Popular Bible Verses from SAN MARCOS 13

Share

Lye tsa caca ti'í ti' lcaa ñati̱ ji'i̱ ma̱ xqui'ya cha' ñati̱ jna' laca ma̱. Ná cube ti' ma̱; lcaa cu'ma̱ nu talo ma̱ ji'i̱ cha' cuxi bi' ña'a̱ cuayá' nu tye chalyuu, cua'ni lyaá ycui' Ni ji'i̱ ma̱ li'.

’Tii ti ti' ma̱ tyi'i̱ ma̱, cua'ni yala ma̱ lo'o ntajatya ti ma̱ ji'i̱ ycui' Ni, cha' ná jlo ti' ma̱ ni jacua' caca tsa̱ bi'.

Ná cutsi̱i̱ ma̱ lo'o tejeya' ngu' ji'i̱ ma̱ cha' tsaa lo'o ngu' ji'i̱ ma̱ slo ngu' tisiya cha' caca cuayá' ji'i̱ ma̱ lo'o ngu' bi', ni ná culacua tsa ti' ma̱ ñi'ya cha' nu xacui̱ ma̱ ji'i̱ ngu' bi'; ta ycui' Ndyosi lcaa cha' nu nga'a̱ cha' chcui' ma̱ tsa̱ bi'. Nga'aa si'i ycui' ti ma̱ chcui' ma̱ li', cha' lo'o tyucui chacuayá' ji'i̱ Xtyi'i ycui' Ndyosi chcui' ma̱.

Tye cha' ji'i̱ lcaa na nu ntsu'u nde cua̱, tye cha' ji'i̱ chalyuu, pana ná tye tsiya' ti cha' nu cua nchcui' na' lo'o ma̱, cha' xcui' cha' liñi laca cha' nu nchcui' na'.

’Ni sca ñati̱ ná jlo ti' ni tsa̱ caca cha' bi', ni hora caca; masi xca̱ ji'i̱ ycui' Ndyosi, masi na' nu laca̱ nu sca ti Sñi' ycui' Ni, ná jlo ti' ya. Sca ti ycui' Ndyosi Sti na', jlo ti' Ni ni tsa̱ caca bi'.

’Tyempo bi' cañi cha' nxu̱u̱ tya'a ngu' nasiyu̱ re lo'o ngu' xa' nasiyu̱, lo'o jua'a̱ caja cha' ji'i̱ ma̱ cha' nxu̱u̱ tya'a ngu' nasiyu̱ tyijyu'. Ná cutsi̱i̱ ma̱ li'.

Jua'a̱ cu'ma̱ ni, tii ti ti' ma̱ tyi'i̱ ma̱ cha' ná jlo ti' ma̱ ni jacua' tya̱a̱ nu Xu'na ma̱, masi nde ngusi̱i̱, masi cla'be talya, masi hora nxi'ya ndye'e, masi lo'o cua nguxee chaca tsa̱. Tii ti ti' ma̱ tyi'i̱ ma̱ lacua si tsiya' ca tyu'u tucua yu ca̱a̱ yu, cha' ná tyalaa ycui' nu Xu'na ma̱ laja lo'o laja' ti ma̱. Ndi'ya̱ nchcui' na' lo'o ma̱, jua'a̱ lo'o lcaa ñati̱: Tii ti ti' ma̱ tyi'i̱ ma̱ lacua.

Xu̱u̱ tya'a ñati̱ sca tsu' lo'o ngu' chaca tsu', jua'a̱ xu̱u̱ tya'a ñati̱ sca quichi̱ tlyu lo'o ñati̱ chaca quichi̱ tlyu, tyu̱u̱ se'i̱ clyacui̱ chalyuu li'. Lo'o jua'a̱ lcua ti se'i̱ caja jbi'ña ji'i̱ ngu'. Pana lcaa cha' bi' caca lo'o chca nguxana ti cha' chcube' ñati̱ chalyuu, si'i na cua tye ti chalyuu li'.

Pana tya lyiji tye chalyuu li', cha' clyo ntsu'u cha' cañi cha' tso'o cuentya jna' slo lcaa ñati̱ tyucui ña'a̱ chalyuu.

Nde loo la ca̱a̱ quiña'a̱ ñati̱ nu chcui' cha' cuiñi ti ji'i̱ ycui' na'. Chcui' ngu' cha' ycui' Cristo laca ngu', lo'o jua'a̱ cñilo'o ngu' bi' ji'i̱ quiña'a̱ ñati̱ nu jlya ti' cha' bi'.

’Lo'o cu'ma̱ ni, tii ti ti' ma̱ tyi'i̱ ma̱ li' ―nacui̱ Jesús―. Tejeya' ñati̱ cuxi ji'i̱ ma̱, jua'a̱ sta ngu' qui'ya ji'i̱ ma̱ slo ngu' tisiya; quiji'i̱ ngu' bi' ji'i̱ ma̱, masi ca ne' laa ji'i̱ ngu'. Nga'a̱ cha' tsatu̱ ma̱ slo ngu' gobierno, slo ngu' nu laca loo; cuentya jna' cacha' ma̱ lcaa cha' tso'o jna' ji'i̱ ngu' bi'.

Cristo cuiñi caca ngu' bi'. Lo'o jua'a̱ tyu'u tucua xi nu cuiñi nu chcui' cha' tu'ba ji'i̱ ycui' Ndyosi laca ycui' ca ngu'; cha' cuiñi ti cua'ni ngu' bi' cha' tlyu, cha' cube tsa ti' xa' ñati̱. Cua'ni ngu' cuiñi bi' jua'a̱, cha' tyiji̱loo ngu' ji'i̱ ma̱ nti' ngu', lo'o jua'a̱ ji'i̱ lcaa ñati̱ nu cua ngusubi ycui' Ndyosi ji'i̱.

Tya ngulu'u Jesús la xi cha' ji'i̱ ngu' li': ―Lo'o li' ―nacui̱ yu―, nu lo'o ndye nchcube' ñati̱, caca talya ña'a̱ xee cuichaa li', lo'o jua'a̱ nga'aa tyaca̱' xee co' li'. Tyalú cuii lo'o cualya nu ntsu'u nde cua̱ ca lo yuu li', lo'o jua'a̱ xquiña Ni ji'i̱ lcaa na nu ntsu'u nde cua̱.