Lucas 10

Qanchis chunka ishkë discïpulunkunata Jesús kachanqan

1Tsëpitanam qanchis chunka ishkë#10.1, 17 Wakin qepa kaq griego copiakunachöqa qanchis chunka (70) kanqantam nin. (72) discïpulunkunata akrarirnin ishkëpayan Señor Jesús kacharqan pë chänan mëtsë markakunaman. 2Kacharmi kënö nirqan: <<Cosëcha ëllïpaq kashqannömi atska nunakuna Teyta Diospa willakïninta chaskikuyänanpaq këkäyan. Tsënö këkaptinpis wallkaqllam willakuqkuna kayan. Tsëmi Teyta Diosta mañakuyë willakuqkunata kachamunanpaq>>.

3<<Kanan willakuq ëwayë. Löbukunaman üshakunata kachëkuqnömi qamkunatapis kachayaq. 4Ëwar ama apayankitsu qellëta ni aljorjata ni llanqita. Nänichö ama piwanpis parlakur shäkuyankitsu.

5<<Pipa wayinmanpis charqa kënö niyanki: <Alli kawakï qamkunachö këkullätsun>. 6Alli chaskiyäshuptikiqa niyashqëkinömi alli kawë kanqa. Mana chaskiyäshuptikim sï alli kawakï kanqatsu. 7Ama wayin wayinqa purikïkäyankitsu, sinöqa chaskiyäshunqëki wayillachö quedakuyanki. Qarayäshunqëkita mikuyanki upuyanki. Uryapukuq nuna pägunta chaskinanpaq derëchun kashqannömi qamkunapapis derëchïkikuna këkan qarayäshunëkipaq.

8<<Më markamanpis chäriyaptiki chaskiyäshuptikiqa qarayäshunqëkita mikuyanki. 9Tsë markachö qeshyaqkunata kachakätsir willapäyanki: <¡Teyta Diospa mandakïnin chämushqanam!> nir. 10Më markachöpis mana chaskiyäshuptikiqa cällikunapa ëwar kënö niyanki: 11<Kikikikuna culpayuq kayanqëkita musyayänëkipaqmi markëkikunapa polvun chakïkunachö laqakashqatapis tapsikuriyä. Ewkuyaptïpis musyayë Teyta Diospa mandakïnin chämunqanta>.

12<<Noqam niyaq: Sodoma nunakunata castigashqanpitapis mas peormi juiciu junaqchö tsë nunakunata Teyta Dios castiganqa.#Gén. 19.1-29.

13<<¡Allaw, Corazín nunakuna! ¡Allaw, Betsaida nunakuna! Sitsun markëkikunachö milagrukunata rurashqänö Tiro y Sidón markakunachö#Isa. 23.1-18; Eze. 26.1—28.26; Joel 3.4-8; Amós 1.9-10; Zac. 9.2-4. ruräman karqan, mënam jutsa rurëninkunata jaqirïkur lütu ratashta yakakurkur uchpa jananchö täräyanman karqan. 14Tsëmi Tiro y Sidón nunakunata castigashqanpitapis mas peor juiciu junaqchö Teyta Dios castigayäshunki. 15Capernaúm nunakuna, ¿<ciëlumanmi ëwashaq> niyankichi? Qamkunaqa Hadesman jitëkushqam kayanki>>.#Isa. 14.13-15.

16Tsëpitanam discïpulunkunata nirqan: <<Qamkuna willakuyashqëkita chaskirqa noqatam chaskiyäman. Qamkunata mana chaskiyäshurnikiqa noqatapis manam chaskiyämantsu. Noqata mana chaskiyämarqa kachamaqnïtapis manam chaskiyantsu>>.

Kachanqankuna kutiyanqan

17Qanchis chunka ishkë (72) ëwaqkuna alläpa kushishqa kutirirmi Jesústa kënö willayarqan: <<Teyta, shutikichö qarquyaptï ¡supëkunapis cäsuyämashqam!>> nir.

18Jesúsnam nirqan: <<Noqa rikarqü imëka räyunöraq ciëlupita Satanás jeqamuqtam.#10.18 Imëka räyunöraq Satanás jeqamurqun ninanqa Satanás poderninnaq tikrashqa ninanmi. 19Noqam podernïta qoyarquq culebrakunatapis atuq kurukunatapis jalukacharkuyänëkipaq y Satanás imata ruraptinpis venciyänëkipaq. Satanásta pärapuyaptikipis manam ni ima pasayäshunkitsu. 20Supëkuna cäsuyäshunqëkita kushikurpis ciëluchö shutikikuna qellqashqa kanqanta masqa kushikuyë>>.

