Temel kerra ma 15

Koteya ge ga̰l ge Ursalima go

1Naa a̰me ma mbo ne Yahudiya ya Antiyokus go, a ka hate ná vya ma go: «Kadɗa aŋ vyan ba̰y ya eya ge Musa ne pal to, aŋ ne pool ɓol máya to.» 2Swaga mbe go Bulus ma ne Barnabas gage nama, gool ɗage nama buwal zi ge be to, a det ya za̰ ta go Bulus ma ne Barnabas poseya ne ná vya a̰me ma mbo ɓol naa ge temeya ma ne naa ga̰l ma ge Ursalima ya. 3Ɓase ge Dok ne ma e nama viya̰ go. Swaga mborra ge nama ne go, ne jo̰ a kale Fenisi ma ne Samariya go, a ka wan nama hon fareba ge pehir ge ɗogle ma ne pe, nama fare mbe ka e ná vya ma ke laar saal ge be to. 4Swaga ge a ne dé ya Ursalima go, ɓase ge Dok ne ma ɓanna ne naa ge temeya ma ne naa ga̰l ma ame nama ne laar saal. A wan nama kaŋ ge Dok ne ke ne bama pe ma mwaɗak.

5Amma naa a̰me ma ge a ne ame hateya ge Farisi ma ne, ge a ne ho̰ fareba ma, a ɗage digi, a jan go: «A kwaɗa ge a vyan pehir ge ɗogle ge a ne ho̰ fareba mbe ma ba̰y, a ho̰ nama wak go nama koy eya ge Musa ne me.» 6Naa ge temeya ma ne naa ga̰l ma kote ne fare mbe pe. 7Ne jo̰ a ɗaŋgre ta fare mbe pal kaal ɗe, Bitrus ɗage digi, jan nama go: «Ná vya ma, aŋ da ne kwarra go, dam ge zḛ ge ma zi ya, Dok tá mbi ne aŋ buwal zi go, mbi mbo waage fare ge kwaɗa pehir ge ɗogle ma ta, nama za̰, nama dé ya hon fareba. 8Dok, na ge ne kwa naa dulwak, ŋgay go na ame nama ame, ho̰ nama O̰yom ge mbegeya no, dimma ne na ne ho̰ nee go no me. 9Be vare nee ne nama to, ne jo̰ há nama dulwak yaɗat ne nama ne ho̰ fareba pe. 10Se no ɗe, aŋ te kugi Dok gyana, aŋ ba ka ɓyare go aŋ é dṵṵl ge nee bá ma, ko nee sḛ ma ne mbya ge in na to ge naa ge ame hateya ma pal ɗaa? 11Amma nee da ne hon fareba go nee ɓo máya da ne kwa a̰se ge Bageyal Jeso ne ta, dimma ne nama sḛ ma go me.»

12Ɓase ma pet a zane kirip, a ga za̰ Barnabas ma ne Bulus wan kaŋ ŋgayya ma ne kaŋ ajab ma ge Dok ne ke ne bama ta pehir ge ɗogle ma buwal zi ma pe. 13Swaga ge a ne á fare pe wanna, Yakub her fare, jan go: «Ná vya ma, za̰ me mbi gale! 14Siman wa̰ nee pe gyana ge Dok ne é pe tal naa a̰me ma ne pehir ge ɗogle ma buwal zi, mbege nama ne na dḭl pe no. 15Fare mbe ma no a mbo dagre ne fare janna ge anabi ma ne, ago a njaŋge go:

16‹Go̰r go, mbi mbo gwan’a,

mbi mbo gwan sin yàl ge Dawda ne ge ne gu se digi,

mbi gwan sin na swaga ge gubul ma digi,

mbi mbo ɗage ne na digi#Amo 9:11-12..

17go no, pehir ge ɗogle ma pet

a mbo ɓyare Bageyal pe,

pehir ge mbi ne mbege nama ne mbi pe ma pet.

No a fare ge Bageyal ne jya̰ ne,

18na ge ne e na kwarra ne zaŋgal ya day ne.›

19Ne da pe no, mbi dwat go, a e dṵṵl ge pehir ge ɗogle ma ge a ne saŋge ta ya Dok ta ma pal to. 20Amma njaŋge me nee nama maktub go, nama za kaŋ ge a ne tyare nama hon kaŋ sḭḭm ma to, nama abe ta uzi ne kaya go#15:20 Ne swaga no go, a jan da ne kaya ge sḭḭm ne, pehir ge ɗogle ma ka mbo fi ne ta zok ge bama sḭḭm ma ne zi ndwara ŋgay go bama uware bama dok., nama za kaŋ ge ne su wak tumul ma to, ko swama to me#Wat 34:15-16, Lev 17:10-16, Lev 18:6-23.. 21Ago ne zaŋgal day, Musa e naa ge jan fare ge Dok ne ma ge suwal ge daage go, a isi fare mbe ma no ya Sinagog ma zi dam ɗigliya ma go ɗaɗak.»

