Lucas 9
9
Chunka ishkë discïpulunkunata Jesús kachanqan
Mateo 10.5-15; Marcos 6.7-13
1Tsëpitanam chunka ishkë discïpulunkunata qayëkur poderninta Jesús qorqan nunakunapita supëkunata qarquyänanpaq y qeshyëkaqkunata kachakätsiyänanpaq. 2Pëkunatam kacharqan Teyta Diospa mandakïnin chämunqanta willakuyänanpaq y qeshyëkaqkunata kachakätsiyänanpaq. 3Kënö nirmi kacharqan: <<Ëwar ama apayankitsu tukruta#9.3 Wakin nunakunaqa shukshuta niyanmi., aljorjata, mirkapata, qellëta ni trocakuyänëkipaq ratashtapis. 4Pipa wayinchöpis posadakurqa tsë markapita ewkuyanqëkiyaq tsëllachö quedakuyanki. 5Më markachöpis mana chaskiyäshuptikiqa chakikikunachö këkaq polvuta tapsikurir ewkuyanki. Tsënö rurayanki Teyta Dios pëkunata castigananpaq kashqanta musyayänanpaq>>.
6Tsënam discïpulunkunana markan markan ëwar Teyta Diospa alli willakïninta willakuyarqan y mëchö tsëchöpis qeshyaqkunata kachakätsiyarqan.
Jesústa Herodes reqita munanqan
Mateo 14.1-12; Marcos 6.14-29
7Jesús rurashqankunata musyarirnam Galileapa mandakuqnin Herodes yarpakachëwan imanö këtapis puëdirqantsu. Wakin nunakunam Jesúspaq niyarqan: <<Bautizakuq Juanmi kawarimushqa>>.
8Wakin kaqkunanam niyarqan: <<Profëta Elíasmi yurimushqa>>.
Y wakin kaqkunanam niyarqan: <<Unë tiempu profëtakunachi mëqan karpis kawarimushqa>>.
9Herodesnam nirqan: <<Juanpa kunkantaqa roqutsirqätaq. Tsënö këkaptinqa ¿piraq kanman tsë nuna? ¿Pipaqtaq wiyä këläya imëkakunatapis ruranqanta?>>
Tsëmi Jesústa alläpa reqita munarqan.
Pitsqa waranqa nunakunapaq milagruta Jesús ruranqan
Mateo 14.13-21; Marcos 6.30-44; Juan 6.1-14
10Willapäkuyashqanpita apostolkuna kutirirmi llapan rurayashqanta Jesústa willayarqan. Jesúsnam pëkunata pusharkur Betsaida markachö chusyaqman ewkurqan. 11Tsëpa ëwayashqanta musyarirnam atskaq nunakuna qatiyarqan. Chäriyaptinnam Jesúsqa Teyta Diospa mandakïninpaq yachatsikurqan y qeshyaqkunata kachakätsirqan.
12Tardiyäkïkuptinnam chunka ishkë discïpulunkuna Jesústa kënö niyarqan: <<Nunakunata witsiratsina tsë urë markakunapa y estanciakunapa ewkur posädankuna y mikïninkuna ashiyänanpaq. Kë chusyaqchöqa manam imapis kantsu>>.
13Jesúsnam nirqan: <<Qamkunam pachanqa qarayänëki>>.
Tsënö niptinnam niyarqan: <<Pitsqa tantawan ishkë pescädullam kayäpaman. Këtsika nunakunapaqqa ¡rantimur imaraqchi tinkutsishwan!>>
14Tsëchömi pitsqa waranqanö (5,000) nunakuna kayarqan. Jesúsnam discïpulunkunata nirqan: <<Nunakunata pitsqa chunkapayan tätsiyë>>.
15Niptinnam llapanta tätsiyarqan. 16Tsëpitanam pitsqa tantatawan ishkë pescäduta tsarirkur ciëluman rikarkur Teyta Diosta Jesús payllä nirqan. Tantata pakirirnam discïpulunkunata makyarqan nunakunata qarayänanpaq. 17Pacha junta mikuriyaptinnam katukunata chunka ishkë canasta juntata ëlluriyarqan.
Teyta Dios kachamunqan Cristo kanqanta Pedro ninqan
Mateo 16.13-19; Marcos 8.27-29
18Juk kutinam discïpulunkunallawan këkar Jesúsqa Teyta Diosman mañakurqan. Mañakïta usharirnam discïpulunkunata tapurqan: <<¿Pï kashqätataq nunakuna niyan?>>
19Discïpulunkunanam niyarqan: <<Wakinmi niyan Bautizakuq Juan kashqëkita. Wakinnam niyan profëta Elías kashqëkita. Y wakinnam niyan mëqan profëtapis kawarimushqa kashqëkita>>.
20Jesúsnam tapurqan: <<Qamkunaqa ¿pï kashqätataq yarpäyanki?>>
Pedrunam nirqan: <<Qamqa Teyta Dios kachamushqan Cristum kanki>>.