Teyta Diosta Jesús alabanqan

Mateo 11.25-27; 13.16-17

21Tsë höranam Espíritu Santupa poderninwan alläpa kushikur Teyta Diosta mañakur Jesús kënö nirqan: <<Ciëluchö y kë patsachö puëdiq Teyta, qamtam alabaq. Manam yachaq tukuqkunatatsu yarpëkashqëkikunata musyatsirqunki, sinöqa wamranö kaqkunallatam. Awmi Teyta, tsënö kanantam munarqunki>>.

22Tsëpitanam tsëchö këkaq nunakunata kënö nirqan: <<Teytämi llapantapis podernïman churamushqa.#Juan 3.35. Tsurin kashqäta pëllam musyan. Y noqallam musyä Teytä kashqanta. Tsëmi noqa käyitsishqä kaqkunalla Teytä imanö kashqantapis musyayan>>.#Juan 1.18; 10.15.

23Tsëpitanam discïpulunkunallata nirqan: <<Kanan pasashqankunata rikarmi kushishqa këkäyanki. 24Noqam niyaq: Unë profëtakunapis y reykunapis rikäyanqëkikunata rikëta munarpis manam rikäyarqantsu. Wiyayanqëkita wiyëta munarpis manam wiyayarqantsu>>.#Mat. 13.16-17.

Nuna mayinta Samaria nuna ankupanqan

25Juk kutinam ley yachatsikuq nuna Jesús yachashqanta o mana yachashqanta musyëta munar kënö tapurqan: <<Rabí, ¿imatataq ruräman wiñë kawëta tarinäpaq?>>

26Jesúsnam nirqan: <<Teyta Diospa leyninchö ¿imataq nikan? Leyir ¿imatataq käyinki?>>

27Tsë nunanam nirqan: <<Teyta Diospa leyninchö kënömi nikan: <Teyta Diosta kuyanki llapan shonqïkiwan, llapan kawënikiwan, llapan kallpëkiwan y llapan yachënikiwan. Nuna mayikitapis kikiki kuyakushqëkinö kuyanki> >>.#Deut. 6.5; Lev. 19.18.

28Tsënam Jesús nirqan: <<Ninqëkiqa allim. Tsëkunata rurarninqa wiñë kawëtam tarinki>>.

29Tsë nunanam yachaq tukur kënö tapurqan: <<¿Pitaq tsë nuna mayïqa?>> nir.

30Tsënö tapuptinmi Jesús nirqan: <<Juk nunash Jerusalénpita Jericó markaman ëwëkänaq. Nänichönash suwakuna alläpa maqakacharkur llapan apanqanta y yakaranqan ratashnintapis limpu qochiyänaq. Tsëpitash wanukïkaqta jaqirir ewkuyänaq.

31<<Tsë nänipash juk sacerdöti pasëkänaq. Tsë nunata rikëkarpis juk lädupash pasakunaq. 32Tsënöllash levitapis tsë nuna jitarëkaqman chänaq. Pëpis juk lädupash pasakunaq.

33<<Pëkunapa qepantanash Samaria nunapis chänaq. Pëshi sï jitarëkaqta taririr alläpa ankupänaq. 34Tsëshi aceitiwan y vïnuwan herïdankunata jampirir shumaq watarapunaq. Tsëpitanash ashnunman montarkatsir juk posädaman apëkur cuidanaq. 35Waränin ewkurnash posadatsikuq nunata ishkë junaq uryapukur gananqan qellëta pagar kënö ninaq: <Kë nunata kachakanqanyaq jampipëkullanki. Masta gastaptikipis kutïkamurmi paguëkullashqëki> >>.

36Tsënö willarirnam Jesús tapurqan: <<Tsë kimanpiq ¿mëqantaq nuna mayinta ankuparqan?>>

37Niptinmi nirqan: <<Tsë Samaria nunachi>>.

Tsënam Jesús nirqan: <<Kanan qampis tsënölla ankupäkuq kanki>>.

Martapa y Maríapa wayinman Jesús chanqan

38Tsëpita discïpulunkunawan Jesús ëwarninmi juk taksha markaman chärirqan. Tsëchönam Marta niyashqan warmi posadatsirqan wayinman. 39Martapa nananmi karqan María. Pëmi Jesús yachatsikunqankunata wiyakurnin nöpanman täkïkurqan. 40Martanam imëka rurëkunawan ocupädu karnin Jesúsman witïkur nirqan: <<Teyta, ¿manaku ankupämanki këchö nanä täkunqanyaq japallä imëkatapis ruraptï? ¡Nïkï yanapamänanpaq!>>

41Señor Jesúsnam nirqan: <<Ä Marta, Marta, qamqa tukï rurëkunapaq alläpam yarpakachanki. 42Llapanpitapis jukllëllam mas alliqa. Tsëtam nanëki Maríaqa akrashqa. Pë yachakushqantaqa manam pipis qochinqatsu>>.

Currently Selected:

Lucas 10: qwhB

Highlight

Copy