Genesis 38
38
Judalo Tamarelo.
1Nalliutome taipsomane Juda aularpoᴋ ᴋatangutiminit, angut Adullamioᴋ itervigivlugo Hiramik attelik.
2Tagvane Judab takovâ Kânaanemiut illangata Suamik attigub pannia, tiguvlugolo tuttikpâ.
3Singailerporlo ernermiglo ernivoᴋ, tâmna Gêremik atserarpâ.
4Amma singailerivoᴋ ernermiglo ernivoᴋ, tâmna Onanemik atserarpâ.
5Ammalo ernermik ernivoᴋ, tâmna Sêlamik atserarpâ. Judale Kesibemêpoᴋ erniaringmago.
6Judable ernine angajukleᴋ Gêre nuliaksamik tunitjivigivâ Tâmaremik attilingmik.
7Kissiane Judab erninga angajukleᴋ ajortôvoᴋ Nâlekab sângane, taimaimat Nâlekab toᴋopâ.
8Tagva Judab Onane oᴋautivâ: Angajuvit nulianga tuttiguk; ukkuararsugigangne nuliarijaksarivat, angajungnut kinguvâksarsiniarlutit.
9Onanelo nallungilaᴋ, kinguvâksaᴋ nangminerijaksaringinamiuk, tuttiklugolo angajume nulianga nunamut kattaktitsivoᴋ, angajuminut kinguvâksarsijomanane.
10Taimailiorninga ajortôngmat Nâlekab sângane, tâmnatauᴋ toᴋopâ.
11Judablo ukkuane Tâmare oᴋautivâ: Uigarniovlutit atâtavit iglunganêtuarit ernera Sêla inumariolerᴋârtinago! — issumaᴋarame: Tâmnatauᴋ toᴋolârpallaivoᴋ angajûngmitut. Tâmarelo aularpoᴋ atâtame iglunganêtuarlune.
12Uvlut unuktut nângmatta, Suab pannia Judab nulianga toᴋovoᴋ. Oggorijungnairamiuk, Juda majorarpoᴋ saugaᴋotiminik sallijunut Timnatemut, illanârijane Hira illagivlugo.
13Tâmarelo unipkautivât oᴋautivlugo: Takkuit, sakkît Timnatemut majorarpoᴋ, saugaᴋotine sallijartorlugit.
14Tagva annorât atorpaktane uigarnionermine pêrpait, kênailitamut ingminik mattuvlune uliklunelo, ingiporlo Enaib itertarvianut, apᴋosinermêtub Timnatemut ilingajome, Sêla inumariojarêrtoᴋ takogalloarlugo nuliangotitaulunginame tâpsomunga.
15Judable takogamiuk, anguniarpaktônasugivâ, kênarne mattungmago.
16Sâvigivâlo apᴋosinerme oᴋarlune: Tuttilaulagin-ai? nallovlune ukkuarinamiuk. Kiovâ: Sumik tunitjivigijomavingâ tuttingniarlunga?
17Oᴋarporlo: Tuktungajoᴋ piaraᴋ illingnut tilikliutiniarpara nergjuteᴋotimnit. Kiovâle: Tilikliuterᴋârnago satoraksanik tunitjiviginiarᴋingâ?
18Oᴋautivâ: Sumik satoraksamik tunitjiviojomavêt uvamnut? Kiovâ: Naᴋitjutingnik nuvijutingniglo ajaupiarniglo aggangnêtomik. Tagva tamakkoninga tunitjivigivlugo tuttikpâ; tâpsomunga singailerpoᴋ.
19Kingorngane (Tâmare) nikovidlune aularpoᴋ tagvangat kênailitanelo pêrpâ, annorât atorpaktane uigarnionermine attingmivlugit.
20Judable tuktungajoᴋ piaraᴋ tilikliutivâ illanârijamigut Adullamiokut, satoraksat arnamit utterᴋolugit; kissiane nagvângilâ taimna.
21Tagva inuit taikanêtut aperivait oᴋarlune: Naûk anguniarpaktoᴋ taimna Enaime apᴋosinerme iksivalauᴋtoᴋ? Kiovâlle: Anguniarpaktoᴋalaungilaᴋ tagvane.
22Judamullo utterpoᴋ oᴋarlune: Nagvângilara; inuillo taikanêtut oᴋarput anguniarpaktoᴋalaungitomik.
23Juda oᴋarpoᴋ: Unêt tigutuinarligit, kangusuktitaurᴋonanuk. Tuktungajoᴋ piaraᴋ una tilikliutigalloarapko, nagvângilat.
24Taᴋᴋit pingasukassait nângmatta, Juda unipkautijauvoᴋ oᴋautjauvlune: Ukkuat Tâmare ajortulivoᴋ, sunaubvalo, singailerpoᴋ ajortulinermut. Juda oᴋarpoᴋ: Anitisiuk, ikitaksauvoᴋ.
25Anititaugame, sakkiminut tilikliutjivoᴋ oᴋarlune: Makkoa inuanut singaititauvunga. Illitarᴋsilerit, kia perᴋutigimangâgit, naᴋitjut una, nuvijutingalo, ajaupiarlo una.
26Judablo illitarivait oᴋarlunelo: Idluarnersauvoᴋ uvamnit, tunilaunginapko ernimnut Sêlamut. Kingornganele uviniᴋatigijungnairpâ.
27Ernisulermat, sunaubva, maggoliaksangnik illumioᴋarpok.
28Erningmalle, aipangata aggârsungit saᴋᴋerput. Tagva ernisuksêjoᴋ ivaluksamik aupaluktamik tigusivlune aggangillo nappersivlune oᴋarpoᴋ: Tâmna sivorliovlune anivoᴋ.
29Agganele uttertingmagit kingumut, sunaubva ᴋatangutinga anivoᴋ; oᴋarpoᴋ tagva: Sôᴋ pivlutit taimak angitigijomik aliksivêt? Tâmna Pêresemik atserarpât.
30Kingorngane ᴋatangutinga anivoᴋ, ivaluksamik aupaluktamik tallermiutalik. Tâmna Sêramik atserarpât.
Currently Selected:
Genesis 38: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
