Lukase 19
19
Pimaklertemik Zaᴋêusemik. Adsiujomik kenaujamik pimaklerutaujunik. Jêsusib iterninganik Jerusalemut. Nelautaininginik. Tempelib sujungaititauninganik.
1Iteriartorlarmelo, Jeriᴋolo apᴋotigivâ.
2Ahâglo, anguteᴋalaukpok tagvane Zaᴋêusemik atilingmik; tâmna angajoᴋaujok pimaklertunut akluitôvlunelo.
3Jêsuselo takojomadlarpâ, kinaungmangât, inungnullo sapperpok, mikigame.
4Sivorliovlunelo aᴋpangerpok, napârtomullo Mulbêreliksamut majoarpok, takojomavlugo, tamanna apᴋotiksaringmago.
5Jêsusiblo tagvunga pigame, ᴋongmut ârlorlune takovâ oᴋautilâllo: Zaᴋêuse, akᴋarsârit; uvlome tujormiovigijaksarigapkit.
6Tagva akᴋarsârpok ᴋuviasuklunelo ilaliorpâ.
7Ilûnatiglo tamanna takogamitsuk, avamudlarput, angumut idluitulijomut tujormiojartormat.
8Zaᴋêusible Nâlegak tikipâ oᴋautilâllo: Nâlegak, ahâk, perᴋutikka maggoilivlugit, aipangit tunivakka aklujunut, uivêrijaujoᴋarpallo uvamnut, sitamairtorpakka utertilugit.
9Jêsusible oᴋautivâ: Uvlome iglomioᴋatigêt ukkoa piulijiksarsivut, angut una Abrahab erneringmagotauk.
10Inûb Erninga tikisimangmat, tammarsimajut ᴋeneriartorlugit piulijartorlugillo.
11Nâlengmatsuglo, amalo adsiujomik oᴋautivait, Jerusalemut ᴋaglilerame, Gûdiblo nâlegauvia tuavidlune sakᴋerniarasugingmatsuk.
12Oᴋarporlo: Atanek nunamut ungasiktomêtomut aularpok, ataniovingmik pijartorlune, kingorngagullo uteromangmilune.
13Kivganele tallimaujortut ᴋaiᴋovait, tunitjivigilaitalo kênaujanik tallimaujortunik, oᴋautivaillo: Niorvgotigisigik tikerᴋârtinanga.
14Inuᴋatingitale ômigigamitsuk, oᴋautjaugartorᴋovât: tâmna atanioterᴋongilavut uvaptingnut.
15Utermigamelo, ataniovik pilauramiuk, kivgane ipkoa ᴋaiᴋovait, kênaujanik tunitsivigijane, tussaromavlune atunit niorvgutigilauktangita pijanginik.
16Sivorlek tagva sakᴋerpok oᴋarlunelo: Atanek, kênaujarnut kênaujaᴋsilaukpunga tallimaujortunik.
17Oᴋautivâlo: Kivgartorloriktotit, ikitunik nertornardlutit atulauravit; iglugasaktalingnut tallimaujortunut ataniotitsomavagit.
18Aipangatauk sakᴋerivok oᴋarlune: Atanek kênaujarnut kênaujaᴋsilaukpunga tallimanik.
19Tâmnatauk oᴋautivâ: Igvittauk ataniojuksauvotit iglugasaktalingnut tallimanut.
20Pingajuaglo sakᴋerame, oᴋarpok: Atanek ahâk tagga kênaujaᴋotit, torᴋorsimajok kakkigumut.
21Erᴋsigiluarapkit, angutauseravit; ililaungitatit tiguvatit, katitidlalaitalo karngasulaungitatit.
22Oᴋautivâ: Kivgâlôjotit, oᴋausernit erᴋartorpagit. Angutausertunga ᴋaujimalauramga ililaungitakka tigugapkit, karngasulaungitakkalo katitikapkit:
23Sôk kênaujaᴋutiga kênaugarniarvingmut pitingipiûk? Tikikumalo, ᴋaiᴋonajalauktara ilaᴋartilugo.
