San Mateo 14

Che gujt Juan Bautist

(Mr. 6:14‑29; Lc. 9:7‑9)

1Lagajc neṉ redxejga Herodes, ni laaza tetrarca, biejn diajgni diidx xcuent ni cayujn Jesús. 2Dxejc räjpni lo rexmosni:

―Dee najc Juan Bautist. Pet agubaṉsacni lo rebeṉgut, ni'cni rajpni yäḻrnibee te rujnni remilagwr.

3Si'c gunii Herodes sa'csi laani basäuuni Juan neṉ latzguiib. Niluxh gunibeeni biliibni con cadeṉ neṉ latzguiib xcuent Herodías, ni gujc chääl bejtzni Felipe. 4Bidxe'chni sa'csi räjp Juan lo Herodes:

―Et laadi rujnlu rbäznäjlu chääl bejtzlu.

5Rlajz Herodes nugu'tni Juan, luxh rdxejbni rebeṉguejdx, sa'csi guiraareni rniireni Juan najc te niguii ni rnii xtidx Dios. 6Dxejc che gojl laj Herodes gujc lanij, birii xindxa'p Herodías te baya'ni nez loj regolnejdx. Luxh sa'csi bidxaglazduxh Herodes baya'ni, 7räjpni loj gunaaga:

―Gunab xhitis ni rlajzlu, sa'csi gudix lazä gunidxä ni guiniabtislu.

8Dxejcti gunaaga, abalijdx xnannini, räjpni lo Herodes:

―Loj te platóṉ baniidx bitiuyejc Juan Bautist.

9Diidxga benhuin lastoo ṟeii Herodes, per sa'csi abia'n diidx, niluxh abiejn diajg rebejṉ, gunibeeni gudeedreni nani guiniab gunaaga. 10Dxejcti gunibeeni biru' yejc Juan Bautist neṉ latzguiib. 11Sas biädnäreni yejcni lo te platóṉ, badeedrenini loj gunaaga. Dxejcti gunaaga badeednini lo xnanni.

12Dxejcti bidzujṉ rexpejṉ Juan sanäreni togoolga te huicua'tzrenini. Dxejcru huisa'nreni diidx loj Jesús.

Bayaan Jesús gaii miḻ bejṉ

(Mr. 6:30‑44; Lc. 9:10‑17; Jn. 6:1‑14)

13Che biejn diajg Jesús xhi guzajc Juan, xtebni huä'pni neṉ te barcw huijni stee laad nez lo reyubijdz. Che gucbee rebejṉ caro sääni, huinajlreni Jesús lo yuj. Guiraa neṉ reguejdxga biriireni. 14Che birii Jesús neṉ barcw, bahuiini loj xhidalduxh bejṉ, dxejc balazlajznireni, basiajcni rebejṉ nani racxhuu. 15Cheni acayu' guxhijṉ, gubig rexpejṉpacni lojni räjpreni:

―Rut rbäjzdi nez lo reyubijdzre, niluxh agudxej ṉaj. Basadiidx rebejṉ te jiireni nez rerench te chasiireni xhi gaureni.

16Räjp Jesús:

―Xhicuent jiireni. La'tu coḻgudeed xhi gaureni.

17Dxejcti räjpreni:

―Xhetru rajpdinu ree. Gaiitis yätxtiil näjza tio'p bäjl rajpnu.

18Laani räjpni:

―Coḻtanäni ree.

19Dxejcti gunibeeni gurej rebejṉ lo guixa'. Dxejcti cua'ni guigaii yätxtiil näjza guiro'p bäjl, guläsni lojni xhaguibaa, badeedni xquixhtios lo Dios, dxejcti gula'ni reyätxtiil. Badeednini loj rexpejṉpacni. Dxejcti rexpejṉpacni gudisrenini loj rebeṉ xhidajl. 20Guiraareni gudajw, gudxaj xque'reni. Dxejcti batie'reni yätxtilbiujy nani bia'n. Si'cti tzubitio'p dxijm̲ gudxajni. 21Renani gudajw najcreni si'cti gaii miḻ niguii, xhet näjdi regunaa niclaza rebiuux bigab.

Gusaj Jesús lo nisdoo

(Mr. 6:45‑52; Jn. 6:16‑21)

22Sas gunibee Jesús biu' rexpejṉpacni neṉ barcw te ganidreni tedreni stee lad nis laḻni casadiidxni rebejṉ. 23Che gulujx basadiidxni rebejṉ, huä'p Jesús yecdajn te xtebni guninäjni Dios Xtadni. Che gojl guxhijṉ, ro'c sugaxteb Jesús. 24Luxh barcw galäii lo nis sasaj. Cagusnibduxh reoḻ barcw, liriääzni lo nis sa'csi cabi' beduxh cadro sääreni. 25Rsildooru gubig Jesús, bidzujṉni lojreni, siädsajni lo nisdoo. 26Che bahuii rexpejṉpacni siädsajni lo nisdoo, bidxejbreni, räjpreni:

―Coḻhuii te fantasmni ―guredxa'reni sa'csi bidxebduxhreni.

27Dxejc gunii Jesús lojreni, räjpni:

―Na'c guidxejbtu, laa naräni; coḻsutijp lastootu.

28Dxejcti gunii Pedr lojni, räjpni:

―Dad, palga lujni, gunibee jiälä lojlu nez lo nisre.

29Räjp Jesús:

―Gudaa pues.

Dxejcti birii Pedr neṉ barcw gusajni lo nis te sääni nez loj Jesús. 30Che bahuii Pedr beduxh ni cabi', bidxejbni, dxejc gusloj cayääzni neṉ nisdoo. Guredxa'ni, räjpni:

―Dad, ¡gulää narä!

31Lagajc dxejc gunaaz Jesús ṉaani, räjpni loj Pedr:

―Guxii rajplu yäḻrililajz. ¿Xhicuent guctio'p lajzlu?

32Che huä'preni neṉ barcw, guläzgajc bej. 33Dxejcti renani sää neṉ barcw bazuxhijbreni nez loj Jesús räjpreni:

―Guliipacni najclu Xi'n Dios.

Basiajc Jesús rebeṉ racxhuu guedx Genesare't

(Mr. 6:53‑56)

34Che gudejdreni lo nis, bidzujṉreni nez lo reyuj xten Genesare't. 35Che biembee rebeṉ ro'cni, batie'chreni diidx guideb gabi lajdxreni. Dxejcti biädnäreni guiraa rebeṉ racxhuu lojni. 36Gunabduxhreni gusaanni caṉreni ro' xhajbtisni. Dxejcti guiraa renani gudajn xhajbni, biajcreni.

Currently Selected:

San Mateo 14: zaw

Highlight

Copy