Maktub ge a ne njaŋge na hon pehir ge ɗogle ma

22Swaga mbe go, naa ge temeya ma, ne naa ga̰l ma poseya ne ɓase ge Dok ne ma mwaɗak, a za̰ ta go na ke ya kwaɗa bama naa a̰me ne bama buwal zi suwal Antiyokus poseya ne Bulus ma ne Barnabas. A teme Yuda na ge a ne tol na Barsabbas ma ne Silas, naa ga̰l ge ne ná vya ma ndwara zḛ ma. 23A hon nama maktub mbe no nama tok go: «Aŋ ná vya naa ge temeya ma poseya ne naa ga̰l ma, a sa̰ aŋ ná vya ge pehir ge ɗogle ma wak, aŋ ge ne suwal Antiyokus go ma, ne suwal Siriya go ma, ne suwal Silisiya go ma pet. 24I za̰ go naa a̰me ma ɗage ne i ta go be ge i hon nama wak to, a mbo iigi, ne da̰a̰me aŋ no ne bama fare janna ma. 25Da ne pe no, i za̰ ta no go, na ke ya kwaɗa, i tá naa a̰me ma, i ba teme nama ya poseya ne i ná vya ge laar wanna Barnabas ma ne Bulus, 26a naa ge a ne ho̰ ta ne dḭl ge nee Bageyal Jeso Kris ne pe ma ne. 27I teme aŋ ya Yuda ma ne Silas, nama mbo wan aŋ fare mbe ma pe ne bama wak zi. 28Ago O̰yom ge mbegeya ne i sḛ ma me, i dwa go na ke ya kwaɗa i pool nege aŋ ne dṵṵl a̰me to, na ka kaŋ ge mbya kerra ma no ɗeŋgo: 29Aŋ za kaŋ ge a ne tyare nama hon kaŋ sḭḭm ma to, ko swama, ko kavaar ge ne su wak tumul, aŋ abe ta uzi ne kaya go me. Abe me ta uzi ne kaŋ mbe ma no ta. Ká me halas!»

30A ya̰ ɓase ma, a mbo suwal Antiyokus ya, a kote ɓase ma ya se, a hon nama maktub mbe. 31Swaga ge a ne isi na, a ke laar saal ne moɗegeya ge maktub mbe ne ho̰ pe. 32Yuda ma ne Silas, ne jo̰ nama sḛ ma anabi ma ne ɗe, a moɗege ná vya ma ne fare janna ma gḛ, a hon nama pool. 33Swaga ge a ne nama ne ka dam ma swak, a e nama viya̰ go, a teme nama ne wak sanna ma mbo hon naa ge a ne teme nama ya ma. [34Go no puy ɗe, Silas vin tene go na gá gale da ne nama.]#15:34 Swaga mbe no ne maktub ge zaŋgal a̰me ma zi to. 35Bulus ma ne Barnabas ga Antiyokus go. Poseya ne naa gḛ, a ka hateya, ne oy fare ge kwaɗa ge Bageyal ne.

Caɗeya ge Bulus ma ne Barnabas

36Dam ma kwaɗa lwak go̰r go, Bulus jan Barnabas go: «Gwa̰ nee luwaɗe ná vya ma ta ge suwal ge daage ge nee ne waage fare ge Bageyal ne ma go, nee ba kwa go nama ke ya gyana de.» 37Barnabas ka ɓyare go na wan Yohanna, na ge a ne tol na Markus bama pe go. 38Amma Bulus vin go bama wa̰ na bama pe go to, ne da pe na ya̰ bama Pamfili ya, na be ke temel dagre ne bama to. 39Nama gage mbe waɗe gḛ ge e nama ɗiŋ a caɗe ta se. Barnabas wan Markus, a ne na her fak mbo Chipre, 40Bulus wan Silas, a ne na mbo, ná vya ma deŋge nama kwa a̰se ge Bageyal ne zi. 41A kale suwal Siriya ma ne Silisiya, a ka sirsi ɓase ge Dok ne ma hon fareba zi.

Currently Selected:

Temel kerra ma 15: FGN2013

Highlight

Copy