SAN MARCOS 9
9
1Tya nchcui' la Jesús lo'o ngu' li':
―Chañi cha' nu nchcui' na' lo'o ma̱ ―nacui̱ yu―, cha' ntsu'u ngu' nu tya ndu̱ lo'o na chalyuu re juani, nu ca cuayá' ti' cha' cua nguxana cha' laca ycui' Ndyosi loo ne' cresiya ji'i̱ ñati̱ chalyuu, nu lo'o tya lyiji cajaa ngu'. Tlyu tsa chacuayá' ntsu'u ji'i̱ Ni lo'o caca Ni loo li'.
Cua ngutsa'a̱ ña'a̱ tyucui ña'a̱ loo Jesús
2Lo'o cua ndya'a scuá tsa̱ li' ndu'u Jesús ndyaa; lo'o Pedro, lo'o Jacobo, lo'o Juan ndyaa lo'o. Jacua tya'a ti ngu' bi' ndyaa ngu' lo xlya ca'ya cua̱, ná lo'o xa' ñati̱ ndyaa ngu'. Ca bi' laja lo'o na'a̱ ngu' ji'i̱ Jesús, cua ngutsa'a̱ ña'a̱ tyucui ña'a̱ loo yu. 3Na'a̱ ngu' cha' ndubi tsa ña'a̱ ste' Jesús, ngati̱ tsa ña'a̱. Ná nchca ji'i̱ sca ñati̱ chalyuu qui'í̱ ji'i̱ ste' ngu' jua'a̱, masi jlo tsa ti' ngu' ñi'ya̱ nu tyaati̱ late' ji'i̱ ngu'. 4Laja lo'o na'a̱ ngu', li' ndu'u tucua jyo'o Elías lo'o jyo'o Moisés, ndu̱ jyo'o bi' nchcui' ngu' lo'o Jesús. 5Li' nchcui' Pedro lo'o Jesús:
―Mstru ―nacui̱―, tso'o tsa cha' ndi'i̱ ya ca nde lo'o nu'u̱. Ta nu'u̱ chacuayá' cuiñá ya sna tya'a chcua'ya, tsaca laca su tyi'i̱ ycui' nu'u̱, chaca su tyi'i̱ La Moisés, chaca su tyi'i̱ La Elías ―nacui̱ Pedro ji'i̱ Jesús.
6Ndyutsi̱i̱ tsa Pedro lo'o tya'a ndya'a̱, bi' cha' nga'aa jlo ti' ngu' ñi'ya̱ cha' nu chcui' ngu'. 7Lo'o li' ndu'u tucua sca coo nguxi̱i̱ tyucui ña'a̱ hichu̱' ngu' su ndu̱ ngu', li' nguañi nchcui' ycui' Ndyosi lo'o ngu' laja coo bi':
―La cui' yu re laca nu sca ti Sñi' na' ―nacui̱ Ni―, tyaca'a tsa yu 'na. Cua'a̱ jyaca̱ ma̱ ji'i̱ yu re lo'o chcui' yu lo'o ma̱.
8Hora ti nguxña'a̱ ngu' su ndu̱ jyo'o bi' tsa̱, pana na'a̱ ngu' cha' nga'aa ndu̱ nu ngu' bi'; sca ti Jesús ndu̱ lo'o nu sna tya'a ngu' nu ndyaca tsa'a̱ ji'i̱.
9Li' ndu'u ngu' ñaa ngu'. Laja lo'o ngua'ya ngu' lo xlya ca'ya, ngulo Jesús cña ji'i̱ ngu' cha' ná cacha' ngu' ji'i̱ xa' ñati̱ ñi'ya̱ ngua cha' nu cua na'a̱ ngu' lo xlya ca'ya.
―Nu lo'o cajaa ycui' na' nu cua nda Ni 'na lijya̱a̱ cha' caca na' ñati̱, lo'o li' tyu'ú na' chaca quiya', li' taca cacha' ma̱ cha' bi' ji'i̱ xa' ñati̱ ―nacui̱ Jesús ji'i̱ ngu' bi'.
