Lucas 20

Jesústa sacerdötikuna tapuyanqan

Mateo 21.23-27; Marcos 11.27-33

1Juk junaqnam Teyta Diospa alli willakïninta templupa patiunchö Jesús yachatsikïkaptin mandakuq sacerdötikuna, ley yachatsikuqkuna y anciänukunapis chäriyarqan. 2Pëkunam tapuyarqan: <<Qamqa ¿pipa poderninwantaq rantikuqkunata qarqurqunki? ¿Pitaq nishurqunki tsënö qarqunëkipaq?>>

3Jesúsnam nirqan: <<Qamkunatapis mä tapuyashqëki. Mä niyämë: 4¿Pitaq Juanta kachamushqa bautizananpaq? ¿Teyta Diosku o nunakunallaku?>>

5Tsënö tapuptinmi kikinkunapura ninakuyarqan: <<Teyta Dios kachamushqanta nishqaqa: <¿Imanirtaq creyiyarqunkitsu?> nimäshunmi. 6<Nunakunam kachayämushqa> nishqaqa nunakunanam tsampir wanutsimäshun. Llapanmi musyayan Juan profëta kashqanta>>.

7Tsëmi Jesústa kënö niyarqan: <<Manam musyayätsu pï kachamushqantapis>>.

8Jesúsnam nirqan: <<Noqapis manam willayaqtsu pipa poderninwan rantikuqkunata qarqushqäta>>.

Chakra arrendaq nunakunaman iwalatsikïpa Jesús yachatsinqan

Mateo 21.33-46; Marcos 12.1-12

9Tsëpitanam iwalatsikïpa yachatsir Jesús kënö nirqan: <<Juk nunash chakranman üvasta plantatsinaq. Tsëpitanash tsë chakranta arrendakïkur juk markapa ewkunaq.

10<<Cosëcha qallëkuptinnash juk sirwiqninta kachanaq üvas chakra arriendunpita cobrakamunanpaq. Tsë sirwikuq chäriptinshi alläpa maqar jinëllata qarquriyänaq. 11Tsëshi chakrayuq nuna juk sirwiqninta yapë kachanaq. Jina pëtapis maqakacharkurshi tukïta nir jinallata qarquriyänaq. 12Tsëpitanash juk sirwiqnintana yapë kachanaq. Jina pëtanäqa maqakacharkurshi yawarllatana qarquriyänaq>>.

13<<Tsënash yarpakachar chakrayuq kënö ninaq: <Kananqa ¿imatataq rurashaq? Mejorqa kuyë tsurïtachi kachashaq. Pëtaqa itsa respetayanqa>.

14<<Tsëshi tsurin yëkïkaqta rikëkur chakra arrendaqkuna niyänaq: <Taqëmi kë chakrawan quedanqa. Noqantsik chakranwan quedakunantsikpaq wanïkatsishun>. 15Chäriptinnash parlayanqannölla üvas chakrapita juk läduman apëkur wanuratsiyänaq>>.

Tsënö willakurirnam Jesús kënö nirqan: <<Tsë üvas chakrayuq ¡imataraq ruranqa tsë nunakunata! 16¿Manatsuraq llapanta wanutsinqa? Tsëpitaqa chakrantapis juktanam arrendakïkunqa>>.

Tsëta wiyëkurnam nunakuna niyarqan: <<¡Ama tsënö kanantaqa Teyta Dios permitïkullanmantsu!>>

17Tsënö niyaptinnam pëkunata alli rikarëkur Jesús kënö nirqan: <<Teyta Diospa palabran kënö qellqarëkanqanta käyikuyë:

<< <Wayi shäritsiqkuna <<kë rumi manam allitsu>> nir jitariyanqanmi kananqa maestra rumi tikrashqa këkan>.#20.17 Tsë rumimanmi Jesucristo iwalatsikurqan. Tsënömi käyitsirqan chikiyaptinpis Teyta Dios llapanpitapis puëdiq kananpaq churashqanta.#Sal. 118.22.

18Pipis tsë rumiman ishkirqa ushakanqam.

Tsënöllam pipa jananmanpis tsë rumi ishkirqa pasëpa ushakätsinqa>>.

19Tsënö yachatsiptinmi mandakuq sacerdötikuna y ley yachatsikuqkuna pëkunapa contran parlëkashqanta käyir#20.19 Tsë iwalatsikï kënömi këkan: Chakrayuqqa Teyta Diosmi. Chakrayuq kachashqan sirwiqkunanam Teyta Diospa profëtankuna. Chakrayuqpa tsurinnam Jesucristo. Chakra arrendaq aksë nunakunanam Jesucristupa contrankuna. prësu tsaritsita munayarqan. Tsënö kaptinpis nunakunata mantsarmi tsaritsiyarqantsu.

Impuestuta pagayänanpaq Jesústa tapuyanqan

Mateo 22.15-22; Marcos 12.13-17

20Tsëmi gobernadorman entregayänanpaq Jesúsman musyapakuqkunata kachayarqan alli tukushllapa llutanta parlatsiyänanpaq. 21Jesúsman chärirnam niyarqan: <<Rabí, noqakuna musyayämi imata yachatsikurpis y parlarpis rasunpa kaqllata nikanqëkita. Manam nunakuna alabayäshunëkita munartsu yachatsikunki, sinöqa Teyta Dios munashqannöllam. 22Romachö mandakuq Césarpaq ¿impuestuta pagashwanku o manaku?>>#20.22 Israel nunakuna niyarqan Romapaq impuestuta pagar Teyta Diospa contran këkäyashqantam. Tsëmi: <<Impuestuta pagashun>> niptinqa Diospa contran Jesús parlashqanta niyanman karqan. <<Ama pagashuntsu>> niptinqa Roma autoridäkunam piñakuyanman karqan.

