Génesis 49

Tsurinkuna y mirëninkuna imanö kayänanpaqpis Jacob ninqan

1Tsëpitanam llapan tsurinkunata qayëkur Jacob nirqan: <<Nöpäman llapëki witiyämï. Warë warätin imanö kayänëkipaqmi kanan willayashqëki.

2<<Llapëki witimur niyashqaqta wiyayämë.

3Rubén, qammi kanki wamaqshu tsurï.

Jövinllaraq këkarmi qamta tsurïkurqaq.

Llapan wawqikikunapis respetayäshurqëkim.

Pëkunapitapis mas poderyuqmi karqëki.

4Alläpa atskayashqa mayuta pipis tsapëta mana puëdinqannömi qamtapis jutsa rurëpita pipis tsarëta puëdishunkitsu.

Concubïna warmïwan punur desonramashqankim.#Gén. 35.22.

Tsëmi mayor derëchïkita oqrarqunki.

5<<Simeónwan Levíqa oqa pakirishqam këkäyan.

Pëkunam cutsillunkunawan nunakunata ushakätsiyarqan.

6Alläpa piñakïwanmi nunakunata wanutsiyarqan.#Gén. 34.24-30.

Asikuyänan rëkurmi törukunapa ankuntapis roqur ushayarqan.

Tsëmi pëkuna ëllukäyanqanchöqa ëllukëtapis munätsu.

7Pëkuna piñayanqanqa alläpa mana allim karqan.

Tsëmi mirëninkunapis Israel nacionchö ramakashqa täräyänanpaq dispunishaq.

8<<Judá, qampita mirënikikunataqa Israel mayinkuna kuyayanqam.

Chikiqninkunataqa poderninwanmi dominayanqa.

Israel mayinkunam respetarnin puntanman qonqurikuyanqa.

9Qamqa mallwa león wätata tsarïkur mikukurkuq cuentam këkanki.

Wätata tsarinanpaq pampaman lätëkuq leonnömi këkanki.

Tsënö mantsëpaq kaptiki ¿piraq ichikllapis qallapëkushunkiman?#Núm. 24.9; Apoc. 5.5.

10Judá castallapitam reykuna imëpis kayanqa.

Manam pipis rey këninta qochinqatsu.

Tsënö kanqa llapanpaq poderyuq rey chämushqanyaqmi.

Tsë reytam mëtsë nación nunakunapis cäsukuyanqa.

11Tsë witsanmi üvaspis llutëpa wayunqa.

Tsëmi üvaspa yuranllamanna ashnunkunatapis watäyanqa.

Vïnupis ratashninta taqshananpaqnöran atska kanqa.

12Atska üvaskuna kaptinmi nunakunapa nawinkunapis vïnupita mas yanaraq kanqa.

Atska lichi kaptinmi kirunkunapis lichipita mas yulaqraq kanqa.

13<<Zabulónpita miraqkunaqa lamar kuchunkunachömi täräyanqa.

Barcukuna chäyänanchömi y yarquyänanchömi markankunapis kayanqa.

Mojunninkunapis Sidónwan tinkunqanyaqmi kanqa.#Deut. 33.18-19; Jos. 19.10-16.

14<<Isacarpita miraqkunaqa corralchö këkaq kallpayuq ashnunömi kayanqa.

15Täranqan markankunaqa mëpis täkïllapaqmi kanqa.

Tsëmi qepita apayänanpaqpis waqtankunata kamäyanqa.

Y sirwikuq karpis kushishqallam kawakuyanqa.

16<<Danpita miraqkunaqa wakin Israel trïbukunanömi trïbun kaq nunakunata mandayanqa.

17Tsënöllam näni lädunchö mäkuq mäkuq ratarëkaq culebranö kayanqa.

Pëkunaqa cawallupa chakinta kanir montaraqninta jitatsiqnömi kayanqa.

18 Teyta Dios, ¡qamllamanmi markäkü salvëkamänëkipaq!

19<<Gadpita miraqkunatam atska soldädukuna qallapäyanqa.

Tsënö këkaqtam kikinkunata qatikachäyanqa.

20<<Aserpita miraqkuna täräyanqanchöqa atska mikïmi kanqa.

Tsëmi rey mikunqannö imëpis alli allillata mikuyanqa.

21<<Neftalípita miraqkunaqa luychunöpis munanqanpa purikuqmi kayanqa.

Kuyëllapaq llullu wawankunata qeshpitsiq luychunömi kayanqa.

22<<Josépita miraqkunaqa yaku kuchunchö winakuq montinömi kayanqa.

Pëkunaqa rämantapis poqtiparaq wayuq montinömi kayanqa.

Montipa rämankuna winar perqa jananpapis lätaqnömi kayanqa.

23Pëkunatam alläpa chikir flëchankunawan atacayanqa.

Tsënöllam imëpis piñatsiyanqa.

24Tsënö kaptinpis Josépita miraqkunapa rikrankunaqa alläpa kallpayuqmi kayanqa.

Flëchananpaq flëchakunantapis chachaqmi aptaräyanqa.

Tsënö kallpayuq kayanqa llapanchö poderyuq Teyta Dios yanapaptinmi.

Pëmi Israel nunakunata mitsir poderninwan imapitapis tsapan.

25Creyikunqä Teyta Dios yanapëkulläshï.

Llapanpaq poderyuq Teyta Dios ciëlupita bendicionninta kachëkallämutsun.

Patsa rurinpitapis yakuta pashtëkatsillämutsun.

Wamrëkikunapis y wätëkikunapis atska kananpaq bendicionninta churëkallämutsun.

26Tëtä bendicionninta qomanqanpita masmi qamtaqa bendicionnïta qoykaq.

Kë bendicionnïqa jirkakuna mana ushakaq kanqannömi qampaq y qampita mirënikikunapaq imëpis kanqa.

Qamtaqa wawqikikunapitam Teyta Dios akrashurqëki.#Deut. 33.13-17.

27<<Benjamínpita miraqkunaqa mantsëpaq löbunömi kayanqa.

Tsarinqan wätata qoya qoyalla mikuqnömi kayanqa.

Tardipanam soldädu mayinkunata rakinqa>>.

28Tsënö nirmi tsurinkunata Jacob bendicionta qorqan. Chunka ishkë tsurinkunapita miraqkunam Israel nunakunapa chunka ishkë trïbunkuna kayan.

Jacob wanukunqan

29Tsëpitanam tsurinkunata Jacob nirqan: <<Unë castäkuna kaqman ewkunäpaqnam këkä. Wanukuptï tëtäwan awilü pamparanqanman apëkamar pampëkayämanki. Pëkunaqa heteo nuna Efrónpa chakranchö këkaq machëchömi pamparëkäyan. 30Tsë machëqa Canaánchö këkaq Macpelachömi këkan. Tsëqa këkan Mamre wak tsimpanchömi. Tsë machëtaqa chakrantawan Efrón nunapitam awilü Abraham rantirqan castankunawan tsëchö pampanakuyänanpaq.#Gén. 23.1-20. 31Tsëchömi pamparëkan awilü Abraham, awilä Sara, tëtä Isaac#Gén. 25.9-10; 35.27-29. y mamänï Rebeca. Warmï Leatapis tsëmanmi pamparqä. 32Tsë chakrataqa y machëtaqa awilü rantirqan heteo nunakunapitam>>.

33Tsurinkunata tsënö käyiratsirnam Jacobqa qopinman jitakärir wanurirqan.#Hech. 7.15.

Currently Selected:

Génesis 49: qwhB

Highlight

Copy