10Ndaquiya' ngu' ji'i̱ cha' nu nchcui' yu, masi ndube tsa ti' ngu' ji'i̱ cha' nu nchcui' yu, nu lo'o cua nacui̱ yu cha' tyu'ú ycui' yu chaca quiya' lo'o ngujuii yu. 11Li' nchcuane ngu' bi' ji'i̱ Jesús:
―Nu mstru cha' jo'ó bi' ni, ¿ñi'ya̱ ndyu'u cha' nu nchcui' mstru bi', lo'o nacui̱ ngu' cha' clyo ntsu'u cha' ca̱a̱ jyo'o Elías nde chalyuu chaca quiya'? ―nacui̱ ngu' ji'i̱ Jesús.
12-13―Chañi, ntsu'u cha' ca̱a̱ jyo'o Elías clyo cha' cua'ni cho'o ji'i̱ lcaa na ―nacui̱ Jesús―. Cacha' liñi na' ji'i̱ ma̱ juani cha' cua laca ndyalaa jyo'o Elías bi' nde chalyuu. Lo'o jua'a̱ cua ngua'ni ngu' lo'o yu ñi'ya̱ nu nscua lo quityi cha' caca ji'i̱ ―nacui̱ Jesús ji'i̱ ngu' bi'―. La cui' jua'a̱, cua nscua cha' jna' lo quityi ji'i̱ ycui' Ndyosi, cha' ntsu'u cha' chcube' na' nu cua nda Ni 'na lijya̱a̱ cha' caca na' ñati̱, lo'o jua'a̱ nscua cha' ntsu'u cha' chcui' ngu' cha' suba' jna'.
Ngua'ni Jesús jo'o ji'i̱ sca yu cuañi' nu ngusñi cui'i̱ cuxi ji'i̱
14Xa' ndyalaa ngu' su ndi'i̱ nu xa' la tya'a ngu' nu ndyaca tsa'a̱ ji'i̱ Jesús chaca quiya'. Cua ndyu'u ti'i̱ quiña'a̱ tsa ñati̱ slo ngu', jua'a̱ ndu̱ xi mstru cha' jo'ó lo'o ngu'; nxlyú mstru bi' cha' hichu̱' ngu' nu ndyaca tsa'a̱ ji'i̱ Jesús. 15Ndube tsa ti' nu ngu' quiña'a̱ lo'o na'a̱ ngu' ji'i̱ Jesús lijya̱. Nxna ngu' slo yu cha' chcui' ngu' lo'o yu li'.
16―¿Ñi'ya̱ cha' nchcui' ma̱ lo'o ngu' jua? ―nacui̱ Jesús ji'i̱ ngu' li'.
17Li' hora ti nguxana nchcui' sca ñati̱ nu ndu̱ laja ngu' bi':
―Mstru ―nacui̱ ji'i̱ Jesús―, na cua ya̱a̱ lo'o na' ji'i̱ sñi' na' slo nu'u̱. Na cu'u̱ yu xqui'ya cui'i̱ cuxi nu ngusñi ji'i̱ yu. 18Lcaa se'i̱ su nxalú cui'i̱ cuxi bi' ji'i̱ yu nclyú yu, li' ndyu'u ngo' tu'ba yu; lye ndyacu la'ya yu, lo'o li' lye ndyaca yaca cuaña' yu. Lo'o jua'a̱ cua ndijña na' ji'i̱ nu ngu' nu ndyaca tsa'a̱ jinu'u̱ jua si tyaja'a̱ ngu' cha' culo ngu' ji'i̱ cui'i̱ cuxi nu ntsu'u ji'i̱ nu quicha re. Pana ná ngua ji'i̱ ngu' ―nacui̱ sti nu quicha bi' li'.
19―Ná jlya ti' cu'ma̱ tsiya' ti ―nacui̱ Jesús ji'i̱ ngu' bi'―. Cuxi tsa cresiya ji'i̱ ma̱. Nga'aa tso'o tyanu na' slo cu'ma̱, nga'aa talo na' ji'i̱ ma̱ tsiya' ti. Pana ca̱a̱ lo'o ma̱ ji'i̱ nu quicha jua slo na' juani.
20Li' ñaa lo'o ngu' ji'i̱ nu quicha slo Jesús. Nu lo'o na'a̱ cui'i̱ cuxi bi' ji'i̱ Jesús, hora ti nguxalú ji'i̱ nu quicha bi'; nclyú lo yuu, nxasu, nxasu, ntyucua ngo' tu'ba li'. 21Nchcuane Jesús ji'i̱ sti nu quicha li':
―¿Ni jacua' nguxana quicha bi'? ―nacui̱ Jesús.
