Lucas 22

Jesústa wanutsiyänanpaq parlayanqan

Mateo 26.1-5, 14-16; Marcos 14.1-2, 10-11; Juan 11.45-53

1Tsë witsanmi Levadürannaq Tanta Mikuna fiestapaq ichikllana pishikarqan. Tsë fiestatam Pascua fiesta niyaq.#Éxo. 12.1-27; Deut. 16.1-8. 2Tsë junaqkunam mandakuq sacerdötikuna y ley yachatsikuqkuna imanöpapis Jesústa wanutsiyänanpaq parlayarqan. Tsënö kaptinpis pëman nunakuna qaqäyänanta mantsarmi prësu tsarita puëdiyarqantsu.

3Tsënam Judas Iscariotipa shonqunman Satanás yëkurirqan. Judasqa Jesúspa chunka ishkë kaq discïpulunkunapitam karqan. 4Pëmi mandakuq sacerdötikunaman y templu täpaq wardiakunapa capitanninkunaman ëwar parlarqan Jesústa imanö entreguëkunanpaqpis. 5Tsënö niptinmi sacerdötikuna kushikur pagayänanpaq äniyarqan. 6Judasnam shuyararqan nunakuna mana kayanqan höra Jesústa entregananpaq.

Pascua mikïta discïpulunkunawan Jesús mikunqan

Mateo 26.17-25; Marcos 14.12-21; Juan 13.21-30

7Levadürannaq Tanta Mikuna fiesta qallëkunan junaqmi Pascuachö mikuyänanpaq mallwa üshata pishtayaq. 8Tsënam Pedruta y Juanta Jesús kacharqan kënö nir: <<Pascua mikïta mikunantsikpaq alistapäkuq ëwayë>>.

9Pëkunanam tapuyarqan: <<Teyta, ¿mëchötaq alistayämushaq?>>

10Jesúsnam nirqan: <<Jerusalénman chärirmi juk nuna kuntuwan yaku apëkaqta tariyanki. Tsë nunapa qepanllata ëwayanki më wayimanpis chashqanyaq. 11Tsëchö wayiyuqta kënö niyanki: <¿Mëqan cuartuchötaqshi Pascua mikïta discïpulunkunawan Jesús mikunqa?> 12Wayiyuqnam rikätsiyäshunki rarachö jatun cuartu alistashqata. Tsëchö mikunantsikpaq alistayanki>>.

13Tsëmi pëkuna ëwar Jesús nishqannölla tariyarqan. Tsëchömi Pascua mikïta alistayarqan.

Santa Cënapaq Jesús yachatsikunqan

Mateo 26.26-30; Marcos 14.22-26; 1 Corintios 11.23-25

14Mikï höranam apostolninkunawan mësaman Jesús täkuriyarqan. 15Tsëchönam Jesús nirqan: <<Imanömi munarqü manaraq wanurnin kë Pascua mikïta qamkunawan mikurita. 16Noqam niyaq: Mananam Pascua mikïta mikushaqnatsu hasta Teyta Diospa mandakïninchö yapë mikunqäyaq>>.

17Tsëpitanam vïnuyuq cöpata tsarirkur Teyta Diosta payllä nikurir apostolninkunata kënö nirqan: <<Këta llapëkikuna upuyë. 18Noqam niyaq: Kananpitaqa vïnuta manam yapë upushaqnatsu hasta Teyta Diospa mandakïnin chämunqanyaq>>.

19Tsënöllam tantata tsarirkur Teyta Diosta payllä nikurqan. Tantata pakirirnam apostolninkunata makyar nirqan: <<Këqa cuerpümi. Kë tantata mikur qamkuna rëkur wanushqäta yarpäyanki>>.

20Tsënöllam mikïta usharir vïnuyuq cöpata tsarirkur nirqan: <<Kë vïnuqa yawarnïmi. Qamkuna rëkur wanur yawarnïta ramaptïmi Teyta Dios mushuq pactuta ruranqa.#Éxo. 24.8; Jer. 31.31-34. 21Entregamaqnï nuna noqantsikwanmi kë mësachö këkan. 22Rasunpam Nunapa Tsurinqa Teyta Dios munashqannölla jipar wanunqa. Tsënö kaptinpis pëta entregaq nunaqa alläpa ankupëpaqmi kanqa>>.

