SAN MARCOS 10
10
Ngulu'u Jesús cha' ná xtyanu ngu' ji'i̱ clyo'o ngu'
1Lo'o li' ndu'u Jesús quichi̱ Capernaum bi', ndyaa tyijyu' ca xa' quichi̱ nu ntsu'u su cuentya Judea lo'o xa' la quichi̱ nde chaca tsu' sta'a̱ Jordán. Ca bi' ndyu'u ti'i̱ quiña'a̱ tsa ñati̱ slo yu. Nclyu'u Jesús ji'i̱ ngu' li', ñi'ya̱ nu nclu'u ti yu ji'i̱ ñati̱ nde lcaa quichi̱ su ndya'a̱ yu. 2Li' ndyalaa xi ngu' fariseo slo yu cha' ngua ti' ngu' bi' tyiji̱loo ngu' ji'i̱ Jesús. Li' nchcuane ngu' ji'i̱ yu:
―¿Ha ntsu'u chacuayá' cuentya ji'i̱ cha' cusu' nu ntsu'u ji'na, cha' xtyanu sca ñati̱ ji'i̱ clyo'o yu? ―nacui̱ ngu' bi' ji'i̱ Jesús.
3Li' nguxtyacui Jesús cha' lo'o ngu' bi':
―¿Ni cña ngulo jyo'o Moisés ji'i̱ ma̱ cua sa'ni la lacua? ―nacui̱ Jesús ji'i̱ ngu'.
4―Nda jyo'o Moisés chacuayá' ji'i̱ ngu' qui'yu tya'a na cha' culo quityi cha' xtyanu ngu' ji'i̱ clyo'o ngu' tsiya' ti. Nu lo'o ndu'u quityi ji'i̱ nu qui'yu, ndye cha' clyo'o ngu' tsiya' ti; nga'aa ntsu'u cha' clyo'o ngu' bi' li' ―nacui̱ ngu' ji'i̱ Jesús.
5Nguxacui̱ Jesús cha' ji'i̱ ngu' li':
―Xqui'ya cu'ma̱ nguscua jyo'o Moisés cha' bi', cha' ná ndaquiya' ma̱ tsiya' ti cha' ji'i̱ ycui' Ndyosi ―nacui̱ Jesús―. 6Pana nu lo'o nguxana ntucua quiya' chalyuu, nu lo'o ngüiñá ycui' Ndyosi lcaa lo na, ná ngua'ni ycui' Ndyosi jua'a̱. “Ngüiñá Ni ji'i̱ ñati̱; ngüiñá Ni ji'i̱ sca nu qui'yu, lo'o jua'a̱ ji'i̱ sca nu cuna'a̱ ngüiñá Ni”, nacui̱ quityi ji'i̱ ycui' Ndyosi. 7“Bi cha' lo'o caja clyo'o sca nu qui'yu, li' tyu'utsu' yu to' tyi sti xtya'a̱ yu, cha' tyi'i̱ yu lo'o clyo'o yu, 8cha' caca ngu' sca ti xtañi tyucuaa ngu' li'.” Nga'aa si'i tucua tya'a ñati̱ laca ngu', cha' cua laca ji'i̱ ngu' ñi'ya̱ si laca ngu' sca ti ñati̱. 9Bi' cha' ná tso'o xtyanu ngu' ji'i̱ clyo'o ngu', cha' cua nda ycui' Ndyosi cha' clyo'o ji'i̱ ngu' ―nacui̱ Jesús ji'i̱ ngu'.