―Tya lo'o cuañi' yu, tya li' ngusñi quicha bi' ji'i̱ yu ―nacui̱ sti nu quicha bi'―. 22Tyu̱u̱ tsa quiya' cua nguxlyú bi' ji'i̱ yu lo quii', nguxtyú ji'i̱ yu lo hitya cha' ngua ti' cui'i̱ cha' cujuii ji'i̱ yu. Cua'ni tya'na ti' nu'u̱ ji'i̱ ya, cua'ni nu'u̱ sca cha' tso'o, cua'ni nu'u̱ jo'o ji'i̱ yu si nchca jinu'u̱ ―nacui̱ sti nu quicha bi' ji'i̱ Jesús.
23―¿Ni cha' laca nacui̱ nu'u̱ 'na jua'a̱, si nchca 'na? ―nacui̱ Jesús ji'i̱―. Lcaa lo cña nchca ji'i̱ sca ñati̱ nu jlya ti' ji'i̱ ycui' Ndyosi ―nacui̱.
24Hora ti nchcui' sti nu quicha bi' li':
―Jlya ti' na' jinu'u̱ ―nacui̱―, xtyucua nu'u̱ 'na cha' jlya la ti' na' jinu'u̱ hora nu lo'o nga'aa jlya tso'o ti' na' ―nacui̱ ji'i̱ Jesús.
25Lo'o na'a̱ Jesús cha' quiña'a̱ la ñati̱ cua tyu'u ti'i̱ ti ngu' slo, li' ngulo yu cña ji'i̱ cui'i̱ cuxi bi':
―Cui'i̱ cuxi nu'u̱ ni, la cui' nu'u̱ laca nu ngua'ni cu'u̱ ji'i̱ nu quicha re ―nacui̱ Jesús―. Culo na' cña jinu'u̱ juani cha' tyu'u nu'u̱ ji'i̱ yu cuañi' re. Nga'aa xlyú nu'u̱ ji'i̱ yu tsiya' ti ―nacui̱ Jesús ji'i̱ cui'i̱ cuxi.
26Ngua'ni bi' cha' cui̱i̱ ngusi'ya nu quicha, xa' lye tsa nguxalú cui'i̱ ji'i̱ nu quicha bi' lo'o ndu'u cui'i̱ ji'i̱ li'. Nclyú nu quicha bi', ntsiya nguliji ti'. Cua quiña'a̱ tsa ngu' na'a̱ ji'i̱.
―Cua ngujuii yu ―nacui̱ ngu' li'.
27Li' ngusñi Jesús ya' nu quicha bi', nguxatu̱u̱ Jesús ji'i̱. Ndatu̱ nu quicha bi', cha' ngua tso'o hora ti.
28Lo'o li' ndu'u Jesús ndyaa yu nde ne' ni'i̱. Li' nchcui' nu ngu' nu ndyaca tsa'a̱ ji'i̱ lo'o yu su ntucua ycui' ti ngu':
―¿Ni cha' ná ngua ji'i̱ ya culo ya ji'i̱ cui'i̱ nu ntsu'u ji'i̱ nu quicha bi'? ―nacui̱ ngu' ji'i̱ Jesús.
29―Sca lo ti cui'i̱ cuxi laca bi' ―nacui̱ Jesús―. Ná nchca ji'i̱ ma̱ culo ma̱ ji'i̱ sca cui'i̱ jua'a̱, si ná jña ma̱ chacuayá' ji'i̱ ycui' Ndyosi cha' caca.
Xa' nchcui' Jesús lo'o ngu' cha' ntsu'u cha' cajaa ycui'
30Lo'o li' ndu'u ngu' bi' quichi̱ bi', nteje tacui ngu' tyu̱u̱ tya'a quichi̱ loyuu su cuentya Galilea bi'. Ná nti' Jesús cha' caja cha' ji'i̱ ngu' quichi̱ bi', cha' nteje tacui ycui' yu lo'o ngu' nu ndyaca tsa'a̱ ji'i̱ yu, 31cha' nti' Jesús culu'u la ji'i̱ nu ngu' nu ndyaca tsa'a̱ ji'i̱ laja lo'o ndya'a̱ ycui' ti ngu'.
