SAN MARCOS 12
12
Cui̱i̱ ji'i̱ msu xña'a̱
1Lo'o li' nguxana Jesús nda yu sca cui̱i̱ lo'o nu ngu' tlyu nu ndu̱ cacua ti slo yu:
―Ntsu'u sca ñati̱, ndi'i̱ xi tyu̱u̱ tya'a yaca si'yu losu' tyixi ji'i̱ nu cua ndyataa yu. Ngüiñá yu sca lo'o chu̱' yaca bi'. Li' ngulu yu sca pilya tlyu ne' quee su tyatá si'yu, cha' tyu'u hitya tyixi ji'i̱ si'yu bi'. Lo'o jua'a̱ ngüiñá yu sca ni'i̱ su tyi'i̱ ngu' cua̱ ji'i̱ yaca si'yu bi'.
’Li' nda yu ne' lo'o su ndu̱ yaca bi' ngüijña xa' la ñati̱. Tsa cla'be ti si'yu nu tyu'u lo yaca bi' caja ji'i̱ ycui' li'. Li' ndu'u yu ndyaa yu xa' quichi̱ tyijyu' la. 2Lo'o ndyalaa co' nu nga'a̱ cha' cumi̱ si'yu losu' bi', li' ngulo yu cña ji'i̱ msu ji'i̱ cha' tsaa slo ñati̱ bi', tsaa squi'ya xi si'yu losu' tyixi nu nga'a̱ cha' tyacua ji'i̱ ycui'. 3Hora ti ntejeya' ngu' nu ndu̱ loo cña bi' ji'i̱ msu nu ndyalaa ca ti, ngujui'i̱ ngu' ji'i̱; ná nda ngu' ni sca ti si'yu losu' cacu xu'na cña bi'. 4Xa' ngulo xu'na cña ji'i̱ chaca msu cha' tsaa na'a̱ msu bi' ji'i̱ yaca si'yu ji'i̱ yu. Chaca quiya' ngua'ni lya' tsa ti' ngu' bi' ji'i̱ msu nu ndyala slo ngu'. Ngujui'i̱ ndacu̱' ngu' scua' hique msu bi', lo'o jua'a̱ ngu̱ ngu' quee ji'i̱. 5Xa' ngulo xu'na bi' cña ji'i̱ chaca msu, lo'o li' ndyujuii ngu' ji'i̱ nu msu bi'. Tyu̱u̱ tya'a msu cua nda xu'na cña ji'i̱ cha' tsaa squi'ya ngu' si'yu losu' bi', pana ngua'ni lya' tsa ti' nu ñati̱ bi' ji'i̱ ca ta'a msu nu ndyaa slo ngu'. Ntsu'u msu bi' ñaa ngujui'i̱ ti ngu' ji'i̱, lo'o jua'a̱ ntsu'u nu ndyujuii ngu' ji'i̱ tsiya' ti.
6’Chaca tya ñati̱ ndyanu ji'i̱ xu'na cña bi', sca sñi' yu nu tyaca'a tsa ji'i̱ yu laca bi'. Li' nda xu'na cña ji'i̱ sñi' ycui' ca cha' tsaa na'a̱ ji'i̱ nu ngu' nu lya' ti' bi'. “Ná tyiquee' taquiya' ngu' ji'i̱ sñi' na'”, ngua ti' xu'na bi'. 7Pana lo'o na'a̱ nu ngu' nu lya' ti' bi' ji'i̱ sñi' ycui' xu'na cña bi', li' nguxana ngu' nchcui' ngu' lo'o tya'a ngu': “Nu jua caca xu'na yaca re nde loo la”, nacui̱ ngu' ji'i̱ tya'a ngu'. “Tso'o la si ca ta'a na cujuii clya na ji'i̱ yu, cha' tyanu yaca re cuentya ji'na tsiya' ti”, nacui̱ ngu'. 8Li' ngusñi ngu' bi' ji'i̱ sñi' xu'na cña bi', ndyujuii ngu' bi' ji'i̱; nguxcua̱a̱ ngu' ji'i̱ jyo'o bi' ca chu̱' lo'o.
9Tya nchcui' la Jesús lo'o ngu', nchcuane yu sca cha' ji'i̱ ngu' li':
―¿Ñi'ya̱ cua'ni xu'na cña bi' li'? ―nacui̱ Jesús ji'i̱ ngu'―. Ná tyiquee' ndi'ya̱ cua'ni yu: tya̱a̱ ycui' xu'na cña bi' ca su ndu̱ yaca bi'; li' cujuii yu ji'i̱ lcaa ñati̱ nu lya' ti' bi', cuati ta yu ji'i̱ yaca si'yu bi' jña xa' la ñati̱ cha' cua'ni ngu' cña ndacua. Jua'a̱ cua'ni xu'na cña bi'.
