Luke 15

Da Lost Sheep Story

(Matthew 18:12-14)

1 # Luke 5:29-30 One time all da guys dat colleck tax money fo da govmen an da odda guys dat get one bad rep wen come togedda by Jesus fo lissen him. 2But da Pharisee guys an da teachas dat teach da Rules From God wen squawk. Dey tell, “Dis guy get peopo wit one bad rep fo his frenz, an he even eat wit dem.” 3So Jesus tell um dis fo teach um:

4He tell, “Wat you figga? If one a you guys get hundred sheep, but one sheep stay lost, you goin leave da ninety nine sheep inside da boonies, an go look fo da one sheep dat stay lost, aah? 5Wen you find um, you feel real good inside, an you put um on top yoa shouldas, 6an go home. Den you tell all yoa frenz an da peopo nex door, ‘Go come, we go throw party! Cuz I wen find my lost sheep.’ 7I tell you, same ting, God an da angel guys inside da sky feel real good inside cuz one bad guy come sorry fo all da bad kine stuff he wen do, an no do um no moa. Cuz fo God, mo betta dat guy come sorry, den all da odda guys dat tink dey no need come sorry.”

Da Lost Coin Story

8“O, wat you tink? If one wahine get ten silva coin, an she lose one, wat she goin do? She goin open one lamp, den she sweep da whole house, an look real good till she find um. 9An wen she find um, she goin tell all her frenz an da peopo nex door, ‘Go come, we go throw party! Cuz I wen find my lost coin!’ 10I tell you, same ting, da angel guys dat stay wit God feel plenny good inside, erytime one bad guy come sorry fo all da bad kine stuff he wen do, an no do um no moa.”

Da Lost Boys Story

11Jesus tell, “Had one guy dat get two boys. 12Da younga boy tell his faddah, ‘Eh Daddy! Give me my share from all you get.’ Den da faddah split all he get an give da boys dea share.

13“Afta dat, da younga boy get all his stuffs, sell his share an take da money, an go one far place. An ova dea he spen um all, cuz he buckaloose. 14He no mo notting. An dat time no mo food in all dat country. So he get real hard time. 15He go by one guy from dat country an get job, an da guy sen him out to his fields fo feed da pigs. 16Da boy real hungry! He like eat da tree beans da pigs stay eat. But nobody give him notting!

17“Den he wise up an figga, ‘Eh, how come?! All da guys dat work fo my faddah fo pay, dey get mo plenny food den dey can eat. Me, I real hungry ova hea, an litto mo mahke! 18Mo betta I go back by my faddah. Den I can tell um, “Eh Daddy! I wen do one real bad ting agains God in da sky an agains you. 19I not good enuff fo be yoa boy. Let me work fo you fo pay, an den bumbye I pay you back.” ’ 20Den he hele from dat place an go back by his faddah.

“He still far from da house wen his faddah spock him. His faddah heart stay fill wit pity an he run to his boy. He hug his boy an kiss him. 21Da boy tell, ‘Eh Daddy! I wen do someting real bad agains God in da sky, an agains you. I not good enuff fo be yoa boy.’

22“But da faddah tell his worka guys, ‘Come quick ova hea! Hurry up! Go get one robe, da bestes one, an put um on him. Put one ring on top his finga an shoes on top his feets. 23Go get da bestes young cow an kill um. We goin throw one party, an make kanikapila, we go party! 24Cuz dis my boy! Jalike he wen mahke, but now he come back alive! Cuz he was lost, but now we find um!’ So dey wen party.

25“Da older boy, he stay work inside da fields. Den he come nea da house, an he hear da music an da dance. 26So he tell one kid, ‘Eh, wassup?’

27“Da kid tell, ‘Yoa braddah wen come back home, an yoa faddah tell da worka guys fo kill da bestes young cow, cuz yoa faddah wen take him in, an eryting pono now!’

28“Da older braddah, he come real huhu. He no like go inside da house. So da faddah go outside an beg him fo come inside. 29He tell his faddah, ‘Eh, wat you stay do! I wen work fo you jalike one slave, plenny years! I neva go agains you wen you tell me fo do someting! You neva give me notting! You neva even give me one bebe goat fo make party wit my frenz! 30But dis guy, yoa boy, he wase awready all da money from yoa land fo pay da hoaz. An wen he come home, right den an dea you kill da bestes young cow fo him. An den!’

31“But da faddah tell, ‘Eh boy, you erytime stay hea wit me, an eryting I get, yoas too. 32But eh! good we throw party, make kanikapila, an sing an feel good inside! Cuz dis guy, yoa braddah, jalike wen mahke, but now he come back alive! Cuz he was lost, but now we find um!’ ”

Currently Selected:

Luke 15: HPB

Highlight

Copy