―Ntsu'u sca ñati̱ nu cujui' cresiya 'na ji'i̱ ngu' tisiya cha' cua'ni cuxi ngu' lo'o na', masi cua nda Ni 'na lijya̱a̱ cha' caca na' ñati̱ ―nacui̱ Jesús ji'i̱ ngu'―. Cujuii ngu' bi' jna' li'. Pana lo'o tyu'u scua sna tsa̱ tya lo'o cua ndyujuii ngu' 'na, li' tyu'ú na' chaca quiya' ―nacui̱ Jesús.
32Ná ngua cuayá' ti' ngu' nu ndyaca tsa'a̱ ji'i̱ ñi'ya̱ cha' nu nchcui' Jesús lo'o ngu'; pana ná ndacha' ngu' ji'i̱ yu ñi'ya̱ nu nti' ñacui̱ cha' nu nda yu, cha' ntsi̱i̱ ngu' chcui' ngu' lo'o yu li'.
Nchcui' ngu' cha' ndulo la cha' ji'i̱ ycui' ca ngu'
33Lo'o li' ndyalaa ngu' nde quichi̱ Capernaum, ndyatí̱ ngu' ne' sca ni'i̱. Li' nchcuane Jesús ji'i̱ ngu':
―¿Ni cha' nchcui' ma̱ lo'o tya'a ma̱ ca tyucui̱i̱ bi' tsa̱? ―nacui̱ Jesús ji'i̱ ngu' bi'.
34Ná ntaja'a̱ ngu' cacha' ngu' ji'i̱ yu ñi'ya̱ cha' nu cua nchcui' ngu' lo'o tya'a ngu' tyucui̱i̱, cha' ntyuju'u ti' ngu'. Tyempo bi' cua nda ngu' cha' lo'o tya'a ngu' si ndulo la cha' ji'i̱ tsaca tya'a ndya'a̱ ngu'. 35Li' ndyaca'a̱ Jesús, xa' nchcui' yu lo'o nu tii tyucuaa tya'a ngu' nu ndyaca tsa'a̱ ji'i̱:
―Ñati̱ nu nti' caca loo la ji'i̱ tya'a ngu' ni, ntsu'u cha' cua'ni ngu' bi' lcaa cña sube ti cha' xtyucua ji'i̱ tya'a ngu', ñi'ya̱ ndu'ni sca msu cña ji'i̱ xu'na ―nacui̱ Jesús ji'i̱ ngu' bi'.
36Lo'o li' ndu'u Jesús sca la'a ti, ñaa lo'o ji'i̱ sca nu sube slo ngu'. Li' nguxatu̱ yu ji'i̱ nu piti bi' nde loo su ndi'i̱ ngu'. Laja lo'o ngüityi Jesús ji'i̱ nu piti bi', li' nchcui' yu lo'o ngu' chaca quiya':
37―Lo'o xtyucua ma̱ ji'i̱ sca ñati̱ ñi'ya̱ laca nu piti re xqui'ya na', la cui' jua'a̱ na nxtyucua ma̱ 'na laca ―nacui̱ Jesús―. Lo'o jua'a̱, lo'o ndu'ni ma̱ cña 'na, la cui' jua'a̱ ndu'ni ma̱ cña ji'i̱ ycui' Ni nu cua nda 'na lijya̱a̱ nde chalyuu ―nacui̱ Jesús.
Stu'ba ti ntsu'u tyiquee ngu' lo'o na si ná nxu̱u̱ tya'a ngu' bi' lo'o na
38―Mstru ―nacui̱ Juan ji'i̱ Jesús―, cua na'a̱ ya ji'i̱ chaca ñati̱ nu ngulo ji'i̱ cui'i̱ cuxi nu ngusñi ji'i̱ ñati̱. Ndu'ni yu cña bi' chacuayá' jinu'u̱, nacui̱ yu, pana ná ndyaca tsa'a̱ yu lo'o cua. Bi' cha' ngua ti' ya cua'a ya ji'i̱ yu, cha' ná culo yu ji'i̱ cui'i̱ cuxi nu ntsu'u ji'i̱ ñati̱ ―nacui̱ Juan.
39―Ná cua'a ma̱ ji'i̱ ―nacui̱ Jesús ji'i̱ ngu'―. Ñati̱ nu cua'ni sca cha' tlyu chacuayá' jna' nacui̱ ngu', nga'aa ca chcui' ñati̱ bi' cha' cuxi jna' nde loo la. 40Stu'ba ti ntsu'u tyiquee ñati̱ lo'o na si si'i na nxu̱u̱ tya'a ngu' lo'o na. 41Chañi cha' nu chcui' na' lo'o cu'ma̱ juani: si ta laja ti cua ña'a̱ ca ñati̱ masi sca tasa ti hitya co'o ma̱ xqui'ya cha' ñati̱ ji'i̱ Cristo laca ma̱, nde loo la tyacua cha' tso'o ji'i̱ ñati̱ bi'.
