SAN MARCOS 13
13
Ngulala ti cati̱ laa tonu
1Lo'o li' cua tyu'u ti Jesús ne' laa tonu lo'o nu ngu' nu ndyaca tsa'a̱ ji'i̱.
―Mstru ―nacui̱ tsaca yu ji'i̱ Jesús―, ña'a̱ tso'o nu'u̱ xi ji'i̱ laa tonu re cha' tso'o tsa ndya'. Tso'o tsa ña'a̱ quee nu ntsu'u sii' ni'i̱ re ―nacui̱.
2―¿Ha cua na'a̱ ma̱ cha' tonu tsa ni'i̱ quee re? ―nacui̱ Jesús ji'i̱ li'―. Nde loo la tyalaa sca tsa̱ lo'o cuityi̱ ñati̱ ji'i̱ ni'i̱ re tsiya' ti, hasta nga'aa tyanu ni sca quee nu xñi ca'a̱ chu̱' tya'a.
Cha' ti'í nu caca lo'o cua tye ti chalyuu
3Lo'o ndu'u ngu' ndyaa ngu' nde lo xlya ca'ya Olivos, ngua'a̱ ngu' xi su tyaca̱' tso'o laa tonu bi'. Nga'a̱ Jesús lo'o Pedro lo'o Jacobo lo'o Juan lo'o Andrés, cuaana ti nchcuane ngu' bi' ji'i̱ yu li':
4―Cuacha' nu'u̱ ji'i̱ ya, ¿ni jacua' cuityi̱ ngu' ji'i̱ laa tonu jua? ―nacui̱ ngu' bi' ji'i̱ Jesús―. ¿Ñi'ya̱ caca ca cuayá' ti' ya nu lo'o cua caca ti cha' cuxi bi'?
5Ngulu'u la xi Jesús ji'i̱ ngu' li':
―Cui'ya ma̱ cuentya cha' ná tucui cñilo'o ji'i̱ ma̱ ―nacui̱ Jesús―. 6Nde loo la ca̱a̱ quiña'a̱ ñati̱ nu chcui' cha' cuiñi ti ji'i̱ ycui' na'. Chcui' ngu' cha' ycui' Cristo laca ngu', lo'o jua'a̱ cñilo'o ngu' bi' ji'i̱ quiña'a̱ ñati̱ nu jlya ti' cha' bi'.
7’Tyempo bi' cañi cha' nxu̱u̱ tya'a ngu' nasiyu̱ re lo'o ngu' xa' nasiyu̱, lo'o jua'a̱ caja cha' ji'i̱ ma̱ cha' nxu̱u̱ tya'a ngu' nasiyu̱ tyijyu'. Ná cutsi̱i̱ ma̱ li'. 8Xu̱u̱ tya'a ñati̱ sca tsu' lo'o ngu' chaca tsu', jua'a̱ xu̱u̱ tya'a ñati̱ sca quichi̱ tlyu lo'o ñati̱ chaca quichi̱ tlyu, tyu̱u̱ se'i̱ clyacui̱ chalyuu li'. Lo'o jua'a̱ lcua ti se'i̱ caja jbi'ña ji'i̱ ngu'. Pana lcaa cha' bi' caca lo'o chca nguxana ti cha' chcube' ñati̱ chalyuu, si'i na cua tye ti chalyuu li'.
9’Lo'o cu'ma̱ ni, tii ti ti' ma̱ tyi'i̱ ma̱ li' ―nacui̱ Jesús―. Tejeya' ñati̱ cuxi ji'i̱ ma̱, jua'a̱ sta ngu' qui'ya ji'i̱ ma̱ slo ngu' tisiya; quiji'i̱ ngu' bi' ji'i̱ ma̱, masi ca ne' laa ji'i̱ ngu'. Nga'a̱ cha' tsatu̱ ma̱ slo ngu' gobierno, slo ngu' nu laca loo; cuentya jna' cacha' ma̱ lcaa cha' tso'o jna' ji'i̱ ngu' bi'. 10Pana tya lyiji tye chalyuu li', cha' clyo ntsu'u cha' cañi cha' tso'o cuentya jna' slo lcaa ñati̱ tyucui ña'a̱ chalyuu. 11Ná cutsi̱i̱ ma̱ lo'o tejeya' ngu' ji'i̱ ma̱ cha' tsaa lo'o ngu' ji'i̱ ma̱ slo ngu' tisiya cha' caca cuayá' ji'i̱ ma̱ lo'o ngu' bi', ni ná culacua tsa ti' ma̱ ñi'ya cha' nu xacui̱ ma̱ ji'i̱ ngu' bi'; ta ycui' Ndyosi lcaa cha' nu nga'a̱ cha' chcui' ma̱ tsa̱ bi'. Nga'aa si'i ycui' ti ma̱ chcui' ma̱ li', cha' lo'o tyucui chacuayá' ji'i̱ Xtyi'i ycui' Ndyosi chcui' ma̱. 12Cuxi tsa caca tyempo li'; cujuii cuañi' ñati̱ ji'i̱ tya'a ngu' cha' cujuii ngu' ji'i̱, jua'a̱ cujuii cuañi' ngu' ji'i̱ sñi' ngu'. Lo'o nu ngu' cuañi' ni, caca ñasi̱' ngu' ji'i̱ sti ngu', ji'i̱ xtya'a̱ ngu' li'; ta nu ngu' cuañi' bi' ji'i̱ sti ngu', ji'i̱ xtya'a̱ ngu' cha' cujuii ngu' cuxi ji'i̱. 13Lye tsa caca ti'í ti' lcaa ñati̱ ji'i̱ ma̱ xqui'ya cha' ñati̱ jna' laca ma̱. Ná cube ti' ma̱; lcaa cu'ma̱ nu talo ma̱ ji'i̱ cha' cuxi bi' ña'a̱ cuayá' nu tye chalyuu, cua'ni lyaá ycui' Ni ji'i̱ ma̱ li'.