10Lo'o ndyaa Jesús ne' ni'i̱ ji'i̱ ngu', li' nchcuane nu ngu' nu ndyaca tsa'a̱ ji'i̱ cuentya ji'i̱ cha' nu nda ca ti yu lo'o ngu'. 11Nguxacui̱ Jesús cha' ji'i̱ ngu' li':
―Lo'o culo sca ñati̱ quityi cha' xtyanu ji'i̱ clyo'o yu, cha' li' taca caja clyo'o yu lo'o chaca nu cuna'a̱ nti' yu, cha' cuxi ndyu'ni yu lo'o nu chaca ñati̱ bi' ―nacui̱ Jesús―. 12Lo'o jua'a̱ sca nu cuna'a̱ nu culo quityi cha' xtyanu ji'i̱ clyo'o, cha' li' taca caja clyo'o lo'o chaca nu qui'yu nti', la cui' ti cha' cuxi ndyu'ni bi' lo'o nu chaca ñati̱ bi' ―nacui̱ Jesús ji'i̱ ngu'.
Ngulacua̱ Jesús ji'i̱ nu sube
13Lo'o li' ngua sca quiya' ñaa lo'o ngu' ji'i̱ tyu̱u̱ tya'a nu sube ca su nga'a̱ Jesús. Ngua ti' ngu' cha' sta ya' ycui' Jesús hique nu sube bi'. Pana ngua'ni tyaala nu ngu' nu ndyaca tsa'a̱ bi' ji'i̱ ngu', cha' ná ca̱a̱ lo'o ngu' ji'i̱ nu sube. 14Lo'o na'a̱ Jesús ñi'ya̱ nu ndyu'ni ngu' nu ndyaca tsa'a̱ ji'i̱, ná ndiya ti' yu cha' ndyu'ni ngu' jua'a̱:
―Ta ma̱ chacuayá' ji'i̱ nu sube cha' ca̱a̱ ngu' ca slo na' ―nacui̱ Jesús ji'i̱ ngu' bi'―. Ná cua'a ma̱ chacuayá' ji'i̱ nu sube bi', cha' ca̱a̱ ngu' slo na'. Ñi'ya̱ laca lo'o jlya ti' nu sube ji'i̱ sti ngu', la cui' jua'a̱ ntsu'u cha' jlya ti' ñati̱ ji'i̱ ycui' Ndyosi, nu lo'o laca Ni loo ne' cresiya ji'i̱ ngu'. 15Chañi cha' nu nchcui' na' ―nacui̱―, cha' ná caca tyatí̱ ngu' cha' ji'i̱ ycui' Ndyosi cha' caca Ni loo ne' cresiya ji'i̱ ngu', si ná tyucui ti' tyiquee ngu' ñi'ya̱ nu ntsu'u tyiquee sca nu sube.
16Lo'o li' ndyala' Jesús ji'i̱ nu sube bi', ngulacua̱ yu ji'i̱ nu sube lo'o ngusta ya' yu hique ngu'.
Nchcui' sca nu culiya' lo'o Jesús
17Tya ndyaa la Jesús tyucui̱i̱ bi', lo'o li' nxna sca nu qui'yu lijya̱ lca'a̱ ji'i̱ Jesús. Ndyatu̱ sti̱' slo Jesús li'.
―Mstru, tso'o tsa ndu'ni nu'u̱ ―nacui̱ ji'i̱ Jesús―. Cacha' nu'u̱ jna', ¿na laca cua'ni na' cha' caja chalyuu nu ná nga'a̱ cha' tye 'na? ―nacui̱ yu.
18―¿Ni cha' laca nti' nu'u̱ cha' ñati̱ tso'o laca na'? ―nacui̱ Jesús ji'i̱ li'―. Sca ti ycui' Ndyosi laca nu chañi cha' tso'o laca Ni ―nacui̱―. 19Jlo ti' nu'u̱ lcaa cña nu ngulo ycui' Ndyosi ji'i̱ ñati̱ cua sa'ni la: “Ná cujuii ma̱ ji'i̱ tya'a ñati̱ ma̱; ná cua'ni ma̱ cha' suba' lo'o clyo'o xa' ñati̱; ná cuaana ma̱ cha' tso'o nu ntsu'u ji'i̱ tya'a ñati̱ ma̱; ná chcui' ma̱ cuentyu ji'i̱ tya'a ñati̱ ma̱; ná cua'ni ma̱ ngana ji'i̱ tya'a ñati̱ ma̱ cuaana ti; lo'o jua'a̱, cua'ni tlyu ma̱ ji'i̱ sti ma̱, ji'i̱ xtya'a̱ ma̱, taquiya' ma̱ ji'i̱ cha' nu nchcui' ngu' bi'”.
