SAN MARCOS 8
8
Nda Jesús na ndyacu jacua mil tya'a ñati̱
1Ngua chaca tsa̱. Tya tsubi' ndyu'u ti'i̱ quiña'a̱ tsa ñati̱ slo Jesús, bi' cha' nga'aa ntsu'u na cacu ngu' juani. Li' nchcui' Jesús lo'o nu ngu' nu ndyaca tsa'a̱ ji'i̱:
2―Tya'na tsa ti' na' ji'i̱ nu ngu' quiña'a̱ re ―nacui̱―, cha' sna tsa̱ cua nguta'a̱ ngu' lo'o na'. Nga'aa ntsu'u tsiya' ti na cacu ngu' juani. 3Ná tso'o culo na' cña ji'i̱ ngu' re cha' tyaa ngu' juani, ña'a̱ lo'o jbi'ña ti ndya'a̱ ngu'; nga'aa talo ngu' tya'a̱ ngu' tyucui̱i̱ cha' tyalaa ngu' to' tyi ngu', cha' jua'a̱ ndi'i̱ xi ngu' nu tyijyu' tsa lijya̱ ngu' ―nacui̱ Jesús ji'i̱ ngu' nu ndyaca tsa'a̱ ji'i̱.
4―¿Ñi'ya̱ cua'ni na ca nde? ―nacui̱ ngu' bi' li'―, cha' ná ndi'i̱ ni sca ñati̱. Ná caja ñi'ya̱ ta na na cacu ngu' re ―nacui̱ nu ngu' nu ndyaca tsa'a̱ ji'i̱ bi'.
5―¿Ni lcua tya'a xlyá ntsu'u ji'i̱ ma̱? ―nacui̱ Jesús ji'i̱ ngu' bi' li'.
―Cati tya'a ti xlyá teje' lo'o ji'i̱ ya ―nacui̱ ngu' ji'i̱.
6Li' ngulo Jesús cña ji'i̱ nu ngu' quiña'a̱ bi', cha' tyaca'a̱ ngu' lo yuu. Ndaya' yu ji'i̱ nu cati tya'a xlyá teje' bi', ndya xlya'be ji'i̱ ycui' Ndyosi xqui'ya cha' ntsu'u na cacu ngu'. Li' ngusa'be yu xlyá bi', nda yu yu'be ji'i̱ nu ngu' nu ndyaca tsa'a̱ ji'i̱ cha' tacha ngu' ji'i̱ nu ngu' quiña'a̱ bi', cha' cacu ngu' ji'i̱. 7Lo'o xi cualya sube ntsu'u ji'i̱ ngu'; bi' cha' lo'o ngulacua̱ Jesús ji'i̱ cualya bi', li' ngulo yu cña cha' tacha ngu' yu'be cualya bi' ji'i̱ nu ngu' quiña'a̱ bi', cha' cacu ngu' ji'i̱. 8Lo'o ndyacu ngu' ji'i̱, nguaala' tsa ji'i̱ ngu' li'. Lo'o li' nguxuti'i̱ ngu' lcaa satya nu tya'a ndyanu su ndyacu ngu', ngutsa'á̱ cati tya'a chcubi lo'o yu'be bi'. 9La cui' tsa̱ bi' cua ndyacu jacua mil tya'a ñati̱. Lo'o nchcui' salya' Jesús lo'o nu ngu' quiña'a̱ bi', 10li' ndyatí̱ yu ne' yaca ni'i̱ sube lo'o nu ngu' nu ndyaca tsa'a̱ ji'i̱, ndyaa yu lo'o ngu' nde su naa Dalmanuta.
Ña'a̱ cui'ya ngu' sca cha' tlyu nu cua'ni Jesús, nti' ngu'
11Li' ndyu'u tucua xi ngu' fariseo slo Jesús cha' xu̱u̱ ngu' lo'o yu. Ngua ti' ngu' cha' caja ñi'ya̱ chcui' ngu' sca cha' cuxi ji'i̱ yu; bi' cha' ndijña ngu' fariseo bi' ji'i̱ yu cha' culu'u yu sca cha' tlyu ji'i̱ ngu', sca cha' tonu nu tyu'u tucua nde cua̱ chacuayá' ji'i̱ ycui' Ndyosi. 12Li' nda xtyi'i Jesús hasta ca ne' cresiya ji'i̱.