Cuxi tsa caca si ntsu'u sca qui'ya nu ndulo la ji'na
42’Ná tso'o culu'u sca ñati̱ tyucui̱i̱ cuxi ji'i̱ ñati̱ nu jlya ti' 'na ñi'ya̱ jlya ti' nu sube ―nacui̱ Jesús―. Tso'o la masi tyaaca̱' sca quichi tonu yane yu cuxi bi', li' xtyú ngu' ji'i̱ yu lo hitya tyujo'o. 43Nga'a̱ cha' xtyanu ma̱ tsiya' ti ji'i̱ sca cha' cuxi nu ndiya tsa ti' ma̱ ji'i̱, masi ndulo tsa cha' bi' ji'i̱ ma̱, nti' ma̱, ñi'ya̱ si laca ya' ma̱. Tso'o la si xana chalyuu nu ná nga'a̱ cha' tye ji'i̱ ma̱, masi ná lo'o cha' cuxi nu ndulo tsa ji'i̱ ma̱ nquicha', cha' li' ná tyalaa ma̱ su cuxi tsa ca bilyaa. Ná ntsu'u cha' tye cha' ndyaqui̱ quii' ca bi', tsa cu' ti ndyaqui̱. 44Ná tye cha' cacu conu' cuaña' ngu' ca bi', ni ná tye cha' ndyaqui̱ quii' tsiya' ti. 45La cui' ti cha', masi ndiya tsa ti' ma̱ ji'i̱ sca cha' cuxi nu ndyu'ni ma̱, masi ndulo tsa cha' bi' ji'i̱ ma̱ nti' ma̱, ñi'ya̱ si laca quiya' ma̱, nga'a̱ cha' xtyanu ma̱ tsiya' ti ji'i̱. Tso'o la si xana chalyuu nu ná nga'a̱ cha' tye ji'i̱ ma̱, masi ná lo'o cha' cuxi bi', cha' li' ná tyalaa ma̱ su cuxi tsa ca bilyaa. 46Ná tye cha' cacu conu' cuaña' ngu' ca bi', ni ná tye cha' ndyaqui̱ quii' tsiya' ti. 47La cui' ti cha', masi ndiya tsa ti' ma̱ sca cha' cuxi nu ña'a̱ ma̱ ji'i̱, nga'a̱ cha' xtyanu ma̱ ji'i̱ cha' bi' tsiya' ti, ñi'ya̱ si na culo ma̱ ji'i̱ ycui' cloo ma̱. Tso'o la si xana chalyuu nu ná nga'a̱ cha' tye ji'i̱ ma̱, masi ná lo'o cha' cuxi bi' nu ndulo tsa ji'i̱ ma̱ nquicha', cha' li' ná tyalaa ma̱ su cuxi tsa ca bilyaa. 48Ná tye cha' cacu conu' cuaña' ngu' ca bi', ni ná tye cha' ndyaqui̱ quii' tsiya' ti.
49’Xñi ycui' Ndyosi lcaa msta̱ nu tyucui tyiquee ngu' sta ngu' cha' tyaqui̱ cuentya ji'i̱ ycui' Ni. Lo'o xi teje' sta ngu' lo msta̱ bi'. Lo'o jua'a̱ xñi ycui' Ndyosi cha' ji'i̱ cua ña'a̱ ca ñati̱ nu talo lo'o tyacua cha' ti'í ji'i̱ ngu'. 50Tso'o tsa teje', ndu'nijo'o tsa ji'na, pana si tye cha' cñi' nu ntsu'u ji'i̱, li' nga'aa cua'nijo'o ji'na, cha' nga'aa caca cñi' bi' chaca quiya'. Lo'o lcaa cu'ma̱ ni, ñi'ya̱ laca teje' laca ma̱; tso'o tsa cña ndu'ni teje' lo'o sca na cacu na, jua'a̱ tso'o tsa cña cua'ni ma̱ laja ñati̱ chalyuu si tso'o ti tyi'i̱ ma̱ lo'o tya'a ma̱.
Currently Selected:
SAN MARCOS 9: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.