20―Mstru ―nacui̱ nu qui'yu bi' li'―, tya cuañi' na' ndaquiya' na' lcaa cña bi'; lcaa yija̱ ndaquiya' na' ji'i̱ cha' bi'.
21Ntsu'u tsa tyiquee Jesús ña'a̱ ji'i̱ nu qui'yu bi'. Xa' nchcui' yu lo'o li':
―Sca ti cña lyiji cua'ni nu'u̱ ―nacui̱ Jesús ji'i̱―. Yaa clya cujui' nu'u̱ lcaa cha' tso'o nu ntsu'u jinu'u̱, cha' tyu'u cñi ta nu'u̱ ji'i̱ ngu' ti'i li'; tyacua xi cha' tso'o jinu'u̱ nde loo la ca su ntucua ycui' Ndyosi. Li' xa' tya̱a̱ nu'u̱ ca slo na' cha' tya'a̱ nu'u̱ lo'o na'.
22Lo'o ndyuna nu qui'yu bi' cha' nu nchcui' Jesús lo'o, xa' ña'a̱ ngulacua ti' li'; xñi'i̱ tsa ti' cha' culiya' tsa nu qui'yu bi'. Ndu'u ndyaa li'.
23Nguxtyacui Jesús nxña'a̱ ji'i̱ ngu' nu ndyaca tsa'a̱ ji'i̱ li'.
―Tucui tsa caca cha' tyalaa ngu' culiya' ca su laca ycui' Ndyosi loo ―nacui̱ Jesús ji'i̱ ngu' bi' li'.
24Ndube tsa ti' ngu' nu ndyaca tsa'a̱ ji'i̱ yu li', cha' nchcui' yu jua'a̱ cha' ji'i̱ ngu' culiya'. Bi' cha' xa' nchcui' Jesús lo'o ngu':
―Cu'ma̱ ngu' cuañi' ―nacui̱ Jesús―, tucui tsa caca cha' caca ycui' Ndyosi loo ne' cresiya ji'i̱ ngu', si tiji̱' tsa ti' ngu' ji'i̱ lcaa cha' tso'o nu ntsu'u ji'i̱ ycui' ca ngu'. 25Lasa la cña tyeje tacui sca na'ni quiya' cuxa, masi sca na'ni tonu ñi'ya̱ sca camello. Lasa la cha' bi', tucui la tyatí̱ sca ngu' culiya' cha' ji'i̱ ycui' Ndyosi cha' caca ycui' Ni loo ne' cresiya ji'i̱ yu.
26Lo'o ndyuna ngu' cha' bi' ndube tsa ti' ngu' li'.
―¿Tilaca taca ji'i̱ clyaá ji'i̱ nu cuxi nu ntsu'u chalyuu lacua, cha' tyalaa ca slo ycui' Ndyosi? ―nacui̱ ngu' ji'i̱ Jesús li'.
27Lo'o ngua tii Jesús ñi'ya̱ nu nclyacua ti' ngu', li' nchcui' yu lo'o ngu' chaca quiya':
―Bi' laca sca cha' nu ná nchca cua'ni ñati̱ chalyuu; pana ycui' Ndyosi ni, nchca ji'i̱ Ni cua'ni cha' tyalaa ngu' slo Ni ―nacui̱ Jesús ji'i̱ ngu'.
28Nchcui' Pedro lo'o li':
―Lo'o cuare ni, cua nguxtyanu ya ji'i̱ lcaa na nu ntsu'u ji'i̱ ya cha' tya'a̱ ya lo'o nu'u̱, ñi'ya̱ nu nacui̱ nu'u̱ cha' cua'ni ya ―nacui̱ Pedro ji'i̱ Jesús.
