Génesis 7

Diluviu kanqan

1Tsëpitanam Noéta Teyta Dios nirqan: <<Llapan nunakunapitapis qamllam noqa munanqänö kawëkanki. Tsëmi qam, warmiki y tsurikikuna warminkunawan arcaman yëkuyanki mana wanuyänëkipaq. 2Püru kaq wätakunataqa#7.2 Püru kaq wätakunaqa Diosta adorar altarchö kayananpaq wätakunam karqan. Mëqan wätakuna püru kanqanta y impüru kanqanta musyanëkipaq leyinki Lev. 11.1-47; Deut. 14.3-20. qanchista chinata y qanchista orquta arcaman yëkatsinki. Impüru kaqtaqa chinan orqullata yëkatsinki. 3Tsënölla yëkatsinki llapan casta päriqkunata#7.3 Wakin nunakunaqa bolaqkunata niyanmi. qanchista chinan orquta kë patsachö mana ushakäyänanpaq. 4Kananpita qanchis junaqtam mana pärëta tamyatsimushaq chusku chunka (40) junaq y chusku chunka paqas. Tsë tamyawanmi kë patsachö llapan kawaq kaqkunata ushakätsishaq>>.

5Tsëmi Noéqa Teyta Dios ninqannölla llapanta rurarqan.

6Diluviu kanqan witsan Noéqa këkarqan joqta pachak (600) watayuqmi. 7Diluviupita salvakuyänanpaqmi Noéqa arcaman yëkurqan warminwan, tsurinkunawan y llumtsïninkunawanpis.#Mat. 24.38-39; Luc. 17.27. 8Tsënömi arcaman yëkuyarqan püru kaq y impüru kaq tukïläya animalkuna, päriqkuna y lätëpa puriqkunapis. 9Tsë animalkunatam Noé yëkatsirqan chinata y orquta, Teyta Dios ninqannölla.

10Teyta Dios ninqannöllam qanchis junaqta diluviu qallëkurqan. 11Tsëqa karqan mushuq wata qallashqanpita juk killata usharir chunka qanchis junaqmi. Tsëpin Noé këkarqan joqta pachak (600) watayuqmi. Patsa rurinpitam atska yaku pashtakaramurqan. Tsënöllam ciëluchö yakuta tsaparëkaq punkupis kichakärirqan.#2Ped. 3.6. 12Tsëmi chusku chunka (40) paqas y chusku chunka junaq mana pasëta tamyamurqan.

13Tamya qallashqan junaqmi Noéqa kiman tsurinkunawan arcaman yëkuyarqan. Tsurinkunapa shutinkunam karqan Sem, Cam y Jafet. Tsënöllam kiman llumtsïninkunawan Noépa warminpis yëkuyarqan. 14Pëkunawanmi yëkuyarqan tukïläya wätana kaq y mana wätana kaq animalkunapis, lätëpa puriqkunapis y llapan casta päriqkunapis. 15Tukïläya animalkunatam ishkëpayan Noé yëkatsirqan. 16Teyta Dios ninqannöllam cada casta animalkunata chinan orqutayan yëkatsirqan. Yëkatsir ushariptinnam arcapa punkunta Teyta Dios wichqarkurqan.

17Tsëpitanam chusku chunka (40) junaq y chusku chunka (40) paqas mana pärëta tamyarqan. Tsënö tamyarmi patsaman yaku juntarir arcata kaskätsir qallëkurqan. 18Tsënö tamyaptinmi yaku mas y mas juntaptin arcaqa kaskar qallëkurqan. 19Altun jirkakunatapis tsapanqanyaqmi yaku juntarqan. 20Tsë jirkakunata tsapärirpis qanchis metru mastaran pasarqan.

21Tsëchömi patsachö kawaqkuna llapan wanuyarqan. Nunakunawan iwalmi animalkuna, päriqkuna y lätëpa puriqkunapis shenqakëpa wanur ushakäyarqan. 22Kë patsachö kawaqkunaqa llapanpis shenqakëpam wanur ushakäyarqan. 23Arcaman Noéwan yëkuqkunallam kawëkar quedayarqan. Mana yëkuq kaqqa nunakunapis, animalkunapis, päriqkunapis y lätëpa puriqkunapis llapanmi wanur ushakäyarqan. 24Tsë yakum juk pachak pitsqa chunka (150) junaqyaq kë patsata tsapararqan.

Currently Selected:

Génesis 7: qwhB

Highlight

Copy