23Llutanta parlatsiyänan rëkur tapuyashqanta käyirmi Jesús kënö nirqan: 24<<Mä impuestu pagana qellëta rikätsiyämë. Kë qellëchö ¿pipa reträtuntaq këkan? Jina ¿pipa shutintaq qellqarëkan?>>

Pëkunanam niyarqan: <<Mandakuq Césarpam>>.

25Jesúsnam nirqan: <<Césarpa kaqtaqa Césarta qoykuyë. Teyta Diospa kaqtaqa Teyta Diosta qoykuyë>>.#20.25 Teyta Diospa kaqqa kawënintsikmi këkan.

26Nunakunapa nöpanchö Jesústa pantatsita mana puëdirnam tsë nunakuna limpu mantsakashqa upällana quedariyarqan.

Kawarimïpaq saduceukuna tapukuyanqan

Mateo 22.23-33; Marcos 12.18-27

27Tsëpitanam wakin saduceukuna Jesústa tapuq ëwayarqan. Pëkuna manam creyiyantsu wanuqkuna kawariyämunanpaq kashqanta.#Hech. 23.8. 28Tsëmi Jesústa tapuyarqan: <<Rabí, Moisés qellqashqanchömi kënö nikan: <Warmiyuq nuna tsurinnaq wanuptin wawqinmi pajunwan täranqa. Tsënöpam wamrankuna kaptin tsë wanuq wawqinpa wamrannö kayanqa>.#Deut. 25.5. 29Kanan niyashqëki. Juk markachöshi qanchis wawqikuna kayänaq. Wamaqshu kaqshi juk warmiwan casakunaq. Pëshi manaraq tsurin kaptin wanukïkunaq. 30Tsëshi qepan kaq wawqinna tsë pajuwan casakunaq. [Pëpis tsurin manaraq kaptinshi wanurinaq.] 31Tsëpita mas qepan kaqnash tsë pajuwan casakunaq. Tsënöllash llapan wawqinkuna tsë pajuwan casakuyänaq. Tsurinkuna manaraq kaptinshi llapanpis wanukuyänaq. 32Tsëpitanash tsë pajupis wanukunaq. 33Wanushqakuna kawariyämunan junaqqa ¿mëqanpa warminraq kanqa, qanchis wawqiwan casakushqa këkaptinqa?>>

34Jesúsnam nirqan: <<Kë vïdallachömi warmipis ollqupis casakuyan. 35Wak vïdaman chäyänanpaq akrashqa kaqkunaqa kawarimur mananam casakuyanqanatsu. 36Tsëchöqa angelkunanö karmi wanuyanqanatsu. Kawaritsimushqa kaptinmi Teyta Diospa wamrankunana kayanqa.

37<<Wanuyashqanpita kawariyämunantaqa Moisés qellqanqanchöpis yachatsimantsikmi. Pëtam shiraka#20.37 Wakin nunakunaqa shira niyanmi. rawrëkaqchö yuripur Teyta Dios kënö nirqan: <Noqaqa Abrahampa, Isaacpa y Jacobpa Diosninmi kä>.#Éxo. 3.6. 38Teyta Diosqa manam wanushqakunapa Diosnintsu, sinöqa kawëkaqkunapa Diosninmi. Pëpaqqa wanushqakunapis kawëkäyanmi>>.

39Tsënö niptinnam ley yachatsikuqkunapita wakin kaqkuna kënö niyarqan: <<Rabí, ¡tsëtaqa allitam nïkurqunki!>>

40Tsëpitaqa mananam imatapis tapïta almitiyarqantsu.

Davidpitapis Cristo mas mandakuq kanqan

Mateo 22.41-46; Marcos 12.35-37

41Tsëpitanam Jesús kënö nirqan: <<¿Imanirtaq nunakuna niyan Davidpa Tsurin Cristo kashqanta? 42Kikin Davidpis Salmo libruchö kënömi qellqarqan:

<< <Mandamaqnïtam Teyta Dios kënö nirqan:

<<Allawka kaq lädüman täkamï 43llapan chikishuqnikikunata munënikiman churamushqäyaq>> >.#Sal. 110.1.

44Kikin Davidpis mandaqnin kashqanta nikaptinqa ¿imanöpataq Cristuqa Davidpa Tsurin kanman?>>#20.44 Cristuqa manam David casta kanqantatsu negarqan, sinöqa Davidpita mas puëdiq kanqantam nirqan.

Ley yachatsikuqkunawan fariseukuna mana alli ruraq kayanqanta Jesús ninqan

Mateo 23.1-12; Marcos 12.38-40; Lucas 11.37-54

45Llapan nunakuna wiyarëkäyaptinnam discïpulunkunata Jesús kënö nirqan: 46<<Paqtam ley yachatsikuqkunanö kayankiman. Pëkunaqa nuna tukurmi chaki puntanyaq shumaq ratashkunata yakakushqa puriyan. Pläzakunachöpis napar alläpa respetayänantam munayan. Sinagögakunachöpis punta kaq bancakunachöran täkuyan. Mikuyänanpaq qayatsiyaptinpis mësachöran mikïta munayan. 47Pajukunapa imankunatapis qochiyan. Tsëpitanam santu tukur unëpa Teyta Diosta mañakuyan. Tsënö kayashqanpitam Teyta Dios mana ankupashpa mas feyupa castiganqa>>.

Currently Selected:

Lucas 20: qwhB

Highlight

Copy