23Apostolninkunanam kikinkunapura kënö tapunakuyarqan: <<¿Mëqantsikraq tsë traicionëru këkantsik?>>

Mandakuq këta munar liryayanqan

24Tsëpitanam apostolkuna mas mandakuq këta munar kikinkunapura piñatsinakuyarqan. 25Tsënam Jesús nirqan: <<Nacionkunata reykunaqa nunakunata munayashqantam ruratsiyan. Tsënö mandakuqkunataqa alli nuna kanqantam niyan. 26Qamkunaqa manam tsënötsu kayänëki. Tsëpa rantinqa precisaq karpis wamranö qollmi shonqum kayänëki. Y mandakuq karpis sirwikuqnöllam kayänëki. 27Maski käyikuyë. ¿Mësachö täraqku o mikïnin sirwiqku mas mandakuq? ¿Manaku mësachö täraq mas mandakuq? Tsënö kaptinpis noqaqa qamkunachö imëka sirwikuqnöllam këkä.

28<<Ima jipakïnïkunachöpis noqawanmi qamkuna imëpis kayarqunki. 29Tsëmi mandakuq kanäpaq Teytä churamanqannölla qamkunatapis mandakuq kayänëkipaq churayashqëki. 30Qamkunam mandakïnïchö noqawan mikuyanki upuyanki. Y trönukunamanmi täkuriyanki chunka ishkë trïbu Israel nunakunata mandayänëkipaq>>.

Pedro negananpaq kaqta Jesús willakunqan

Mateo 26.31-35; Marcos 14.27-31; Juan 13.36-38

31Tsënö nirirnam Pedruta Jesús nirqan: <<Simón, Simón, Satanásmi Teyta Diosta mañakushqa imëka trïguta wawyaqnö qamkunapa markäkïnikikunata probananpaq. 32Tsënö kaptinpis Teyta Diosmanmi mañakurqü mana qelanashpa noqaman markäkamunëkipaq. Tsënam noqaman yapë markäkamurnin discïpulu mayikikunata yanapëkunki noqaman markäkur tsarakuyänanpaq>>.

33Pedrunam nirqan: <<Teyta, prësuyämaptinpis manam jaqishqëkitsu. Wanutsiyämaptinpis noqaqa qamwanmi ëwashaq>>.

34Jesúsnam nirqan: <<Pedro, noqam niq: Kanan paqas gällu manaraq cantaptinmi kima kuti negamanki>>.

Discïpulunkuna alistakushqa puriyänanpaq Jesús willakunqan

35Tsëpitanam apostolninkunata Jesús tapurqan: <<Qellëninnaqta, aljorjannaqta, llanqinnaqta willakuyänëkipaq kachayanqaqchö ¿imëkikunapis pishirqanku?>>

Pëkunanam niyarqan: <<Manam imäkunapis pishirqantsu>>.

36Jesúsnam nirqan: <<Kananpitaqa qellënikikuna y aljorjëkikuna apayë. Espädëkikuna mana kaptinqa ponchïkikunata rantikïkurpis rantiyë. 37Noqam niyaq: Teyta Diospa palabranchö noqapaq kënö nirmi qellqarëkan: <Jutsayuq nunanöllam wanurqan>.#Isa. 53.12. Tsë qellqarëkanqannöllam noqata pasamanqa>>.

38Tsënam apostolninkuna niyarqan: <<Teyta, këchö ishkë espädam këkan>>.

Jesúsnam nirqan: <<¡Tsëllana!>>

Getsemaníchö Jesús mañakunqan

Mateo 26.36-46; Marcos 14.32-42

39Tsëpita yarqurirnam costumbrinmannö Olivos jirkaman Jesús ëwarqan. Discïpulunkunanam qatiyarqan. 40Tsëman chärirnam nirqan: <<Teyta Diosta mañakuyë Satanás mana tentayäshunëkipaq>>.

41Tsënö nirirnam mas washaninkunaman ëwëkur qonqurikur Teyta Diosta mañakur nirqan: 42<<Teytallä, cöpachö winarëkaq castïguïkita ama upïkatsillämëtsu.#Sal. 75.8; Isa. 51.17; Jer. 25.15-29. Tsënö kaptinpis noqa munashqänöqa ama katsuntsu, sinöqa qam munashqëkinö këkullätsun>>.

43[Tsënam ciëlupita juk ángel yurirkur kallpatsarqan. 44Shonqunchö tsëläyapa nanatsikurmi masraq mañakurqan hasta yawarnöraq sudorninpis patsaman shutunqanyaq.]

45Tsëpita discïpulunkuna kaqman kutirmi llakikïwan punukashqa këkäyaqta tarirqan. 46Tsënam Jesús nirqan: <<¡Imanirtaq punukïkäyanki! Sharkur Teyta Diosta mañakuyë Satanás mana tentayäshunëkipaq>>.