29―Chañi cha' nu nchcui' na' lo'o ma̱ ―nacui̱ Jesús―, cha' cua ña'a̱ ca ñati̱ nu ntsu'u cha' tsaa tyijyu' cha' cua'ni cña cuentya jna', lo'o jua'a̱ nguxtyanu ngu' lcaa na nu ntsu'u ji'i̱ ngu' cha' ndyu'ni ngu' cña bi', ná xtyanu na' ji'i̱ ngu' bi' jua'a̱ ti. Masi tyi ngu', masi tya'a ngula ngu' masi qui'yu masi cuna'a̱, masi xtya'a̱ ngu', masi sti ngu', masi sñi' ngu', masi yuu nu ntsu'u ji'i̱ ngu', masi tyanu lcaa cha' bi', 30pana la cui' chalyuu juani xa' caja quiña'a̱ la cha' ji'i̱ ngu' bi', tsa ña'a̱ nu nguna' ji'i̱ ngu' bi' ngua ti' ngu'. Caja su caca tyi ngu', caja nu caca tya'a ngula ngu', caja nu caca xtya'a̱ ngu', caja nu caca sñi' ngu', caja yuu su cua'ni ngu' cña; hasta sca siyento tsa lo cua cha' bi' caja ji'i̱ ngu'. Lo'o la cui' jua'a̱ tyacua cha' ti'í ji'i̱ ngu', pana ca nde loo la caja chalyuu nu ná nga'a̱ cha' tye ji'i̱ ngu' bi'. 31Nde loo la caca ngu' nu tyu'u tucua su cua tye ti cha'; nde chu̱' la tyanu ngu' nu ndu'u tucua clyo ―nacui̱ Jesús ji'i̱ ngu'.
Xa' nchcui' Jesús lo'o ngu' cha' cua cajaa ti ycui'
32Xa' ndu'u ngu' ndyaa ngu' li', ndyaa Jesús lo'o nu ngu' tya'a ndya'a̱ yu tyucui̱i̱ tsaa ngu' nde Jerusalén. Nde loo ndyaa ycui' Jesús. Lye tsa ngulacua ti' ngu' tya'a ndya'a̱ yu, jua'a̱ nu xa' la ñati̱ nu ndya'a̱ lca'a̱ ji'i̱ ngu', ntsi̱i̱ tsa ngu'. Ndyaa lo'o Jesús ji'i̱ nu tii tyucuaa tya'a ngu' nu ndyaca tsa'a̱ ji'i̱, ndyaatsu' ngu' sca la'a ti cha' chcui' Jesús lo'o ngu' bi' ñi'ya̱ cha' nu caca ji'i̱ ycui' yu nde loo la.
33―Cua'a̱ jyaca̱ ma̱ ―nacui̱ Jesús ji'i̱ ngu' bi' li'―, cua ngusñi na tyucui̱i̱ nde ca'ya juani cha' tsaa na Jerusalén. Cajua taya' ngu' 'na nu cua nda Ni 'na lijya̱a̱ cha' caca na' ñati̱, cha' tsaa lo'o ngu' 'na slo sti jo'ó nu laca loo, slo mstru cha' jo'ó. Cua'ni cuayá' ngu' bi' 'na li'. Chcui' ngu' cha' ntsu'u qui'ya 'na, lo'o jua'a̱ xqui'ya bi' ntsu'u cha' cajaa na'. Li' tsaa lo'o ngu' bi' 'na slo ngu' xa' tsu' nu laca loo ji'i̱ lcaa na. 34Li' xtyí lo'o ngu' bi' 'na, tyu'u hitya sañi' ngu' bi' loo na', quiji'i̱ ngu' bi' 'na lo'o reta. Li' cujui'i̱ ca'a̱ ngu' bi' 'na lo crusi cha' cajaa na'. Pana lo'o tyu'u scua sna tsa̱, li' tyu'ú na' chaca quiya'.
Ndijña Jacobo lo'o Juan sca cha' tso'o ji'i̱ Jesús
35Lo'o li' ñaa Jacobo lo'o Juan tya'a slo Jesús. Sñi' Zebedeo laca ngu' bi'.