10’¿Ha bilya chcui' ma̱ lo quityi ji'i̱ ycui' Ndyosi su nscua ndi'ya̱?:
Ntsu'u sca quee nu nguxcua̱a̱ cuityi ni'i̱ ji'i̱ clyo, cha' ná tso'o ña'a̱ quee bi' nti' ngu';
pana juani cua ngujui cña nu cua'ni quee bi', cha' ndu̱ bi' su ndulo la cha' ji'i̱ cuentya ji'i̱ ycui' Ndyosi.
11Ycui' nu Xu'na na ngua'ni cha' jua'a̱ ngua cha' bi', bi' cha' ndube tsa ti' na ji'i̱ cha' tlyu bi'.
Jua'a̱ nchcui' quityi ―nacui̱ Jesús.
12Lo'o li' ngua ñasi̱' nu ngu' tlyu bi' ji'i̱ Jesús, cha' ngua tii ngu' bi', cha' cua nchcui' Jesús cha' ji'i̱ ycui' ngu' bi' laja lo'o nda yu cui̱i̱ bi' lo'o ngu'. Xñi ngu' bi' ji'i̱ Jesús ngua ti' ngu'; pana ná ngua ji'i̱ ngu', cha' ntsi̱i̱ ngu' ji'i̱ nu ñati̱ quiña'a̱ bi'. Bi' cha' ndu'u nu ngu' tlyu bi', ndyaa ngu' li'.
Cha' ji'i̱ cñi cña loo ngu'
13Ca tiya' la li' ngulo nu ngu' tlyu bi' cña ji'i̱ tucua sna tya'a ngu' fariseo, jua'a̱ ji'i̱ xi ñati̱ nu cuentya ji'i̱ rey Herodes, cha' tsaa ngu' ca slo Jesús, cha' chcui' cuayá' ngu' lo'o yu. 14Lo'o cua ndyalaa ngu' slo yu, li' nchcui' ngu' lo'o yu:
―Mstru ―nacui̱ ngu' ji'i̱ Jesús―, jlo ti' ya cha' liñi tsa ndu'ni nu'u̱; la cui' cha' liñi nu ntsu'u ji'i̱ ycui' Ndyosi, bi' ti cha' laca nu nclu'u nu'u̱ ji'i̱ ngu'. Ná ndube ti' nu'u̱ ñi'ya̱ cha' nu nchcui' ngu' jinu'u̱. Sca ti cuayá' nti' nu'u̱ ña'a̱ nu'u̱ ji'i̱ lcaa ñati̱, masi ngu' ti'i, masi ngu' tonu. Tyu'u cha' clyu ti' jinu'u̱, ¿ha tso'o si ta na cñi cña loo na cuentya ji'i̱ rey tlyu nu ndi'i̱ xa' tsu' bi'? ―nacui̱ ngu'―. ¿Ha ndu'ni tsa cha' ta na cñi bi' ji'i̱ ngu'? ¿Ha ná tso'o la masi ná ta na cñi bi' tsiya' ti?
15Ngua tii Jesús cha' tucua cha' ntsu'u tyiquee ngu' bi'.
―¿Ni cha' laca nchcui' cuayá' ma̱ 'na jua'a̱? ―nacui̱ Jesús ji'i̱ ngu' bi'―. Ta ma̱ sca cñi plata 'na cha' ña'a̱ na' ji'i̱.
16Li' nda ngu' sca cñi ji'i̱. Nchcuane Jesús ji'i̱ ngu' li':
―¿Tilaca nu ca ji'i̱ lcui̱ nu nga'a̱ chu̱' cñi re? ¿Ti ji'i̱ xtañi yu nu nscua chu̱' cñi re? ―nacui̱ Jesús ji'i̱ ngu'.
―Xtañi nu rey tlyu nu ndi'i̱ xa' tsu', bi' nga'a̱ chu̱' cñi cua ―nacui̱ ngu' li'.
17―Tso'o ―nacui̱ Jesús li'―, ji'i̱ rey tlyu bi' tya ma̱ lcaa na nu nga'a̱ cha' ta ma̱ ji'i̱ lacua, lo'o jua'a̱ ji'i̱ ycui' Ndyosi tya ma̱ lcaa na nu ntsu'u cha' tya ma̱ ji'i̱ Ni.
Ndube tsa ti' ngu' cha' nchca tsa ji'i̱ Jesús xtyacui cha' lo'o ngu' bi'.