―Lcaa ñati̱ nu lu'ú nde chalyuu tyempo juani ni, ¿ni cha' laca xcui' na nti' ngu' cha' cua'ni na' sca cha' tlyu chacuayá' ji'i̱ ycui' Ni cha' ña'a̱ ngu' ji'i̱? ―nacui̱ Jesús―. Cha' liñi nchcui' na' lo'o ma̱, cha' ná ta ycui' Ni chacuayá' ña'a̱ ma̱ ni sca cha' tlyu ―nacui̱ Jesús ji'i̱ ngu' bi'.
13Lo'o li' nguxtyanu yu ji'i̱ ngu' fariseo bi'; xa' ndyatí̱ yu ne' yaca ni'i̱ sube ti lo'o nu ngu' nu ndyaca tsa'a̱ ji'i̱ bi', nteje tacui ngu' lo tayu', ngutu'u ngu' chaca tsu' li'.
Ngu' fariseo laca ñi'ya̱ nti' scua̱ tiye'
14Ngujlyaa ti' nu ngu' nu ndyaca tsa'a̱ ji'i̱ Jesús cha' tsaa lo'o ngu' na cacu ngu' tsa̱ bi', sca xlyá teje' ti ntsu'u ji'i̱ ngu' nde ne' yaca ni'i̱ sube. 15Lo'o li' nda Jesús chaca cui̱i̱ lo'o ngu':
―Tii ti ti' ma̱ tyi'i̱ ma̱ ―nacui̱ yu―, cui'ya ma̱ cuentya ñi'ya̱ ndu'ni scua̱ tiye' nu nda ngu' bi', nu ngu' fariseo lo'o ngu' nu cuentya ji'i̱ rey Herodes ni.
16Cuaana ti nchcui' ngu' nu ndyaca tsa'a̱ ji'i̱ lo'o tya'a ngu' li':
―Xqui'ya cha' ná ntsu'u la xlyá teje' ji'na, bi' cha' nchcui' yu cha' ji'i̱ scua̱ tiye' lo'o na ―nacui̱ ngu' ji'i̱ tya'a ngu'.
17Pana ngua tii Jesús cha' ná ngua cuayá' ti' ngu' bi'.
―¿Ni cha' laca ndube ti' ma̱ cha' ná ntsu'u na cacu ma̱? ―nacui̱ yu ji'i̱ ngu' bi' li'―. ¿Ha ná jlo ti' ma̱? ¿Ha ná nchca cuayá' ti' ma̱? ¿Ha ndyacu̱' hique ma̱? ―nacui̱ yu―. 18Ntsu'u si'yu cloo ma̱, ¿ha ná nchca ña'a̱ ma̱? Ntucua jyaca̱ ma̱, ¿ha ná nchca cuna ma̱? ¿Ha ná ndyi'u ti' ma̱ tsiya' ti? 19Nu lo'o ngusa'be na' ca'yu tya'a xlyá teje' ndyacu nu ca'yu mil tya'a ñati̱ bi' ni, ¿ni lcua tya'a chcubi ntsu'u yu'be xlyá nu cua nguxuti'i̱ ma̱ li'? ―nacui̱ Jesús ji'i̱ ngu'.
―Tii tyucuaa tya'a chcubi ―nacui̱ ngu' ji'i̱.
20―La cui' jua'a̱ lo'o ngusa'be na' cati tya'a xlyá teje' ndyacu nu jacua mil tya'a ñati̱ bi', ¿ni lcua tya'a chcubi ntsu'u yu'be xlyá nu cua nguxuti'i̱ ma̱ li'? ―nacui̱ yu ji'i̱ ngu'.
―Cati tya'a chcubi ―nacui̱ ngu' ji'i̱.
21―¿Ha bilya caca cuayá' ti' ma̱ lacua? ―nacui̱ Jesús ji'i̱ ngu' bi' li'.