―Mstru ―nacui̱ ngu'―, tyu'u cha' clyu ti' jinu'u̱, ntsu'u sca cha' nu nti' ya cha' cua'ni nu'u̱ cuentya ji'i̱ ya ―nacui̱ ngu' ji'i̱ Jesús.
36―¿Na laca nti' ma̱ cha' cua'ni na' cuentya ji'i̱ ma̱? ―nacui̱ Jesús ji'i̱ ngu' li'.
37―Cua'ni nu'u̱ cha' tso'o ta nu'u̱ chacuayá' ji'i̱ ya cha' stu'ba ti tyaca'a̱ ya lo'o nu'u̱ ca su tlyu su xee tsa, ca su caca nu'u̱ loo nde loo la ―nacui̱ ngu' bi'―. Tsaca ya tyaca'a̱ ya la'a tsu' cui̱ su ntucua nu'u̱, chaca ya tyaca'a̱ ya la'a tsu' coca jinu'u̱.
38―Ná jlo ti' ma̱ ñi'ya̱ cha' ndijña ma̱ 'na juani ―nacui̱ Jesús ji'i̱ ngu'―. ¿Ha taca ji'i̱ ma̱ cha' co'o ma̱ taná clyaa' nu nga'a̱ cha' co'o na'? ¿Ha talo ma̱ si xcube' ngu' ji'i̱ ma̱ ñi'ya̱ nu nga'a̱ cha' xcube' ngu' 'na nu lo'o cujuii ngu' 'na?
39―Taca ji'i̱ ya ―nacui̱ ngu' ji'i̱ Jesús li'.
―Chañi cha' lo'o cu'ma̱ nga'a̱ cha' co'o ma̱ taná clyaa' nu nga'a̱ cha' co'o ycui' na' ―nacui̱ Jesús―. Chañi cha' chcube' ma̱ ñi'ya̱ nu nga'a̱ cha' xcube' ngu' 'na. 40Pana, nu tyaca'a̱ ma̱ la'a tsu' cui̱ 'na, nu tyaca'a̱ ma̱ la'a tsu' coca 'na ni, ná ntsu'u chacuayá' 'na cha' ta na' su tyaca'a̱ ñati̱ ca ndacua. Cua laca ngusubi ycui' Ni ji'i̱ ñati̱ nu tyaca'a̱ nde sii' na' tyempo bi' ―nacui̱ Jesús ji'i̱ ngu'.
41Nu xa' la tii tya'a ngu' nu ndya'a̱ lo'o Jesús ni, lo'o ngua tii ngu' ñi'ya̱ cha' laca nu ngüijña Jacobo lo'o Juan ji'i̱ Jesús, chi̱i̱ tsa ngua ti' ngu' ña'a̱ ngu' ji'i̱ ngu' bi' li'. 42Pana nchcui' Jesús lo'o ca ta'a ngu' sca tyempo ti:
―Jlo ti' ma̱ cha' nu ngu' nu laca loo ji'i̱ ngu' xa' tsu' ni, tyaala tsa ngu' bi' ―nacui̱ Jesús―. Lye tsa nclyo ngu' bi' cña ji'i̱ ngu' ca quichi̱ tyi ngu'. 43Pana nu cu'ma̱ ni, ná tso'o cua'ni ma̱ jua'a̱. Lcaa lo cña nu taca xtyucua ma̱ ji'i̱ tya'a ñati̱ ma̱, bi' cña ntsu'u cha' cua'ni ma̱, si cua nti' ma̱ cha' caca ma̱ loo ji'i̱ ngu' bi'. 44Lo'o jua'a̱ si nti' ma̱ cha' ndulo la cha' ji'i̱ ma̱ cuentya ji'i̱ ngu' tya'a ma̱, ntsu'u cha' cua'ni ma̱ ñi'ya̱ si laca ma̱ msu ji'i̱ tya'a ñati̱ ma̱, masi ná lo'o caya'. 45Na' nu cua nda Ni 'na lijya̱a̱ cha' caca na' ñati̱, ná lijya̱ na' nde chalyuu cha' caja msu 'na; ycui' na' laca na' msu ji'i̱ ñati̱, bi' cha' lijya̱ na'. Na cua lijya̱ na' cha' cajaa na' xqui'ya qui'ya nu ntsu'u ji'i̱ ñati̱, cha' cua'ni lyaá na' ji'i̱ quiña'a̱ tsa ñati̱ li' ―nacui̱ Jesús ji'i̱ ngu'.