14’Cua nscua lo quityi ji'i̱ jyo'o cusu' Daniel nu ngua tu'ba ji'i̱ ycui' Ndyosi nu ngua sa'ni, cha' ca tiya' la ña'a̱ ma̱ cha' tyu̱ sca na nu suba' tsa, nu cua'ni ñu'u̱ ji'i̱ lcaa na lubii―. (Caca cuayá' ti' ma̱ cha' bi' nu lo'o chcui' ma̱ lo quityi re.) ―Nu lo'o ña'a̱ ma̱ cha' ndu̱ na suba' bi' ca ne' laa tonu su ná ntsu'u chacuayá' tyu̱ ―nacui̱ Jesús―, li' tso'o la si xna lcaa ma̱ nu ndi'i̱ ma̱ nde loyuu su cuentya Judea, xna ma̱ cha' tyu'u cuatsi' ma̱ laja ca'ya. 15Xna clya ma̱ tsa̱ bi' li'. Si nga'a̱ ñati̱ que ni'i̱ ji'i̱ li', nga'aa caja tyempo ji'i̱ ngu' bi' tya̱a̱ ngu' nde ne' ni'i̱, cha' culo ngu' yu'ba nu ntsu'u ji'i̱ ngu'; nga'a̱ cha' ca'ya clya ngu' bi' nde lo yuu cha' xna clya ngu' li'. 16Lo'o jua'a̱ si nga'a̱ ñati̱ lo xtya̱ tsa̱ bi', nga'aa caja tyempo xtyu̱u̱ ngu' bi' ca to' tyi ngu' cha' squi'ya ngu' te' quicha̱' ji'i̱ ngu', cha' ntsu'u cha' xna clya ngu' bi' li'. 17Tya'na tsa nu cuna'a̱ tana; jua'a̱ nu cuna'a̱ nu ntsu'u cubi' cuañi' nu tya ntyi', tya'na tsa caca ngu' bi' lo'o caca tsa̱ bi'. 18Tso'o si jña ma̱ cha' ji'i̱ ycui' Ndyosi cha' ná caca tyempo tlya' bi' nu lo'o ntsu'u cha' xna ma̱, 19cha' lye tsa chcube' ngu' tsa̱ bi'. Ni sca quiya' bilya chcube' ñati̱ chalyuu jua'a̱, tya lo'o ngüiñá ycui' Ndyosi chalyuu. Lo'o jua'a̱ tyempo nu caca nde loo la, nga'aa chcube' ngu' chaca quiya' jua'a̱. 20Pana cua nacui̱ ycui' nu Xu'na na cha' xtyi la tsa̱ caca tyempo nu chcube' ngu' ca li'. Si tyiquee' talo tyempo cuxi bi', nga'aa clyaá ni tsaca ñati̱ chalyuu li'. Pana xqui'ya cha' tya'na ti' ycui' Ni ji'i̱ ñati̱ ji'i̱ Ni, bi' cha' cua'ni Ni cha' xti ti tsa̱ caca tyempo cuxi bi'.
21’Ca nde loo la ndi'ya̱ chcui' nu ngu' cuiñi lo'o ma̱: “Ña'a̱ ma̱ ña'a̱, cua ndyalaa Cristo ca nde”, ñacui̱ ngu' cuiñi. Lo'o li': “Ña'a̱ ma̱ ña'a̱, cua ndyalaa Cristo quichi̱ jua”, ñacui̱ xa' la nu cuiñi li'. Ná taquiya' ma̱ ji'i̱ cha' nu chcui' ngu' bi'. 22Cristo cuiñi caca ngu' bi'. Lo'o jua'a̱ tyu'u tucua xi nu cuiñi nu chcui' cha' tu'ba ji'i̱ ycui' Ndyosi laca ycui' ca ngu'; cha' cuiñi ti cua'ni ngu' bi' cha' tlyu, cha' cube tsa ti' xa' ñati̱. Cua'ni ngu' cuiñi bi' jua'a̱, cha' tyiji̱loo ngu' ji'i̱ ma̱ nti' ngu', lo'o jua'a̱ ji'i̱ lcaa ñati̱ nu cua ngusubi ycui' Ndyosi ji'i̱. 23Cua ndacha' na' cha' bi' ji'i̱ ma̱ juani, nu tya lyiji caca cha' cuxi bi', cha' cui'ya ma̱ cuentya ñi'ya̱ caca cha' bi', cha' caca tii ti' ma̱ li'.