Ngua'ni Jesús jo'o ji'i̱ sca ngu' cuityi̱' ca Betsaida
22Lo'o li' ndyalaa ngu' ca nde quichi̱ Betsaida. Hora ti ñaa lo'o ngu' quichi̱ ji'i̱ sca nu cuityi̱' slo Jesús. Ndijña tsa ngu' ji'i̱ yu cha' sta ya' yu hique nu quicha, ngua ti' ngu'. 23Bi' cha' ndaya' Jesús ya' nu cuityi̱', ndyaa lo'o yu ji'i̱ ca to' quichi̱. Ngutu'u hitya sañi' Jesús cloo nu quicha, ngusta ya' yu cloo nu cuityi̱' bi' li'.
―¿Ha cua ña'a̱ nu'u̱ sca na? ―nacui̱ Jesús ji'i̱ nu quicha.
24Cua ngulane ña'a̱ nu quicha cacua ti li'.
―Cua nchca ña'a̱ na' xi ―nacui̱ nu quicha―. Tsa lyiji tsa tyaca̱' ña'a̱ na', ñi'ya̱ ña'a̱ yaca ña'a̱ ngu' lo'o ndya'a̱ ngu' ―nacui̱ nu quicha bi' ji'i̱ Jesús.
25Xa' ngusta ya' Jesús cloo nu quicha bi'. Lo'o nguxña'a̱ tso'o nu quicha chaca quiya', li' cua ngua ña'a̱ tso'o ji'i̱ lcaa ñati̱; cua ndyaca tso'o cloo li'. 26Pana ngulo Jesús cña ji'i̱ cha' tyaa to' tyi:
―Ná tsaa nu'u̱ nde lquichi̱ juani, ná cacha' nu'u̱ ji'i̱ ñati̱ na ca nu ngua jinu'u̱ ―nacui̱ Jesús ji'i̱ nu ngua quicha bi'.
Ndacha' liñi Pedro cha' ycui' Cristo laca Jesús
27Tya ndyaa la Jesús lo'o nu ngu' nu ndyaca tsa'a̱ ji'i̱, ndyaa ngu' tyu̱u̱ tya'a quichi̱ sube ti ca loyuu su cuentya Cesarea de Filipo. Laja lo'o ndya'a̱ ngu' tyucui̱i̱, li' nchcuane Jesús ji'i̱ ngu':
―Lo'o nchcui' ñati̱ jna', ¿tilaca laca na', nti' ngu'? ―nacui̱ Jesús ji'i̱ ngu' nu ndyaca tsa'a̱ ji'i̱.
28―Ntsu'u ngu' nu nchcui' cha' jyo'o Juan nu ntyucuatya ji'i̱ ngu' tya tsubi' la laca nu'u̱ ―nacui̱ ngu'―. Xa' la ñati̱ ni, nchcui' ngu' cha' jyo'o cusu' Elías laca nu'u̱; lo'o xa' la ñati̱ ni, nchcui' ngu' cha' sca jyo'o cusu' nu ngua tu'ba ji'i̱ ycui' Ndyosi sa'ni la laca nu'u̱.
29―Lo'o cu'ma̱ ni ―nacui̱ Jesús―, ¿tilaca laca na' nti' ma̱? ―nacui̱ yu ji'i̱ nu ngu' nu ndyaca tsa'a̱ ji'i̱.
Hora ti nguxacui̱ Pedro cha' ji'i̱ yu:
―Cristo laca nu'u̱ ―nacui̱ Pedro li'.
30Ngulo Jesús cña ji'i̱ ngu' li', cha' ná cacha' ngu' cha' bi' ji'i̱ xa' la ñati̱.
Nda Jesús cha' lo'o ngu' cha' cua cajaa ti ycui'
31Lo'o li' nguxana Jesús ngulu'u yu ji'i̱ ngu' ndi'ya̱:
―Ntsu'u cha' ca̱a̱ quiña'a̱ tsa cha' ti'í nu caca ji'i̱ ycui' na', masi ycui' Ndyosi cua nda Ni 'na lijya̱a̱ cha' caca na' ñati̱ ―nacui̱ Jesús ji'i̱ ngu'―. Nde loo la chcui' tsa ngu' cuentyu jna'; lo'o nu ngu' cusu', lo'o sti jo'ó nu laca loo, lo'o mstru cha' jo'ó ni, lcaa ngu' bi' chcui' ngu' cha' nu cuiñi laca na'. Lo'o jua'a̱ cujuii ngu' jna' li'; pana lo'o tyu'u scua sna tsa̱, li' tyu'ú na' chaca quiya'.