Nchcuane ngu' ji'i̱ Jesús ñi'ya̱ caca lo'o tyu'ú ngu' chaca quiya'
18Lo'o li' ndyalaa xi ngu' saduceo slo Jesús; lo'o nu ngu' bi' ni, ná jlya ti' ngu' cha' tya tyu'ú jyo'o chaca quiya'. Nchcuane ngu' bi' sca cha' ji'i̱ Jesús li':
19―Mstru ―nacui̱ ngu' bi'―, sa'ni la nguscua jyo'o Moisés sca cha' lo quityi cuentya ji'i̱ tya'a ngula ngu'. Nu lo'o cua ngujuii tsaca yu ni, si cua ngujui clyo'o yu pana bilya caja sñi' yu, li' ntsu'u cña ji'i̱ tya'a ngula yu nu ntucua ycui' ti cha' caja clyo'o lo'o nu cuna'a̱ clyo'o jyo'o tya'a yu. Li' chcui' ngu' ji'i̱ sñi' clyo ngu' cha' sñi' nu qui'yu nu cua ngujuii bi' laca bi', cha' ná chcuna' xtañi yu nu cua ngujuii bi'. Jua'a̱ nchcui' Moisés cua sa'ni la. 20¿Ñi'ya̱ caca li'? Ngua sca quiya' ndi'i̱ cati tya'a nu qui'yu, xcui' tya'a ngula ngu'. Ngujui clyo'o nu cusu' la, pana yala ti ngujuii li', lo'o bilya caja sñi' ngu'. 21Lo'o jua'a̱ ngujui clyo'o nu cuna'a̱ ti'i bi' lo'o chaca yu tya'a ngula jyo'o bi'. La cui' jua'a̱ ngujuii nu qui'yu bi', lo'o bilya caja sñi' ngu'. Xa' ngujui clyo'o nu cuna'a̱ ti'i bi' lo'o chaca yu tya'a jyo'o bi'. 22Lo'o jua'a̱ ngua cha' ji'i̱ lo'o nu cati tya'a ngu' qui'yu bi'. Ná ngujui sñi' ngu' tsiya' ti. Su cua ndye, li' ngujuii nu cuna'a̱ bi'. 23Nu lo'o tyu'ú lcaa jyo'o chaca quiya' ni, ¿tilaca caca clyo'o nu cuna'a̱ bi', cha' nu ca ta'a cati tya'a ngu' bi' cua nguti'i̱ lo'o nu cuna'a̱ bi'?
24―Ná jlo ti' ma̱ tsiya' ti ―nacui̱ Jesús ji'i̱ ngu' bi'―, cha' ná nchca cuayá' ti' ma̱ ñi'ya̱ cha' nu nscua lo quityi ji'i̱ ycui' Ndyosi. Ná nchca cuayá' ti' ma̱ ñi'ya̱ ña'a̱ cña tonu tsa nu nchca ji'i̱ ycui' Ndyosi cua'ni Ni. 25Nu lo'o tyu'ú lcaa jyo'o chaca quiya', nga'aa ntsu'u cha' caja clyo'o ngu' li'. La cui' ñi'ya̱ nu ndi'i̱ xca̱ ji'i̱ ycui' Ndyosi ca su ntucua Ni, la cui' jua'a̱ tyi'i̱ ngu' li'. 26¿Ha ná jlya ti' ma̱ cha' tyu'ú jyo'o chaca quiya'? ¿Ha bilya chcui' ma̱ lo quityi nu nguscua jyo'o Moisés cua sa'ni la? Tso'o la si chcui' ma̱ ñi'ya̱ nscua cha' ji'i̱ yaca quiche' bi', nu lo'o nchcui' ycui' Ndyosi lo'o Moisés ndi'ya̱: “Ycui' Ndyosi Xu'na Abram laca na'”, nacui̱ ycui' Ni ji'i̱ Moisés; “ycui' Ndyosi Xu'na Isaac laca na', ycui' Ndyosi Xu'na Jacob laca na'”. 27Ná nacui̱ quityi bi' cha' na cua ngua ycui' Ndyosi Xu'na ngu' bi', ña'a̱ ti tya laca Ni Xu'na ngu' bi' juani; lo'o jua'a̱ laca ycui' Ndyosi Xu'na lcaa ñati̱ lu'ú. Bi' cha' nacui̱ na' cha' ná ngua cuayá' ti' ma̱ tsiya' ti ―nacui̱ Jesús ji'i̱ nu ngu' saduceo bi'.