Wanutsiyänanpaq kaqta Jesús willakunqan
Mateo 16.20-28; Marcos 8.30—9.1
21Jesúsnam tsëta pitapis mana willakuyänanpaq chunka chunka atikarqan.#9.21 Tsë witsan Israel nunakuna yarpäyarqan Cristuta Teyta Dios kachamuptin Roma nunakunata guërrachö vencinanpaq kashqantam. Tsënö yarpäyaptinpis Jesucristo manam guërrata rurananpaqtsu shamurqan, sinöqa noqantsik rëkur cruzchö wanunanpaqmi. Tsëmi discïpulunkunata Jesús nirqan pë Cristo kashqanta pitapis mana willapäyänanpaq. Tsënö kaptinpis wanushqanpita kawarirkamurnam nirqan pïmëtapis willapäyänanpaq (Mat. 17.9; 28.19). 22Tsëpitanam nirqan: <<Nunapa Tsurintam alläpa jipatsiyanqa. Anciänukuna, mandakuq sacerdötikuna y ley yachatsikuqkunam contran shärir wanutsiyanqa. Tsëpita kima junaqtaqa kawarimunqam>>.
23Tsënö nirirnam llapan nunakunata kënö nirqan: <<Pipis discïpulü këta munarqa kikin munashqannö ama kawatsuntsu, sinöqa waran waran cruzninta apaqnö noqata qatimätsun.#9.23 Jesucristo kawashqan witsanqa pipis cruzninta aparqan wanutsishqa kananpaqmi. Tsëmi cruzninta apaqnö noqata qatimätsun nirqa jutsa rurëpaq wanushqanö kar Jesucristuta qatiränanpaq kashqanta nikan.#Mat. 10.38; Mar. 8.34; Luc. 14.27; Juan 12.25. 24Kawëninta salvëta munaq nunaqa kawëninta oqranqam. Kawëninta noqa rëkur oqraq nunanam kawëninta salvanqa.#9.24 Tsënö nirqa Jesucristo kënömi nirqan: <<Kikin munashqannö lluta kawakuqkunaqa manam salvakuyanqatsu. Noqa munanqänö kawaqkunam sï salvakuyanqa>>.#Mat. 10.39; Mar. 8.35; Juan 12.25.
25<<Infiernuman jitëkushqa kananpaq kaptinqa ¿imapaqtaq sirwin jinantin mundupa duëñun kashqanpis? 26Pipis noqapita y willakïnïpita penqakuptinqa Nunapa Tsurinpis Teyta Diospa, santu angelkunapa y kikinpa chipapëkaq poderninwan shamurmi pëpita penqakunqa. 27Rasunpam niyaq: Manaraqpis wanurmi wakinniki rikäyanki Teyta Diospa mandakïninta>>.
Jesús chipapëkar tikrakurinqan
Mateo 17.1-8; Marcos 9.2-8
28Tsëpita puwaq junaqtanönam Pedruta, Juanta y Santiaguta pusharkur Teyta Diosman mañakuq juk jirkaman Jesús ëwarqan. 29Teyta Diosman Jesús mañakïkaptinnam qaqllan chipapäkurqan y ratashninkunapis pasëpa yulaq rikakurmi chipaparqanraq. 30Tsëchömi Moiséswan Elías Jesúswan parlëkäyarqan. 31Pëkunapis tsëläya chipapäkïkaqchömi Jerusalénchö Jesús wanunanpaq kaqta parlëkäyarqan.
32Pedrunam ishkan yanaqinkunawan pununëwan këkar rikëkuyarqan Jesús chipapäkïkaqta y pëwan ishkaq nunakuna këkäyaqta. 33Moiséswan Elías ewkuyaptinnam mana käyishpa Jesústa Pedro nirqan: <<Teyta, allim këchö këkäyä. Kima tsukllata rurayämushaq: jukta qampaq, jukta Moiséspaq y juktana Elíaspaq>>.
34Tsënö parlëkaptinmi pukutë tsaparirqan. Tsëmi discïpulunkuna alläpa mantsakäyarqan. 35Pukutëpitanam Teyta Dios kënö nimurqan: <<Pëmi akrashqä#9.35 Wakin griego copiakunachömi kuyë niyan. Tsurï. Pë niyäshushqëkita cäsukuyë>>.
36Tsënö parlar ushariptinnam discïpulunkuna Jesúsllatana rikäriyarqan. Jirkachö rikäyashqantaqa manam ni pitapis tsë witsan willayarqantsu.
Juk wamrata Jesús kachakätsinqan
Mateo 17.14-21; Marcos 9.14-29
37Waränin junaqnam jirkapita kutikäyämuptin atskaq nunakuna Jesústa taripäyarqan. 38Tsë nunakuna rurinpitanam juk nuna qaparipa kënö nirqan: <<¡Rabí, tsurïta ankupëkullë! Pëqa japallan tsurïmi këkan. 39Supëmi pëta jinanllachö qaparitsin, tapsikacharkun, pushuqatapis kachutsin y imëpis alläpa maltratan. 40Tsëmi supëta qarquyänanpaq discïpulïkikunata rowakuptïpis puëdiyashqatsu>>.