32Liñi ngulu'u Jesús cha' bi' ji'i̱ nu ngu' nu ndyaca tsa'a̱ ji'i̱; bi' cha' ngusñi Pedro ya' Jesús li', nchcui' lo'o yu cha' ngua ti' cua'a ji'i̱ yu, cha' nga'aa chcui' Jesús jua'a̱. 33Li' nguxtyacui Jesús su ndu̱ ti, nxña'a̱ yu ji'i̱ nu ngu' nu ndyaca tsa'a̱ ji'i̱; ndacu̱' yu tsiya' ti cha' nu nchcui' Pedro li'.
―Tyu'utsu' nu'u̱ 'na, Satanás ―nacui̱ yu ji'i̱ Pedro―, cha' nga'aa tacu̱' loo nu'u̱ cha' 'na. Si'i ñi'ya̱ nu nclacua ti' ycui' Ndyosi nclyacua ti' nu'u̱ juani, sca cha' nu ndya'a̱ tyiquee ñati̱ chalyuu ti nclyacua ti' nu'u̱ ―nacui̱ Jesús ji'i̱ Pedro.
34Lo'o li' ngusi'ya Jesús ji'i̱ nu ngu' nu ndyaca tsa'a̱ ji'i̱, lo'o ji'i̱ nu quiña'a̱ tsa ñati̱ nu lca'a̱ ji'i̱ cha' tya̱a̱ ngu' slo yu. Nchcui' yu lo'o ngu' li':
―Si ntsu'u ngu' nu chañi cha' nti' ngu' tsaa ngu' lo'o na' ―nacui̱ yu―, nga'a̱ cha' xtyanu ngu' bi' lcaa cha' nu ntsu'u tsa tyiquee ngu' bi' ji'i̱, cha' tya'a̱ ngu' lo'o na' lcaa tsa̱, masi cujuii ñati̱ ji'i̱ ngu' bi' cuentya 'na. 35Chcuna' chalyuu ji'i̱ ngu' si xcui' nclyacua tsa ti' ngu' ñi'ya̱ caca ji'i̱ ycui' ti ngu'; pana quije chalyuu nu ná nga'a̱ cha' tye ji'i̱ ngu' si tyaja'a̱ ngu', masi cujuii ñati̱ ji'i̱ ngu' cuentya 'na, xqui'ya cha' nchcui' ngu' cha' tso'o jna' lo'o xa' ñati̱. 36Ná tyanu cha' tso'o ji'i̱ ngu', masi ngua'ni tsa ngu' ngana nde chalyuu nquicha'; lo'o cajaa ngu', li' chcuna' lcaa chalyuu ji'i̱ ngu'. 37Ná taca ta ngu' caya' cha' caja la chalyuu ji'i̱ ngu'. 38Caca tyuju'u ti' na' nu cua nda Ni 'na lijya̱a̱ cha' caca na' ñati̱, nu lo'o ña'a̱ na' ji'i̱ scaa ñati̱ chalyuu nu ntyuju'u ti' jna', masi tyuju'u ti' ngu' bi' ji'i̱ cha' tso'o nu nchcui' ti na'. Si xqui'ya na' tyuju'u ti' ngu' bi' slo ngu' cuxi chalyuu juani, masi slo ngu' suba' chalyuu juani, li' caca tyuju'u ti' na' ji'i̱ ngu' bi' nu lo'o ca̱a̱ na' chaca quiya' nde loo la cha' caca na' loo ji'i̱ ñati̱. Li' lye tsa ña'a̱ xee caca lo'o tya̱a̱ na' chaca quiya' chacuayá' ji'i̱ Sti na'. Ca̱a̱ na' lo'o xca̱ nu tacati tsa ji'i̱ ycui' Ni, cha' lubii tsiya' ti ngu' xca̱ bi' ―nacui̱ Jesús ji'i̱ ngu'.
Currently Selected:
SAN MARCOS 8: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.
