Temel kerra ma 17
17
Bulus ma ne Silas suwal Tesalonika go
1Swaga ge a ne mbo Amfipolis, a kale mbo Apolloniya, a det ya Tesalonika go. Sinagog ge Yuda ma ne ka suwal mbe diŋ. 2Hada ge na ne zi, Bulus mbo ɓol nama. Ɗiŋ dam ɗigliya ma ataa a ne nama ka ɗaŋgre ta fare ge njaŋgeya ma pal. 3Ka wan nama fare pe, ne ŋgay nama go Kris mbya njot yál, ne tan naa ge siya ma buwal zi digi. Ka jan nama go: «Jeso ge mbi ne waage aŋ na mbe no, ka jan go na Kris ne.» 4Naa a̰me ma ne Yuda ma buwal zi ge fare mbe ne wa nama dulwak zi ma, a mbo Bulus ma ne Silas pe go, ne Grek ma naa ge ne sya Dok vo ma gḛ, ɓanna ne naa zaab a̰me ma ge tok pool ma me. 5Amma Yuda ma, yil hun nama siya, a abe naa a̰me ma ge bernde ma ne viya̰ go, a kote naa gḛ gḛ, a ɗage giwli suwal. A mbo Jason diŋ ya mbo ɓyare Bulus ma ne Silas pe, ndwara gene nama ɓase ma ndwara se ya. 6Amma a ɓol nama to, a zwal Jason ma ne ná vya a̰me ma ya naa ga̰l ge suwal ne ma ndwara se, a ka oyya go: «Naa mbe ma iigi dunya ya digi gilu, a det ja ɗiŋ go go. 7Jason ame nama na diŋ. A pili ta ne eya ge Kaysar ne ma, a jan go gan ge ɗogle ya go, na Jeso.» 8Nama fare janna mbe ma iigi ɓase ma, ne naa ga̰l ge suwal ne ma me. 9A e Jason ma ne naa ge may ma pot bware gḛ ɓya a ba ɗage kan nama digi.
Bulus ma ne Silas ge suwal Bere go
10Swaga ge swaga ne ke se ɗaal, ná vya ma é Bulus ma ne Silas mbo suwal Beriya. Swaga ge a ne dé ya suwal diŋ, a mbo wat Sinagog ge Yuda ma ne zi. 11Nama mbe ma no a ka da ne haŋgal ge kwaɗa waɗe naa ge Tesalonika ma. A ame fare ge Dok ne ne sḛ fafa̰y. Dam ne dam a ka hale njaŋgeya ma pe, ndwara kwa pe go nama go mbe tem ɓa de. 12Naa gḛ ne nama buwal zi a hon fareba, poseya ne Grek ma zaab ge tok pool ma, ne naa sonmo ma gḛ ge be to. 13Swaga ge Yuda ge ne Tesalonika go ma ne za̰ go Bulus waage fare ge Dok ne ya Beriya ya me, a mbo ya ndwara é ɓase ma iigi digi. 14Swaga mbe go no ná vya ma ɗame Bulus mbo maŋgaɗam ga̰l yuwam wak se ya. Amma Silas ma ne Timotawus gá se. 15Naa ge ne ɗame Bulus ma a ne nama mbo ɗiŋ suwal Atena ya. A gwan’a ne wak honna ge Bulus ne go, Silas ma ne Timotawus mbo ɓol na suwal Atena ya avun cap.