Jesústa prësu tsariyanqan

Mateo 26.47-56; Marcos 14.43-50; Juan 18.1-11

47Jesús tsënö parlëkaptinmi apostolnin Judas Iscariote atskaq nunankuna pushashqa chärirqan. Jesúsman witïkurnam qaqllanchö mutsëkurqan. 48Jesúsnam nirqan: <<Judas, ¿mutsëkurku Nunapa Tsurinta entreganki?>>

49Tsënam Jesústa prësu tsariyänanpaq kaqta mäkurir discïpulunkuna kënö niyarqan: <<Teyta, ¿espädäkunawanku wallukacharkayämushaq?>>

50Tsënö nirmi juknin kaq discïpulun sumo sacerdötipa sirwiqninpa allawka kaq rinrinta pintiriqpaq wallïkurqan. 51Jesúsnam nirqan: <<¡Ama tsëta rurayëtsu!>> Tsëpitanam nunapa rinrinta kutirkatsir kachakäratsirqan.

52Jesústa prësu tsariyänanpaq ëwaqkunaqa kayarqan mandakuq sacerdötikunam, templu täpaq wardiakunapa capitanninkunam y precisaq Israel nunakunam. Pëkunatam Jesús nirqan: <<¿Imanirtaq suwamannöpis espädëkikunawan y garrutikikunawan shayämurqunki? 53Waran waran templupa patiunchö qamkunawan këkaptï ¿imanirtaq tsëchöqa tsariyämarqëkitsu? Kananmi sï höra chäramushqa Satanáspa munëninta rurayänëkipaq>>.

Jesústa Pedro neganqan

Mateo 26.57-58, 69-72; Marcos 14.53-54, 66-72; Juan 18.12-18, 25-27

54Tsënam Jesústa prësu tsarïkur sumo sacerdötipa wayinman apayarqan. Pedrunam karullapa qatirqan. 55Tsë wayipa patiunchönam nunakuna ninata sendirkur qoñükurnin këkäyarqan. Tsënam Pedrupis pëkunaman witirqan qoñükunanpaq. 56Pedro qoñukïkaqta rikëkurnam sacerdötipa wätënin warmi kënö nirqan: <<Kë nunapis tsë nunawanmi purishqa>>.

57Pedrunam negarnin nirqan: <<¡Warmi, manam pëta reqillätsu!>>

58Tsëpitanam jina jukna pëta rikëkur nirqan: <<Qampis taqë nunawanmi purishqanki ¿aw?>>

Pedrunam nirqan: <<¡Nuna, manam pëwan purishqätsu!>>

59Juk höratanönam jina juk nunana nirqan: <<Rasunpam kë nunaqa qatirashqa. Ari, pëpis Galilea nunataq>>.

60Tsënam Pedro nirqan: <<Nuna, ¡imatachi parlankipis! ¡Manam käyïtsu!>>

Pedro tsënö parlar manaraq ushaptinmi gällu cantarirqan. 61Tsënam Pedruman Jesús tumëkur rikärirqan. Pedrunam yarpärirqan Jesús kënö nishqanta: <<Manaraq gällu cantaptinmi kima kuti negamanki>>.

62Tsëmi waqtaman yarqurir alläpa llakikur waqarqan.

Jesústa burlakur maqayanqan

Mateo 26.67-68; Marcos 14.65

63Jesústa cuidaq nunakunanam burlakurnin maqayarqan. 64Y nawinta tsaparkurnam [laqyar] niyarqan: <<Pï maqashunqëkitapis mä niyämë>>.

65Tsënömi mas llutankunata nirnin burlakuyarqan.

Autoridäkuna Jesústa tapuyanqan

Mateo 26.59-66; Marcos 14.55-64; Juan 18.19-24

66Patsa waräriptinnam precisaq Israel nunakuna, mandakuq sacerdötikuna y ley yachatsikuqkuna ëllukäyarqan. Pëkunapa despächunman chätsiyaptinmi Jesústa kënö tapuyarqan: 67<<Mä niyämë: ¿Rasunpaku Teyta Dios kachamushqan Cristo kanki?>>

Jesúsnam nirqan: <<Awmi niyaptiqpis manam creyiyämankimantsu. 68Tapuyaptiqpis manam yaskiyämankimantsu [ni jaqirayämankitsu]. 69Kananpita witsëpam Nunapa Tsurin puëdiq Teyta Diospa allawka kaq lädunman täkurinqa>>.#Sal. 110.1.

70Tsënam autoridäkuna tapuyarqan: <<Tsëpinqa ¿Diospa Tsurinku kanki?>>

Jesúsnam nirqan: <<Qamkuna niyanqëkinöllam kä>>.

71Pëkunanam niyarqan: <<Diospa Tsurin kanqanta kikin nikämashqaqa ¿imapaqnataq testïgutapis ashishun?>>

Currently Selected:

Lucas 22: qwhB

Highlight

Copy