Cña nu ndulo la cha' cua'ni na cuentya ji'i̱ ycui' Ndyosi
28Ndu̱ sca mstru cha' jo'ó slo Jesús li'. Ndyuna mstru bi' ñi'ya̱ nu nguxacui̱ ngu' cha' ji'i̱ Jesús, ñi'ya̱ ngua cha' tso'o tsa nchcui' Jesús lo'o ngu'. Lo'o li' nchcuane mstru bi' sca cha' ji'i̱ Jesús:
―Ca ta'a cña nu ngulo ycui' Ndyosi ji'na cha' cua'ni na ni, ¿ñi'ya̱ cña laca nu ndulo la cha' cua'ni na ji'i̱? ―nacui̱ ji'i̱ Jesús.
29Li' nguxacui̱ Jesús cha' ji'i̱ mstru bi':
―Ndi'ya̱ nchcui' cha' nu nscua clyo la bi': “Cu'ma̱ ngu' Israel, cua'a̱ jyaca̱ ma̱ cha' sca ti ycui' Ndyosi laca nu Xu'na na” ―nacui̱ Jesús ji'i̱―. 30“Lo'o jua'a̱ ntsu'u cha' tyucui tyiquee ma̱ tyu'u cha' ji'i̱ ma̱ lo'o ycui' Ndyosi nu Xu'na ma̱, nu lo'o lubii ti cresiya ji'i̱ ma̱, jua'a̱ lo'o lcaa cha' nu nda'ya hique ma̱, jua'a̱ lo'o tyucui juersa ji'i̱ ma̱ tyu'u cha' ji'i̱ ma̱ lo'o Ni.” 31Lo'o jua'a̱ nscua chaca cha' nu nchcui' ndi'ya̱: “Cua'ni tya'na ti' ma̱ ji'i̱ tya'a ñati̱ ma̱ ñi'ya̱ nu ndu'ni tya'na ti' ma̱ ji'i̱ ycui' ca ma̱”. Nga'aa ntsu'u xa' la cña nu ndulo la ji'na cha' cua'ni na ―nacui̱ Jesús.
32―Cha' liñi laca cha' nu nchcui' nu'u̱, mstru ―nacui̱ mstru bi' ji'i̱ Jesús―, chañi cha' nu nchcui' nu'u̱ cha' sca ti ycui' Ndyosi nu chañi cha' laca Ni Xu'na na; nga'aa ntsu'u chaca. 33Lo'o jua'a̱ tyucui tyiquee na nga'a̱ cha' tyu'u cha' ji'na lo'o ycui' Ndyosi, jua'a̱ lo'o lcaa cha' nu nda'ya hique na, jua'a̱ lo'o tyucui juersa ji'na tyu'u cha' ji'na lo'o Ni; ndu'ni tsa cha' cua'ni na jua'a̱. Lo'o jua'a̱ cha' cua'ni tya'na ti' na ji'i̱ tya'a ñati̱ na, ñi'ya̱ nu tya'na ti' na ña'a̱ na ji'i̱ ycui' ca na, tso'o tsa cha' bi'. Nu lo'o cua'ni na cña jua'a̱, quiña'a̱ tsa cha' tso'o ndyu'ni na li'. Xtyi la cha' ndulo ji'na cha' tsaa lo'o na msta̱ nu caca ji'i̱ ycui' Ndyosi, masi msta̱ ndyaqui̱, masi na'ni lu'ú nu cujuii na ca ne' laa cha' caca msta̱.
34Ngua cuayá' tso'o ti' nu qui'yu bi', ngua ti' Jesús.
―Ná quiña'a̱ tsa lyiji jinu'u̱ cha' tyatí̱ nu'u̱ cha' ji'i̱ ycui' Ndyosi cha' caca Ni loo ne' cresiya jinu'u̱ ―nacui̱ Jesús ji'i̱ mstru bi'.
Lo'o ndye nchcui' Jesús cha' bi', nga'aa nchcui' ngu' xi xa' la cha' lo'o, cha' ntsi̱i̱ ngu' xi ji'i̱.
