Exodus 4
4
Mosese tatamnartulititauvok. Egipteneliarpok.
1Mosese kiovoᴋ oᴋarlune: Ahâgle, okperijomângilânga, nipigalo nâlagomângilât, oᴋaromârpulle: Nâlekab sakᴋervigitsangilâtit.
2Nâlekable oᴋautivâ: Suna tigumiarᴋiûk? Oᴋarpok: Ajaupiak.
3Oᴋarporlo: Nunamut egileruk! Nunamullo egingmago, tagva ᴋuglugiangorpok; Mosesiblo ᴋemâlerpâ.
4Nâlekable oᴋautivâ: Isaklugo pamiungagut tiguleruk! Isaklugo tagva tigungmago, aggangine ajaupiangorivok.
5Okperᴋovlugit, Nâlekab atâtangita Gûdingata, Abrahab Gûdingata, Isaab Gûdingata, Jakob Gûdingata sakᴋervigingmatit.
6Nâlekablo amma oᴋautivâ: Aggatit ikkiavit iluanut ilikit! Tagva aggane ikkiame iluanut ilivait, amuarmagillo sunaubva, kallaktut aputitut ᴋaᴋortigijut.
7Oᴋarporlo: Amma aggatit ilikit ikkiavit iluanut! Iligivaillo amma ikkiame iluanut, amumagillo sunaubva, uviningatut ilingalerêrivut.
8Tagva okperijomângikunitit, nipîllo nâlangnago tatamnartokut sivorlikut, nipît okperijomârpallaivât tatamnartokut kingorlikut.
9Tatamnartugle tâpkoa maggûk okperinajangipatikik nippîllo nâlangnago, imermik ᴋallujartorit kôngmit nunamut panertomut kovilugo, tagvainak kôngmit ᴋallujat aungoromârpok nuname panertome.
10Mosesele oᴋarpok Nâlekamut: Takûk, Nâlegak, oᴋaloritsangilanga, sivornganelônêt mânnalônêt oᴋauseᴋaravit kivgarnut, ᴋaneralo oᴋaralo oᴋumaingmanik.
11Nâlekable oᴋautivâ: Kia inuit ᴋaneᴋartipagît? Ubvalo kia oᴋajuitut tussilartullo tautuktullo tautungitullo taimaitipagît? Uvanga Nâlegak pingitungâ?
12Taimaimat aularit taikunga. Uvanga ᴋanît najoromavara ajoᴋertoromavagillo oᴋautigijaksarnik ᴋanok.
13Oᴋarporle: Nâlegak, tililauruktôk kinalônêt tilijomajat.
14Tagva Nâlegak ningaumajârpok Mosese pivlugo, oᴋarlunelo: Arone Leviteojok angajugingipiûk? ᴋaujimavara tâmna oᴋaloringmat. Ahâglo, pagrearpâtit, takogunitillo ômamut ᴋuviasugomârpok.
15Tâmna oᴋarvigijaksarivat, oᴋausiksat ilivlugit ᴋaninganut. Uvangalo ᴋanît najoromavara ᴋaningalo, ajoᴋertoromavaptiglo iliortuksauniptingnik ᴋanok.
16Tâmnalo oᴋartigijaksarivat inungnut, ilingnut ᴋanertut-ituksauvok tâmna, igvillo tâpsomunga Gûdetut-ituksauvotit.
17Ajaupiarlo una tigujaksarivat aggangnut, tâpsomûna tatamnartunik piniartuksaugavit.
18Moseselo aularlune uterpok sakkiminut Jêtromut, oᴋarporlo tâpsomunga: Omât, aularlangatôk! ᴋatangutikka Egiptenemêtut utervigilakka, takojomavlugit sule inôngmangâta. Jêtro oᴋarpok: Ulapirksauteᴋarlutit aularit.
19Nâlegak oᴋarpoktauk Mosesemut Midiamêtilugo: Atê, Egiptenemut uterit, angutit ilingnik toᴋotsinasuartut ilûnnatik toᴋungmata.
20Tagva Mosese nuliane ernîngnelo ilagivlugit siuterᴋortojokullo ingergatilugit uterpok Egiptenemut, Gûdiblo ajaupianga tigumiarpâ.
21Nâlegarlo oᴋarpok Mosesemut: Tikingmikuvit Egiptenemut, kamatsialerit, tatamnartunik tamainik ilijamnik aggangnut piniarᴋovlutit Faraub sângane. Uvangale ômatinga mangaititsomârpara, inuillo aularᴋojomângilait.
22Tagva oᴋartuksauvotit Faraomut: Nâlegak oᴋauseᴋarpok imâk: Israêle tagva ernera angajuklek.
23Oᴋautivagillo: Ernera aularᴋojaksarivat, kivgartorᴋovlugo uvamnik. Aularᴋojomangikungne, tagva ernît angajuklek toᴋotsomavara.
24Apᴋometilugole siniktarvingme Nâlekab tikipâ toᴋonasuarlugo.
25Tagva Ziporab savik ujaraujok tiguvâ, ernimelo uviningata amingata nuvua kipivâ, itiganginullo egilugo oᴋarpok: Ilâ, auliksôvlutit uigivagit.
26Tagva pijungnairpâ. Taipsomane oᴋarpok: Auliksôvlutit uigivagit, kipimanek pitjutigivlugo.
27Nalekablo Arone oᴋarvigivâ: Aularit Mosese pagrearlugo inuᴋangitomut. Aularamelo naipipâ Gûdib ᴋakᴋangane, kunikpâlo.
28Mosesiblo Aronemut oᴋautigivait tamaita Nâlekab tilijime oᴋausingit, tatamnartullo tamaita perᴋojangit.
29Moseselo Aronelo aularpuk Israêlikut angajoᴋângit tamaita katitilugit.
30Aroniblo oᴋautsit tamaita Nâlekab oᴋauserijangit Mosesemut oᴋauserivait, tatamnartullo piniarnerivait inuit sângane.
31Inuillo okpilerput; tusaramiglo Nâlekab Israêlikut takojartormagit, kapiasuktitauningillo takonârmagit, tagva okᴋungalerput opigosuklutik.
Currently Selected:
Exodus 4: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