41Jesúsnam nirqan: <<¡Mana markäkuq jutsasapa nunakuna! ¡Imëyaqraq qamkunawan këkäshaq! ¡Imëyaqraq qamkunata awantayashqëki! Mä wamrëkita apamï>>.
42Jesúsman aparëkaptinnam supëqa wamrata patsaman seqirir tapsikacharkurqan. Tsënam supëta piñapar Jesús nirqan: <<Kë wamrapita yarqï>>.
Tsëpitanam wamrata kachakashqatana tëtanta qoykurqan. 43Teyta Diospa poderninwan kachakätsishqanta rikëkurnam llapankuna espantakuyarqan.
Wanutsiyänanpaq kanqanta Jesús yapë willakunqan
Mateo 17.22-23; Marcos 9.30-32
Rurashqankunapita nunakuna espantashqa këkäyaptinnam discïpulunkunata Jesús nirqan: 44<<Kanan willayashqaqta shumaq käyikuyë. Nunapa Tsurinqa chikiqninkunapa makinman entregashqam kanqa>>.
45Tsënö willakuptinpis discïpulunkuna manam käyiyarqantsu imata nishqantapis. Mana käyirpis tapïtaqa mantsakuyarqanmi.
Mëqan mas mandakuq kananpaq discïpulukuna tapuyanqan
Mateo 18.1-5; Marcos 9.33-37
46Tsëpitanam discïpulunkuna mas mandakuq këta munar kikinkunapura piñatsinakuyarqan. 47Shonqunkunachö imata yarpäyanqanta musyarirnam juk wamrata nöpanman shäratsirnin 48Jesús kënö nirqan: <<Pipis kë wamratanö shutïchö chaskirqa noqatam chaskiman. Y noqata chaskimarqa kachamaqnïtapis chaskinmi. Qamkunachöpis mas qollmi shonqu kaqkunam mas mandakuq kayanqa>>.
<<Contrantsik mana karqa noqantsikwanmi këkan>> Jesús ninqan
Marcos 9.38-40
49Juannam kënö nirqan: <<Teyta, noqakunam rikäyarqü juk nuna shutikichö supëkunata qarqïkaqta. Tsënö kaptinpis noqantsikwan mana puriptinmi michäyarqü>>.
50Tsënam Jesús kënö nirqan: <<Ama michäyankitsu. Pipis contrantsik mana karqa noqantsikwanmi këkan>>.
Santiagutawan Juanta Jesús piñapanqan
51Ciëluman kutikunanpaq ichikllana pishikaptinnam kallpata tsarïkur Jerusalénman Jesús ëwarqan. 52Ëwëkarnam kacharqan Samaria partichö juk markaman posädata ashiyänanpaq. 53Posädata ashiyaptinpis Jerusalénman ëwëkashqanta mäkïkurmi tsë markachö täraq nunakuna chaskiyarqantsu. 54Tsëmi discïpulunkuna Santiago y Juan kënö niyarqan: <<Teyta, ciëlupita nina shamur kë nunakunata wanuratsinanpaq ¿[Elíasnö] Teyta Diosman mañakarayämümanku?>>
55Jesúsnam piñapar [nirqan: <<Tsënö yarparqa manam Teyta Dios munanqannötsu yarpëkäyanki. 56Nunapa Tsurinqa manam nunakunata ushakätsinanpaqtsu shamushqa, sinöqa nunakunata salvananpaqmi>>.]
Tsënö nirirmi juk marka nänipana ewkuyarqan.
Qatirëta munaq nunakunata Jesús käyitsinqan
Mateo 8.19-22
57Nänipa ëwarëkäyaptinnam Jesústa juk nuna kënö nirqan: <<Teyta, mëpa ëwaptikipis qatishqëkim>>.
58Jesúsnam nirqan: <<Atuqkunapaqa machëninkuna kanmi. Pishqukunapapis qeshunkuna kanmi. Nunapa Tsurinpaqa manam ni mëchö punurinanllapaqpis kantsu>>.
59Juk nunatanam nirqan: <<Aku ewkushun>>.
Tsë nunanam nirqan: <<Tëtë, ewkunapaq tëtätaraq puntata pamparamushaq>>.
60Jesúsnam nirqan: <<Wanushqakunataqa wanushqa mayinkuna pampakuyätsun. Qamqa ëwar Teyta Diospa mandakïninta willakï>>.
61Juk nunanam nirqan: <<Teyta, qatishqëkim. Puntataqa wayïchö kaqkunapitaraq despidikaramushaq>>.
62Tsënam Jesús nirqan: <<Pipis qepaman rikarëkar yapyaqnö karqa Teyta Diospa mandakïninpaq manam sirwintsu>>.
Currently Selected:
Lucas 9: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
