Lucas 21

Waktsa paju ofrendanqan

Marcos 12.41-44

1Tsëpitanam templuchö Jesús rikärirqan ofrenda winakuyänan cäjaman kapuqyuq nunakuna ofrendata winayaqta. 2Tsënöllam jina rikärirqan waktsa pajutapis ishkë centävullanta winariqta. 3Tsënam Jesús nirqan: <<Rasunpam niyaq: Kë waktsa pajum llapanpitapis mas atskata winarkushqa. 4Wakinkunaqa sobrankunallatam winayashqa. Kë pajuqa rantipakunanpaq këkaqnintapis llapantam winarkushqa>>.

Templuta ushakätsiyänanpaq kanqanta Jesús willakunqan

Mateo 24.1-2; Marcos 13.1-2

5Templuta perqaraq rumikuna kuyëllapaq kashqanta y Diospa qarëninkunawan shumaq adornashqa kanqanta parlayaptinnam Jesús nirqan: 6<<Kë llapan rikäyanqëkita chipyëpam juchutsiyanqa. Manam ni juk rumillapis perqarëkarqa quedanqatsu>>.

Manaraq kutimuptin imakuna kananpaq Jesús ninqan

Mateo 24.3-28; Marcos 13.3-23

7Tsënam Jesústa tapukuyarqan: <<Rabí, ¿imëtaq nishqëkinö kanqa? Tsënö kananpaq ¿ima señaltaq kanqa?>>

8Jesúsnam nirqan: <<Paqtam pipis engañayäshunkiman. Atskaqmi shutïchö shayämunqa: <Noqam Cristo kä> nir y <kë patsa ushakanqanam>. Tsënö niyäshuptikipis ama creyiyankitsu. 9Guërra këkanqanta y wanutsinakï këkanqanta musyarpis ama mantsakäyankitsu. Puntataqa tsëkunaran kanqa. Tsënö kaptinpis kë patsaqa manaran ushakanqaraqtsu>>.

10Mastam Jesús nirqan: <<Juk nacionmi juk nacionwan guërrata rurayanqa y juk marka nunakunam juk marka nunakunawan wanutsinakuyanqa. 11Patsapis alläpam temblorwan kuyunqa. Mallaqëpis y pestipis jinantinchömi kanqa. Ciëluchöpis mantsakëpaq señalkunatam rikäyanqa.

12<<Manaraq tsëkuna pasakuptinmi qatikachäyäshurniki prësu tsariyäshunki. Sinagögakunaman apëkurmi juzgar carcelman llawitsiyäshunki. Noqa rëkurmi reykunamanpis y gobernadorkunamanpis prësu apayäshunki. 13Tsënöpam willakïnïta pëkunatapis willayanki. 14Tsëchö imata parlayänëkipaqpis ama yarpakachäyëtsu. 15Noqam imata parlayänëkipaqpis käyitsiyashqëki. Tsëmi chikiyäshuqnikikunapis ni ima niyäshïnikita puëdiyanqatsu.

16<<Qamkunapa contrëkikunam shäriyanqa mamëkikuna, tëtëkikuna, wawqikikuna, castëkikuna y yanasëkikunapis. Wakinnikikunatanam wanutsiyäshunki. 17Noqa rëkurmi pïmëpis chikiyäshunki. 18Tsënö kaptinpis Teyta Dios manam jaqiyäshunkitsu. Manam juk aqtsëkikunallapis oqrakanqatsu. 19Imanö jiparpis noqaman markäkamurqa salvakuyankim.

20<<Imëmi soldädukuna Jerusalénta tumariq täpëkaqta rikäriyanki, tsëmi musyariyanki ushakënin junaq chämushqanta. 21Tsënöta rikar Judeapa markankunachö täraqkuna jirkakunapa safakuyätsun. Jerusalénchö yachaqkunapis safakuyätsun. Chakrakunapa yarqushqa kaqkunapis markaman ama kutiyätsuntsu. 22Tsë junaqkuna alläpa castïgu kaptinmi Teyta Diospa palabran qellqarëkanqannö llapan cumplikanqa.

23<<¡Allaw, imanöraq jipayanqa qeshyaq warmikuna y llullu wawayuq warmikuna! Jinantinchö Israel nunakunata Teyta Dios castigaptinmi alläpa jipayanqa. 24Wakinkunatam espädawan wanutsiyanqa y wakinkunatanam jinantin nacionkunaman prësu apayanqa. Teyta Diosta mana cäsuq nunakunam Jerusalénta poderninkunachö katsiyanqa hasta Teyta Dios dispunishqan tiempu kamayaq.

Jesucristo kë patsaman kutimunanpaq kanqan

Mateo 24.29-31; Marcos 13.24-27

25<<Intipis, killapis y qoyllurkunapis mantsakäkïpaqmi tikrakurinqa. Kë patsachönam lamar alläpa bunyëpa bunyar kuyuptin nunakuna mantsakëwan imanö këtapis puëdiyanqatsu. 26Ciëlupis karkaryaptinmi kë patsata imapis pasananpaq kanqanta yarparnin nunakuna mantsakëwan desmayariyanqa. 27Tsënam nunakuna rikäyanqa Nunapa Tsurin pukutë jananchö chipapëkar alläpa puëdiq këninwan shamïkaqta.#Dan. 7.13. 28Kë llapan niyashqaqkuna cumplikaptin kallpata tsarir kushikuyë. Tsëkunata rikarmi musyayanki jipëkunapita Teyta Dios salvayäshunëkipaq kashqanta>>.

29Tsënam iwalatsikïpa yachatsikur Jesús kënö nirqan: <<Hïgus montita y wakin montitapis rikar käyikuyë. 30Raprankuna tseqllimuqta rikarmi usya tiempu qallananpaqna kanqanta musyayanki. 31Tsënöllam niyashqaqnö pasakushqanta rikar musyayanki Teyta Diospa mandakïnin chämunanpaq ichikllana pishikashqanta. 32Rasunpam niyaq: Kanan tiempu nunakuna manaraq ushakäyaptinmi llapan niyashqaqkuna cumplikanqa. 33Ciëluwan kë patsa ushakaptinpis noqa nishqäkunaqa manam ushakanqatsu.

34<<Paqtam tsë junaq mana yarpashqëki höra shamur tariyäshunkiman jutsa rurëkaqta, machakur kakïkaqta y kë vïdachö imëkapaqpis yarpakachar chukru shonqu këkaqta. 35Imëka toqllanömi jinantin markachö nunakunatapis tsë junaq tsarinqa. 36Tsënö kananpaq këkaptinqa Teyta Diosman imëpis mañakur shuyakïkäyë. Tsënöpam shamunanpaq kaq jipakïkunapita safar Nunapa Tsurinpa nöpanchöpis kushishqa kayanki>>.

37Junaqpam templuchö Jesús yachatsikuq y paqaspanam Olivos jirkaman ewkuq tsëchö punukunanpaq. 38Jesús yachatsikushqanta wiyayänanpaqmi qoya qoyalla llapan nunakuna templuman ëwayaq.

Currently Selected:

Lucas 21: qwhB

Highlight

Copy