Ngua'ni Jesús jo'o ji'i̱ Bartimeo nu cuityi̱'
46Lo'o li' ndyalaa Jesús ca quichi̱ Jericó. Nteje tacui ngu' cla'be quichi̱ bi'. Nu lo'o cua tyaa ti Jesús lo'o ngu' nu ndyaca tsa'a̱ ji'i̱, li' quiña'a̱ tsa ñati̱ ndyaa lo'o ngu' bi'. Jua'a̱ ngua li', to' tyucui̱i̱ nga'a̱ sca nu cuityi̱' nu naa Bartimeo, ndijña msta̱ ji'i̱ ngu' nu lijya̱ bi'. Sñi' Timeo laca nu quicha bi'. 47Nu lo'o ngua tii yu quicha bi', cha' lijya̱ ycui' Jesús Nazaret, cui̱i̱ ngusi'ya ji'i̱ Jesús li':
―Jesús, ñati̱ tya'a ji'i̱ jyo'o David laca nu'u̱ ―nacui̱―, cua'ni tya'na ti' nu'u̱ jna' ―nacui̱ nu quicha bi' ji'i̱ Jesús.
48Tyu̱u̱ tya'a ñati̱ ngua ti' cua'a ngu' ji'i̱ nu quicha bi', cha' cuaana ti tyaca'a̱, ngua ti' ngu'; pana ná ntaja'a̱ nu quicha bi', cui̱i̱ la nxi'ya li':
―Cusu', ñati̱ tya'a ji'i̱ jyo'o David laca nu'u̱ ―nacui̱ nu quicha―, cua'ni tya'na ti' nu'u̱ jna'.
49Li' ndatu̱ Jesús, se'i̱ ti ndu̱ yu li'.
―Ñacui̱ ma̱ ji'i̱ yu cha' ca̱a̱ yu ca nde ―nacui̱ Jesús.
Li' nacui̱ ngu' ji'i̱ nu cuityi̱' cha' tsaa ca slo Jesús.
―Cua'ni tlyu tyiquee nu'u̱ juani ―nacui̱ ngu' ji'i̱ nu quicha bi'―. Tyatu̱ nu'u̱, yaa clya nu'u̱ slo La Jesús jua ―nacui̱ ngu'.
50Li' ngulo nu quicha plee ji'i̱, nxtyanu ji'i̱. Hora ti ndyatu̱ ngusna ndyaa slo Jesús. 51Li' nchcui' Jesús lo'o nu quicha bi':
―¿Na laca nti' nu'u̱ cha' cua'ni na' lo'o nu'u̱? ―nacui̱ yu ji'i̱.
―Mstru ―nacui̱ nu cuityi̱'―, cua'ni nu'u̱ jo'o 'na, cha' xa' tyaca̱' tso'o xee cloo na' ña'a̱ na' chaca quiya' ―nacui̱ ji'i̱ Jesús.
52―Tso'o ―nacui̱ Jesús ji'i̱―, tyaa nu'u̱ to' tyi juani. Jlya ti' nu'u̱ 'na, bi' cha' cua ndyaca tso'o cloo nu'u̱.
Hora ti ngua tso'o cloo nu cuityi̱' bi', na'a̱ chaca quiya'. Li' ndu'u lca'a̱ ji'i̱ Jesús tyucui̱i̱.
Currently Selected:
SAN MARCOS 10: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.