Nchcuane Jesús ji'i̱ ngu' cuentya ji'i̱ Cristo
35Tya ndu̱ Jesús nclyu'u yu ji'i̱ ngu' ne' laa tonu bi'. Li' nchcuane yu ji'i̱ ngu':
―Nchcui' nu mstru cha' jo'ó bi' cha' la cui' ñati̱ tya'a ji'i̱ jyo'o David caca Cristo ―nacui̱ Jesús ji'i̱ ngu'―. ¿Ni cha' laca nchcui' mstru bi' jua'a̱? 36Cua nchcui' ycui' jyo'o David tya sa'ni la cha' Xu'na yu laca ycui' Cristo. Xqui'ya cha' ngulu'u Xtyi'i ycui' Ndyosi ji'i̱ David, bi' cha' nguscua yu ndi'ya̱:
Ycui' Ni nu laca Xu'na na nacui̱ ji'i̱ Cristo nu Xu'na na':
“Tyucua nu'u̱ nde la'a tsu' cui̱ 'na”, nacui̱ Ni,
“ña'a̱ cuayá' nu cua'ni tye na' cha' ji'i̱ lcaa tya'a cusu̱u̱ jinu'u̱,
cha' caca nu'u̱ loo ji'i̱ lcaa ca cha'”, nacui̱ ycui' Ndyosi nu Xu'na na ji'i̱ Cristo.
37Xu'na na', nchcui' jyo'o David ji'i̱ Cristo ―nacui̱ Jesús ji'i̱ ngu'―. ¿Ni cha' laca nchcui' ngu' cha' ñati̱ tya'a ji'i̱ jyo'o David caca ycui' Cristo lacua?
Tso'o tsa ndyuna ñati̱ cha' nu nda Jesús, lo'o jua'a̱ quiña'a̱ tsa ñati̱ ndu̱ ca bi'.
Ngusta Jesús qui'ya ji'i̱ mstru cha' jo'ó bi'
38Lo'o li' tya nclyu'u la Jesús ji'i̱ ngu':
―Tii ti ti' ma̱ cha' ná cñilo'o mstru cha' jo'ó ji'i̱ ma̱. Ndiya tsa ti' ngu' bi', cha' tyiji̱loo ngu' ji'i̱ xa' la ñati̱ ―nacui̱ Jesús―. Lacu' ngu' bi' late' tso'o ña'a̱ nu tyucui̱ cu', cha' lye tsa cua'ni chi̱ xa' ñati̱ loo ngu' bi' lo'o ndya'a̱ ngu' lcaya'. 39Ndiya ti' mstru bi' tyucua lo yaca xlya nu tso'o la ña'a̱ ne' laa, jua'a̱ tyucua ngu' bi' ca su tso'o la lo'o ndyaca ta'a. 40Hasta nxlyaá mstru bi' ni'i̱ ji'i̱ nu cuna'a̱ ti'i, jua'a̱ ji'i̱ lcaa na nu ntsu'u ji'i̱ nu cuna'a̱ bi' nxlyaá ngu'. Tyiquee' nchcui' mstru bi' lo'o ycui' Ndyosi; pana na cuiñi ti ndu'ni ngu' jua'a̱, cha' ña'a̱ ñati̱ ji'i̱ ngu' nti' ngu'. Bi' cha' lye la xcube' Ni ji'i̱ mstru bi', nu lo'o tyalaa tsa̱ cha' cua'ni cuayá' Ni ji'i̱ lcaa ñati̱.
Msta̱ nu nda sca nu cuna'a̱ ti'i
41Lo'o ndye nchcui' Jesús cha' bi', li' ndyaa tucua yu xi ne' laa bi' cacua ti su ndu̱ caju̱ su nxu'ba ngu' cñi cha' caca msta̱. Na'a̱ yu ji'i̱ nu quiña'a̱ tsa ñati̱ nu ndya'a̱ nsu'ba msta̱ ne' caju̱ cajua. Ndya'a̱ xi ngu' culiya', quiña'a̱ tsa cñi ngusu'ba ngu' culiya' bi' ne' caju̱ bi'. 42Li' ndyalaa sca nu cuna'a̱ ti'i, ngusu'ba tucua tya'a ti cñi sube ne' caju̱ bi', ñi'ya̱ nti' si laca bi' sca centavo ti. 43Li' nchcui' Jesús lo'o nu ngu' nu ndyaca tsa'a̱ ji'i̱ cha' ca̱a̱ ngu' slo:
―Chañi cha' nu nchcui' na' lo'o ma̱ ―nacui̱ Jesús ji'i̱ ngu' bi'―, cha' tlyu la msta̱ nu nda nu cuna'a̱ ti'i jua que msta̱ nu nda lcaa lo xa' la ñati̱ nu ndya'a̱ re. 44Xa' ñati̱ ni, nda ngu' cñi nu ntyucua ti ji'i̱ ngu'; pana nda nu cuna'a̱ ti'i jua lcaa na nu ntsu'u ti xi ji'i̱, lcaa nu nga'a̱ cha' caja xi na cacu ma' cua nda bi' juani.
Currently Selected:
SAN MARCOS 12: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.