Ndi'ya̱ caca lo'o chaca quiya' ca̱a̱ ycui' nu cua nda Ni ji'i̱ lijya̱ cha' caca ñati̱
24Tya ngulu'u Jesús la xi cha' ji'i̱ ngu' li':
―Lo'o li' ―nacui̱ yu―, nu lo'o ndye nchcube' ñati̱, caca talya ña'a̱ xee cuichaa li', lo'o jua'a̱ nga'aa tyaca̱' xee co' li'. 25Tyalú cuii lo'o cualya nu ntsu'u nde cua̱ ca lo yuu li', lo'o jua'a̱ xquiña Ni ji'i̱ lcaa na nu ntsu'u nde cua̱. 26Lo'o na' nu cua nda Ni 'na lijya̱a̱ cha' caca na' ñati̱ ni, ña'a̱ ngu' 'na, cha' ca̱a̱ na' laja coo nu ndubi tsa ña'a̱. Lye xi ña'a̱ caca li', cha' lo'o lcaa juersa 'na ca̱a̱ na'. 27Li' culo na' cña ji'i̱ quiña'a̱ tsa tya'a xca̱ ji'i̱ ycui' Ndyosi, cha' tsaa xca̱ bi', cha' xuti'i̱ se'i̱ ti ji'i̱ lcaa ñati̱ nu cua ngusubi ycui' Ni ji'i̱; tsaa xca̱ bi' lcaa su ndi'i̱ ñati̱ bi' tyucui ña'a̱ chalyuu.
28’Ntsu'u sca cha' nu ca tsa'a̱ na xi lo'o ña'a̱ na masi yaca quityi, masi yaca ntsati̱. Nu lo'o xana tyucua sati̱, li' caluu laca'; caca cuayá' ti' na li' cha' cua ngulala ti tyalaa ni tyo. 29Lo'o jua'a̱ caca cuayá' ti' ma̱ cha' cua tye ti lcaa cha'; nu lo'o ña'a̱ ma̱ tyu'u tucua lcua ti cha' nu cua ndacha' na' ji'i̱ ma̱ tsa̱, cua ca̱a̱ ti ycui' na' li'. 30Chañi cha' nu nchcui' na' lo'o ma̱, cha' lo'o bilya tye cha' ji'i̱ lcaa ñati̱ nu lu'ú chalyuu juani, li' caca lcaa cha' nde chalyuu ñi'ya̱ nu ndacha' na' ji'i̱ ma̱ tsa̱. 31Tye cha' ji'i̱ lcaa na nu ntsu'u nde cua̱, tye cha' ji'i̱ chalyuu, pana ná tye tsiya' ti cha' nu cua nchcui' na' lo'o ma̱, cha' xcui' cha' liñi laca cha' nu nchcui' na'.
32’Ni sca ñati̱ ná jlo ti' ni tsa̱ caca cha' bi', ni hora caca; masi xca̱ ji'i̱ ycui' Ndyosi, masi na' nu laca̱ nu sca ti Sñi' ycui' Ni, ná jlo ti' ya. Sca ti ycui' Ndyosi Sti na', jlo ti' Ni ni tsa̱ caca bi'.
33’Tii ti ti' ma̱ tyi'i̱ ma̱, cua'ni yala ma̱ lo'o ntajatya ti ma̱ ji'i̱ ycui' Ni, cha' ná jlo ti' ma̱ ni jacua' caca tsa̱ bi'. 34Ñi'ya̱ laca lo'o cua tsaa ti sca ñati̱ tlyu tyijyu': lo'o cua tsaa ti yu, ta yu cña ji'i̱ msu cha' ña'a̱si̱i̱ ngu' to' tyi yu, sca cña scaa msu bi'; cuati culo nu xu'na ni'i̱ bi' cña ji'i̱ nu qui'yu nu ndu̱ cua̱ ca to' lo'o cha' cua'ni tii ti' yu. 35Jua'a̱ cu'ma̱ ni, tii ti ti' ma̱ tyi'i̱ ma̱ cha' ná jlo ti' ma̱ ni jacua' tya̱a̱ nu Xu'na ma̱, masi nde ngusi̱i̱, masi cla'be talya, masi hora nxi'ya ndye'e, masi lo'o cua nguxee chaca tsa̱. 36Tii ti ti' ma̱ tyi'i̱ ma̱ lacua si tsiya' ca tyu'u tucua yu ca̱a̱ yu, cha' ná tyalaa ycui' nu Xu'na ma̱ laja lo'o laja' ti ma̱. 37Ndi'ya̱ nchcui' na' lo'o ma̱, jua'a̱ lo'o lcaa ñati̱: Tii ti ti' ma̱ tyi'i̱ ma̱ lacua.
Currently Selected:
SAN MARCOS 13: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.