Bulus suwal Atena go
16Ne jo̰ go Bulus ka da̰re nama suwal Atena go, swaga ge ne kwa kaŋ sḭḭm baŋneya bindik suwal mbe diŋ na laar vḛne ge be to. 17Ka mbo wan Yuda ma ne pehir ge ɗogle ge ne sya Dok vo ma fare pe ge Sinagog zi, dam ne dam ka mbo ɓol naa ge tandal ge suwal ne go. 18Naa ge ne ɓyare zwama pe ge Epikur#17:18 Epikur: a ndu ge ne ka ɓyare zwama pe ne, na hateya go kaŋ ma ke ta da ne bama tok hini, a be kaŋ a̰me ke nama ne to. naa ma, ne Estoykos#17:18 Estoykos: a naa ge ɓyare zwama pe ma ne me, nama hateya go zwama a kwa eya ge dunya ne ma, katɗa kwaɗa dunya zi mbo da ne pool ge mo ne ta. naa ma me a ka kat swaga mbe go, a ne nama ka wan ta fare ma pe. Naa a̰me ka jan go: «Bage ɗeɗe fare mbe no wan ma fare pe ɗaa?» A̰me ma ka jan go: «Wan fare ge dok ge ɗogle ma ne.» Ago Bulus ka wan fare ge Jeso ne ma ne tanna pe. 19A wan na, a gene na ya swaga koteya Areyopagus#17:19 Areyopagus: A swaga koteya ge naa ga̰l ge suwal ne ma ne ɓol ta na go. A njal pala ge sore busur pala digi. Swaga mbe gá swaga ɓol ta ge ɓase ma ne ne za̰ fare ge giya̰l ma pe. go, a jan na go: «Gale wa̰ i hateya ge giya̰l ge mo ne jan na fare mbe no pe gale. 20Ago mo wan i ne go fare ge giya̰l ma pe. I ɓyare go mo wa̰ i na pe zum kwaɗa, i ba kwa na.» 21Ago naa ge suwal Atena ne ma pet, poseya ne gwasal ge ne mbo ya suwal mbe diŋ ma ka mbo kat swaga mbe go za̰ fare ge giya̰l ma ne wan fare ge giya̰l ma pe.
22Bulus mḛ digi Areyopagus tuŋsi go ɗar, jan go: «Naa ge suwal Atena ma, mbi kwa go, kaŋ ma zi pet, aŋ hon dok ma hormo gḛ ge be ɗo to. 23Swaga ge mbi ka anna aŋ suwal diŋ mbi ka kwa aŋ kaŋ sḭḭm ma, a be no ɗeŋgo to, mbi aŋ twal tuwaleya a̰me ge aŋ ne njaŋge na ta go: ‹Ne dok ge ndu ne wan na pe to pe.› Kaŋ ge aŋ ne uware na be ge wan na pe to mbe, a na ge mbi ne mbo ya waage aŋ na. 24Dok ge ne dó dunya ne kaŋ ge ne na pul zi ma pet, na sḛ ya digi ma ne suwar pal, kat ge zok ge naa dasana ma ne sḭ na ne bama tok zi zi to. 25Na̰ sḛ ɓyare go naa dasana ma ke na temel dimma ne na ne ɓyare a̰me ne nama ta go to, a na sḛ hon kaŋ ma pet ndwara ne, ne o̰yom, ne kaŋ ge daage ne pet me. 26Da ne ndu ɗu ta ke pehir ma no pet, e nama ne suwar pal no pet, e swaga ma, ne dam ma, ne nama suwal warbe ma no, 27ne da pe nama ɓyare na pe, kadɗa day ya, nama ba ɓol na, ko tandaŋgeya zi. Amma na sḛ be kaal ne nee to. 28Ago da ne na ta nee ka ne ndwara no, nee mwase ta no, ne ka ne go no. A na no ge aŋ naa ge mbal fare sḭ ma ne jan: ‹I na hir ma ne me.› 29Ne jo̰ nee na hir ma ne ɗe, nee ne pool dwat go Dok dimma ne dinar, ko ne fool kaal, ko ne njal ge naa ge kwa na cerra ma ne ce na ɗalla ne dwatɗa ge bama ne zi go to. 30Be ge dwat ge dam ma ge kwarra to ma zi pal to, Dok waage naa dasana ma ma̰ no pet, ge swaga ge daage go pet go, nama hase. 31Ne da pe e dam a̰me ya go ɗu ge na ba kun sarya dunya pal pet dosol zi, ne ndu ge na ne tá na ta. Ago tanna ge ne ta̰ na ne naa ge siya ma buwal zi digi, ŋgay naa pet go na bage kun sarya mbe ne.»
32Swaga ge a ne za̰ fare tanna ge siya ma ɗe, a̰me ma ka ke kalam, a̰me ma jan na go: «I mbo gwan za̰ mo fare mbe ma dam ge ɗogle go.» 33Go mbe no, Bulus wat ne nama buwal zi ya zum. 34Naa a̰me ma a mbarge ta ne na, a hon fareba. Nama buwal zi, ka Denis, ndu a̰me ne naa ga̰l ge suwal ne ma buwal zi, ne ndu gwale a̰me ge a ne tol na Damaris, ne naa ge ɗogle ma me.
Currently Selected:
Temel kerra ma 17: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