24Tagva najortine oᴋautivait: Omangat kênaujak aᴋsârnigarisiuk tunilugolo tallimaujortunik kênaujalingmut.
25Oᴋautivâllo: Atanek, tâmna tallimaujortunik kênaujaᴋalerêrpok.
26Oᴋaupapsele: Peᴋartok sumik tunitjivioniarmat; peᴋangitorle aᴋsârtauniarpok pinganik.
27Ipkoale uvamnut akkerartortut, uvamnullo ataniotiviojomangitut ᴋaisigik toᴋosigiglo sakᴋamne.
28Taimâk oᴋarame, aularpok, takpaunga Jerusalemut ailerlune.
29Betfâgemullo Betâniamullo ᴋaglilerame, ᴋakᴋamut orᴋsoktalingmut tikilune, maggûngnik ilinniartiminit tiliklerpok,
30Oᴋarlunelo: Aileritik iglugasangnut neliptingnêtunut; iteruptiglo, noggak pituksimajok nenilârpatik; ᴋânganut sulle inungmik ingitoᴋalaungitok. Pitûdjârlugo ᴋaitikko.
31Aperijauguptiglo, sôk pitûdjârmangâptikko, imâk kiogitik: Nâlekab atoromangmago.
32Tilijaujuglo aivuk, sorlolo oᴋautingmagik naipipâk.
33Noggarmigle pitûdjârsitilugik, inungita oᴋautivakit: Sôk noggak pitûdjârpitikô?
34Kiovaille oᴋautivlugit: Nâlekab atoromangmago.
35Apâk tagva Jêsusemut, annorâtiglo noggaub ᴋemerdloanut ilivlugit, Jêsuselo ᴋânganut ingitipât.
36Ingergatilugolo annorâtik isivilerpait apᴋomut.
37Kaglilermallo, ᴋakᴋamit orᴋsoktalingmit atersâlermat, ilinniartingita ilûnatik ᴋuviasuvaksoadlarlutik nipperᴋortovlutiglo Gûde nakoridlarpât, tatamnadlartut tamaita takojatik pivlugit.
38Oᴋarlutiglo: Nertortaule tikitok, atanersoak Nâlekab atingane! Ullapirsauteᴋarle ᴋilangme, Nakudlartoᴋarle ᴋotsingnerme!
39Farisêerillo ilangita ilaungmijut oᴋautivât: Ajoᴋertuijok, ilinniartitit inertikit!
40Kiovlune oᴋautivait: Oᴋaupapse, ukkua nipangerpatta, tagva ujarᴋat niplerniarput.
41Iglugasaksoarnullo ᴋaglilerame, takunârpait ᴋugviorutigilaitalo.
42Oᴋarporlo: ᴋanoktôk ᴋaujimagupse ilipseluatsiak, naliunerme tamattomane ulapirᴋsartauniksapsingnut ilingajunik! Mânale ijipsingnut ijersimavok.
43Naliutuksamut tikitaujomârapse, akkerartortipse ilujomârpâse avatipsigut, ᴋitorngaselo illaliudlugit, illuluse anerᴋonase; nanêᴋupselo ilûnâne kappiasuktitsomârpâse,
44Nungutsomârpâselo, (igluselo) ujarᴋangnik maggûngniglônêt ᴋallerêktoᴋarungnairomârput, piulijiksapse naliuninga kamagilaunginapsiuk.
45Katimaviksoarmullo iterpok, pisiniartullo niuverniartullo ᴋamanêtut anitilerpait.
46Oᴋautivaillo: Aglaksimavok: igluga tuksiarviovok; ilipsele inuarviotilaukpase.
47Uvlullo tamaita katimaviksoarme ajoᴋertuivok. Ajoᴋertuijoksuille, aglangniglo ilisimajut, inuillo angajoᴋângit pinasuarput toᴋotsomavlugo.
48Nagvârnagolo ᴋanok ilijarianga, inuit ilûnatik ungagidlalâllo tussaromadlarmatsuk.
Currently Selected:
Lukase 19: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
