Genesis 28
28
Jako ᴋemâvoᴋ Haranemut.
1Isaab tagva Jako ᴋairᴋovâ saimauserlugolo; perᴋolugolo oᴋautivâ: Nulianingniarnak Kânaanib panningita illanganik!
2Parngnailerille ingergarniarlutit Mesopotâmiamut, anânavit atâtangata Betuelib iglunganut, taikangallo nulianilerit Labanib, anânavit anningata panningita illanganik.
3Gûdible ajugaᴋangitub saimauserlitit, kinguvâktârtilutillo, unuksivalliatilutillo inôᴋatigêksoangortilutit;
4Illingnullo tuniliuk saimanartoᴋ Abrahab pinga, illingnullo kinguvâksarnullo kingunikkut, kingormgujerᴋovlutit nunamik tujormiangorvigijarnik, Gûdib tunijanganik Abrahamut!
5Taimak Isaab Jako aularᴋongmago, ingergavoᴋ Mesopotâmiamut Labanemut, Siriamiomut, Betuelib erninganut, Jakoblo Esauiblo anânangata Rebekkab anninganut.
6Esauele tukisilerame, Isaab Jako saimauserlugo aularᴋongmago Mesopotâmiamut, taikangat nulianirᴋovlugo, saimauserlugolo inerterlugolo oᴋautingmago: Nulianingniarnak Kânaanib panningita illanganik,
7Jakoblo atâtakûngne nâlangmagik aularlunelo Mesopotâmiamut;
8Tukisileramelo Esaue, atâtame Isaab Kânaanib panningit idluaringimagit;
9Tagva Ismaêlemut aivoᴋ, nulianiklunelo Mahâlatemik, Ismaêlib Abrahab erningata panninganik, Nabajotib najanganik, nuliarigêrtângminut illautilugo.
10Jakole aularpoᴋ Bersêbamit, ingergavlunelo Haranemut.
11Nunallo illanganut tikkiname, unnuivoᴋ tagvane, seᴋineᴋ tachisimangmat. Ujaraillo tagvanêtut illanganik tigusivoᴋ akitiginiardlugo, tagvungalo innalerpoᴋ.
12Sinnaktômavorlo: sunaubva majûtit nuname nappajut, issuallo aktoajoᴋ ᴋilangmut. Sunaubvalo, Gûdib engelingita majoarvigivait aᴋᴋarvigilaitalo.
13Sunaubvalo, Nâlegaᴋ ᴋollâne nangerpoᴋ oᴋarlunelo: Uvanga Nâlegauvunga, atâtavit Abrahab Gûdinga, Isaablo Gûdinga. Nuna innangavigijat tunijomavara illingnut kinguvâksarnullo.
14Kinguvâksatillo nunab sanningititut unuktigijomârput, siamaromârpotillo paunga taunungalo avungalo aungallo, illikkullo kinguvâksakullo kinguvârêt nunamêtut ilûnamatsiatik saimausertaujomârput.
15Ahâglo, illagivagit saputijomavagillo, naukullônêt ingergaralloarmangârpit; uttertitsomavagillo nunamut mattomunga, allarniatsanginapkit, piniarᴋârtinanga tamainik oᴋautigijamnik illingnut.
16Jakolo siningminit tupalerame, oᴋarpoᴋ: Illâle! tamadja Nâlekab najugâ, uvangalo nellovara.
17Kuksasuklunelo oᴋarpoᴋ: Kappianarmêk nuna tamanna! Tamannauvoᴋ illa Gûdib iglunga; tamannauvoᴋ ᴋilaub upkoanga!
18Uvlârarsukullo Jako makiname, ujaraᴋ tiguvâ, akitigijane, nallunaikutangortilugolo nappartipâ, orᴋsumiglo koverivâ ᴋânga.
19Nunalo tamanna Bêtelemik taivâ: sivorngagut iglugasait Lûsemik atteᴋaralloarmatta.
20Jakolo angerpoᴋ, angeruteᴋarlune imâk: Gûdib illagikpanga, saputivlungalo apᴋome mattomane ingergarvigijamne, nerᴋiksaniglo tunitjivigikpanga nerrijaksamnik, annorâniglo attijaksamnik,
21Atâtamalo iglunganut utteruma ᴋanoenanga, tagva Nâlegaᴋ Gûdigijomavara.
22Ujararlo una nappartitara, nallunaikutaksautilugo igluksaujomârpoᴋ Gûdemut, ilûnatiglo uvamnut tunijavit tellimaujoanimmarik tunitjivigijomârpagit.
Currently Selected:
Genesis 28: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
