>.

18Judánam nirqan: <<¿Imatataq jaqipänaqta munanki?>>

Pënam nirqan: <<Sëllïkita watuntin y tukrïkita#38.18 Wakin nunakunaqa shukshïkita niyanmi. jaqipämë>>.

Tsënam prendata jaqipëkur pëwan punurqan y Judápata Tamar qeshyaqyärirqan. 19Tsëpitanam Tamarqa wayinman kutïkur yakaranqan vëlunta qotukurir lütu ratashninta yapë yakakurirqan.

20Judánam yanasan Hiratawan mallwa chiwata apatsirqan jaqinqan prendankunata ëllunanpaq. Apatsiptinpis manam tsë warmita tarirqannatsu. 21Mana tarirnam Judápa yanasanqa tsë markachö täraq nunakunata kënö tapukurqan: <<Tëtakuna, kë Enaim markaman yëkamuna punkuchö täkuq prostitüta warmita ¿rikälläyarqunkiku?>>

Pëkunanam niyarqan: <<Këchöqa manam ima prostitüta warmitapis rikäyarqütsu>>.

22Tsënö niyaptinnam Judá kaqman kutïkur kënö willarqan: <<Manam tarirqütsu tsë warmita. Tsëchö täraqkunapis niyämashqa tsëchöqa manash rikäyashqatsu ima prostitüta warmitapis>>.

23Judánam nirqan: <<Mana tarishqa këkaptikiqa imanashuntaq. Yapë ashishqaqa nunakunam asipämäshun. Prenda jaqipamunqäkunatapis jina apakutsun>>.

24Tsëpita kima killatanönam nunakuna ëwar Judáta niyarqan: <<¡Teyta, llumtsïniki Tamarqa piwan karpis punushqam kanqa! ¡Pëqa qeshyaqmi këkan!>>

Tsënam Judáqa alläpa piñar nirqan: <<¡Tsënö warmitaqa wayinpita jorqurir kayëkuyë!>>

25Wanutsiyänanpaq apëkäyaptinnam suegrun Judáman Tamar kënö willakatsirqan: <<Kë tsararëkanqä prendayuqpatam qeshyaq këkä. Reqiyë watuntin sëllu y tukrun#38.25 Wakin nunakunaqa shukshun niyanmi. pipa kanqantapis>>.

26Tsëta rikëkurnam Judá kikinpa kanqanta reqirir nirqan: <<Pëqa manam jutsayuqtsu. Tsurï Selawan mana juntanqäpita noqam jutsayuqqa kä>>.

Tsëpita patsam Judáqa llumtsïninwan manana punurqannatsu.

27Killan tinkuriptinnam Tamar qeshpikurqan millishta. 28Qeshpikïta jipëkaptinnam juknin kaq wamrapa makin yarqaramurqan. Tsëtanam partëraqa puka jïluwan watarkur nirqan: <<Kë kaqmi wamaqshu këkan>>.

29Makinta tsë wamra kutitsikïkuptinnam wawqinna puntata yarqaramurqan. Tsënam partëraqa nirqan: <<Këqa ¿imanöparaq jukninta llallïkamushqa?>>

Puntata yurinqanpitam tsë wamrapa shutin churarqan Fares#38.29 Fares ninanqa kichaq ninanmi. nir. 30Tsëpitaran puka jïluwan makin watashqa kaqqa yurikurqan. Tsë wamrapa shutinmi churarqan Zara#38.30 Zara ninanqa atsikyaq ninanmi. Tsë shutita churarqan puka jïluwan watashqa kanqanpitam. nir.

Currently Selected:

Génesis 38: qwhB

Highlight

Copy